2 Kɔ̀rintìyà 7:15 - Mokpwe: Bakwery (New Testament)

¹⁵ Èŋge eyà e gbèyi ema ŋmèma mo eni mo hwèlì na inyɔ lì aka tɔ̀ na e hvonda ya worzo, na oma a ɔ̀ŋgɛ̀lɛ̀ nɛ inyɔ hwa arzɛ e ma hwɛnɛ ŋmèma mo lì gbeyà hweyà hwe arzɛ ema mɔ̀ à mà e ohweyà o lì gbeyà. Ŋmèma mo eni mo hwèlì hvɛ na inyɔ nanù mɛnɛ, a ɔ̀ŋgɛ̀lɛ̀ tɛ nɛ inyɔ e ma mo karzɛ na èluhwe na o lì mo òŋgòwànà hvɛ na ŋmèma mɔ̀kɔ.

2 Kɔ̀rintìyà 7:15 Mawu Ofanana

Yòwanìrzɛ̀ 16:21

È mòlanà ema a hwèlì ò lìyalì a arzuumɛ èhwanja e hvònda ya eni ya mòtàkà e ma uka. Ndi e ŋmanà wa eni à mà yahwa tɛ, a ò lìŋga èhwanja ŋmanà a ŋyahwahwi ò rze.

Hwègbèèlì 16:29

Oŋgò mɔ̀ɔ̀ŋgèlì wa hwèwòwà à mà òhwa nanù ema hwa jàne hwètùlù, à mà ahwèŋgɛ̀ rzìi a kpèeyà ò tenì ya e ndawò ya hwèwòwà, rzìi a kpàana mòkambiya ò wòrzò wò ama Pàwolò na Rzàyìlàrzì.

1 Kɔ̀rintìyà 2:3

Nà mà hwɛ̀ nà inyɔ ò e mbowà ya anyu ndɛɛ̀ndɛ nà rzi tanɛ o lì gbeyà ene èwòlò, èhwanja ŋmèmà mà ami mo ma tumeya na wɔ̀ŋgɔ̀.

2 Kɔ̀rintìyà 2:9

Lìtìŋga ema lì ma gbeyà ndèŋgàna na e tìleya ene kààtì, lì hwèlì ndi nanù ema o lì hwiya ŋga e o gbeyà hweyà ema nà mà e ohweyà o lì gbeyà.

2 Kɔ̀rintìyà 6:12

Irzɔ je e lìŋgàni, ndèŋgànɛlɛ i rza rzɔ̀rzì o lì e uŋmɛ̀lɛ̀ nanù ema je e lìŋgàni. Ndi inyɔ e uŋmɛ̀lɛ̀ nanù ema e rza jo lìŋgàni.

Ɛ̀hvìrzìyà 6:5

Inyɔ hvɛ hwàkòmì e hweyàne irzaŋgo ja anyu ja èwòlò. Ndeŋgànɛ̀lɛ̀ e hwa ŋgbe èluhwe, ndeŋga e hwa hweyàne na ŋmèma mɔ̀kɔ molemilemi na oma e hweyàna Krirztò.

Hvìlipìyà 1:8

Lohwɛ̀ ndi à hwèlì è mboŋgi yà ami nanù ema ŋmèma ema nà è hwɛ̀nèlì mò hwèlì ndi nyàyi hvɔ̀kɔ nà oma Yerzù Krirztò mɔhvɛ à è hwɛ̀nèlì.

Hvìlipìyà 2:12

O eŋgànɛlɛ rzɔ, ìi wònyàmòwe kòkò, na oma e ma hwɛ lì gbeyà hweyà ema Lohwɛ̀ à mà ohwe nanù ema e gbeye e hvonda ema nà mà hwɛ na inyɔ, e o lɔ̀wu nanù ema e gbeye mamɛ ema a ohwi nanù ema e gbeye, nàŋgɛ ema imba na rza enje hvɛ na inyɔ. È àŋgàmɛ̀nɛ̀yi lì hwɛnɛ wɔ̀ŋgɔ̀ wo ama Lohwɛ̀ o mèèmà me anyu na o lì arzihwirzɛ inyɔ hwiti o worzo wo ama Lohwɛ̀. È keke o lì gbeyà hweyà ema Lohwɛ̀ a arza nanù ema e gbeye aŋga nanù lì kɔ̀tɔ̀wɔ̀ ema e o luwɛ e o ondìrzɛ̀hwɛ.

Kòlòrzìyà 3:12

È hwèlì ndi nàa hwatò ema Lohwɛ̀ à mà hvɔ̀rzɛ̀, inyɔ è ondi wòtani ndèŋgànɛ̀lɛ̀ à è lìŋgàni rzàyi-rzàyi. Ò èŋgànɛlɛ rzɔ inyɔ è àŋgàmɛ̀nɛ̀yi lì hwɛnɛ mèèmà mè ììlì, è hwɛni lì hwɛnɛ mèèmà mè gbamù, è hwɛni lì arzìirzɛ̀. È hwɛni lì hwɛ hviyayi, ndèŋgànɛlɛ è hwɛni lì àjùlɛ̀.

2 Tɛ̀rzàlonìyà 3:14

È hwèlì tɛ nanù ema o hwèlì mòtò ema a rza emelɛ o lì oŋgàma màmɛ ema e tìlahwì o tenì ya ene kààtì, e mo ika mìirzɔ. È rzi hwɛnɛ tɔ̀ eyà o lì mo gbeyàna, aŋga nanù oma à mà enya.

1 Yòwanìrzɛ̀ 3:17

Tɔ̀ njɛnɛ ema a ohvi erzàŋgo rzi a ɛnɛ ŋmanyàŋgò wa eni a endèli rzìi a rzi mo hwɛneya ŋmèma mo ììlì o lì mo oŋgòhwànà, nɛ rzɔ mɔ̀ à tanɛyi lì ohwa nanù ema a lìŋgàni Lohwɛ̀ e?