2 Kɔ̀rintìyà 9:13 - Mokpwe: Bakwery (New Testament)

¹³ Hweya ema ene èwòlò ema e gbeyà, hwe o wuluhwa o mote, hwe gbeyà hwatò rzayi-rzayi o lì ŋgba Lohwà èluhwe, èhwanja inyɔ e hwèlì ndi o lì gbeyà na oma ŋmɛ̀ndì mò ama Krirztò mo òhwi. Inyɔ e hwɛnì rzɔ o lì uŋmɛ̀lɛ̀ mono ŋmèma mo gbamù o hwatò hwa Lohwà ema hwa hwèlì o Jèrurzalɛ̀mù, ndèŋgànɛlɛ o lì mo uŋmɛ̀lɛ̀ hvɛ o hwahvɛhvɛ hwatò hwa Lohwà.

2 Kɔ̀rintìyà 9:13 Mawu Ofanana

Matiyò 5:16

Inyɛ̀ inyɔ hvɛ è pànye ndi ŋgàna hvɔ̀kɔ nàa ètùlù. Hwatò hwa ɛni tɛ hwèwòlò hwe anyu hwe gbamù ema è gbèya, hwa eka Lohwɛ̀ Tatɛ̀ hwa anyu ema à hwèlì ò ŋmanyu yà lohwà.”

Matiyò 9:8

Nà òma è ŋgìndì è mà ɛnɛ nanù, hwa mà tùmeyà nà mòkambiya. Rzìi hwa wòteya lì eka Lohwɛ̀, èhwanja mɔ̀ à ŋgbelì hwatò ène tumba wònjà.

Lukàrzɛ̀ 6:46

“Mamɛ ndeŋgàtɛ è nò hwɛlɛ nanù ema, ‘Ìi Rzàŋgò, Ìi Rzàŋgò,’ ndi e rza gbeyà mamɛ ìmba na òhwa e?

Yòwanìrzɛ̀ 15:8

Èluhwe ya ama e Tatɛ̀ ya ami e awuŋmɛ̀lɛ̀ e hwèlì tɛ ema e ŋyàa hwehvùma jɔ̀ɔjɔ̀ɔ, eŋge ndi e gbeyà ema e hwɛ̀ɛ hwànɔ̀ŋgèlì hwa ami.

Hwègbèèlì 11:18

Lirzakò ema hwanɛ̀yi hwatò hwà mà hweye ene eyà, wɔ̀ hwà mà hwɛmɛ e ndandò ya awu na Pètrò rzi hwa wòteya lì eka Lohwɛ̀. Wɔ̀ hwà mà òhwa nanù ema, “Irzɔ i tànɛyi ò lì ɛnɛ nanù ema, Lohwɛ̀ a ŋgbèlì hvɛ hwanù hwatò ema hwa rza enje wònyà Yudà èŋge ehvòlò ya lì tikòwa ò wòhwè wò awu lì timba ò ma Lohwɛ̀ lì luwa lòŋgɛ la gbìndèyà.”

Hwègbèèlì 4:21

Hwelìyelì hwe hwàkàyìrzèlì hwe ma timba lì hwa kòkòwɛ̀lɛ̀ na ŋginyà rzi hwa hwà hwɛmɛ ema hwa ɛndɛ. Hwa rzi tànɛyi lì hwa kɔ̀kìrzɛ̀ èhwanja hwatò hwa arzɛ hwà mà hwɛ lì eka Lohwɛ̀ lì hvòmɛ̀nɛ̀ mamɛ ema e ma gbèyɛ̀nɛ.

Ròmànì 10:16

Rzeketɛ hwatò hwa arzɛ wɔ̀ ndi hwa mà emeyà Ŋmɛ̀ndì mò Gbamù. È mòòhwèlì wà èlìŋgɛ̀ Àyìrzayà mɔ̀ ŋmìti à mà òhwa nanù ema, “Ìi Rzàŋgò njɛnɛ hwa awu à lòkɛ̀ mònò ŋmɛ̀ndì ema jò òhwa e?”

Ròmànì 12:8

Mòtò ema a hwɛni jàhwèyà ja lì kɔ̀mɛlɛ hwatò, inyɛ mɔ̀ à hwa kɔ̀mɛlɛ. Tɔ̀ njɛnɛ hvɛ ema a ŋgba hwatò hwema, a hwa ŋgbaane na eenji. È mɔ̀ hvɛ ema a hwɛni jàhwèyà ò lì timba hwatò, inyɛ a hwa timbe kɔ̀yi-kɔ̀yi. È mòtò hvɛ ema a òhvi jàhwèyà ja lì uŋmɛ̀lɛ̀ hwatò ììlì, inyɛ a uŋmɛ̀lɛ̀ hwatò ììlì na màlìŋgò.

Ròmànì 15:31

È nò kanɛ̀lɛ̀lɛ̀ nanù ema na ò rzùŋgàhwà ò màà mà hwatò ema hwa rza lòkɛ̀yì Krirztò ò erzòòkà ya Jùdeyà nanù ema hwa rzi nò gbeyà tɔ̀ wòhwe. Ndèŋgànɛ̀lɛ̀ e kànɛ hvɛ nanù ema wòlì ema na ò ɛndɛneya mèlìrza me hwatò ema me hwèlì ò mòndeŋge mò hwatò hwa Lohwà ò Jèrurzalɛ̀mù, hwa wò emeyà.

Ròmànì 16:26

Ndi ò nàŋgɛ eŋge jɔ̀kɛ̀ e ma jò wuluhwàhwɛlɛ. Mɔ̀ à mà e wuluhwa nàŋgɛ na hweyà ema hwà-òhwèlì hwa hwèlìŋgɛ̀ hwà mà tile ò e kààtì ya ama Lohwɛ̀. Mɔ̀ à mà gbeye ndi nanù, aŋga nanù hwatò hwa arzɛ̀ hwa hwèkòmè hwe ya arzɛ hwa mò lòkɛ̀ na lì mò hweyàne.

2 Kɔ̀rintìyà 10:5

I hwe gbeyàna hvɛ o lì wuulɛ tɔ̀ ima johwi ja lì ayèkirzɛ̀, ema hwa ohwa ema i gbeyà ema hwatò hwa rza hwiya Lohwɛ̀. I gbeyà hwatò ò lì tikowa màlùtèyà ma awu aŋga nanù màlùtèyà ma awu ma arzɛ ma o hwɛ ndi nàa Krirztò a arza ama mà hwɛ.

2 Kɔ̀rintìyà 2:12

Nà oma na ama ùke o mbowà ya Trɔ̀wàrzì, o lì ohwa Ŋmɛ̀ndì mò Gbamù mo òma Krirztò, nà mà ùŋmanɛlɛ nanù ema Lohwɛ̀ à mà màa lì no lìhvoweya e njiya o lì gbeyà èwòlò ya eni.

2 Kɔ̀rintìyà 8:4

Hwà mà jo atɛkɛ rzayì-rzayì nanù ema i hwɛnɛ mɔ̀nyɛ̀ŋgì o lì oŋgòwànà hwatò hwa Lohwà hwa hwèlì o mbowà ya Jèrurzalɛ̀mù, nà oma wɔ̀hvɛ hwa hwèlì hwa gbeyà.

2 Kɔ̀rintìyà 9:14

Hwa okelì o lì e ɛnɛ, ndèŋgànɛlɛ hvɛ hwa e kanɛ̀lɛ̀lɛ̀ èhwanja e ndèli ya ama Lohwɛ̀ e hwèlì na inyɔ. Èŋge ndèli e olo rzayi-rzayi.

Gàletìyà 1:24

Eyà ema Lohwɛ̀ à mà no gbèeyà e ma hwa gbeyà o lì eka Lohwɛ̀.

1 Tìmotì 6:12

O àjùlɛ̀ o lì atàkìrzɛ̀ lì ika ŋmèma mo aŋgɔ̀ na Lohwɛ̀ na o lì mo gbèeyà. Lòŋgɛ la gbìndèyà ema Lohwɛ̀ à mà o ŋgbɛ o lì lɛmbɛ gbamù. Lohwɛ̀ à mà o ŋgba lìŋgi lòŋgɛ lìrzako ema o ma ohwe o marzo ma hwatò rzayi-rzayi nanù ema o lòkɛ̀ Krirztò.

1 Tìmotì 6:13

O worzo wo ama Lohwɛ̀, mɔ̀ ema a ŋgbàà lòŋgɛ o hwema hwe arzɛ, ndèŋgàna o worzo wo ama Yerzù Krirztò mɔ̀ ema à mà ohwa e jɔ̀kɛ̀ o worzo wo ama Pòntìyùrzì Pìlatò, na e ohweyà nanù ema,

Hibrù 10:23

Inyɛ̀ i lɛmbɛ lìhvìtà là arzu kɔ̀yi-kɔ̀yi, e rzi hwɛ lì nyiŋgirzɛhwɛ, èhwanja irzɔ i lòkɛ̀yi nanù ema Lohwɛ̀ ema a ohwi à mà a gbeyà mamɛ ema a ohwa nanù ema a gbeyà a e gbeyà.

Hibrù 13:16

È rzi hvoŋga hvɛ o lì gbeyà gbamù, na o lì òŋgòwàna hwahvɛhvɛ hwatò ema hwa hwèlì o lìtake. Tɔ̀ mamɛ ema mòtò a ohvi inyɛ a e gbeyàne o lì oŋgowàna mɔ̀kɔ na ɔ̀nɛyi. Màhweyà manù ema mà lìŋgìrzɛ Lohwɛ̀.

Hibrù 3:1

Ìi wònyàmòwe hwa ama Krirztò kòkò, inyɔ ema Lohwɛ̀ à mà hwɛ̀lɛ o lì hwɛ hwatò hwa eni, inyɛ̀ e ika màlùtèyà ma anyu o ma Yerzù. Mɔ̀ ndi à hwèlì e mògbèèlì ema Lohwɛ̀ à mà ome o lì hwɛ e Pìlìrzì e kàrzàmi o hweyà ema irzɔ jo ohwi nanù ema i lòkɛ̀yì.

Hibrù 4:14

Ò èŋgànɛ̀lɛ̀ rzɔ nà oma ì hwɛnì è Pìlìrzì è Kàrzàmi Ndɛnɛ, Yerzù è Ŋmanà wà ama Lohwɛ̀, ema à mà lòmɛ lì ɛndɛ ò ŋmanyu yà lohwà ò worzo wò ama Lohwɛ̀, inyɛ ì lɛ̀mbɛ lìlòkɛ̀ là arzu kɔ̀yi-kɔ̀yi.

Hibrù 5:9

Lohwɛ̀ à mà mo gbeyà o lì hwɛ e Pìlìrzì e Kàrzàmi ema e hvomɛ̀nɛ̀, aŋga nanù, hwatò ema hwa mo hweyàna, hwa o luwa lìrzùŋgàhwa ema lì o hwɛ natɛ̀ɛ na o gbìndèyà.

1 Pètrò 2:9

Ndi inyɔ ndi e hwèlì hwatò ema Lohwɛ̀ à mà hvɔ̀rzɛ̀, Ipìlìrzì ja ama Lohwɛ̀ ema mɔ̀ ndi à hwèlì e kiŋgɛ. È hwèlì ndi èkòmè ya wòtani, ndèŋgànɛ̀lɛ̀ Lohwɛ̀ ŋmitɛ-ŋmitɛ ndi à e hwɛni, aŋga nanù inyɔ e uŋmɛ̀lɛ̀ hwahvɛhvɛ hwatò na oma mɔ̀ à hwèlì gbamù. Lohwɛ̀ à mà e ulɛ ò tenì ya jìtìtì ndèŋgànɛ̀lɛ̀ mɔ̀ à mà e jànà o ŋmàye.

1 Pètrò 4:11

Tɔ̀ ima mòtò ema à hwi lì ohwa gbamù inyɛ à ohwe ndi nàa à ohwa ndi è mbɔrzi ema è uwɛ̀lɛ̀lɛ̀yì ò mà Lohwɛ̀ mɔ̀ ŋmìti. Tɔ̀ njɛnɛ ema à oŋgowàna hwatò, inyɛ à gbeyàne ndi è ŋginyà ema Lohwɛ̀ à mò ŋgbelì. Jèka jò ò ŋgbààhwà Lohwɛ̀ lì hvomɛ̀nɛ̀ hweyà hwe arzɛ lì akeyà nà Yerzù Krirztò. Èluhwe yà arzɛ nà è ŋginyà yà arzɛ è hwɛ nà mɔ̀ ò gbìndèyà nà ò gbìndèyà. Inyɛ̀ wò lìya nanù!