2 Kɔ̀rintìyà 6:9 - Mokpwe: Bakwery (New Testament)

⁹ Hwatò hwa jo hwi kɔ̀yi-kɔ̀yi ndi hwanɛyi hwa jo ɛnɛ ndi nàa hwèèti hwe hwatò. Hwatò hwa lùtèyà ndi nanù ema i rza o hwɛ o lòŋgɛ, ndi tɔ̀ nanù i hwèlì lòŋgɛ. I hwèlì lì luwa mètàkà o màa hwatò, tɔ̀ nɛ hwa rza jo òŋwa.

2 Kɔ̀rintìyà 6:9 Mawu Ofanana

Hwègbèèlì 17:18

Hwàtò ema hwà mà hwɛ ò ehvehva ema e ma hwɛ̀lɛ̀hwɛ̀ Èpìkòlìyànì na Rzìtɔ̀yìkì, wɔ hvɛ hwà mà wòteyà ò lì taa e hvenda na mɔ̀. Lòŋgò la awu hwà mà ijòwa nanù ema, “Mamɛ hvɛ ene ema tɔ̀ ònò hvɛ ema a rza òkòwɛ a arza ò lì òhwa e?” Hwahvɛhvɛ hwatò hwà mà òhwa nanù ema, “È gbèyi ndi nàa ò a ɛnɛ ema mɔ̀ à òhwa ndi ò lì hvòmɛ̀nɛ̀ mahvɛhvɛ mòhwà ma hwàyɛ̀nì.” Wɔ̀ hwà mà òhwa ndi nanù èhwanja Pàwolò à mà hwɛ lì òhwa lì hvòmɛ̀nɛ̀ ŋmɛ̀ndì mò gbamù mò ama Yerzù na hwèhvùmùwèlì.

Hwègbèèlì 19:26

O naŋgɛ rzɔ, inyɔ hwiti e ma ɛni, na lì hweyà eyà ema ònò mòtò Pàwolò a gbeyà. Mɔ̀ a òhwa nanù ema mòhwa ema mà wòndɛhwɛyi na màà mà hwatò hwa hwènàmà ma rza enje mòohwa. Ndeŋgànɛ̀lɛ̀ mɔ̀ à mà gbeyà rzayi-rzayi ja hwatò e ma hwa hwèlì ò Ɛ̀hvɛ̀rzɔ̀rzì na hwèrzòòkà hwe arzɛ hwe Èrzìyà, hwa lòkɛ̀ nanù ema hweyà ema mɔ̀ à òhwa hwe hwèlì ndi e jɔ̀kɛ̀.

Hwègbèèlì 25:19

Ndi wɔ̀ hwà mà òhva ndi mbùnakɛ̀ na mɔ̀ ò lì hvòmɛ̀nɛ̀ lì lòkɛ̀ la awu na mòtò mɔ̀kɔ ema a hwɛ̀lɛ̀hwɛ̀ Yerzù, ema à mà màa lì ŋwa, ndi mɔ̀ Pàwolò a òhwa nanù ema òŋgò mòtò a e hwèlì lòŋgɛ̀.

Hwègbèèlì 25:26

Ndi ò jɔ̀kɛ̀ na rza òhvi tɔ̀ lìtiŋga la eyà ò lì tìla ò itita ò lì òmeya Kàyìrzà ò lì teŋgɛ̀nɛ̀ Pàwolò. O èŋgànɛ̀lɛ̀ ò naŋgɛ na e jànelì e mɔ̀ ò marzò ma anyù, rzɛ̀hvɔ̀nì ò wòrzò wò aŋgɔ̀ Kìŋgɛ̀ Agrìpa, aŋga nanù ò mburza hweyàrzìrzèlì hwe anyu, na ò hwɛnɛ eyà ya lì tìleya Kàyìrzà.

Ròmànì 15:19

Nà ma gbeyà ndi hwene hweyà ò ŋginyà ya hweembànèlì na mànyakà na e ŋginyà ya Èlìŋgɛ̀ ya ama Lohwɛ̀. O eŋgànɛ̀lɛ̀ rzɔ, lì anjiya ò e mbòwa ya Jèrurzalɛ̀mù natɛ̀ɛ na ò erzòòkà ya Ilìlìkumi, nà mà òhwa Ŋmɛ̀ndì mò Gbamù mò ama Krirztò gbamù.

Ròmànì 8:36

Nà òma è kààtì yà Lohwà è òhwi nanù ema, “Hwatò hwa hwèlì hwa jò òŋwa hvònda tɛ ò nyòla inyɔ. Hwa jò ɛnɛ ndi nàa mɛ̀lɛ̀ŋgù ema mè timbawi ò lì òŋwahwa.”

1 Kɔ̀rintìyà 11:32

Ndi i kàyìrzɛ̀hwɛ tɛ na lì kɔ̀kìrzɛ̀hwɛ̀ na e Rzàŋgo, i rza kɔ̀kìrzɛ̀hwɛ̀ na ene rze.

1 Kɔ̀rintìyà 15:31

Ìi wònyàmowe, imba na tɛ̀mɛ̀ o worzò wo kpelì wùnyà tɛ. Hwèkòòwà ema na e ohvani, na oma e hwèlì mòtò mɔ̀kɔ na Yerzù Krirztò, e Rzàŋgo ya arzu hwe ɔ̀ndi hwe gbeyà a na ohwa ene eyà.

1 Kɔ̀rintìyà 4:9

Ène eyà yɔ ndi Lohwɛ̀ a jo ŋgbelì irzɔ I àpɔ̀rzìtòlò o lì hwɛ nàa hwatò ema i rza ohvɛ wòlìtò. I hwèlì ndi nàa hwatò ema hwa akɛ̀lɛ̀hwɛ̀yì e mbako nanù ema hwa ŋwa o ewòkà. Nà ohwa ndi ene eyà nanù, èhwanja hwatò hwa arzɛ nà i aŋgèlì hwa jò inja ò lì ɔ̀ŋgɔ mamɛ è ò jò gbèyɛ̀nɛ.

2 Kɔ̀rintìyà 11:6

Nà tànɛyi na rzi hwiye o lì ohwe o ìtììtènì ja hwatò na oma wɔ hwa ohwa, ndi imba na rzɔŋgìtɛ̀nɛ̀ hweyà hwe arzɛ ema imba na ohwa. I ma e tɛlɛlɛ hwene hweyà hwe arzɛ ema i gbeyà.

2 Kɔ̀rintìyà 4:2

I rzɔnjɛ̀lɛ̀ hwègbèèlì hwe arzu hwe wùndɛ̀ ja wòhwe, na hweyà ema hwe jànà ìrzɔnì. I rza e lùkɛ̀lɛ̀ na jòòhwì ja arzu ja wàna tɔ̀ lì tìkòwà e mbɔrzi ya Lohwà o lì e ɔnjɔ. Ndi jo òkolɛ hwatò Eyà ya Lohwɛ̀ nyayi ema hwa e rzɔŋgìtɛ̀nɛ̀. Nà oma jo òkolɛ Èya yà Lohwà na ŋmèma mɔ̀kɔ, tɔ̀ mòtò a rza tànɛyi lì ohwa o ŋmèma mo eni nanù ema i mo lukɛlɛ ndi lì lukɛlɛ. Irzɔ i hwi nanù ema Lohwɛ̀ a hwi tɔ̀ mamɛ ema i gbeyà.

2 Kɔ̀rintìyà 5:11

Nà oma i hwi nanù ema e Rzàŋgo e o kàyìrzɛ̀ hwatò, ndèŋgànɛlɛ hvɛ na oma i mo ŋgba èluhwe, i keka o lì gbeyà nanù ema hwatò hwa hwiye nanù ema ŋmɛ̀ndì i hwa ohweyà mo hwèlì ndi e jɔ̀kɛ̀. Lohwɛ̀ a hwi i nyayi ja hwatò ema irzɔ i hwèlì, imba hvɛ na hwi nanù ema inyɔ hvɛ e hwi i nyayi ja hwatò ema irzɔ hvɛ i hwèlì, na lòkɛ̀yi hvɛ nanù ema inyɔ e hwi nanù ema, jo òhwa ndi e jɔ̀kɛ̀.