1 Tìmotì 6:16 - Mokpwe: Bakwery (New Testament)

¹⁶ Mɔ̀ ndi hvɛ a hwèlì e mɔ̀ mɛnɛ ema a hwɛni e ŋginyà o lì hwɛ natɛ̀ɛ na o gbìndèyà, mɔ̀ ndi hvɛ a hwèlì ŋmàye ema mo mɔ̀tɛ̀lɛ̀ rzayi-rzayi ema tɔ̀ mòtò tɔ̀ mɔ̀kɔ a rza tànɛyi lì kombɛnɛ. Mɔ̀ ndi à hwèlì e mɔ̀ ema tɔ̀ mòtò a rza ɛni. Ndèŋgàna tɔ̀ mòtò tɔ̀ mɔ̀kɔ a rza tànɛyi lì mo ɛnɛ. Èluhwe e hwɛ na mɔ̀ ndèŋgàna mɔ̀ à o hwɛ ndi o lìkànèyà natɛ̀ɛ na o gbìndèyà. Inyɛ̀ wo lìya nanù.

1 Tìmotì 6:16 Mawu Ofanana

Yòwanìrzɛ̀ 1:18

Tɔ̀ mòtò à rzi ɛni Lohwɛ̀ tɔ̀ wùnyà lì aka tɛ ehvòwà yà eni yà ŋmanà ema è hwèlì ò ŋmanyu yà Lohwà ò tòŋgòŋgò yà eni. Mɔ̀ ndi à jò wùlùhwèlì Tatà Lohwɛ̀.

Yòwanìrzɛ̀ 14:9

Yerzù rzìi a mò alàhwɛ̀ nanù ema, “Ìi Hvìlìpì, ò rza nò hwi e? Tɔ̀ nɛ na hwèlì ò ìtììtènì ja anyu ene hvònda ya arzɛ e? È mɔ̀ ema à mà nò ɛnɛ, à mà ɛnɛ Tatɛ̀. Nɛ rzɔ ò wa ò tànɛyi lì tɛ̀mɛ̀ nàŋgɛ rzìi ò òhwa òma, ‘O jò uŋmɛ̀lɛ̀ Tatɛ̀ e?’

Yòwanìrzɛ̀ 6:46

È rza enje nanù ema mòtò à mà ɛnɛ Tatɛ̀. È mɔ̀ ema a uwɛ̀lɛ̀lɛ̀yi ò ma Lohwɛ̀, mò ŋmìti ndi à mà ɛnɛ Tatɛ̀.

Yòwanìrzɛ̀ 8:58

Yerzù rzi a hwa alàhwɛ̀ nanù ema, “Nà è òhweyà ndi è jɔ̀kɛ̀ ema, ndèŋgàna Abràhamù a e ŋyahwa, imba na hwèlì.”

Ɛ̀hvìrzìyà 3:21

Inyɛ̀ èluhwe è hwɛ nà Lohwɛ̀, èhwanja ò hweyà hwe ndɛnɛ ema à hwèlì lì gbèeyà. Hwene hweyà hwe ɛnɛ̀hwɛ̀ ò lì arzàŋganɛ là hwatò hwa Lohwà ndèŋgana hwe ɛnɛ̀hwɛ̀ ò hweyà ema Krirztò à gbèeyà. Èluhwe è hwɛ nà mɔ̀ ò ì hvonda jà arzɛ, ò gbìndèyà nà ò gbìndèyà. Inyɛ̀ wò lìya nanù.

Hvìlipìyà 4:20

Èluhwe è hwɛ nà Lòohwà là arzu, Tatɛ̀ hwa arzu natɛ̀ɛ nà ò gbìndèyà. Inyɛ̀ wò lìya nanù.

Kòlòrzìyà 1:15

Tɔ̀ mòtò à rza ɛni Lohwɛ̀ nà mììrzɔ̀ mà eni. Ndi hwatò hwa mà rzɔ̀ŋgìtɛ̀nɛ̀ njɛnɛ Lohwɛ̀ à hwèlì è hvonda ema hwa mà ɛnɛ Krirztò, ehwànja mɔ̀ ndi à akɛ̀nɛ̀ Lohwɛ̀. Mɔ̀ ndi à hwèlì ehvòwà yà ŋmanà ema à tɛmì ò ŋmanyu yà hwèèmà hwe arzɛ ema Lohwɛ̀ à mà wèkɛ.

1 Tìmotì 1:17

Ŋmàye nà èluhwe hwe hwɛ nà Lohwɛ̀ ò gbìndèyà nà ò gbìndèyà. Mɔ̀ ndi à hwèlì è kiŋgɛ ò gbìndèyà nà gbìndèyà. Mɔ̀ ndi à hwèlì è mɔ̀ ema hwatò hwa rza ɛni nà mììrzɔ̀ mà awu ndeŋgànɛ̀lɛ̀ à rza ŋwa. Mɔ̀ ŋmìti mɛ̀nɛ ndi à hwèlì Lohwɛ̀. Inyɛ̀ wò lìya nanù.

Hibrù 13:8

Yerzù Krirztò a hwèlì ndi molemilemi o i hvonda ja arzɛ. Nà oma à mà hwɛ ŋmɛlɛ ema wɔ̀ ma aka, nanù ndi à hwèlì yàwonò ndeŋgànɛ̀lɛ̀ nanù ndi à o hwɛ natɛ̀ɛ nà o mòlìkɛ̀.

Jèmìrzì 1:17

Tɔ̀ ima jàhwèyà ja gbamù nà tɔ̀ ima eyà ema e ondìrzɛhwɛyi gbamù, hwe uwɛ̀lɛ̀lɛ̀yi ndi o ma Tàtɛ ema a hwèlì o ŋmanyu yà lohwà. Tatɛ̀ ndi à weki hwèèmà hwe arzɛ ema hwe uŋmɛ̀lɛ̀ ŋmàye o ŋmanyu yà lohwà. Hwene hwèèmà hwe hvànya ŋmàye ndèŋgànɛ̀lɛ̀ mono ŋmàye mo ayèŋgowɛ̀ ndi Lohwɛ̀ a rza ayeŋgòwɛ̀.

1 Yòwanìrzɛ̀ 1:5

O nàŋgɛ, ŋmɛ̀ndì ema i ma hweyàne Yerzù Krirztò ndèŋgànɛ̀lɛ̀ je e ohweyà e mɔ̀ mo hwèlì ndi ema, Lohwɛ̀ ndi à hwèlì ŋmàye, ndèŋgànɛlɛ a rza ohvi tɔ̀ matò wa wòhwe o nyo ya ani.

1 Yòwanìrzɛ̀ 1:7

Ndi i hwɛni tɛ lòŋgɛ la ŋmàye, na oma mɔ̀ ŋmìti hvɛ a hwɛni, aŋga nanù i hwɛ mɔ̀kɔ na ɔ̀nɛyi, ndèŋgànɛ̀lɛ̀ màyija ma ama e ŋmanà wa eni Yerzù, ma jo rzàŋgìrzɛ̀ o wòhwe wo arzu wa arzɛ.

1 Yòwanìrzɛ̀ 4:12

Tɔ̀ mòtò à rzi ɛni à ɛnɛ Lohwɛ̀, ndi jà alìŋgànɛ tɛ mɔ̀kɔ nà ɔ̀nɛyi, eŋge ŋgànà e hwèlì ndi nanù ema Lohwɛ̀ a hwèlì o ìtììtènì ja arzu ndèŋgàna e ndìŋgɛ ya eni e o ondìrzɛ̀hwɛ̀ o ìtììtènì ja arzu.

Judɛ 1:25

Èluhwe ya arzɛ e hwɛ na mɔ̀. Mɔ̀ ŋmìti mɛnɛ ndi à hwèlì Lohwɛ̀, ema a jo rzùŋgà mòŋgɛ ma arzu o lì akeyà na hwègbèèlì hwe ama e Rzàŋgo ya arzu Yerzù Krirztò. Èluhwe, lì olowa, e ŋginyà, na màkànèyà ma arzɛ ma hwèlì ndi e ma eni, lì wòteyà o hwewotelì, o nàŋgɛ na o gbìndèyà. Inyɛ̀ wo lìya Nànù.

Hwèwulùwèlì 1:6

À jò gbèyi ì hwèlì ndi nàa Ipilìrzi ema i gbèeyà Lohwɛ̀ è Tatɛ̀ yà eni ema è hwa kànèyà. Inyɛ̀ èluhwe nà lìkànèyà là eni lì hwɛ ò gbìndèyà nà ò gbìndèyà. Inyɛ̀ wò lìya nanù.

Hwèwulùwèlì 1:8

Rzàŋgo Lohwɛ̀ lì karzamì à ohwi nanù ema, “Imbà ndi nà hwèlì è Àlhvà nà è Omèga,” mɔ̀ ndi à hwèlì Lòohwà ema lì hwèlì, ema lì mà hwɛ, ndèŋgànɛ̀lɛ̀ ema lì ò hwɛ̀ɛ̀.

Hwèwulùwèlì 21:3

Nà ma hweyà lìlo lì ndɛnɛ ema lì uwɛlɛlɛyi o konda ya lìkànèyà lì ohwa nanù ema, “È ɔŋgɔ̀ tɛ, o naŋgɛ èki ya hwèlìyelì hwe ama Lohwɛ̀ e hwèlì ndi na hwatò hwa hwènàmà! Lohwɛ̀ a o lìiya na wɔ̀ èki yɔ̀kɔ ndèŋgànɛ̀lɛ̀ wɔ̀ hvɛ hwa o hwɛ ndi hwatò hwa eni. Lohwɛ̀ a o lìiya èki yɔ̀kɔ na wɔ̀.

Hwèwulùwèlì 22:5

O rza o hwɛ hvɛ wuu. Wɔ̀ hwa rza o arza hvɛ tɔ̀ ètùlù tɔ̀ ŋmàye, tɔ̀ moombe mo igbèyi ehwànja Rzàŋgo Lohwɛ̀ a o hwɛ ŋmàye mo awu, ndèŋgànɛlɛ wɔ̀ hwa o kànèyà natɛ̀ɛ na o gbìndèyà.

Hwèwulùwèlì 4:11

“Ìi Rzàŋgo hwa arzu nà Lòohwà là arzu, ò àŋgàmɛ̀nɛ̀yi lì lùwa wonyàki, èluhwe nà màyìmbì, ehwànja ò wà ndi ò hwèlì è mɔ̀ ema à wèki hwèèmà hwe arzɛ, ndèŋgànɛlɛ ò lì emeyà là aŋgɔ hwe arzɛ hwe mà wèkàhwà nà lì hwɛnɛ hwèhwɛ̀ɛ̀lì hwe awu.”

Hwèwulùwèlì 7:12

Hwa mà hwɛ lì ohwa nanù ema, “Inyɛ̀ wò lìya nanù! Mònàmɛ̀, lì ekàhwà, lìhwiyè, jèka, èluhwe, màyìmbì nà ŋginyà inyɛ hwe hwɛ nà Lòohwà la arzu natɛ̀ɛ nà ò gbìndèyà! Inyɛ̀ wò lìya nanù.”