1 Tìmotì 6:4 - Mokpwe: Bakwery (New Testament)

⁴ Hwàŋga hwatò hwa ondi na kumba ndèŋgàna hwa rza hwi tɔ̀ eyà. È nyayi ema hwaŋga hwatò hwa lìŋgàni hwèhvèŋgòwèlì hwe mbɔrzi na mòtaŋgo e gbèyi ndi nàa nyàmbɛ na wɔ̀. Ène eyà e hwa jànelì inona o ìtììtènì ya awu, mòhvùŋgu, hwatò hwa ohwa wòhwe lì teŋgɛ̀nɛ hwahvɛhvɛ hwatò, ndèŋgàna hwa a ohvanɛ màlùtèyà ma wòhwe lì hvomɛ̀nɛ̀ mɔ̀kɔ na ɔ̀nɛyi.

1 Tìmotì 6:4 Mawu Ofanana

Hwègbèèlì 15:2

Ène eyà e ma jàneyà Pàwolò na Bànàbàrzì hvenda ndɛnɛ natɛ̀ɛ wɔ hwà mà imanɛlɛ nanù ema Pàwolò, Bànàbàrzì na hwahvɛhvɛ hwatò hwa ɛndɛ ò Jèrurzalɛ̀mù, ò lì ɛndɛ lì ɛnɛ i àpɔ̀rzìtòlò na hwàtimbèlì hwa ŋmèmba lì hvòmɛ̀nɛ̀ ene eyà.

Hwègbèèlì 18:15

Kanatɛ e hwèlì ndi eyà ya hvenda lì teŋgɛ̀nɛ̀ e mbɔrzi, mìinà na e mbenda ya anyu, inyɔ hwiti e kulɛ mònò mòtaŋgò. Imba na rza kàyìrzɛ̀ ene nyayi ya ŋmàŋgò.”

Hwègbèèlì 8:9

Nàŋgɛ rzɔ ò mà hwɛ munyanà mɔ̀kɔ ò eŋge mbòwa, ema lìinà là eni lì mà hwɛ ndi Rzimɔ̀ni, à mà hwɛ lì gbeyà hweyà hwe mànyakà nà è ŋginyà yà eni yà mèrzòmba ò eŋge mbòwà ndɛ̀nɛ. Ndèŋgànɛ̀lɛ̀ mɔ̀ à mà tàmìrzɛ̀ hwatò hwa arzɛ hwa eŋge erzòòkà yà Rzàmàrìyà. À mà hwɛ lì ayèkìrzɛ̀ nanù ema tɔ̀ mòtò à rza mò uki.

Ròmànì 12:16

È awòhwànɛ̀ wàna hvɔ̀kɔ mɔ̀kɔ na ɔ̀nɛyi. È rzi ayèkirzɛ̀. È hwɛ mbunda na hwatò ema hwa rza òhvɛ hwetɛmelì ema hwe kàrzamì. Inyɛ̀ tɔ̀ mòtò a rzi ɔ̀ŋgɛ̀lɛ̀ nanù ema mɔ̀ à hwɛni lìhwiyè rzayi-rzayi.

Ròmànì 13:13

Inyɛ̀ i hwɛnɛ hwɛ̀ɛ̀mɛ̀ hwe gbamù nàa hwatò ema hwa hwèlì ò ŋmàye. È rzi ɛndɛ ò indèma ema hwatò hwa nyɔ mimba rzi hwa wòma, i rzi hwɛnɛ nyìrzɛ̀ ya mòrzònje. È rzi gbeyà hweyà hwe ndɔ̀ki. È rzi tɔ̀wɔ ndèŋgànà e rzi hwɛnɛ inòna.

Ròmànì 14:1

È emeyà hwatò hwa arzɛ ema lìlòkɛ̀ la awu lì ɔtɔ̀wù, e rzi keka lì tɔ̀wɔ na wɔ̀ lì hvòmɛ̀nɛ̀ hweŋge hweyà hwe arzɛ ema hwa lutelì nanù ema hwa àŋgàmɛ̀nɛ̀ lì gbeyà na hweŋge ema hwa rza àŋgàmɛ̀nɛ̀ ò lì gbeyà.

Ròmànì 2:8

Hwahvɛhvɛ hwatò hwa hwèlì ikuka ndèŋgànɛ̀lɛ̀ hwa rza gbeyà hweyà hwe jɔ̀kɛ̀, wɔ hwa gbeyà ndi hweyà hwe wòhwe. Inì nyayi ja hwatò Lohwɛ̀ a ò hwa uŋmɛ̀lɛ̀ hwètàtò hwe eni ò lì hwa kɔ̀kìrzɛ̀.

1 Kɔ̀rintìyà 11:16

Ndi mòtò a arza tɛ lì tàànà ene eyà hvenda, mamɛ ya arzɛ na hwɛnì lì ohwa e hwèlì ndi nanù ema irzɔ tɔ̀ miitelì me arzɛ i rza ohvi ehvɛhvɛ ɛ̀ɛ̀mɛ̀ ya lì kanɛ̀ Lohwà.

1 Kɔ̀rintìyà 11:18

Èya ya worzò e hwèlì ndi ema, na ohwayɛlɛyi nanù, ema, e aùŋmanɛ tɛ o lì kanɛ̀, o hwèlì lì akahwanɛ̀ o ìtììtènì ja anyu. Nà e jɔ̀kɛ̀ na lòkɛ̀ ene eyà teŋyi.

1 Kɔ̀rintìyà 3:18

È hwɛmɛ lì alukɛlɛnɛ la inyɔ hwiti. È hwèlì tɛ ema mɔ̀kɔ wa anyu, a ɔ̀ŋgɛ̀lɛ̀ nanù ema a hwɛnì lìhwiyè o ene rze, inyɛ a àtimbirzɛ mɔ̀ ŋmìti èèti ya mòtò, oma à mà lùwa lìhwiyè.

1 Kɔ̀rintìyà 3:3

Èhwanja e hwèlì e nɔ̀ŋgɔ ndi hweyà hwe e nyàmà yà nyo. È a ohvanɛyi inona mɔ̀kɔ na ɔ̀nɛyi. È tɔ̀wɔ hvɛ metaŋgo mɔ̀kɔ na ɔ̀nɛyi. Rzeke hwenè hweyà hwe uŋmɛ̀lɛ̀ nanù ema hwègbèèlì hwe wòhwe hwe e nyàmà ya nyo hwe hwèlì hwe e kànèyà e? Rzekè inyɔ e hwèlì e lìya ndi nàa hwatò hwa ène rze.

2 Kɔ̀rintìyà 11:20

Tɔ̀ e hwɛ nanù ema mòtò a e timbirzɛ tɛ ndi nàa mòkòme, tɔ̀ e hwɛ ndi ema a e laanà, tɔ̀ e hwɛ ndi ema a e ɔnjɔ, tɔ̀ e hwɛ ndi ema a e ndinda, tɔ̀ e hwɛ ndi nanù ema a e rzamì lùumbɛ̀ o worzo, e mo emeyà.

Gàletìyà 5:15

Ndi e rza ahweyànɛlɛ tɛ rzi e anana mɔ̀kɔ na ɔ̀nɛyi o a ɛnɛ oma e hwèlì ndi nyàmà ja wàŋga e aŋgowe. È rza aŋgo tɛ nanù oma e hwɛni lì àwòŋwànɛ̀yì mɔ̀kɔ na ɔ̀nɛyi.

Gàletìyà 5:26

I rza hwɛni lì a ekirzɛ, i rza hwɛni lì ahvikowanɛ, tɔ̀ lì a ahwɛnɛnɛ inona.

Gàletìyà 6:3

Tɔ̀ ima mòtò ema a lùtèyà nanù ema mɔ̀ ndi à hveti, a à lukɛlɛ ndi mɔ̀ ŋmìti. Èŋge tumba mòtò e rza enje tɔ̀ mòtò.

Hvìlipìyà 1:15

O lì ohwa la jɔ̀kɛ̀, lòŋgo la hwatò hwa ohwa lì hvomɛ̀nɛ̀ Krirztò ehwànja hwa no nonelì ndèŋgànɛlɛ wɔ hwa arza lì awuŋmɛ̀lɛ̀ nanù ema wɔ̀ hwa hwɛni wòlìto lì no aka, ndi loŋgo la awu hwa ohwa moŋgo ŋmɛ̀ndì mò gbamù na mèèmà me gbamù.

Hvìlipìyà 2:14

È gbeye hweyà hwe arzɛ e rzi hwɛ lì àyiŋgòwɛ̀ tɔ̀ o lì kɔɔ hvènda.

Hvìlipìyà 2:3

È rzi gbeyà hweyà ema hwe uŋmɛ̀lɛ̀ nanù ema e hwe gbeyà ndi o lì hwɛ gbamù. È rzi gbeyà hvɛ hweyà ema hwe uŋmɛ̀lɛ̀ nanù ema e awòwɛ̀. Ndi na lì arzihwirzɛ la anyu la arzɛ inyɛ e ɛnɛ hwahvɛhvɛ hwatò wòlìto lì aka inyɔ hwìtì.

Kòlòrzìyà 2:18

È rzi keka o lì emeyà nanù ema tɔ̀ mòtò a e tindɛlɛ nanù ema e àŋgàmɛ̀nɛ̀yi lì arzìirzɛ. Ndeŋgànɛ̀lɛ̀ e rzi keka lì emeyà nanù ema tɔ̀ mòtò a e tindɛlɛ nanù ema e àŋgàmɛ̀nɛ̀yi lì kànɛ i aŋgèlì nàa oma mɔ̀ à ji kànɛ. Inyɔ e gbèyi tɛ nanù e wɔ̀lɛnɛ jàhwèyà ema Lohwɛ̀ a ohwi nanù ema a e ŋgba. Tɔ̀ njɛnɛ ema a okòlɛ nanù, a ohwa ndi nanù ema a ɛni jɛ̀nɛ̀ni. Èŋge tumba mòtò e ohvi ndi kumba ya ŋgundu na hweyà hwe wòhwe ema hwe wurza o ŋmèma mo eni, a rza ohvi tɔ̀ lìtiŋga o lì uŋmɛ̀lɛ̀.

2 Tɛ̀rzàlonìyà 2:4

Mɔ̀ à ò teŋgɛ̀nɛ̀ tɔ̀ ima yoma ema è hwɛ̀lɛ̀hwɛ̀ lìinà nanù ema lohwà, tɔ̀ enìmìnìmì ema hwa kànɛ̀lɛ̀lɛ̀, rzìi à ò akàrzɛ mɔ̀ ŋmìti ò lì hwa aka. À ò kpèeyà, rzìi a o lìya tɔ̀ ò tenì yà è ndawò yà Lohwà, rzìi à ahwɛlɛ mɔ̀ ŋmìti nanù ema à hwèlì ndi Lohwɛ̀.

1 Tìmotì 1:4

È rzìi emeyà hwaŋga hwatò ò lì ohwa mɛɛndi ema me rza enje jɔ̀kɛ̀ na mɛɛndì ema me ohwa hweyà lì hvomɛ̀nɛ̀ imbamba ja awu ema mòtò a rza tanɛ lì aŋga mɔ̀rzɔ̀ŋgi. Hwa okolɛ tɛ iŋgi nyayi ja mɛɛndì, me jànà hvenda, me rza oŋgowàna hwatò ò lì lìya lòŋgɛ ema e uŋmɛ̀lɛ̀ nanù ema hwa lòkɛ̀ Lohwɛ̀.

1 Tìmotì 1:7

Hwàŋga hwatò hwa ohvi ndi mèèmà me lì hwɛ hwà-òkòlèlì hwa e mbenda ya ama Lohwɛ̀. Ndi wɔ̀ hwa rza rzɔ̀ŋgìtɛ̀nɛ̀ hweyà ema hwa ohweyà hwatò, ndèŋganɛlɛ wɔ̀ hwa rza rzɔ̀ŋgìtɛ̀nɛ̀ hweyà ema hwa ohwa nanù ema hwa hwi.

1 Tìmotì 3:6

A rza àŋgàmɛ̀nɛ̀yi ndi lì hwɛ mòtò ema a rzi ku mbɔ, o lì lòkɛ̀ Krirztò, ene e tànɛyi lì mo gbeyà ema, ayèkirzɛ, o lì kpa, na o lì luwa kɔ̀kìrzɛ̀ molemilemi na oma Mòkarzɛ̀ à mà kpe rzìi a luwa kɔ̀kìrzɛ̀.

2 Tìmotì 2:14

O hwɛ ndi o lì ɔ̀ŋgɛ̀lɛ̀nɛ hwaŋga hwatò ema hwa lòkɛ̀ hwene hweyà, o hwa kòkòwɛ̀lɛ̀ o worzo hwa ama Lohwɛ̀ nanù ema, hwa rza akanjɛnɛ mɔ̀kɔ na ɔ̀nɛyi lì hvomɛ̀nɛ̀ eyà ya Lohwà. Ène nyayi ya hvenda e rza oŋgowàna, ndi e hvàŋga lìlòkɛ̀ la hwaŋga ema hwa e òkànèyà.

2 Tìmotì 2:23

O rzɔnjɛ̀lɛ̀ e mbɔrzi ya hvenda ya èèti ema e rza oŋgowàna tɔ̀ mòtò tɔ̀ eyà. O hwi nanù ema e hvenda ndi e jànà mòtaŋgo.

2 Tìmotì 3:4

Hwa o hwɛ hwatò ema hwa o àhwirzɛ̀ imbunda ja awu, hwatò hvɛ ema hwa lìya lòŋgɛ la mooŋgoŋgo, hwatò ema hwa ondi na kumba, na hwaŋga hwatò ema hwa lìŋgàni hweyà hwe ene rze lì aka hweyà hwe ama Lohwɛ̀.

Tàyìtùrzì 3:9

Ndi inyɔ e rza alɛ̀mbɛ̀nɛ hvenda ya èetì, o lì ohwa nɛ inyɔ̀ŋgɔ̀nì i ma wòteyà. È rzɔ̀njɛlɛ ihvenda, na metàŋgo lì hvomɛ̀nɛ̀ e mbenda ya wònyà Yudà. È rza akakumɛnɛ hwene hweyà ehwànja, hwe hwèlì ŋgandì ndeŋgànɛlɛ hwe rza ohvi tɔ̀ mɔ̀rzɛ̀ŋgi.

Jèmìrzì 1:19

Wònyànyàŋgo hwa ami kòkò, e ɔ̀ŋgɛ̀lɛ̀ hwene hweyà. Tɔ̀ ima mòtò a àŋgàmɛ̀nɛ̀yi lì wàmirzɛ o lì okànèyà mamɛ ema ohvɛhvɛ mòtò a ohwa, tɔ̀ mòtò a rza àŋgàmɛ̀nɛ̀ lì wàmirzɛ o lì ohwa tɔ̀ eyà, tɔ̀ mòtò a rza àŋgàmɛ̀nɛ̀ lì wàmirzɛ o lì tààtà.

2 Pètrò 2:12

Ndi hwaŋga hwà-òkòlèlì hwa mòlaŋgà, hwa gbeyà ndi hweyà ò màlùtèyà mà awu, nàa nyàmà jà waŋga. Iŋgi nyàmà ja waŋga ì ŋyàhwɛlɛyì ndi ò lì lɛ̀mbɛ̀hwɛ̀ nà lì oŋwahwa. Hwàŋga hwà-òkòlèlì hwa mòlaŋgà wɔ̀ hwa ohwa ndi hweyà hwe wòhwe ò tɔ̀ ima eyà ema hwa rzɔ̀ŋgìtɛ̀nɛ̀. Ò eŋgànɛ̀lɛ̀ rzɔ, Lohwɛ̀ à hwa nyɔ̀ŋgìrzɛ̀ nà oma hwatò hwa oŋwa iŋgi nyàmà jà waŋga.

2 Pètrò 2:18

Wɔ̀ hwa gbeyà jòòhwì jà kumba na èèti. Wɔ̀ hwa gbeyàna hweyàrzèlì hwe è nyàma nyo yà è mòtò wà hwènàmà ò lì lùkɛ̀lɛ̀ hwatò. Hwàto ema wɔ̀ hwa ɔ̀njɔ̀ɔ̀, hwa hwèlì ndi hwatò ema hwa mà wòteyà lì ulɛ̀ màtàŋga mà awu ò hwèlìyelì hwe hwatò hwa wòhwe.

Judɛ 1:10

Ndi hwaŋga hwatò ema hwa mà è kpèeyà ò ìtììtènì yà anyu, hwa ohwa wòhwe lì hvomɛ̀nɛ̀ hweyà ema hwa rza rzɔ̀ŋgìtɛ̀nɛ̀. Tɔ̀ mamɛ ema è hwa jɛ̀lɛ̀lɛ̀yi ò màlùtèyà mà awu, ɔndi hwa gbeyà. Wɔ̀ hwa gbeyà ndi hweyà nàa nyàmà ja waŋga. Hwèŋge hweyà mɛnɛ ndi hwe hwa jàneyà e kpelì.

Judɛ 1:16

Hwanù hwatò hwa lìyelì ndi ò lì arzàrzòwɛ ndeŋgànɛlɛ hwa hwɛlɛ hwahvɛhvɛ hwatò. Hwa oŋgama è nyɔ̀ŋgì yà awu yà wòhwe, hwa à èkìrzɛ̀, nà lì ohwàna jɛ̀ɛ̀mɛ̀ ema ì tɛ̀ɛ̀ aŋga nanù hwa luwànà hwatò hwèèmà.

Hwèwulùwèlì 3:17

Inyɔ e ohwa nanù ema, ‘È hwèlì ndi hwèwàŋgì, e ohvi hwèèmà hwe arzɛ, e rza takeya tɔ̀ yoma.’ Ndi inyɔ e rza hwi nanù ema e hwèlì ndi hwatò ema e taka rzayi-rzayi hwatò ema e okahwɛlɛ ìilì, hwatò ema e hwèlì mèlìrza, hwatò ema e hwèlì ndima ndèŋgànɛ̀lɛ̀ hwatò ema e hwèlì mèrzombo.