2 Tìmotì 2:12 - Mokpwe: Bakwery (New Testament)

¹² Ja àjùlɛ̀nɛ̀ tɛ o lì taka na mɔ̀, irzɔ jo ò kànèyà na mɔ̀. Irzɔ i mo rzɔ̀rzi tɛ, mɔ̀hvɛ a hwɛni ndi lì jo rzɔ̀rzɔ̀.

2 Tìmotì 2:12 Mawu Ofanana

Matiyò 10:33

Ndi tɔ̀ njɛnɛ ema a nò rzɔ̀rzi ò marzò ma hwatò hwa hwènàmà, imba hvɛ na mò rzɔ̀rzɔ̀ ò wòrzò wa ama Tatɛ̀ wà ami ema a hwèlì ò ŋmanyu yà lohwà.

Matiyò 26:35

Pètrò rzìi à alàhwɛ̀ nanù ema, “Tɔ̀ è hwɛ ndi nanù ema nà hwɛni lì ŋwa nà ò wà nà rza tanɛ lì ò rzɔ̀rzɔ̀.” Hwanɛ̀yi Hwà-òkòwèlì hwa arzɛ wɔ̀ hvɛ hwa mà òhwa ndi nanù mɛnɛ.

Matiyò 26:75

Pètrò rzìi à ɔ̀ŋgɛ̀lɛ̀ jòòhwì ema Yerzù à mà mò òhweyà nanù ema, “Ndèŋgànà è mòme wà wuhwà à è tòŋga, ò nò rzɔ̀rzɔ̀ ŋgelì iyàwò nanù ema ò rza nò hwi.” À mà wurza ò èwòka rzìi à eyà ije-ije.

Makòrzì 10:33

À mà hwa òhweyà nanù ema, “È hwiye nanù ema ja agba ndi ò Jèrurzalɛ̀mù, aŋga ndì è Ŋmanà wà è Mòtò wà Hwènàmà a hwɛnì lì ŋgbààhwà ò màà mà è Ipìlìrzì ndɛnɛ nà hwà-òkòlèlì hwa mbenda. Wɔ̀ hwa mò akɛlɛlɛ è mbàkò ya kpelì, rzìi hwa mò akɛlɛ ò màà mà hwatò ema hwa rza enje hwatò hwa Irzàyɛ̀lì.

Makòrzì 8:38

È mɔ̀ ema à nò òkana imba nà Eyà yà Lohwà irzɔ̀ni, ò ene nyɔ̀ŋgɔ̀nì yà yàwònò ema è òŋgamà Lohwɛ̀ nà mèèmà mè hwàkɛ ema è hwèlì hvɛ ndi è nyɔ̀ŋgɔ̀nì yà wòhwe, è Ŋmanà wà è Mòtò wà Hwènàmà mɔ̀ hvɛ à mò òkana irzɔ̀ni è hvònda ema à jà nà i aŋgèlì jè eni jà wòtani nà èluhwe yà ama Tatɛ̀ wà eni.”

Lukàrzɛ̀ 12:9

Tɔ̀ njɛnɛ hvɛ ema à nò rzɔ̀rzi ò màrzò ma hwatò, ìmba hvɛ nà mò rzɔ̀rzɔ̀ ò màrzò ma i aŋgèlì, ja ama Lohwɛ̀.

Lukàrzɛ̀ 22:29

Nà òmà Tatɛ̀ wà amì a nò ŋgbelì è wònjà yà lìkànèyà, nanù ndi ìmba hvɛ na è ŋgbà.

Lukàrzɛ̀ 22:30

Ène e gbeyà è hwɛnì lì làa nà lì nyɔ nà ìmba èki yɔ̀kɔ ò lìkànèyà la amì. È ò lìya hvɛ ò mbòkò ja màkànèyà ò lì kàyìrzɛ̀ lìyòmɛ̀ la matumba nà mahwàkɛ ma wònyà Irzàyɛ̀lì.

Lukàrzɛ̀ 9:26

Mòtò à nò òkanì tɛ ìrzɔnì nà hweyòhwèlì hwe amì, È Ŋmanà wà è Mòtò wà hwènàmà mɔ̀ hvɛ à mò òkànà ìrzɔnì lìŋgi lìrzàkò ema à tìmba ònò nà wòtani wà eni, nà è wɔ̀ hwa ama è Rzàŋgò yà enì, nà i aŋgèlì ja wòrzaŋgi.

Hwègbèèlì 14:22

Tɔ ima èki ema hwà mà uke, hwà mà hwɛ lì òkòlɛ hwatò ema hwà mà lòkɛ̀ Yerzù na lì etìrzɛ mèèmà me awu aŋga nanù hwa ò alɛ̀mbɛ̀nɛ lì lòkɛ̀ la awu. Hwà mà hwɛ lì hwa òkòlɛ nanù ema, “I hwɛni lì akeyà rzayi-rzayi ja mètàkà ndèŋgàna je e kpèeyà ò lìkànèyà la ama Lohwɛ̀.”

Ròmànì 5:17

È hwèlì ndi e jɔ̀kɛ̀ nanù ema wòhwe ema ehvòwa ya mòtò Adàmu à mà gbeye, wò ma gbeyà hwatò hwa arzɛ ò lì hwɛ ò rze ya e ŋginyà ya kpelì. Ndi eyà ema enɛyi ehvòwa mòtò ya awɔ̀kɛ Yerzù Krirztò mɔ̀ hvɛ à mà gbeye yɔ e imbami rzayi-rzayi. Ène eyà e gbeyà hwatò hwa arzɛ ema hwà mà luwɛ e ndèli ya ama Lohwɛ̀ ema e òlò, hwa ò imanɛlɛhwɛ ò wòrzò wò ama Lohwɛ̀. Hwa ò hwɛnɛ lòŋgɛ là gbìndèyà na lì hwɛnɛ ŋginyà ò ŋmanyu ya hweyà hwe arzɛ.

Ròmànì 8:17

Kanatɛ irzɔ i hwèlì ndi hwàna hwa ama Lohwɛ̀, irzɔ i lùwà mònàmɛ̀ ema Lohwɛ̀ à mà uteya hwàanà hwa eni, ndeŋgànɛ̀lɛ̀ irzɔ i lùwà hwèèmà ema Lohwɛ̀ à mà uteya Yerzù, e hwèlì tɛ ò jɔ̀kɛ̀ nanù ema inyɔ e emelì ò lì taka na Krirztò aŋga nanù irzɔ hvɛ jò ò luwa èluhwe ema Lohwɛ̀ a mò ŋgba.

Hvìlipìyà 1:28

È rzi keka lì oka hwaŋga hwatò ema hwa e teŋgɛ̀nɛ̀ wɔ̀ŋgɔ̀. Inyɛ̀ ètìrzɛ̀ mèèmà me anyu o ihvonda ja arzɛ. Ène eyà e o uŋmɛ̀lɛ̀ nanù ema, wɔ̀ hwa rza o luwa lìrzùŋgàhwa ndi inyɔ e o lì luwa. Lohwɛ̀ ndi à rzekelì hwene hweyà hwe arzɛ.

1 Tìmotì 5:8

Tɔ̀ ima molokelì ema a rza woŋgohwa e mbiya ya eni, rzɛhvɔ̀ni hwàŋgà hwa lìtumba ema hwa mo kombɛnɛ, e uŋmɛ̀lɛ̀ nanù ema mɔ̀ à rza lòkɛ̀ Krirztò na e jɔ̀kɛ̀. Èŋge ŋgàna e hwèlì ndi nanù ema, mɔ̀ à gbeyà wòhwe lì aka e mòtò ema a rza lòkɛ̀yi Krirztò.

Judɛ 1:4

Nà ohwa ndi nanù èhwanja lòŋgò là hwatò ema hwa rza hwɛnɛ ɛ̀ɛ̀mɛ̀ yà ama hwatò hwa ama Lohwɛ̀, hwa mà kpèeyà ò ìtììtènì jà anyu ò jùtùtà. Hwaŋga hwatò hwa ohwa nanù ema, è ndèli ema Lohwɛ̀ à mà jò ŋgbɛ, ndèŋganɛlɛ nà oma à mà jò làkìrzɛ̀ wòhwe wò arzu, è mà jò ŋgbàà è wònjà ò lì gbeyà hweyà hwe mbindo. Lohwɛ̀ mɔ̀ à mà màa lì tɛ̀yirzɛ̀ è kɔ̀kìrzɛ̀ ema hwaŋga hwatò hwa ò lùwɛ natɛ̀ɛ nà è kòhwàa. Hwàŋga hwatò hwa rza emelì Yerzù Krirztò na oma è hwèlì nanù ema Yerzù mɛnɛ ndi à hwèlì è Rzàŋgo yà arzu nà è mòkànèlì wà arzu.

Hwèwulùwèlì 1:6

À jò gbèyi ì hwèlì ndi nàa Ipilìrzi ema i gbèeyà Lohwɛ̀ è Tatɛ̀ yà eni ema è hwa kànèyà. Inyɛ̀ èluhwe nà lìkànèyà là eni lì hwɛ ò gbìndèyà nà ò gbìndèyà. Inyɛ̀ wò lìya nanù.

Hwèwulùwèlì 1:9

Imbà ndi nà hwèlì Yòwanìrzɛ̀ ŋmanyàŋgò wà anyu. Nà hwèlì ndi mɔ̀kɔ ema mɔ̀hvɛ à hwèlì ndi nàa inyɔ, ò lì kaka ŋmèma nà ò lì àjùlɛ̀nɛ̀ mètàke ema mè jèeyà hwatò ema hwa hwèlì ò lìkànèyà là ama Yerzù Krirztò. Hwa mà nò ika ò erzòòkà ema malìhwà ma mà toŋge ema è hwɛ̀lɛ̀hwɛ̀ Pàtìmòrzì ehwànja nà mà ohwa Eyà yà ama Lohwɛ̀ rzìi nà ohweyà hwatò lì hvomɛ̀nɛ̀ hweyà ema nà mà ɛnɛ lì e hvomɛ̀nɛ̀.

Hwèwulùwèlì 2:13

Nà hwi èki ema ò lìya. Aŋga ndi è konda yà lìkànèyà là ama mòkarzɛ̀ è hwèlì. Ndi è eka mèèmà mè anyu nà imba nanù mɛnɛ. È mà nò lòkɛ̀ nà ŋmèma mɔ̀kɔ nanù mɛnɛ tɔ̀ ò è hvonda yà ama Àntipàrzi. Àntipàrzi à mà nò tɛ̀meyà è mboŋgi yà jɔ̀kɛ̀, ndèŋgànɛ̀lɛ̀ hwa mà mò oŋwa ò ìtììtènì jà anyu ò hwèlìyelì hwe ama Mòkarzɛ̀.

Hwèwulùwèlì 20:4

Rzìi na ɛnɛ ikonda ja màkànèyà ema hwatò ema hwà mà ji lìya wɔ̀ ndi Lohwɛ̀ à mà ŋgbe e wònja o lì kànèyà hwatò. Rzìi na ɛnɛ e mòtò wa tenì wa hwatò ema hwà mà ŋwɛɛ. Hwà mà hwa oŋwa ehwànja hwà mà hwɛ lì ohwa e jɔ̀kɛ̀ ema Yerzù à mà jàne ehwànja hwà mà hwɛ lì ohwa ŋmɛ̀ndì ema mo uwɛ̀lɛ̀lɛ̀yi o ma Lohwɛ̀. Wɔ̀ hwà mà hwa oŋwa ehwànja wɔ̀ hwa rzi kanɛ̀ eŋge nyàmà yà wòhwe tɔ̀ èlìŋgɛ̀ ya eni ehwànja wɔ̀ hwa rzì emeyà lì luwa èèmbanelì ya eni o imbɔ̀mbɔ tɔ̀ o màà mà awu. Wɔ̀ hwà mà tìmba o lòŋgɛ rzìi hwa hwɛ na Krirztò o lìkànèyà o tenì ya ikolì ja meya.

Hwèwulùwèlì 20:6

Mònàmɛ̀ mo o hwɛ na hwaŋga ema hwa o hwɛ o hwehvùmuwelì hwe worzo. Hwa hwèlì ndi hwatò ema hwa hwèlì wòtani. È kpelì ema e hwèlì e kpelì ya hwèlìŋgɛ̀, e rza hwɛnì màyìmbì o ŋmanyu ya hwatò ema hwa hwèlì o hwehvùmuwelì hwe kpelì hwe worzo. Ndi wɔ̀ hwa o hwɛ ipilìrzi ja ama Lohwɛ̀ na e ja ama Krirztò, ndèŋgànɛ̀lɛ̀ wɔ̀ hwa o hwɛ na mɔ̀ o lìkànèyà o tenì ya ikolì ja meya.

Hwèwulùwèlì 3:10

Nà oma e hwèlì nanù ema, inyɔ e ika eyà ya ami ema na e ohwèlì nanù ema e kake mèèmà o lì àjùlɛ̀nɛ̀ mètàkà me anyu, imba hvɛ na o e kombɛ o e hvonda ya mòtàkà ema mo o jèeya e rze ya mɔ̀nyɛ̀, o lì kèkirzɛ hwatò hwa arzɛ hwa è rze yà mɔ̀nyɛ̀.

Hwèwulùwèlì 3:21

Hwàto ema hwa lìya lì aka hweyà hwe wòhwe, nà ò hwa ŋgba è wònja ò lì lìya nà imba ò konda yà ami yà lìkànèyà, ŋgànà hvɔ̀kɔ nà oma imba hvɛ nà lìya ò ŋmanyu yà hwàkɔ̀yèlì wà ami rzìi nà lìya nà Tatɛ̀ wà ami ò è konda yà eni yà lìkànèyà.

Hwèwulùwèlì 3:8

Nà hwi èwòlò ema è gbeyà. È ɔŋgɔ̀ tɛ, nà mà ò lìhvoweya lìyohva ema lì ò hwɛlɛlɛ̀yi ò worzo ndèŋgànɛ̀lɛ̀ tɔ̀ mòtò à rza tànɛ à lì umba. Nà hwi nanù ema è ŋginyà ema ò hwɛni è tùù, ndi tɔ̀ nanù inyɔ è oŋgama eyà yà ami, ndèŋgànɛ̀lɛ̀ inyɔ è rza ohwa nanù ema è rza no hwi.

Hwèwulùwèlì 5:10

À mà hwa gbeyà ò lì hwɛ ipilìrzi ema ì gbèeyà Lòohwà là arzu, ndèŋgànɛ̀lɛ̀ wɔ̀ hwa ò kànèyà è rze yà mɔ̀nyɛ̀.”