1 Kɔ̀rintìyà 6:19 - Mokpwe: Bakwery (New Testament)

¹⁹ È rza hwi nanù ema è nyo ya anyu è hwèlì ndi hwèlìyelì hwe Èlìŋgɛ̀ yà Wòtani e? Èma e lìyayi o tenì yà nyo yà anyu, ema Lohwɛ̀ a mà è ŋgbè e? Rzèketɛ inyɔ ndi e ohvi i nyo ja anyu, i hwèlì ndi nyo ja ama Lohwɛ̀.

1 Kɔ̀rintìyà 6:19 Mawu Ofanana

Yòwanìrzɛ̀ 2:21

Ndi e ndawò ema Yerzù mɔ̀ à mà hwɛ lì òhwa, e ma hwɛ ndi e nyò ya eni.

Ròmànì 8:9

Ndi inyɔ, e rza enje hwatò ema yòwò ya nyò ye e kànèyà, ndi inyɔ e lìya ndi na òma Èlìŋgɛ̀ yà Wòtani ye e kànèyà ò lì lìya. Nà e jɔ̀kɛ̀ Èlìŋgɛ̀ ya Lohwɛ̀ e hwèlì ò tenì ya anyu. Tɔ̀ njɛ̀nɛ ema a rza hwɛnɛ Èlìŋgɛ̀ ya ama Krirztò, a rza enje na Krirztò.

1 Kɔ̀rintìyà 3:16

Nà lòkɛ̀yi nanù ema e ayèmbɛ inyɔ hwa arzɛ nanù ema e hwèlì ndi nàa e Ndawò yà Lohwà. Ndèŋgana èlìŋgɛ̀ ya ama Lohwɛ̀ e hwèlì, e lìyayi o ìtììtènì ja anyu.

1 Kɔ̀rintìyà 6:13

Ohvɛhvɛ mòtò a tànɛyi lì ohwa nanù ema, “Molelì mò gbeyàhwi ndi ò lùuŋga, rzìi lùuŋga lɔ̀hvɛ lì gbeyàhwi ndi o mòlelì.” È jɔ̀kɛ̀, ndi o ò jà wùnyà ema Lohwɛ̀ a hwe hvaŋga hwe ahwàkɛ. È nyo ya arzu e rzi wèkahwì ndi ò lì gbeyà mòrzònje. Ndi è nyo yà àrzu è mà wèkahwà ndi lì gbèeyà Rzàŋgo; Rzìi Rzàŋgo a ɔ̀ŋgeyà è nyo yà àrzu.

1 Kɔ̀rintìyà 6:3

È rza hwi nanù ema jo ò kàyìrzɛ̀ i aŋgèlì ja ama Lohwɛ̀ e? Ŋgelì iti nà hwenè hweyà hwe rzàlì hwe lìni lòŋgɛ e!

2 Kɔ̀rintìyà 5:15

A ma jo ŋwèeyà ndi irzɔ hwa arzɛ, aŋga nanù hwatò ema hwa hwèlì lòŋgɛ, mòŋgɛ ma awu ma rza uŋmɛ̀lɛ̀ nanù ema hwa lìya ndi o wɔ̀ hwiti. Ndi wɔ̀ hwa hwèlì lòŋgɛ o nyòla ya ama Krirztò ema à mà ŋwa rzìi Lohwɛ̀ a mo hvùmùlɛ̀ o nyòla awu.

2 Kɔ̀rintìyà 6:16

È Ndawò ya Lohwà e rza ohvi tɔ̀ eyà o lì gbeyà na e ndawò ya lì hvɛhvɛ lohwà. Imba na ohwa ndi nanù èhwanja irzɔ ndi i hwèlì e ndawò yà Lohwà, Lòohwà ema lì hwèlì lòŋgɛ. È hwèlì ndi nanù, na oma e tìlahwì nanù ema Lohwɛ̀ a ohwi nanù ema, “Nà o hwɛ na hwatò hwa amì ndèŋgànɛlɛ na o lìya na wɔ̀. Hwa o no gbeyà ndi nàa e Ndawò ya Lohwà ndèŋgànɛlɛ na o ò hwa wòwa ndi nàa hwatò hwa ami.”

Tàyìtùrzì 2:14

Yerzù Krirztò à mà aŋgbɛ mɔ̀ ŋmìti o lì jo kɔ̀tɔ̀ o wòhwe wo arzu wo arzɛ. A ma jo gbèeyà o lì hwɛ hwatò ema hwa hwèlì wòtani, ndèŋgànɛ̀lɛ̀ à mà jo gbeyà o lì hwɛ hwatò hwa eni mɛnɛ, ema hwa ohvi e nyɔ̀ŋgi ya lì gbeyà hweyà hwe gbamù.

Jèmìrzì 4:5

È ɔ̀ŋgɛ̀lɛ nanù ema o ŋgundu ndi e tìlahwì o kààtì ya Lohwà nanù ema, “Èlìŋgɛ̀ ema Lohwɛ̀ a jo ikà o mèèmà me arzu e hwèlì ndi e ya eni, ndeŋgànɛlɛ mɔ̀ à nòneyà eŋge Èlìŋgɛ̀.”

1 Pètrò 2:5

Inyɔ e jèe e hwɛ ndi nàa màŋyàyi ema mà hwèlì lòŋgɛ ema Lohwɛ̀ a gbeyàna o lì oŋga e ndawò ya eni ya èlìŋgɛ̀. Ndeŋgànɛlɛ o tenì ya eŋge ndawò ɔndi inyɔ e o mo gbèeyà. È o hwɛ ndi pìlìrzì ja wòtani, ema e o mo ŋgbɛ màhwèyà ma wòtani ema mɔ̀ à o emeyà lì akeyà na Yerzù Krirztò.