Gàletìyà 1:4 - Mokpwe: Bakwery (New Testament)

⁴ Ò lì arza nanù ema i rzolowahwa ò lì gbeyà wòhwe ò ene rze yà yawono, Yerzù Krirztò à mà aŋgbɛ mɔ̀ ŋmìti ò lì jò ŋwèeyà ò wòhwe wò arzu. À mà gbeyà ndi nanù èhwanja nanù ndi Lohwɛ̀ è Tatɛ̀ yà arzu è mà tɛ̀yirzɛ.

Gàletìyà 1:4 Mawu Ofanana

Matiyò 13:22

Ìhvɔ̀ŋgɔ̀ hvɛ ema ì undi ò tenì ya wàŋga ya hwènyɛ̀ŋgɛnyɛ̀ŋgɛ̀, ì hwèlì ndi nàa hwatò ema hwa hweyi ŋmɛ̀ndì mò ama Lohwɛ̀, ndi mètàkà me lòŋgɛ na jɔ̀ɔ̀njì ja mònàmɛ̀ mò ene rze hwe lìŋga mèèmà me awu. Ema me ma hwa gbeyɛ ema naŋgɛ rzɔ hwa rza tànɛyi lì ŋya hwèhvùma hwe gbamù.

Matiyò 20:28

nyàyi hvɔ̀kɔ hvɛ mɛnɛ nàa è Ŋmanà wà è Mòtò wà Hwènàmà a rzìi jɛ̀ɛ̀ ema hwatò hwa mò gbèeyà, ndi mɔ̀ à jelì ò lì gbèeyà hwatò, na ò lì ŋgba lòŋgɛ la eni nàa tùŋge ò lì kɔ̀tɔ̀ rzayì-rzayì ja hwatò.”

Matiyò 26:28

Yerzù rzìi à hwa òhweyà nanù ema, “Màyìjà mà ami manù ema mà kòmèlì ò mèyòhvò mè rzayì-rzayì ja hwatò. Manù màyija mà hwèlì ndi màyija mà hweyi hvènya, nanù ema Lohwɛ̀ à hwa làkìrzɛ̀ wòhwe wò awu.

Matiyò 26:42

Yerzù a tìmba hvɛ ò lì kanɛ̀ rzìi a òhwa nanù ema, “Ìi Tatà wa ami, e hwèlì tɛ ema ò rza tanɛ lì nò wòwàna mònò muna mò mòtàkà ema na rzi mò hwanɛ inyɛ lì emeyà lì aŋgɔ̀ lì gbèyɛ̀nɛ.”

Matiyò 6:9

O èŋgànɛ̀lɛ̀ rzɔ nanù ndi inyɔ è hwɛnì lì kanɛ̀, Lohwɛ̀, Tatɛ̀ wà arzu ema ò hwèlì ò ŋmanyu, èluhwe è hwɛ nà lìinà là aŋgɔ̀.

Makòrzì 10:45

Èhwanja tɔ̀ è Ŋmanà wà è Mòtò wà Hwènàmà a rzi je ndi ema hwa mò gbèeyà. A jelì ndi ò lì hwɛ è mògbèèlì wa hwatò hwa arzɛ. Nà ò lì ŋgba lòŋgɛ la eni ò lì kɔ̀tɔ̀ rzayì-rzayì ja hwatò.”

Lukàrzɛ̀ 22:19

Rzìi à wòwa èhvòòtò, a ŋgbà Lohwɛ̀ jekà, à è kàhwà. Rzìi à è ŋgba hwà-òkòwèlì hwa eni, a òhwa nanù ema, “È nyò ya amì ene ema, yè è ŋgbààhwì. È gbèyè nanù ò lì nò ɔ̀ŋgɛlɛ.”

Lukàrzɛ̀ 22:42

“Ìi Tatɛ̀, ò lìŋgànì tɛ, ò nò ulɛ̀lɛ̀ mònò mòtàkà mò ŋginyà. Ndi rzèkɛtɛ ò hwèlìŋgànèlì hwe amì, ndi ò hwèlìŋgànèlì hwe aŋgɔ̀.”

Yòwanìrzɛ̀ 10:11

“Imba ndi nà hwèlì e mɔ̀ɔŋgèlì wà gbamù wà mɛ̀lɛ̀ŋgù. È mɔ̀ɔ̀ŋgèlì wà gbamù wà mɛ̀lɛ̀ŋgù à wòŋgìrzɛ̀nɛ̀yi ò lì ŋwèeyà mɛ̀lɛ̀ŋgù ma eni.

Yòwanìrzɛ̀ 12:31

O nàŋgɛ nanù e hvònda ene ema Lohwɛ̀ a kàyìrzɛ ene rze. Nàŋgɛ nanù e mòkànèlì wà ene rze a hweni lì kàyìrzɛ̀hwɛ.

Yòwanìrzɛ̀ 5:30

“Nà rza tànɛ̀yi lì gbeyà eyà na è wònjà yà amì, na kàyìrzɛ̀ ndi na òma e Rzàŋgò a nò òhwèlì, ò èŋgànɛ̀lɛ̀ hwèkàyìrzèlèlì hwe tɛmi ehve-ehve, èhwanja na rza kàyìrzɛ̀ ndi na òma imba na arza, ndi na kàyìrzɛ̀ ndi na òma e mɔ̀ e ma a nò òmi a arza.

Yòwanìrzɛ̀ 6:38

Èhwanja na rza uhwɛlɛlɛ ò ŋmanyu yà lohwà ò lì jà lì gbeyà hweyà na òma na lìŋgàni. Nà jelì ndi ò lì gbeyà na òma Tatɛ̀ wa ami ema a nò òmi a àrzeyà.

Ròmànì 1:7

Ò èŋgànɛ̀lɛ̀ rzɔ, nà è tìlèlì inyɔ hwa arzɛ ema è hwèlì ò èkòmè ya Ròmànì. È hwèlì ndi hwatò ema Lohwɛ̀ à lìŋgàni ndèŋgànɛ̀lɛ̀ à mà è hvɔ̀rzɔ̀ ò lì hwɛ hwatò wà eni. Inyɛ̀ è ndèli nà ɛ̀yɔ̀lɛ̀ ema hwe uwɛ̀lɛ̀lɛ̀yi òma Lohwɛ̀ è Tatɛ̀ yà arzu, nà è Rzàŋgò Yerzù Krirztò è hwɛ nà inyɔ.

Ròmànì 12:2

È rzi keka lì òŋgama hwɛ̀ɛ̀mɛ̀ hwe hwatò hwa ene rze ya mɔ̀nyɛ̀, ndi e hwɛmɛ Lohwɛ̀ a tikòwe mèèmà me anyu, aŋga nanù e luwa mèèmà me hvènya. Èŋge ye e gbeyà e rzɔ̀ŋgìtɛ̀nɛ̀ na ò lì òŋgama hweyà na òma Lohwɛ̀ a àrzeyà. Inyɔ e hwi gbamù hweyà ema Lohwɛ̀ a lìŋgàni ndèŋgànà e òŋgama hweyà ema hwe hvòmɛ̀nɛ̀yi.

Ròmànì 4:25

O nyòla wòhwe wò arzu ɔ̀ndeŋgàtɛ̀ Lohwɛ̀ à mà ŋgba Krirztò ema a jò ŋwèeyà. A ma hvùmùlɛhwɛ ò kpelì, aŋga nanù a jò tɛmìrzɛ ehve-ehve na Lohwɛ̀.

Ròmànì 8:27

Lohwɛ̀ ema a ɛnɛ e tenì ya mèèmà me arzu, ndèŋgàna hvɛ a hwi màlùtèyà ma Èlìŋgɛ̀ èhwanja Èlìŋgɛ̀ e hwèlì e kanɛ̀lɛ̀lɛ̀ mèèmà me hwatò nyayi ema Lohwɛ̀ a àrzeyà.

Ròmànì 8:3

È mbenda e rzi tanɛ lì kulɛ wòhwe èhwanja e mòtò wa hwènàmà a rzi hwɛnɛ e ŋginyà ya lì e òŋgama. O èŋgànɛ̀lɛ̀ Lohwɛ̀ à mà gbeyà eyà ema e mbenda e rzi tanɛ lì gbeyà. A ma òma è Ŋmanà wà eni na e nyò ya e mòtò wa hwènàmà ema e gbeyà wòhwe, ò lì lìmìrzɛ̀ e ŋginyà ya wòhwe. Nà òma Lohwɛ̀ à mà gbeye nanù e ma kulɛ e ŋginyà ya wòhwe ò tenì ya e mòtò wa hwènàmà.

Ròmànì 8:32

Jàyɛ̀, na òma Lohwɛ̀ a rzi utɛ tɔ̀ Ŋmanà wa eni. A ma mò wòwa rzìi a mò ŋgbà ema a jò ŋwèeyà. Èŋge ŋgàna e hwèlì ndi nanù ema mɔ̀ à rza ò jò ŋgba hvɛ tɔ̀ mamɛ ema i mò ijòwi e?

1 Kɔ̀rintìyà 15:3

Nà ma e ohweyà Ŋmɛ̀ndì mò Gbamù ema nà mà luwe ndèŋgàna mo hwèlì wòlìtò. Mòŋgo ŋmɛ̀ndì mò hwèlì ndi ema, Krirztò à mà jo ŋwèeyà o wòhwe wò arzu, na oma e tìlahwì o kààtì ya ama Lohwà.

2 Kɔ̀rintìyà 4:4

Mòkarzɛ̀, e mòkànèlì wa ene rze mɔ̀ ndi à kànèyà màlùtèyà ma hwatò ema hwa rza lòkɛ̀yì Krirztò. Wɔ̀ hwa rza tànɛyi lì rzɔ̀ŋgìtɛ̀nɛ̀ nanù ema ŋmɛ̀ndì mò gbamù e uŋmɛ̀lɛ̀ nɛ Krirztò a hwɛni wòlìto. Krirztò mɔ̀ ŋmìti a hwèlì ndi nàa Lohwɛ̀.

Gàletìyà 2:20

Nà oma Yerzù à mà ŋwèeyà o mbarza, e hwèlì ndi ema imbahvɛ nà mà ŋwa. Nà rza enje lòŋgɛ hvɛ. Krirztò ndi à hwèlì o tenì ya ami. O eŋgànɛ̀lɛ̀ rzɔ tɔ̀ ima lìtumba la eyà ema na gbèeyà o rze ya mɔ̀nyɛ̀ nàŋgɛ, na e gbèeyà ndi èhwanja o lìlòkɛ̀ ema na ohvani è Ŋmanà wà ama Lohwɛ̀ ema a no lìŋgàni rzii a ŋwa o nyòla ami.

Gàletìyà 6:14

Ndi o imba na o ayèkirzɛ̀ ndi, lì ayèkirzɛ̀ la ami lì hwèlì ndi e kpelì ema e Rzàŋgo ya arzu Yerzù Krirztò e ŋwɛlɛlɛ o mbàrza o nyòla arzu. È kpelì ya eni e ma no gbeyà ema hweyà hwe ene rze hwe rza enje tɔ̀ eyà o mirzɔ̀ ma ami. Ndeŋgànɛ̀lɛ̀ na rza ohvi tɔ̀ eyà o lì gbeyàna ene rze.

Ɛ̀hvìrzìyà 1:11

Nà oma ì hwèlì mɔ̀kɔ nà Krirztò ɔ̀ndeŋgàtɛ̀ Lohwɛ̀ à mà jò hvɔ̀rzɔ̀ ò lì hwɛ̀ɛ̀ è hwa eni hwatò. À mà gbeyà ndi nanù èhwanja nanù ndi mɔ̀ à mà tɛ̀yirzɛ̀ nà è kòòhwà. À gbèyi hweyà hwe arzɛ ò lì gbèyɛ̀nɛ nà oma à mà hwe tɛ̀yirzɛ̀.

Ɛ̀hvìrzìyà 2:2

Ò eŋge hvonda è mà nɔ̀ŋgɔ̀ hweyà hwe wòhwe hwe hwatò hwa ene rze. È mà hwɛ lì hweyàna è mòkànèlì ema à kànèyà hwèlìŋgɛ̀ hwe wòhwe ema hwe hwèlì ò yululì. Nàtɛ̀ɛ nà yàwònò, eŋge èlìŋgɛ̀ è hwèlì è kànèyà hwatò ema hwa gbeyà mamɛ ema Lohwɛ̀ à ohwi nanù ema hwa rza gbeyà.

Ɛ̀hvìrzìyà 5:16

È gbeyàne ihveyo ja arzɛ ema e lùu o lì gbeyà gbamù, ehwànja mene mèènyà wòhwe wo àkɛ̀lɛ̀nɛ̀yì.

Ɛ̀hvìrzìyà 5:2

Inyɔ e lìŋgàne hwahvɛhvɛ hwatò, ŋgànà hvɔ̀kɔ nàa oma Krirztò a me e lìŋgàne rzìi a jo ŋwèeyà. A ma aŋgbɛ̀ɛ mɔ̀ ŋmìti o ma Lohwɛ̀ nàa làhweyà na jàhwèyà ema i ma lìŋgìrzɛ Lohwɛ̀ rzayi-rzayi.

Ɛ̀hvìrzìyà 6:12

È njuma ema jà ana è rza enje ndi yà hwatò hwa hwènàmà. Ndi irzɔ jà ànànà ndi lì teŋgɛ̀nɛ̀ iŋginyà ja wòhwe, hwàtìmbèlì hwa awu ema hwa kànèyà e rze ya jìtìtì na iŋginyà ja wòhwe ema i hwèlì o lìwòhwɛ̀ la ŋmanyu.

Hvìlipìyà 4:20

Èluhwe è hwɛ nà Lòohwà là arzu, Tatɛ̀ hwa arzu natɛ̀ɛ nà ò gbìndèyà. Inyɛ̀ wò lìya nanù.

1 Tɛ̀rzàlonìyà 1:3

Irzɔ ì kanɛ̀ tɛ Tatɛ̀ Lohwɛ̀ là arzu, jè è ɔ̀ŋgɛ̀lɛ̀nɛ̀ èwòlò ema è gbeyà ò nyòla lìlòkɛ̀ ema è hwɛni. Jò ɔ̀ŋgɛ̀lɛ̀ è ndìŋgɛ ema è hwɛ̀nèlì hwahvɛhvɛ hwatò ema è mà gbeyà inyɔ è gbeyà hweya rzayi-rzayi ò lì hwa oŋgowàna, nà oma inyɔ è ikayi mèèmà mè anyu ò hwèjèelì hwe ama è Rzàŋgo yà arzu Yerzù Krirztò. Ène eyà è gbeyà màtàŋga mà anyu mà inyàmɛ̀nɛ̀ ò rze.

1 Tɛ̀rzàlonìyà 3:11

Nà arza nanù ema Lòohwà la arzu, e Tatɛ̀, na Rzàŋgo wa arzu Yerzù Krirztò, hwa jo rzèkeyà e hveyo ò lì e jèeya hvɛ.

1 Tɛ̀rzàlonìyà 3:13

I kànɛ ndi nanù, aŋga nanù Rzàŋgo Yerzù a e ètìrzɛ̀ mèèmà me anyu aŋga nanù e rza hwɛnɛ tɔ̀ lìtɔ̀tì tɔ̀ lɔ̀kɔ la mààtòo ma wòhwe o inyo ja anyu, na lì hwɛ wòtani o worzo wo ama Lohwà la arzu na Tàtɛ, e hvonda ema Rzàŋgo ya arzu Yerzù Krirztò a o jɛ̀ɛ̀ na hwatò wa eni hwa arzɛ.

2 Tɛ̀rzàlonìyà 2:16

Inyɛ̀ Rzàŋgo wà arzu, Yerzù Krirztò mɔ̀ ŋmìti nà Lohwɛ̀, Tatɛ̀ wà arzu, mɔ̀ ema à mà jò lìŋgàna ndèŋgànɛ̀lɛ̀ ò è ndèli yà eni, à jò ètìrzɛ̀ mèèmà mè arzu nà gbèti ema wò rza kuwa, ndèŋgànɛlɛ à jò ŋgbe lìhvìtà ò hweyà hwe gbamù.

1 Tìmotì 2:6

A ma ŋgbaà lòŋgɛ la eni o lì ŋwèeyà hwatò hwa arzɛ. Èŋge kpelì ema à mà ŋwèeyà hwatò hwa arzɛ, e ma uŋmɛ̀lɛ̀ o e hvonda ya jɔ̀kɛ̀ nanù ema Lohwɛ̀ a arza nanù ema tɔ̀ ima mòtò a rzuŋgahwe.

Tàyìtùrzì 2:14

Yerzù Krirztò à mà aŋgbɛ mɔ̀ ŋmìti o lì jo kɔ̀tɔ̀ o wòhwe wo arzu wo arzɛ. A ma jo gbèeyà o lì hwɛ hwatò ema hwa hwèlì wòtani, ndèŋgànɛ̀lɛ̀ à mà jo gbeyà o lì hwɛ hwatò hwa eni mɛnɛ, ema hwa ohvi e nyɔ̀ŋgi ya lì gbeyà hweyà hwe gbamù.

Hibrù 2:5

Rzeketɛ i aŋgèlì ndi Lohwɛ̀ a rzekelì nanù ema i kànèyà e rze ya mɔ̀nyɛ̀ hvènya ema irzɔ jo ohwi nanù ema e o jà.

Hibrù 6:5

Hwanu hwatò ema hwà mà kèkɛ̀ wotɛ̀lu wo eyà ya Lohwà ndèŋgànɛ̀lɛ̀ hwà mà ɛnɛ màyìmbi ema mo o hwɛ e hvonda ema Lohwɛ̀ a o kànèyà.

Hibrù 9:14

È hwèlì tɛ ema màyija ma hwèembè ma tanɛ ma hwɛnɛ màyìmbì ma lì rzàŋgirzɛ hwatò, nanù oma màyija ma ama Yerzù ma hwɛni màyìmbì rzayi-rzayi o lì rzàŋgirzɛ hwatò. Krirztò ema a rza ohvɛ tɔ̀ wòhwe tɔ̀ wɔ̀kɔ à mà aŋgbɛ mɔ̀ ŋmìti nàa jàhwèyà o lì jo kɔ̀tɔ̀ irzɔ hwa arzɛ. A ma gbeyà ndi ene eyà nanù o lì akeyà na èlìŋgɛ̀ yà wòtani ema e hwɛ natɛ̀ɛ na o gbìndèyà. Màyìjà ma eni mɔ̀ ndi ma jo rzàŋgirzɛyi mèèmà me arzu, ema i rza gbeyà hweyà hwe wòhwe ema hwe jo jàneyà e kpelì. Ndi e àŋgàmɛ̀nɛ̀yi lì gbèeyà Lòohwà la lòŋgɛ.

Jèmìrzì 4:4

Inyɔ e hwèlì ndi nàa hwatò ema hwa hwèlì o ndawò ja màahwa ndi hwa gbeyà mòrzònje. È rza hwi nanù ema e ikayi tɛ mèèmà me anyu o hwema hwe rze, hwe e gbeyà inyɔ e jà ndi hwàkɔ̀ɔ̀yèlì hwa ama Lohwɛ̀ e? O eŋgànɛlɛ rzɔ tɔ̀ ima mòtò ema a lìŋgàni o lì ika ŋmèma mo eni o hwema hwe ene rze, à mà agbeyɛ mɔ̀ ŋmìti mɔ̀kɔ̀yèlì wa ama Lohwɛ̀.

1 Pètrò 2:24

Krirztò mɔ̀ ŋmìti à mà hwanɛ wòhwe wo arzu o e nyo ya eni o mbàrza, aŋga nanù irzɔ, i hwɛmɛ lì gbeyà hweyà hwe wòhwe, ndèŋgànɛ̀lɛ̀ o lì a ayèŋgowɛ̀ lì lìya lòŋgɛ la ehve-ehve. O lì akeyà na hwèhwàŋgù hwe eni inyɔ e ma wɔ̀wìrzɛ̀hwɛ.

1 Pètrò 3:18

Nà ohwi ene eyà nanù ehwànja Krirztò mɔ̀ hvɛ à mà taka na lì ŋwa o nyòla wòhwe wo arzu o ŋgèlì hvɔ̀kɔ o iŋgèlì ja arzɛ. A ma hwɛ ndi mòtò ema à mà hwɛ lì gbeyà hweyà ema Lohwɛ̀ a arza, ndi à mà ŋwa o nyòla hwatò hwa wòhwe. A ma gbeyà ndi nanù aŋga nanù irzɔ i uka o ma Lohwɛ̀. Hwàto hwà mà mo òŋwa ndi e nyàma nyo ya eni ya e mòtò wa hwènàmà ndi e ma ŋwa. Lohwɛ̀ à mà gbeyà èlìŋgɛ̀ ya eni o lì hwɛ lòŋgɛ.

1 Yòwanìrzɛ̀ 2:2

Krirztò ŋmìti à mà hwɛ ndi nàa jàhwèyà ema Lohwɛ̀ à mà gbeyàne o lì jo kɔ̀tɔ̀ o wòhwe ema i ma gbeye. A ma gbeyà ndi nanù aŋga nanù irzɔ i luwa lì làkìrzɛnɛ. Rzeketɛ o wòhwe wo arzu mɛnɛ ndi o wòhwe wo hwatò hwa arzɛ hwa ene rze.

1 Yòwanìrzɛ̀ 3:16

Nànù ndì ì hwìiyà mamɛ è ndìŋgɛ è hwèlì, è hwèlì ndi nanù ema Yerzù Krirztò mɔ̀ à mà ŋgba lòŋgɛ la eni o nyòla arzu. O èŋgànɛ̀lɛ̀ irzɔ hvɛ ja àŋgàmɛ̀nɛ̀yi lì ŋgba mòŋgɛ ma arzu o nyòla ya wònyànyàŋgo hwa arzu hwa Krirztò.

Hwèwulùwèlì 1:5

Yerzù Krirztò mɔ̀ hvɛ à è omelì è ndèli nà ɛ̀yɔ̀lɛ̀. Mɔ̀ ndi à hwèlì è mɔ̀ ema à ohwa è jɔ̀kɛ̀ lì hvomɛ̀nɛ Lohwɛ̀ nyayi ema ì hwi nanù ema è hwèlì è jɔ̀kɛ̀. Mɔ̀ ndi à hwèlì è mòtò wà worzo ema à lomi lì hvùmùlɛ, ndèŋgànɛ̀lɛ̀ mɔ̀ ndi à hwèlì è mòkànèlì hwa ikìŋgɛ jà ene rze. À jò lìŋgàni, ndèŋganɛlɛ mɔ̀ à mà gbeyà wòhwe wò rza jò kànèyà hvɛ nà oma mɔ̀ à jo ŋwèlɛ̀lɛ̀yì ò mèyohvo mè arzu.

Hwèwulùwèlì 5:9

Hwa mà èmba mɔ̀rzɔ̀kɔ̀ mòhvènya, nanù ema, “Ò kànɛ̀yi lì wòwa è kààti ema è lìŋgɛ̀lɛ̀hwɛ nà ò lì rzòlòwà mòjèkà mò eni, ò kànɛyi ehwànja ò mà oŋwàhwa, ndèŋgànɛ̀lɛ̀ ò mà kɔ̀tɔ̀wɔ̀ hwatò hwa ama Lohwɛ̀ nà màyija mà aŋgɔ. Ò mà gbeyà hwa mà timba ndi hwatò hwa ama Lohwɛ̀. Hwa mà uwɛ̀lɛ̀lɛ̀yi ò mahvɛhvɛ màtumba, hwa ò ohwa ihvɛhvɛ mbɔrzi, hwa uwɛ̀lɛ̀lɛ̀yi ò hwehvɛhvɛ hwèkòmè, ndèŋgànɛ̀lɛ̀ hwa hwèlì inyayi jà hwatò hwa arzɛ.

Hwèwulùwèlì 7:9

Ò mburzà yà hwenè hweyà hwe arzɛ, ɔndi nà à ɛnɛ ŋgìndì ndɛnɛ yà hwatò. Hwa mà kòka nyayi ema tɔ̀ mòtò à rzìi tànɛ ò lì hwa aŋga. Hwa mà uwɛ̀lɛ̀lɛ̀yi ò èkomè nà èkomè, hwa mà uwɛ̀lɛ̀lɛ̀yi ò màtumba nà màtumba, hwa mà hwɛ inyayi ja hwatò jà arzɛ rzìi hwa à ohwa hvɛ ò ihvɛhvɛ mbɔrzi. Hwa mà tɛ̀mɛ̀ ò worzo wò è konda yà lìkànèyà nà ò worzo wò è Ŋguma yà Mɔ̀lɛ̀ŋgù. Hwa mà wɔtɔ̀ meŋgombe mè mbɔ̀mi rzìi hwa tɛtɛ hvɛ ì nyàŋgo ò màa mà awu.