1 Tìmotì 1:5 - Mokpwe: Bakwery (New Testament)

⁵ Lìtìŋga ndèŋgàtɛ̀ nà mà e ohweyà ema o òkolɛ hwatò hwèyòkòlèlì hwe jɔ̀kɛ̀ hwe hwèlì ndi nanù ema, hwatò hwa alìŋgànɛ mɔ̀kɔ na ɔ̀nɛyi. È hwɛni lì hwɛnɛ ndìŋgɛ ema e uwɛ̀lɛ̀lɛ̀yi o ŋmèma ema me rzaŋgi, ŋmèma ema mo hwi mamɛ e hvomɛ̀nɛ̀ na mamɛ ema e rza hvomɛ̀nɛ̀, na ŋmèma ema mo hwi lì lòkɛ̀ ema lì hwèlì e jɔ̀kɛ̀.

1 Tìmotì 1:5 Mawu Ofanana

Matiyò 12:35

Mòtò wà gbamù a gbeyà gbamù èhwanja e uhwɛ̀lɛ̀lɛ ndi ò ŋmèma mò eni ema gbàamù wò utahwi. Mòtò wa wòhwe a gbeyà wòhwe èhwanja e uwɛ̀lɛ̀lɛ̀yi ndi ò mèèmà mò eni ema wòhwe wò utahwi.

Matiyò 5:8

Mònàmɛ̀ nà hwatò ema hwa rzàŋgi mèèmà, èhwanja wɔ̀ hwa ò ɛnɛ Lohwɛ̀.

Hwègbèèlì 15:9

Lohwɛ̀ a rzi gbèye tɔ̀ ndandò ò wɔ̀ tɔ̀ irzɔ, èhwanja mɔ̀ à mà hwa làkirzɛ wòhwe wò awu lì akeyà na lìlòkɛ̀ la awu.

Hwègbèèlì 23:1

Pàwolò à mà ɔ̀ŋgɔ hwatò hwa hwèlìyelì hwe lìkànèyà la mbòwa kòò rzìi a òhwa nanù ema, “Ìi wònyànyàŋgò hwa ami kòkò hwa wònyà Yudà! Nàtɛ̀ɛ na ò wònò wùnyà wò yawònò èlìŋgɛ̀ ya ami e hwèlì gbamù, ò lì hvòmɛ̀nɛ̀ lòŋgɛ la ami ò wòrzò wa ama Lohwɛ̀.”

Hwègbèèlì 24:16

O èŋgànɛ̀lɛ̀ na keka ihvònda ja arzɛ nanù ema ŋmèma mò ami mò rzaŋge ò wòrzò wò ama Lohwɛ̀ na ò wòrzò wò ama e mòtò wa hwènàmà.

Ròmànì 10:4

Krirztò mɔ̀ à mà gbeyà èwòlò ema e mbenda e ma àŋgàmɛ̀nɛ̀ lì gbeyà, ò èŋgànɛ̀lɛ̀ rzɔ, tɔ̀ njɛnɛ ema a mò lòkɛ̀, a hwɛ ehve-ehve ò wòrzò wò ama Lohwɛ̀.

Ròmànì 12:9

Tɔ̀ ima mòtò a hwɛni lì hwɛnɛ e ndìŋgɛ na hwatò na e jɔ̀kɛ̀. È kɔ̀ mamɛ ema e hwèlì wòhwe. È akakumɛnɛ ò lì gbeyà mamɛ ema e hwèlì gbamù.

Ròmànì 14:15

O tàtìrzɛ̀ tɛ ŋmanyàŋgò wa aŋgɔ̀ tɔ̀ e ndòmɛ ya aŋgɔ̀ ò mamɛ ema ò laa, nanù òma ò rza enje ò lì mò uŋmɛ̀lɛ̀ e ndìŋgɛ. O rzi gbeyà nanù ema mòlelì ema ò laa mò hvàŋge lòŋgɛ la e mòtò ema Krirztò a ŋwelɛlɛyi ò mbarza.

Ròmànì 9:1

Nà òhwa ndi e jɔ̀kɛ̀ nàa e mòtò ema a lòkɛ̀ Krirztò, na rza kɔwu hweyà. Ŋmèma mò ami ema èlìŋgɛ̀ yà wòtani e kànèyà mò nò òhweyà nanù ema na rza kɔwu hweyà.

1 Kɔ̀rintìyà 13:1

Nà tànɛyi tɛ lì ohwa i mbɔrzi jarzɛ ja hwatò hwa hwènàmà anù rze na e jɔ jà i aŋgèlì rzìi na rzì ohve ndìŋgɛ e mbɔrzi ya amì è hwɛ ndi nàa èhwèlèlè ya mokèŋge ema e gbeyà mɔ̀tɔ̀wù mo ŋgundu, tɔ̀ ŋgɛ̀ŋgi e ma yo òkahwa.

2 Kɔ̀rintìyà 1:12

Mamɛ ya arzɛ ema e gbèyɛ̀nɛ̀yi, e jò ŋgbelì kumba. I tànɛyi lì ohwà na mèèmà me rzaŋgi ema o hwɛ̀ɛ̀mɛ̀ hwɛ arzu hwe arzɛ anù rze, rzɛ̀hvɔ̀nì na oma i hwèlì na inyɔ na mèèmà me wòtani, na e jɔ̀kɛ̀ ya arzu. Nànù ndi Lohwɛ̀ a mà tɛ̀yirzɛ ema e hwɛ. Rzeketɛ o lìhwiyè la arzù la mòtò wa hwènàmà, ììlì ja ama Lohwɛ̀.

Gàletìyà 5:22

Ndi Èlìŋgɛ̀ yà Wòtani e hwèlì tɛ o tenì yà mòtò, e mò gbeyà nanù ema a gbèyè hweyà na e ndìŋgɛ, na mɔ̀nyɛ̀ŋgì, na ɛ̀yɔ̀lɛ̀, na la àjùlɛ̀nɛ̀, na ŋmèma mo gbàamù, na ɛ̀ɛ̀mɛ̀ ya gbamù, a hwɛ hvɛ ndi mòtò ema hwatò hwa tànɛyi lì ika mèèmà me awu.

Gàletìyà 5:6

Ŋga wà endà mòtò tɔ̀ wà rzi mò endè eŋge è rza ohvi tɔ̀ eyà ò lì gbeyà nà lì hwɛ là arzu nà Krirztò. Mamɛ ema è hwèlì wòlìto è hwèlì ndi ò lì lòkɛ̀ Krirztò. Lìŋgi lì lòkɛ̀ lì àŋgàmɛ̀nɛ̀yi lì àwùlùhwɛ̀ ò è ndìŋgɛ ema jà à àwùŋmɛ̀lɛ̀nɛ̀ mɔ̀kɔ nà ɔ̀nɛyi.

1 Tìmotì 1:18

È ŋmanà wà ami, Tìmòtì kòkò hweyà ema nà ohweyà ema ò gbèye, hwe hwèlì ndi hweyà ema Lohwɛ̀ à mà òhweyà hwatò nanù ema e hwa òhweyà ema màmɛ è hwɛni lì gbèyɛ̀nɛ nà ò wà. Inyɛ̀ eŋge mbɔrzi è ò ètìrzɛ̀. Nà oma ò gbeyànà hwèyòkòlèlì hwè jɔ̀kɛ̀ inyɛ hwe ò gbèye ò hwɛ ndi nàa mòtò ema à ana gbamù.

1 Tìmotì 1:19

Ò lɛ̀mbɛ kɔ̀yi-kɔ̀yi ò lì lòkɛ̀ Krirztò nà lì gbeyà hweyà gbamù nà oma ŋmèma mò aŋgɔ̀ mò òhweyà. Lòŋgo là hwatò hwa rza gbeyà hweyà nà oma mèèmà mè awu mè hwa ohweyà ò lì gbeyà. Ène eyà ema hwa gbeyà ema hwa mà rzɔ̀njɛlɛ lìlòkɛ̀ là awu ndeŋgànɛ̀lɛ̀ hwa rza hwi òne hwa tànɛyi lì ɛndɛ.

1 Tìmotì 3:9

Hwa àŋgàmɛ̀nɛ̀yi lì oŋgama e jɔ̀kɛ̀ ema Lohwɛ̀ a gbèeyà ema hwatò hwa hwiye màlùtèyà na ɛ̀ɛ̀mɛ̀ ema a arza nanù ema hwa hwɛnɛ. Hwa hwɛni lì gbeyà nanù na ŋmèma ema mo hwi mamɛ ema e lɔ̀wu.

2 Tìmotì 1:3

Nà èki Lohwɛ̀ mɔ̀ ndi à hwèlì è mɔ̀ ema imba nà gbèeyà nà ŋmèma mɔ̀kɔ nà oma è nyɔ̀ŋgɔ̀nì yà ami è mà mò gbèeyà. Nà mò èka ihvonda ja arzɛ ò lì ò hvomɛ̀nɛ̀ tɔ̀ ima lìrzako ema nà kanɛ̀ ŋmèrze nà wù.

2 Tìmotì 1:5

Nà ɔ̀ŋgɛ̀lɛ̀ nanù ema ò mà lòkɛ Yerzù Krirztò nà è jɔ̀kɛ̀. Liŋgi lì lòkɛ̀ mɛnɛ ndi è mbamba yà aŋgɔ̀ wà molanà Lɔ̀yìrzì nà nyɔ̀ŋgɛ wà aŋgɔ̀ Yùnìrzì wɔ̀ hvɛ hwa mà hwɛnɛ. Nà lòkɛ̀ nanù ema ò nàŋgɛ nanù, lìŋgi lìlòkɛ̀ mɛnɛ ndi wà hvɛ ò hwɛni.

2 Tìmotì 2:22

Ìi Tìmòtì, o rzi gbeyà hweyà hwe wòhwe ema imberza i gbeyà, ndi o keke ndi lì gbeyà mamɛ ema e hvomɛ̀nɛ̀, o inyàmɛnɛ lìlòkɛ̀ Krirztò o keke lì lìŋgàna hwahvɛhvɛ hwatò, o hwɛ hvɛ ndi o ɛ̀yɔ̀lɛ̀ na tɔ̀ ima mòtò. O nɔ̀ŋge hwene hweyà na hwahvɛhvɛ hwatò ema hwa kanɛ̀lɛ̀lɛ̀ Lohwɛ̀ na ŋmèma mɔ̀kɔ.

Tàyìtùrzì 1:15

O hwatò ema hwa rzàŋgi, hwèèmà hwe arzɛ hwe rzàŋgi, ndi o hwaŋga hwatò ema hwa rza rzàŋgɛ, ndeŋgànɛlɛ hwa rza lòkɛ̀, tɔ̀ eyà o màlùtèyà mà awu nà ò mèèmà me awu e rza rzàŋgi.

Hibrù 10:22

Inyɛ̀ i keke o lì ɛndɛ lì kombɛnɛ Lohwɛ̀ nà mèèmà mɔ̀kɔ na o lì mo ŋgbà mèèmà me arzu me arzɛ. Ène eyà e hwèlì ndi nanù èhwanja màyija ema Yerzù à mà kome o mbarza, mà rzaŋgirzɛ mèèmà me arzu. Mɔ̀ a timbi hvɛ o lì jo rzaŋgirzɛ na malìhwa ema mà rzaŋgi kɛɛŋgɛŋgɛ.

Hibrù 13:18

È jo kanɛ̀lɛ̀lɛ̀ èhwanja màlùtèyà ma arzu ma rzaŋgi, ndèŋgànɛ̀lɛ̀ hvɛ irzɔ ja arza lì lìya na èluhwe o tɔ̀ ima eyà ema i gbeyà.

Hibrù 9:14

È hwèlì tɛ ema màyija ma hwèembè ma tanɛ ma hwɛnɛ màyìmbì ma lì rzàŋgirzɛ hwatò, nanù oma màyija ma ama Yerzù ma hwɛni màyìmbì rzayi-rzayi o lì rzàŋgirzɛ hwatò. Krirztò ema a rza ohvɛ tɔ̀ wòhwe tɔ̀ wɔ̀kɔ à mà aŋgbɛ mɔ̀ ŋmìti nàa jàhwèyà o lì jo kɔ̀tɔ̀ irzɔ hwa arzɛ. A ma gbeyà ndi ene eyà nanù o lì akeyà na èlìŋgɛ̀ yà wòtani ema e hwɛ natɛ̀ɛ na o gbìndèyà. Màyìjà ma eni mɔ̀ ndi ma jo rzàŋgirzɛyi mèèmà me arzu, ema i rza gbeyà hweyà hwe wòhwe ema hwe jo jàneyà e kpelì. Ndi e àŋgàmɛ̀nɛ̀yi lì gbèeyà Lòohwà la lòŋgɛ.

Jèmìrzì 4:8

È jèe e kombɛ̀nɛ̀ Lohwɛ̀ aŋga nanù mɔ̀ hvɛ a e kombɛ̀nɛ̀. Inyɔ̀ hwatò hwa wòhwe e hwɛmɛ o lì gbeyà wòhwe. Inyɔ̀ hwatò hwa mèhvìlì e ika màlùtèyà ma anyu o lì gbeyà hweyà ema hwe rzàŋgi.

1 Pètrò 1:22

O naŋgɛ ema inyɔ e gbeyà hweyà hwe jɔ̀kɛ̀, hwe ma e gbeyà inyɔ e ma rzaŋga. Ène eyà e ma gbeyà nanù ema inyɔ na hwahvɛhvɛ hwatò ema hwa lokɛ Krirztò e ma alìŋgànɛ mɔ̀kɔ na ɔ̀nɛyi. O eŋgànɛ̀lɛ̀, e a lìŋganɛ na mèèmà me anyu kɔ̀yi-kɔ̀yi.

1 Pètrò 3:16

Ndi e gbeye nanù na mèèmà ema me lìhvohwèlì. Inyɔ e gbeyà tɛ nanù, inyɔ e arzihwirzɛ na èluhwe ya arzɛ ndèŋgànɛ̀lɛ̀ inyɔ e lìhvowe mèèmà me anyu o hwatò ema hwa ohwa hweyà hwe wòhwe o lì e teŋgɛ̀nɛ̀ ehwànja e oŋgama Krirztò. Wɔ̀ hwa o òka ìrzɔnì hwa ɛni tɛ hwɛ̀ɛ̀mɛ̀ hwe anyu hwe gbamù.

1 Pètrò 3:21

Ndeŋgànɛ̀lɛ̀ manù malìhwà mà tɛmelì ndi lìlùhwìrzɛ̀. O naŋgɛ, lìŋgi lìlùhwìrzɛ̀ lɔ ndi lì gbèyi ɔ̀ndeŋgàtɛ̀ hwatò hwa rzùŋgahwì o lì akeyà na e ŋginyà ya hwèhvùmuwèlì hwe ama Yerzù Krirztò. Lìlùhwìrzɛ̀ lì rza enje ndi o lì ulɛ la ŋmiŋgo ò nyo, ndi lì hwèlì ndi o lì emeyà o lì gbèeyà Lohwɛ̀ na ŋmèma mo rzàŋgi.

1 Pètrò 4:8

O lì aka hweyà hwe arzɛ, ya alìŋgànɛ mɔ̀kɔ na ɔ̀nɛyi kɔ̀yi-kɔ̀yi, ehwànja e ndìŋgɛ e hwànda wòhwe rzayi-rzayi.

2 Pètrò 1:7

O ŋmanyu ya lì gbeyà hweyà ema Lohwɛ̀ a arza, inyɔ hwatò hwa ama Krirztò inyɛ e ndìŋgɛ e hwɛ o ìtììtènì ja anyu. O ŋmanyu ya e ndìŋgɛ o ìtììtènì ja anyu ja hwatò hwa ama Krirztò, e lìŋgàne tɔ̀ ima mòtò.

1 Yòwanìrzɛ̀ 3:10

Nànù ndi irzɔ ì hwɛni lì hwiya njɛnɛ hwàànà hwa ama Lohwɛ̀ hwa hwèlì, nà njɛnɛ hwàànà hwa ama Mòkarzɛ̀ hvɛ hwa hwèlì, tɔ̀ njɛnɛ ema à rza gbèyɛ mamɛ ema è hvomɛ̀nɛ̀yi à rza enje è ŋmanà wà ama Lohwɛ̀. Ŋgànà hvɔ̀kɔ hvɛ nà tɔ̀ njɛnɛ ema à rza lìŋgànɛ̀ ŋmanyàŋgò tɔ̀ è ndomɛ̀ yà eni.

1 Yòwanìrzɛ̀ 3:23

È mbenda ema a ŋgbelì e hwèlì ndi nanù ema, i lòkɛ̀ o lìinà la ama è Ŋmanà wà eni Yerzù Krirztò na o lì alìŋgànɛ mɔ̀kɔ na ɔ̀nɛyi. Ène mbenda hvɛ mɛnɛ ndi Krirztò à mà jo ŋgbe.

1 Yòwanìrzɛ̀ 3:3

Tɔ̀ njɛnɛ ema a hwɛni lìni lìhvìtà o ma Krirztò, a arzàŋgìrzɛ̀ mɔ̀ ŋmìti ŋgànà hvɔ̀kɔ hvɛ na oma Krirztò a rzàŋgi.