1 Tìmotì 6:18 - Mokpwe: Bakwery (New Testament)

¹⁸ O hwa ohweyà oma hwa a gbeyà gbaamù o lì oŋgowàna hwatò. Nà oma hwatò ema hwa ohvi wolì rzayi-rzayi hwa nàmà, hweyà hwe gbamù ema hwa gbeyà, hwe hwɛ ndi mònàmɛ̀ mo awu, ndèŋgàna hwa hwɛni lì hwɛnɛ mèèmà me nyɔ̀ŋgi ya lì oŋgowàna hwahvɛhvɛ hwatò na tɔ̀ mamɛ ema Lohwɛ̀ à mà hwa ŋgbɛ.

1 Tìmotì 6:18 Mawu Ofanana

Matiyò 5:42

O ŋgbe òŋgò mòtò ema à ò ɔ̀mbɔ̀, ndèŋgànɛ̀lɛ̀ hvɛ ò bàlɛ̀ òŋgò ema à arza lì ò bàlɛ̀nɛ̀.”

Lukàrzɛ̀ 12:21

Nànù ndi e hwɛnì lì hwɛ nà tɔ̀ njɛnɛ ema àwutɛ̀lɛ̀ mònàmɛ̀ ndi à rza nàmɛ̀ ò wòrzò wò ama Lohwɛ̀.”

Lukàrzɛ̀ 3:11

Yòwanìrzɛ̀ à mà alàhwɛ̀ nanù ema, “Tɔ̀ njɛnɛ ema à hwɛnì mèŋgòmbè mehwàkɛ a ŋgbè mɔ̀kɔ òma òŋgò ema à rza òhvɛ̀ɛ, òŋgò hvɛ ema à òhvi mòlelì a ŋgbè hwaŋga ema hwa rza òhvɛ̀.”

Hwègbèèlì 10:38

Inyɔ e hwi nanù ema Lohwɛ̀ à mà ɔ̀kirzɛ̀ Yerzù, è mòtò wà Nàrzàrɛ̀tì, rzìi à mò ŋgba Èlìŋgɛ̀ yà Wòtani nà è ŋginyà. Yerzù à mà hwɛ lì ɛndɛ ò èki yà arzɛ, rzìi a à gbeyà gbamù. Nà òma Lohwɛ̀ à mà hwɛ na mɔ̀, mɔ̀ à mà wɔ̀wìrzɛ̀ hwatò hwa arzɛ ema hwà mà hwɛ ò rze ya e ŋginyà ya ama Mòkarzɛ̀.

Hwègbèèlì 11:29

O èŋgànɛ̀lɛ̀ hwà-òkòwèlì ò lì atanɛ la awu, wɔ̀ hwà mà tɛ̀yirzɛ̀ nanù ema tɔ̀ ima mɔ̀kɔ wa awu a ò òma lìwòŋgò ò hwatò ema hwa lòkɛ̀ Yerzù ò erzòòkà ya Jùdeyà.

Hwègbèèlì 9:36

O mbòwa ya Jopà ò ma hwɛ mòlòkèlì wa mòlanà ema à mà hwɛ̀lɛ̀hwɛ̀ Tàbità. (jànda ja lìinà la eni ò mbɔrzi ya Grìki lì hwèlì ndi Dɔ̀kàrzì eŋge ŋgàna e hwèlì ndi ìrzɛ̀wù). Onò mòlanà, à mà akɛlɛ e hvònda ya eni ya arzɛ ò lì gbeyà hweyà hwe gbamù na ò lì òŋgòwànà mèlìrza me hwatò.

Ròmànì 12:13

O ìtììtènì ja anyu ja hwatò hwa ama Krirztò, e hwèlì tɛ ema mɔ̀kɔ wa anyu a endèli tɛ yòma, e mɔ̀ ema a e òhvi inyɛ a mò ŋgbe e yɔ. Tɔ̀ njɛnɛ ema a e jɛlɛlɛ nàa ŋmɛ̀nì e mò karzɛ gbamù.

Ròmànì 12:8

Mòtò ema a hwɛni jàhwèyà ja lì kɔ̀mɛlɛ hwatò, inyɛ mɔ̀ à hwa kɔ̀mɛlɛ. Tɔ̀ njɛnɛ hvɛ ema a ŋgba hwatò hwema, a hwa ŋgbaane na eenji. È mɔ̀ hvɛ ema a hwɛni jàhwèyà ò lì timba hwatò, inyɛ a hwa timbe kɔ̀yi-kɔ̀yi. È mòtò hvɛ ema a òhvi jàhwèyà ja lì uŋmɛ̀lɛ̀ hwatò ììlì, inyɛ a uŋmɛ̀lɛ̀ hwatò ììlì na màlìŋgò.

1 Kɔ̀rintìyà 16:2

Tɔ̀ ima eyu ya Màrzo Lìrzàmba tɔ̀ ima mɔ̀ wa anyu a ulɛ ŋmanà wolì a ute. Wono wolì wo hwɛ ndi o mamɛ ema tɔ̀ ima mòtò a lu. È gbèyi tɛ nanù o rza hwɛ hvɛ mòrzàŋgèlì mo wòlì nà jelì tɛ.

2 Kɔ̀rintìyà 8:12

È hwɛnì tɛ nyɔ̀ŋgi ya lì ŋgbà mòtò yoma na oma e ohvi, e emànɛ̀lɛ̀hwɛ̀yì na Lohwɛ̀. Lohwɛ̀ a rza arza nanù ema mòtò a ŋgbe lì aka mamɛ ema a ohvi.

2 Kɔ̀rintìyà 8:9

È hwi na oma e Rzàŋgo ya arzu Yerzù Krirztò a e oŋgòhwànà o lì hwɛ enji. Tɔ̀ ima lìtumba la yòma ema Lohwɛ̀ a hwɛnì, mɔ̀ Yerzù ndi à e hwɛni. Ndi tɔ̀ nanù o nyòla ya anyu à mà hwɛmɛ eŋge ehwàŋgì ya eni ya arzɛ o ŋmanyu rzìi a rzihwa anù rze nàa mòtakèlì wa mòtò. A ma gbeyà ndi nanù o lì arza nanù ema inyɔ e luwe mònàmɛ̀ ema Lohwɛ̀ a ŋgbà hwatò.

Gàletìyà 6:10

O èŋgànɛ̀lɛ̀ rzɔ, tɔ̀ ima hvonda ema i lu o lì gbeyà gbamù, inyɛ i wo gbèeyà tɔ̀ ima mòtò, rzɛ̀hvɔ̀nì wònyàmòwe hwa Krirztò.

Ɛ̀hvìrzìyà 4:28

Hwàyihwɛ̀ hwa hwɛmɛ lìihwa. Ndi tɔ̀ nanù hwa gbeyàne màà mà awu o lì gbeyà èwòlò na ŋmèma mɔ̀kɔ. Aŋga nanù, hwa luwa yoma ema hwa tànɛyi lì oŋgowàna hvɛ mèlìrza me hwatò.

1 Tìmotì 5:10

Moŋgo mokurze mo molanà mo hwɛni ndi lì hwɛ molanà ema a hwiyɛnɛyi o hwègbèèlì wa eni hwe gbamù. A àŋgàmɛ̀nɛ̀yi ndi lì hwɛ molanà ema à mà màa lì woŋgohwa hwàànà gbamù, a kàrzɛ hwàyɛ̀nì gbamù o ndawò ya eni, a hwɛni lì arzìirzɛ, ema à mà gbèeyà hwatò hwa Lohwɛ̀ nyayi ema à mà hwɛ lì rzorza matàŋgà mà awu. A hwɛni hvɛ ndi lì hwɛ molanà ema à mà oŋgowanɛ hwatò ema hwà mà hwɛ o ndùtù, ndèŋgàna a hwɛni hvɛ lì aŋgbɛ ŋmìti o hwègbèèlì hwe gbamù.

Tàyìtùrzì 2:14

Yerzù Krirztò à mà aŋgbɛ mɔ̀ ŋmìti o lì jo kɔ̀tɔ̀ o wòhwe wo arzu wo arzɛ. A ma jo gbèeyà o lì hwɛ hwatò ema hwa hwèlì wòtani, ndèŋgànɛ̀lɛ̀ à mà jo gbeyà o lì hwɛ hwatò hwa eni mɛnɛ, ema hwa ohvi e nyɔ̀ŋgi ya lì gbeyà hweyà hwe gbamù.

Tàyìtùrzì 3:8

Hwène hweyà hwe arzɛ ema nà mà ohwɛ hwe hwèlì ndi e jɔ̀kɛ̀. Nà arza ema e ùkirzɛ̀lɛ̀lɛ̀ hwene hweyà nɔ̀ke-nɔ̀ke aŋga nanù, hwaŋga ema hwà mà lòkɛ̀ Lohwɛ̀ hwa o aŋgowa o lì aŋgbɛ wɔ̀ hwiti o lì gbeyà mamɛ ema e hvomɛ̀nɛ̀. Nànù ndi i gbeye ndèŋgànɛ̀lɛ̀ nanù ndi hwe jànà hwatò hwa arzɛ mɔ̀rzɛ̀ŋgi.

Hibrù 13:16

È rzi hvoŋga hvɛ o lì gbeyà gbamù, na o lì òŋgòwàna hwahvɛhvɛ hwatò ema hwa hwèlì o lìtake. Tɔ̀ mamɛ ema mòtò a ohvi inyɛ a e gbeyàne o lì oŋgowàna mɔ̀kɔ na ɔ̀nɛyi. Màhweyà manù ema mà lìŋgìrzɛ Lohwɛ̀.

Jèmìrzì 2:5

Wònyànyàŋgo wa ami kòkò, e okànèyà. Rzeke e hwèlì ndi e jɔ̀kɛ̀ nanù ema Lohwɛ̀ mɔ̀ à mà màa lì hvɔ̀rzɔ̀ mèlìrzà me hwatò ema hwa hwɛ hwàlòkèlì hwa ama Krirztò e? Ndèŋgànɛlɛ lìŋgi lì lòkɛ̀ ndi lì hwèlì mònàmɛ̀ mo awu, ndèŋgànɛ̀lɛ mɔ̀ à mà hwa hvɔ̀rzɔ̀ nanù ema wɔ̀ ndi hwa hwèlì hwatò ema hwa o hwɛ lìkànèyà la eni. Ndeŋgànɛlɛ lìŋgi lìkànèyà ndi mɔ̀ à ohwi nanù ema, mɔ̀ à ŋgba hwatò ema hwa mo lìŋgàni.

1 Pètrò 3:11

Inyɛ̀ mɔ̀ à hwɛmɛ o lì gbeyà wòhwe a à gbeyà ndi hweyà hwe gbaamù. A àŋgàmɛ̀nɛ̀yi lì keka lì hwɛ o ɛ̀yɔ̀lɛ̀ na hwatò hwa arzɛ.

1 Yòwanìrzɛ̀ 3:17

Tɔ̀ njɛnɛ ema a ohvi erzàŋgo rzi a ɛnɛ ŋmanyàŋgò wa eni a endèli rzìi a rzi mo hwɛneya ŋmèma mo ììlì o lì mo oŋgòhwànà, nɛ rzɔ mɔ̀ à tanɛyi lì ohwa nanù ema a lìŋgàni Lohwɛ̀ e?

3 Yòwanìrzɛ̀ 1:11

È mbunda ya ami kòkò, o rza embàneyà wòhwe ema hwatò hwa gbeyà, ndi o embàneyà hweyà hwe gbamù ema hwatò hwa gbeyà. Tɔ̀ njɛnɛ ema a gbèyi gbamù e uŋmɛ̀lɛ̀ ndi nanù ema a hwèlì ndi e ŋmanà wa ama Lohwɛ̀. Tɔ̀ njɛnɛ hvɛ ema a gbeyà wòhwe, wòhwe wo eni wo uŋmɛ̀lɛ̀ ndi nanù ema mɔ̀ à rza hwi Lohwɛ̀.