Ɛ̀hvìrzìyà 2:20 - Mokpwe: Bakwery (New Testament)

²⁰ È hwèlì ndi nàa hwèèmà ema hwa gbeyàna o lì oŋgà e ndawò. I àpɔ̀rzìtòlò na hwà-òhwèlì hwa hwèlìŋgɛ̀ hwa gbèyi ndi nàa mɔ̀nɔ̀ŋgɔ̀ mo e ndawò. Yerzù Krirztò mɔ̀ ŋmìti ndi à hwèlì lìwondi la tina.

Ɛ̀hvìrzìyà 2:20 Mawu Ofanana

Matiyò 16:18

Pètrò na òhweyà nanù ema ò hwèlì ndi ɛ̀kɔ̀kɔ̀ ya lìŋyàyi. O ŋmanyu ya ene ɛkɔkɔ ya lìŋyàyi ndi na òŋga mìitelì me ami. Tɔ̀ è ŋginyà ya e kpelì e rza tànɛyi lì anana meŋge miitelì.

Matiyò 21:42

Yerzù rzi a hwa òhweyà nanù ema, “È rzi laŋgi ò èki ema Èya ya Lohwà e òhwa nanù ema, ‘Lìnyayi ema hwà-òŋgèlì hwà mà hvake na yòma ya ŋgundu, lì ɔ̀ndi lì ma timbɛ lìŋyàyi ema lì endàhwàwɛlɛ. È Rzàŋgò ndi à mà gbeyà ene eyà. Ndèŋgànɛ̀lɛ̀ e hwèlì mànyakà ò mirzɔ̀ ma arzu.’

1 Kɔ̀rintìyà 12:28

Lohwɛ̀ à mà ŋgba hwatò hwehvɛhvɛ hwèwòlò ò tenì ya mìitelì. A ma loma lì ika lòŋgo la hwatò i Àpɔ̀rzìtòlò. O mburzà nanù, a hvɔ̀rzɔ̀ hvɛ hwà-òhwèlì hwa hwèlìŋgɛ̀. Ndèŋgana a e hvɔ̀rzɔ̀ hvɛ Hwà-òkòwèlì. Ndèŋgana a e hvɔ̀rzɔ̀ hwatò ema hwa gbeyà hweyà hwe mànyakà. Rzi a hvɔ̀rzɔ̀ hvɛ hwatò ema hwa òŋgòwàna hwanɛ̀yi hwatò. A ma hvɔ̀rzɔ̀ hwatò ema hwà mà hwɛnɛ lìhwiyè la lì tìmba hwahvɛhvɛ hwatò. Rzi a hvɔ̀rzɔ̀ hvɛ hwatò ema hwa ohwa ihvɛhvɛ mbɔrzi.

Gàletìyà 2:9

Jèmìrzì, Pètrò nà Yòwanìrzɛ̀ ema hwatò hwà mà hwiye nàa màwòndì ma ŋmèmba, hwà mà ayèmbɛ nanù ema Lohwɛ̀ ndi à mà no ŋgba ene ndèli ya lì hwɛ e àpɔ̀rzìtòlò ya eni, o eŋgànɛ̀lɛ̀ wɔ̀ hwà mà jo hwatɛ irzɔ na Bànàbàrzì o lì uŋmɛ̀lɛ̀ nanù ema hwà mà emeyà nanù ema irzɔ na wɔ̀ i gbeyà ndi èwòlò yɔ̀kɔ. Irzɔ na wɔ̀ i ma tɛ̀yirzɛyi nanù ema i hwɛ o lì ohweyà hwatò ema hwa rza enje wònyà Yudà ŋmɛ̀ndì mò gbamù, na oma wɔ̀ hvɛ hwa lìmeya ndi o lì ohweyà wònyà Yudà ŋmɛ̀ndì mò gbamù.

Ɛ̀hvìrzìyà 3:5

Ò mòlòmɛ̀ Lohwɛ̀ à rzi wùluhweyà hwatò hwa hwènàmà hwene hweyà ema tɔ̀ naŋgɛ tɔ̀ mòtò tɔ̀ mɔ̀kɔ à rza rzɔ̀ŋgìtɛ̀nɛ̀. Ndi ò naŋgɛ à mà gbeyàna è Èlìŋgɛ̀ yà eni ò lì uŋmɛ̀lɛ̀ hwà-òhwèlì hwa hwèlìŋgɛ̀ nà i àpɔ̀rzìtòlò ema hwa gbèeyà Lohwɛ̀ hwene hweyà.

Kòlòrzìyà 2:7

Nà oma o lòkɛ̀ hweyà ema hwanu hwà-òkòlèlì hwa e okòlɛ, hwene hweyà hwe hwèlì ndi e jɔ̀kɛ̀. Ndeŋgànɛ̀lɛ̀ e a ŋgbàà Lohwɛ̀ jeka o hweyà hwe arzɛ o ihvonda ja arzɛ.

1 Pètrò 2:6

Èhwànja e tìlahwì o e kààtì ya Lohwà nanù ema, “È ɔŋgɔ tɛ, nà mà wowa lìŋyàyi la wòlìto rzìi na lì rzùmèlì o Rzàyɔ̀nì, È mɔ̀ ema a mo lòkɛ̀yi a rza o hwɛnɛ tɔ̀ irzɔ̀ni.”

Hwèwulùwèlì 21:14

Èŋge ŋgawo ya eŋge mbowà ndɛɛndɛ e ma oŋgahwa ndi o ŋmanyu ya lìyome la mènɔ̀ŋgɔ̀ na mehwakɛ, mìinà mà lìyome la àpɔ̀rzìtòlò na mahwakɛ me ama e Ŋgumà ya Mɔ̀lɛ̀ŋgù me mà tìlahwa o ŋmanyu ya mene mènɔ̀ŋgɔ.