1 Tìmotì 3:3 - Mokpwe: Bakwery (New Testament)

³ Ène nyayi ya mòtò, a rza hwɛni lì hwɛ mòtò wa mboma, tɔ̀ mòtò ema a jànà mòhvùŋgu. Ndi a hwɛni ndi lì hwɛ mòto ema a hwèlì ŋmɛ̀ɛ na mòtò ema a rza tɔ̀wɔ mòtaŋgo, a rza hwɛni lì hwɛ mòtò ema a lìŋgàni wolì.

1 Tìmotì 3:3 Mawu Ofanana

Matiyò 21:13

À mà hwa òhweyà nanù ema, “È tìlahwì ema, Lohwà a òhwi nanù ema, ‘È ndawò ya ami e ò hwɛ̀lɛ̀hwɛ̀ ndi e ndawò ya màkanɛ̀.’ Ndi inyɔ ye e timbirzɛ ndi ‘Èki ema hwayihwɛ hwa utàmà.’”

Hwègbèèlì 20:33

Nà rzi òhve tɔ̀ nyɔ̀ŋgi ò lì wòwàna tɔ mòtò tɔ mɔ̀kɔ e rzìlìhwà tɔ̀ e gòòlù ya eni tɔ lìwɔti.

Ròmànì 16:18

È rzi keka lì hwa òŋgama èhwanja hwa rza gbèeyà ndi e Rzàŋgò ya arzu Krirztò, ndi hwa gbèeyà ndi nanù ò lì òndìrzɛ̀ e nyɔ̀ŋgi ya awu. Hwa gbeyàna e mbɔrzi ya awu ya gbamù na jòòhwì ja gbamù ò lì lukɛlɛ hwatò ema hwa rza rzɔ̀ŋgɔ lì rzɔ̀ŋgìtɛ̀nɛ̀.

Ɛ̀hvìrzìyà 5:18

È rzì woma mboma yà mimba, èhwanja mà è tìmbìrzɛ̀ ndi hwèèti hwe hwatò. Ndi tɔ̀ nanù, inyɛ Èlìŋgɛ̀ yà Wòtani e hwɛ o tenì ya anyu.

1 Tɛ̀rzàlonìyà 5:14

Ìi wònyàmòwe kòkò, nà je e ohweyà hvɛ nanù ema e kòkòwɛ̀lɛ̀ hwatò ema hwa hwèlì rzìŋgà nanù ema hwa àŋgàmɛ̀nɛ̀yi lì gbeyà èwòlò, e embɛ̀ hwaŋga ema hwa oka wɔ̀ŋgɔ̀, e oŋgowane hwaŋga ema hwa rza ohvɛɛ ŋginyà, e a àjùlɛ̀nɛ̀ mɔ̀kɔ na ɔ̀nɛyi.

1 Tìmotì 3:8

Hwatò ema hwa oŋgowàna o lì gbèeyà èwòlò ò ŋmèmba hwa hwɛni ndi lì hwɛnɛ ɛ̀ɛ̀mɛ̀ ya gbamù na o lì hwɛ hwatò ema hwa ohwa hweyà na ŋmèma mɔ̀kɔ. Hwa rza hwɛni lì hwɛ hwatò hwa mboma, tɔ̀ lì hwɛ hwatò ema hwa hwèlì njɔ̀ŋgu ya wolì.

2 Tìmotì 3:2

O eŋge hvonda o hwɛ hwatò hwa ikuka, hwatò ema hwa lìŋgàni wolì, hwaŋga ema hwa ayèkirzɛ̀, hwaŋga ema hwa hwɛnyɛnɛ, hwaŋga ema hwa rza hweyàna irzàŋgo na inyàŋgo ja awu, hwaŋga ema hwa rza ekɛnɛ na hwatò ema hwa rza gbeyà mamɛ ema Lohwɛ̀ a arza nanù ema hwa gbeye.

Tàyìtùrzì 1:11

O rzi keka lì emeyà nanù ema hwaŋga hwatò hwa okolɛ ehwànja wɔ̀ hwà mà hvuŋguhwa rzayi-rzayi ja màtumbà mà hwatò hwa ama Krirztò na oma wɔ̀ hwa okolɛ hweyà ema hwa rza ohvɛ e wònja o lì hwe okolɛ. Wɔ̀ hwa okolɛ ndi ini nyayi ja hweyà aŋga nanù wɔ̀ hwa luwa wolì.

Tàyìtùrzì 1:7

Kànàtɛ e mòtimbèlì wa ŋmèmba ndi à kànèyà ewòlo ya ama Lohwɛ̀, a àŋgàmɛ̀nɛ̀yi ndi lì hwɛ mòtò ema a rza ohvɛ tɔ̀ njɔ̀mi. A àŋgàmɛ̀nɛ̀ ndi lì hwɛ mòtò ema a rza enje lìhvàma, na mòtò ema a ambi lì tata. A rza àŋgàmɛ̀nɛ̀ lì hwɛ mòtò ema a aŋgbɛ mɔ̀ ŋmìti o lì nyɔ la mimba, tɔ̀ mòtò ema a jànà mòhvùŋgu. Ndèŋgànɛ̀lɛ̀ a rza àŋgàmɛ̀nɛ̀ lì hwɛ njɔ̀ŋgu.

Tàyìtùrzì 2:3

Ŋgànà hvɔ̀kɔ hvɛ mɛnɛ, o òkolɛ hwàwululu hwa hwalanà o lì gbeyà hweyà nyayi ema e ŋgbàà Lohwɛ̀ èluhwe o tɔ̀ mamɛ ema wɔ̀ hwa gbeyà. O hwa ohweyà nanù ema hwa rzi keka lì inda tɔ̀ mòtò, hwa rzi aŋgbɛ wɔ hwiti o lì nyɔ mimba emà mà hwa wòmirzɛ̀. Ndi o hwa ohweyà nanù ema hwa okòlɛ̀ hwatò hweyà ema hwe hvomɛ̀nɛ̀.

Tàyìtùrzì 3:2

O hwa ohweyà nanù ema hwa rzi keka lì ohwàna tɔ̀ mòtò eyà ya wòhwe, ndi inyɛ hwa hwɛ o ɛ̀yɔ̀lɛ̀ na hwatò nà ò lìŋgànà hwahvɛhvɛ hwatò, nà o lì arzìhwìrzɛ̀lɛ̀lɛ̀ o hwatò hwa arzɛ.

Hibrù 13:5

È rzì keka lì ika mèèmà me anyu o lì lìŋgàna wolì ndeŋgànɛ̀lɛ̀ e ohve mɔ̀nyɛ̀ŋgì na mamɛ ema e ohvi èhwanja Lohwɛ̀ à ma ohwa nanù ema, “Nà rza e hwɛmɛ, ndeŋgànɛ̀lɛ̀ hvɛ na rza e rzɔ̀rzɔ̀.”

Jèmìrzì 4:1

Mamɛ e jànà injùmà na mètaŋgo ò ìtììtènì ja anyu e? Rzeke e hwèlì ndi e jɔ̀kɛ̀ nanù ema ilema ja lì hwɛnɛ la hwèèmà ema hwe jo ananà o tenì yɔ̀ ndi e gbeyà i gbeyà hwene hweyà e?

1 Pètrò 5:2

e hwɛ ndi nàa hwà-ɔ̀ŋgelì hwa mɛ̀lɛ̀ŋgù o hwatò hwa ama Lohwɛ̀ ema hwa hwèlì o rze ya anyu. È hwa ɔŋgeya, rzeketɛ ema ehwànja e hwɛni lì hwa ɔŋgeya, ndi ehwànja e hwɛni nyɔ̀ŋgi o lì gbeyà nanù na oma Lohwɛ̀ a arza nanù ema e hwɛ. È gbeye èwòlò ya anyu e rzi hwɛ lì oŋgama mɔ̀rzɛ̀ŋgì ndi ehwànja e hwɛni mèèmà me lì e gbeyà.

2 Pètrò 2:3

O tenì ya e njɔ̀ŋgu ya awu, hwanu hwà-òkòlèlì hwa mòlaŋgà, hwa o luwa morzɛ̀ŋgi o lì e ohweyà màyìtò ema wɔ̀ hwa weki e lì e hvùmana hwèèmà. Lohwɛ̀ mɔ̀ à mà màa lì akɛlɛ e mbàko na e koohwa nanù ema a o hwa kɔ̀kìrzɛ̀. Èŋge kɔ̀kìrzɛ̀ e hwa ambɛ̀lɛ̀, ndèŋgànɛ̀lɛ̀ mòŋgo mokona mo hwa ambɛ̀lɛ̀.

Judɛ 1:11

Èwoma na wɔ̀! Wɔ̀ hvɛ hwa gbeyà ndi na oma Keni à mà gbeye ema à mà oŋwe ŋmanyàŋgò wa eni. O nyòla wolì wɔ̀ hwa tànɛyi lì gbeyà tɔ̀ mamɛ nàa Bàlàamì. Maniyà mà awu mɔ̀ hvɛ ma mà hwa gbeyà o lì ŋwa nyayi hvɔ̀kɔ hvɛ na oma Kora à mà ŋwe ehwànja à rzi hweyàne Lohwɛ̀.

Hwèwulùwèlì 1:9

Imbà ndi nà hwèlì Yòwanìrzɛ̀ ŋmanyàŋgò wà anyu. Nà hwèlì ndi mɔ̀kɔ ema mɔ̀hvɛ à hwèlì ndi nàa inyɔ, ò lì kaka ŋmèma nà ò lì àjùlɛ̀nɛ̀ mètàke ema mè jèeyà hwatò ema hwa hwèlì ò lìkànèyà là ama Yerzù Krirztò. Hwa mà nò ika ò erzòòkà ema malìhwà ma mà toŋge ema è hwɛ̀lɛ̀hwɛ̀ Pàtìmòrzì ehwànja nà mà ohwa Eyà yà ama Lohwɛ̀ rzìi nà ohweyà hwatò lì hvomɛ̀nɛ̀ hweyà ema nà mà ɛnɛ lì e hvomɛ̀nɛ̀.