Ɛ̀hvìrzìyà 4:22 - Mokpwe: Bakwery (New Testament)

²² Hwa mà è okolɛ̀ ò lì hwɛ̀mɛ̀ ɛ̀ɛ̀mɛ̀ yà worzo ema è mà lomè lì hwɛ̀nɛ̀. Ò eŋge hvonda mòŋgɛ mà anyu ma mà hwɛ wòhwe ehwànja è mà ohva ndi mèèmà mè lì gbèeyà hweyà hwe wòhwe mɛnɛ. Meŋge mèèmà ema è mà hwɛ̀nɛ̀ ò lì gbèeyà hweyà hwe wòhwe mè mà è eŋgìrzɛ̀.

Ɛ̀hvìrzìyà 4:22 Mawu Ofanana

Ròmànì 6:6

Irzɔ i hwi nanù ema na òma hwà mà wòmeyà Krirztò ò mbarza hwà mà mò wòmeyà na ɛ̀ɛ̀mɛ̀ ya mòlòmɛ̀ ema i ma òhve. Ène e ma gbèyɛ̀nɛ ndi nanù aŋga nanù e ŋginyà ya eŋge ɛ̀ɛ̀mɛ̀ ya mòlòmɛ̀ ema e ma hwɛ lì jò gbèeyà ò lì gbeyà wòhwe e hwɛni lì hvaŋgahwa ya arzɛ ya arzɛ. Ène eyà e gbeyà nanù ema wòhwe wò rza jò wòwa hvɛ nàa hwàkòmì.

Ròmànì 7:11

Wòhwe wò mà luwa e njiya ya eni ema e akeyà ò mburza e mbenda, wò ma nò ɔnjɔ rzìi na gbeyà wòhwe. O èŋgànɛ̀lɛ̀ rzɔ wòhwe ndi wò nò òŋwi.

2 Kɔ̀rintìyà 11:3

Ndi tɔ̀ nanù, na oka wɔ̀ŋgɔ̀ nanù ema, na oma Mòkarzɛ̀ à mà lukɛlɛ Èhva, nanù mɛnɛ hvɛ ndi hwa e o lukɛlɛ aŋga nanù e rza ika mèèmà me anyu me arzɛ oma Yerzù Krirztò, ndèŋgànɛlɛ e rza o mo gbèeyà na mèèmà me anyu me arzɛ.

Gàletìyà 1:13

È mà hweyà nɛ lòŋgɛ là ami lì mà lome lì hwɛ è hvonda ema na mà nɔ̀ŋgɔ ɛ̀ɛ̀mɛ̀ ya wònyà Yudà. È ma hweyà nanù ema imba nà mà hwɛ lì tàkìrzɛ̀ hwatò hwa ama Krirztò na ekɔɔni ya ami ya arzɛ. Nà ma arza lì hwa kulɛ hwa arzɛ.

Ɛ̀hvìrzìyà 2:3

Irzɔ hwa arzɛ hvɛ i mà hwɛ ndi nàa wɔ̀. I mà hwɛ hvɛ ndi lì gbeyà hweyà o lì òkìrzɛ̀ e nyàma nyo mɔ̀nyɛ̀ŋgì. I ma hwɛ lì gbeyà hweyà hwe wòhwe na oma inyo ja arzu i ma arze nà e hweyɔ hvɛ ema màlùtèyà ma arzu ma mà arze. Wono wòhwe ema i ma hwɛ lì gbeyà, wo ma hwɛnɛ lì gbeyà Lohwɛ̀ o lì jo kɔ̀kìrzɛ̀ molemilemi na oma a kɔ̀kìrzɛ̀ hwatò hwa arzɛ.

Ɛ̀hvìrzìyà 4:17

O lìinà la ama Rzàŋgo, na e kòkòwɛ̀lɛ̀ kɔ̀yi-kɔ̀yi nanù ema e rzi lìya lòŋgɛ nàa hwatò ema hwa rza hwiyɛ̀ɛ Lohwɛ̀. Hweya ema hwa lùtèyà hwe hwèlì ndi hweyà ema hwe rza hwɛnɛ wòlìto ndeŋgànɛ̀lɛ̀ hwene hweyà hwe rza tànɛyi lì hwa oŋgowàna.

Ɛ̀hvìrzìyà 4:25

O èŋgànɛ̀lɛ̀ rzɔ e hwɛmɛ hweyà hwe lì kɔ̀. Ja àwòhwànɛ̀lɛ̀ e jɔ̀kɛ̀ mɔ̀kɔ na ɔ̀nɛyi, ehwànja i gbèyi ndi nàa hwatò ema hwa ahviyànɛ nyo hvɔ̀kɔ na Krirztò.

Ɛ̀hvìrzìyà 4:31

È ulɛ̀ màlùtèyà mà wòhwe mà arzɛ ema mè è hwèlì ò mèèmà mè anyu, rzìi è hwɛmɛ lì ambirzɛnɛ nà hwètàtò hwe ŋginyà ema hwe hwèlì ò mèèmà mè anyu. È hwàà, motàŋgo, nà ɛkɔ̀ni ò mèèmà mè anyu. È rzi tɔ̀wɔ tɔ̀ lì ahwɛnyɛnɛ mɔ̀kɔ nà ɔ̀nɛyi, è rzi ahwɛ̀nɛ̀nɛ̀ wɔ̀ɔ̀ nà tɔ̀ ima mòtò.

Kòlòrzìyà 2:11

Nà oma è hwèlì ò mòndeŋgè nà Krirztò, Krirztò à mà è endà. Rzeketɛ nà oma mòtò wà hwènàmà à endà mòtò. Krirztò ndi à hwèlì è mɔ̀ ema à yè endà ò èlìŋgɛ̀. À mà è ulɛ̀ ɛ̀ɛ̀mɛ̀ yà anyu yà wòhwe.

Tàyìtùrzì 3:3

O hvonda hvɔ̀kɔ ema e ma aka, irzɔ hvɛ i ma hwɛ hwèèti, i rzi hwɛ lì hweyàna Lohwɛ̀, i ma hvònda e njiya, i ma hwɛ nàa hwàkòmì na oma i ma ohve e nyɔ̀ŋgi ya hweyà hwe e rze ya mɔ̀nyɛ̀, ndèŋgànɛ̀lɛ̀ i ma hwɛ lì arza mɔ̀nyɛ̀ŋgì mo e rze. Mòŋgɛ ma arzu ma mà onda ndi na inona na ɛ̀kɔ̀wù. Hwàto hwà mà jo kɔwu ndèŋgànɛ̀lɛ̀ irzɔ hvɛ i ma kɔwu mɔ̀kɔ na ɔnɛyi.

Hibrù 12:1

Nà oma, ŋgìndì ndɛnɛ ya mboŋgi e jo toŋgi, inyɛ i hvàke tɔ̀ ima lìtumba la eyà ya wòhwe ema e jo kakumɛ̀nɛyi. Inyɛ̀ i hwàŋge hvɛ lìhwaŋgi ema lì jo hwèlì o worzo na lì àjùlɛ̀.

Hibrù 3:13

Ndi è àyètìrzɛ̀nɛ̀ mɔ̀kɔ nà ɔnɛyi wùnyà tɛ, na oma eyu e hwɛ̀lɛ̀hwɛ̀ nanù ema, “Yàwono,” aŋga nanù wòhwe wo rza lukɛlɛ mèèmà me anyu o lì hwɛneya Lohwɛ̀ maniya.

Jèmìrzì 1:21

O eŋgànɛ̀lɛ̀ rzɔ, inyɔ e hwɛmɛ hweyà hwe arzɛ hwe mbindo na hweyà hwe arzɛ hwe wòhwe ema e gbeyà. Nà lì arzìirzɛ lì arzɛ inyɔ ye emeyà eyà ema Lohwɛ̀ à mà onɛ o mèèmà me anyu. Èŋge eyà ndi Lohwɛ̀ a gbeyàna o lì e rzùŋgànà mòŋgɛ ma anyu.

Jèmìrzì 1:26

Tɔ̀ ima mòtò ema a ɔ̀ŋgɛ̀lɛ̀ nanù ema mɔ̀ à gbeyà ndi nà oma Lohwɛ̀ a àrzeyà, rzìi a rzi kànèyà jɛ̀ɛ̀mɛ̀ ja eni, eŋge tumba mòtò a alukɛ̀lɛ̀ ndi mɔ̀ ŋmìti, ndèŋganɛlɛ èwòlò ya eni ema mɔ̀ à gbèeyà Lohwɛ̀ e hwèlì ndi ŋgundu.

1 Pètrò 1:18

Inyɔ e hwi nanù ema Lohwɛ̀ à mà e kɔ̀tɔ̀ o tenì ya hwɛ̀ɛ̀mɛ̀ hwe wòhwe. Hwɛ̀ɛ̀mɛ̀ hwe wowe ema inyɔ e ma rzaŋgohwane imbamba ja anyu, rzeketɛ hwema nàa gòòlù tɔ̀ rzìlìhwà ema hwe hvaŋgeya.

1 Pètrò 4:3

Inyɔ e ma hvaŋga hvonda rzayi-rzayi o hvonda ema e ma aka, o lì gbeyà mamɛ ema hwatò ema hwa rza lòkɛ̀ Lohwɛ̀ hwa hvɔ̀rzì o lì gbeyà. Èŋge hvonda e ma aka. È mà lìya mòŋgɛ ma anyu o mòrzònje, e ma hwɛnɛ nyɔ̀ŋgi o mèèmà o lì gbeyà hweyà hwe wòhwe, e ma hwɛ lì nyɔ mììmbà o lì woma, e ma hwɛ lì aŋga indèma ema hwatò hwà mà hwɛ lì nyɔ mììmbà na lì woma rzìi hwa a gbeyà hweyà hwe wòhwe, ndèŋgànɛ̀lɛ̀ e ma hwɛ hvɛ lì kànɛlɛ̀lɛ̀ mahvɛhvɛ màlohwà.

2 Pètrò 2:13

Lohwɛ̀ à ò gbeyà nanù ema hwa tàke rzayi-rzayi ehwànja wɔ̀ hvɛ hwa mà tàkìrzɛ̀ hwahvɛhvɛ hwatò. Wɔ̀ hwa lìŋgàni o lì ujìrzɛ̀ e nyɔ̀ŋgi ya e nyàma nyo. Ndeŋgànɛ̀lɛ̀ wɔ̀ hwa rza oka tɔ̀ irzɔ̀ni o lì gbeyà hweŋge hweyà tɔ̀ o ŋmèrze mo wùnyà. Hwa hwèya gbamù o lì gbeyà hweŋge hweyà e hwèlì tɛ nanù ema hwa hwèlì lì laa na inyɔ èki yɔ̀kɔ. O eŋgànɛ̀lɛ̀ rzɔ, hwà mà hvàŋga lìinà la anyu na lì e jàneya irzɔ̀ni.

2 Pètrò 2:7

A ma rzùŋga Lɔ̀ti, munyanà wa gbamù ema a rzi lìŋgànɛ hweŋge hwɛ̀ɛ̀mɛ̀ hwe wòhwe ema hwaŋga hwatò hwa wòhwe hwà mà hwɛ lì gbeyà.