1 Kɔ̀rintìyà 4:5 - Mokpwe: Bakwery (New Testament)

⁵ O èŋgànɛ̀lɛ̀ rzɔ, o rza akɛlɛ hwèkàyìrzèlì o tɔ̀ ima mòtò, natɛ̀ɛ e hvonda ya jɔ̀kɛ̀ e uka. Hwèkàyìrzèlèlì hwe o jà, e hvonda e ma e Rzàŋgo Yerzù Krirztò a o jɛ̀ɛ̀. A jelì tɛ, a jànà o ŋmàye hwèŋge hwema ema hwe e utami o jììtìtì, rzi a hvulùwa hvɛ màlùtèyà ema mà utami o mèèmà me hwatò. O èŋge hvonda ndi Lohwɛ̀ a eka tɔ̀ ima mòtò o mamɛ ema a gbèyi.

1 Kɔ̀rintìyà 4:5 Mawu Ofanana

Matiyò 10:26

“O èŋgànɛ̀lɛ̀ rzɔ e rzi òka hwatò hwa hwènàmà wɔ̀ŋgɔ̀. O rzà ènje tɔ̀ eyà ema e utami ema e rza ò jɛ̀ɛ lì wurzà. O rzà ènje hvɛ tɔ̀ eyà ema è hwandahwi ema è rza ò hwiyàhwà.

Matiyò 24:30

O eŋge hvònda e ò ɛnɛ èmɛ̀nɛ̀nì ya è Ŋmanà wà è Mòtò wà Hwènàmà e uwɛ̀lɛ̀lɛ̀yi ò lìwòhwɛ̀ la ŋmanyu, rzìi matumbà mà arzɛ ma hwatò ma e rze ya arzɛ ma ò wòteyà lì ahvahvɛ. Hwatò hwa ò ɛnɛ è Ŋmanà wà è Mòtò wà Hwènàmà na òma a jà ò lìmbàkì la e ŋmanyu yà lohwà na ŋginyà na èluhwe ndɛnɛ.

Matiyò 24:46

Mònàmɛ̀ mò hwèlì na òŋgò mògbèèlì ema rzaŋgò wa eni wa èwòlò a timbi tɛ rzìi a mò ùŋmanɛlɛ a gbeyà mamɛ ema à mà mò òhweyà nanù ema a gbèèye.

Matiyò 25:21

Rzaŋgɛ wà eni wa èwòlò à mà mò alàhwɛ̀ nanù ema, ‘O gbèyi gbamù, ò hwèlì ndi e mògbèèlì wa gbamù ema a tɛmi ehve-ehve. O awuŋmɛ̀lɛ̀ ò wà witi ò lì hwɛ e mògbèèlì wa gbamù na jɔ̀kɛ̀. Nà òma ò tanɛyi lì ɔ̀ŋgeya ŋmanà wòlì, ò èŋgànɛ̀lɛ̀ imba na ò ika ema ò kànèyà wòlì wò ndɛnɛ. Kpèeyà ònò i rzòmbìrzɛ̀ mɔ̀nyɛ̀ŋgì mò ami.’

Matiyò 25:23

Rzàŋgò wa eni wa èwòlò rzìi a mò alàhwɛ̀ nanù ema, ‘O gbèyi gbamù, ò hwèlì ndi e mògbèèlì wa gbamù. Nà òma ò tanɛ lì ɔŋgeya ŋmanà wòlì, ò èŋgànɛ̀lɛ̀ imba na ò ika ema ò kànèyà wòlì wò ndɛnɛ. Kpèeyà ònò i rzòmbìrzɛ̀ mɔ̀nyɛ̀ŋgì mò ami.’

Lukàrzɛ̀ 6:37

“È rzi kàyìrzɛ̀ hwahvɛhvɛ hwatò, ndèŋga Lohwɛ̀ à rza ò kàyìrzɛ̀ wa hvɛ. È rzi òhwa hweyà hwe wòhwe lì hvòmɛ̀nɛ̀ hwahvɛhvɛ hwatò, Lohwɛ̀ mɔ̀ hvɛ à rza òhwa wòhwe lì è teŋgɛ̀nɛ̀. È àlàkìrzɛ̀nɛ̀, aŋga ndi Lohwɛ̀ mɔ̀ hvɛ a è làkìrzɛ̀.

Yòwanìrzɛ̀ 21:22

Yerzù rzìi à mò alàhwɛ̀ nanù ema, “Imba nà arza tɛ ema mɔ̀ à hwɛ lòŋgɛ natɛ̀ɛ nà jà, mamɛ èŋge è ò ɔ̀ŋgɔ e? Ò wà ò nò nɔŋge.”

Yòwanìrzɛ̀ 21:23

Àŋga ndì è mà òhwàhwè ò ìtììtènì jà hwatò ema hwa mà hwɛ lì nɔŋgɔ Yerzù èki yà arzɛ nanù ema òŋgò Mòòkòwèlì wà eni à rza ŋwa tɔ̀ nɛ Yerzù à rzi òhwe nanù ema à rza ŋwa. À mà òhwa ndì nanù ema, “Nà àrzi tɛ ema à hwɛ lòŋgɛ natɛ̀ɛ nà jà mamɛ eŋge yè è ɔ̀ŋgɔ e?”

Yòwanìrzɛ̀ 5:44

È ayèkanɛ̀ tɛ mɔ̀kɔ na ɔ̀nɛyi e hweyà gbamù, ndi e rza gbeyà tɔ̀ eyà ò lì lùwa jèeka ema i uwɛlɛlɛ ndi na Lohwɛ̀. Nɛ rzɔ e tànɛyi lì nò lòkɛ̀ e?

Ròmànì 14:4

O wa ò hwèlì ndi njɛnɛ, ò lì kàyìrzɛ̀ e mòkutu wà ama òhvɛhvɛ mòtò e? È rzàŋgò ya awu, yɔ ndi e tànɛyi lì òhwa ŋga hwa gbèyi gbamù, tɔ̀ hwa rza gbèyi gbamù. Ndi e ŋginyà ya ama e Rzaŋgò yɔ ndi e òŋgòwàna òŋgò mòkutu ò lì gbeyà gbamù.

Ròmànì 2:1

O èŋgànɛ̀lɛ̀ rzɔ, tɔ̀ ima mɔ̀ hwa anyu ema a kàyìrzɛ̀ɛ hwahvɛhvɛ hwatò, tɔ̀ ò hwɛ ndi njɛnɛ, ò rza òhvì tɔ̀ lìtìŋga ema ò rza lùhwànà lì làkìrzɛ̀. Èhwanja ò kàyìrzɛ̀ tɛ hwahvɛhvɛ hwatò, rzìi ò wà witi ò hwɛ ndi ò lì gbèeyà hwèŋge hweyà ema ò hwa kàyìrzɛ̀, nanù òma ò wa hvɛ ò a tùulɛ̀ ŋmàŋgò.

Ròmànì 2:16

O èŋgànɛ̀lɛ̀ lì hvòmɛ̀nɛ̀ Ŋmɛ̀ndì mò gbamù ema imba na òhwa, nanù ndi e ò hwɛ̀ɛ ò wòŋgò Wùnyà ema Lohwɛ̀ a ò ŋgbàà Yerzù Krirztò e ŋginyà ò lì kàyìrzɛ̀ɛ hwatò, lì hvòmɛ̀nɛ̀ màlùtèyà ma ìwùndɛ̀ ja mèèmà me awu na mamɛ hwa gbeyà ò jututa.

Ròmànì 2:29

Jàyɛ̀, ò tɛ̀ɛ̀tɛ̀ɛ e wònja ya wònyà Yudà e hwèlì ndi òŋgò mòtò ema a hwèlì wònyà Yuda ò tenì ya ŋmèma, ene ŋgàna e hwèlì ndi nanù ema, mòtò ema à mà endàhwɛ̀ ò ŋmèma, ndèŋgàna ene èwòlò e gbeyàhwa ndi na Èlìŋgɛ̀ ya ama Lohwɛ̀, rzeketɛ e ya e mbenda ema e tìlahwì. Èŋge tumba mòtò e ekàhwà na Lohwɛ̀ rzeketɛ ò hwatò hwa hwènàmà.

Ròmànì 2:7

Hwàŋga hwatò ema hwa rza ɔ̀tɔ̀ ò lì gbeyà hweyà hwe gbamù, na lì arze èluhwe na lì kàrzɛhwɛ, hwa ò hwɛ ò lòŋgɛ ò gbìndèyà. Lohwɛ̀ a ò ŋgbà inì nyayi ja hwatò lòŋgɛ la gbìndèyà.

1 Kɔ̀rintìyà 1:7

Ène ŋgàna ò eŋgànɛ̀lɛ̀, è rzi hvondi lì lùwa tɔ̀ mònàmɛ̀ tɔ̀ mɔ̀kɔ nà omà è ambɛ̀lɛ̀lɛ̀ nanù ema, Rzàŋgo wà arzu Yerzù Krirztò à awùlùhwɛ mɔ̀ ŋmìti.

1 Kɔ̀rintìyà 11:16

Ndi mòtò a arza tɛ lì tàànà ene eyà hvenda, mamɛ ya arzɛ na hwɛnì lì ohwa e hwèlì ndi nanù ema irzɔ tɔ̀ miitelì me arzɛ i rza ohvi ehvɛhvɛ ɛ̀ɛ̀mɛ̀ ya lì kanɛ̀ Lohwà.

1 Kɔ̀rintìyà 11:26

Ène ŋgàna è hwèlì ndi nanù ema tɔ̀ ima hvonda ema e làa ene ehvòòto, rzìi e nyɔ hvɛ manù mimba, e hwèlì e ohwa lì hvomɛ̀nɛ̀ e kpelì ya ama Rzàŋgo natɛ̀ɛ a tìmba anù rze hvɛ.

1 Kɔ̀rintìyà 15:23

Ndi tɔ̀ ima mòtò a hvùmùlɛ̀hwɛ ndi o e ya eni hvonda. Krirztò ema a hwèlì e wa worzò o lì hvùmùwà, e hvonda ema a o jɛ̀ɛ̀ hvɛ hwaŋga hwatò ema hwa hwèlì e hwa eni, wɔhvɛ hwa hvùmùwà.

1 Kɔ̀rintìyà 3:13

Ndi o wùnyà wo hwèkayirzelì, mùùnya mo hvurzirzɛ e tumba èwòlò ema tɔ̀ ima mooŋgelì a gbèyi. Mòŋgo mùùnya mo uŋmɛ̀lɛ̀ ŋga èwòlò yà mòtò tɛ è hwɛnì wòlìtò.

1 Kɔ̀rintìyà 3:14

È hwèlì tɛ ema, èwòlò ema, è mògbèèlì à gbèyi, è ò karzòlɛ̀ mòŋgo mùnya, è mògbèèlì à ò lùwa jàhwèyà.

1 Kɔ̀rintìyà 3:8

È mòtò ema a ona na e mɔ̀ ema a hvahva malìhwa hwà gbeyà ndi èwòlò yɔ̀kɔ mɛnɛ. Lohwɛ̀ a o hwa teŋgɛ̀nɛ̀ o èwòlò ya awu ema hwa gbèyi.

2 Kɔ̀rintìyà 10:18

Rzeketɛ hweyà hwe gbamù ema mòtò à ohwanɛ̀lɛ ò mɔ̀ ŋmìti ndi hwe uŋmɛ̀lɛ̀ nanù ema à emànɛ̀lɛ̀hwɛ̀ nàa àpɔ̀rzìtòlò, ndi è mòtò wà jɔ̀kɛ̀ ema Lohwɛ̀ à ohwa hweyà hwe gbamù lì hvomɛ̀nɛ̀ mɔ̀ ndi à emeyàhwɛlɛyi.

2 Kɔ̀rintìyà 10:9

Nà rza arza nanù ema e lùteyà nanù ema ene kààtì ema na e tìleya e hwèlì ndi o lì e rzìrzà.

2 Kɔ̀rintìyà 4:2

I rzɔnjɛ̀lɛ̀ hwègbèèlì hwe arzu hwe wùndɛ̀ ja wòhwe, na hweyà ema hwe jànà ìrzɔnì. I rza e lùkɛ̀lɛ̀ na jòòhwì ja arzu ja wàna tɔ̀ lì tìkòwà e mbɔrzi ya Lohwà o lì e ɔnjɔ. Ndi jo òkolɛ hwatò Eyà ya Lohwɛ̀ nyayi ema hwa e rzɔŋgìtɛ̀nɛ̀. Nà oma jo òkolɛ Èya yà Lohwà na ŋmèma mɔ̀kɔ, tɔ̀ mòtò a rza tànɛyi lì ohwa o ŋmèma mo eni nanù ema i mo lukɛlɛ ndi lì lukɛlɛ. Irzɔ i hwi nanù ema Lohwɛ̀ a hwi tɔ̀ mamɛ ema i gbeyà.

2 Kɔ̀rintìyà 5:10

O èŋgànɛ̀lɛ̀ rzɔ, tɔ̀ ima mɔ̀kɔ hwa arzu na ɔ̀nɛyi a o tɛ̀mɛ̀ o hwèkàyìrzèlèlì o worzo wo ama Yerzù Krirztò o wùnyà ema a o kàyìrzɛ̀ hwatò hwa arzɛ o lì hvomɛ̀nɛ̀ hweyà ema tɔ̀ ima mòtò à mà gbèyi e hvonda ema à mà hwɛ o rze ya mɔ̀nyɛ̀. Tɔ̀ ima mòtò a o luwa etaŋgi lì hvomɛ̀nɛ̀ mamɛ ya arzɛ ema à mà gbeye o rze.

1 Tɛ̀rzàlonìyà 5:2

Èhwànja inyɔ hwiti è hwi gbamù nanù ema woŋgo wùnyà ema Rzàŋgo à ò jɛ̀ɛ̀, à ò jà ndi nàa ŋmìhwɛ̀, nyàyi hvɔ̀kɔ nà oma è ŋmìhwɛ̀ à jà wùùwù ema tɔ̀ mòtò à rza mò ambɛlɛlɛ.

Hibrù 4:13

Ò worzo wò ama Lohwɛ̀, ò rza enje tɔ̀ eyà ema è utami. Ndi hweyà hwe arzɛ hwe enyɛ̀lɛ̀lɛ̀yi ò worzo wò ama Lohwɛ̀. Ndeŋgànɛ̀lɛ̀ ò mà Lohwɛ̀ ndi irzɔ ì hwɛnì lì ohwa hweyà hwe arzɛ ema ì gbeyà.

Jèmìrzì 4:11

Ìi wònyànyàŋgo wa ami kòkò, e rzà àwòhwànɛlɛ hweyà hwe wòhwe mɔ̀kɔ na ɔ̀nɛ̀yi, tɔ̀ njɛnɛ ema a ohwi eyà ya wòhwe o lì teŋgɛ̀nɛ̀ ŋmanyàŋgò wa eni, tɔ̀ lì mo kàyìrzɛ̀, nanù oma a ohwa ndi hweyà hwe wòhwe lì teŋgɛ̀nɛ̀ e mbendà ya ama Lohwɛ̀ ndèŋgànɛlɛ mɔ̀ à ohwi nanù ema e mbenda e rza lɔ̀wu. O òhwi tɛ nanù ema e mbendà ya ama Lohwɛ̀ e rza lɔ̀wu, eŋge ŋgànà e hwèlì ndi nanù ema e gbeyà hweyà ema e mbendà ya ama Lohwɛ̀ e ohwi nanù ema e rza gbeyà. Nànù oma o ma awòwɛ̀ o wà witi o lì hwɛ e mòkàyìrzèlì.

Jèmìrzì 5:7

Ìi wònyànyàŋgo hwa ami kòkò, e àjùlɛ̀ natɛ̀ɛ na o hwèjèelì hwe ama e Rzàŋgo. È embàneyà e mo gbeyà mbota. Mɔ̀ a ambɛ̀lɛ̀ natɛ̀ɛ na e hvonda ema a rzàŋga e mbota ya gbamù. Mɔ̀ a kaka ŋmèma natɛ̀ɛ na e hvonda ema e mbuwà ya worzo e yɔ̀ɔ̀, na e hvonda ema e rzukana o lì yɔ̀ɔ̀.

Jèmìrzì 5:9

Ìi wònyamòwè kòkò, e rza arzàrzòwànɛ̀ mɔ̀kɔ na ɔ̀nɛyi e rzi jà lì hwɛ Lohwɛ̀ a ohwa nanù ema e hwèlì ndi hwatò hwa wòhwe. È hwiye nanù ema e mòkàyìrzèlì a e hwɛlɛlɛ̀yi ndi o toŋgoŋgo.

1 Pètrò 1:7

Lìtìŋga la manù màkèkìrzɛnɛ lì hwèlì ndi o lì e kèkirzɛ lìlòkɛ̀ la anyu o lì uŋmɛ̀lɛ̀ nanù ema lìlòkɛ̀ la anyu lì imbami na e jɔ̀kɛ̀. È gòòlù e tanɛ e hwɛ wòhwe ndi tɔ̀ nanù hwa e rzɛ̀lɛ̀ o mùnya o lì e rzàŋgìrzɛ, hwa tanɛ tɛ lì gbeyà gòòlù nanù, eŋge ŋgànà e hwèlì ndi nanù ema hwa àŋgàmɛ̀nɛ̀ lì e kèkirzɛ̀ lìlòkɛ̀ la anyu aŋga nanù lìlòkɛ̀ la anyu lì imbama ehwànja lìlòkɛ̀ la anyu lì akayi e gòòlù. È hwèlì tɛ nanù ema lìlòkɛ̀ la anyu lì akayi màkèkìrzɛ̀nɛ̀ aŋga nanù Lohwɛ̀ a e eka, mɔ̀ à e ŋgba ŋginyà na èluhwe e hvonda ema Yerzù Krirztò a o àwùlùhwɛlɛlɛ̀ hwatò hwa arzɛ hwa e rze ya mɔ̀nyɛ̀.

1 Pètrò 5:4

Aŋga nanù, e kìŋgɛ ya Hwà-ɔ̀ŋgèlì hwa mɛ̀lɛ̀ŋgù e jelì tɛ mɔ̀ à e ŋgba mòrzawèlì ema mo tuti. Moŋgo mòrzawèlì mo ò hwɛ natɛ̀ɛ na o mòlìkɛ̀.

2 Pètrò 3:12

Inyɛ̀ è hwɛnɛ ene ɛ̀ɛ̀mɛ̀ nà oma è ambɛlɛlɛ wùùnyà ema Lohwɛ̀ à mà rzèkeyà nanù ema Krirztò à jà. È à tàkirzɛ aŋga nanù woŋgo wùnyà wò akɛlɛ lì jà. Ò wòŋgo wùnyà mùùnya mò kùwa lì rzɛ̀lɛ̀ lìwòhwɛ là ŋmanyu là arzɛ ndèŋgànɛ̀lɛ̀ mò rzɛ̀lɛ̀ hwèèmà hwe arzɛ ema hwe hwèlì ò ŋmanyu.

2 Pètrò 3:4

o lì ohwa nanù ema, “A ma ohwa nanù ema a jà hvɛ, one mɔ̀ à hwèlì nàŋgɛ e? Irzàŋgo ja arzu i ma màa lì ŋwa kohwaa, ndi tɔ̀ ima eyà e hwèlì ndi nanù mɛnɛ, na oma e ma hwɛ natɛ̀ɛ na o ewèkelì ya e rze.”

Judɛ 1:14

Ènɔ̀kù è mɔ̀ ema à mà ùkirzɛ̀ è nyɔ̀ŋgɔ̀nì lìrzamba ò mòtende mò ama Adàmu, à mà hwɛ à mà ohwa nà è kòòwà lì hvomɛ̀nɛ̀ mamɛ ema è ò gbèèyɛnɛ hwanù hwatò. À mà ohwa nanù ema, “È okànèyà tɛ! È Rzàŋgo è hwèlì è jà nà hwèkòlì nà hwèkòlì hwe aŋgèlì jà eni jà wòtani.

Hwèwulùwèlì 1:7

È ɔŋgɔ tɛ, à hwèlì à jà nà lìmbaki, ndèŋgànɛlɛ tɔ̀ ima mòtò à ò mò ɛnɛ, tɔ̀ hwaŋga hwatò ema hwa mà gbeyà ema à ŋwe nà oma hwa mà mò hvànɛ ò mbàrza. Màtumba mà arzɛ mà è rze yà mɔ̀nyɛ̀ hwa ò mò ɛhwɛ. Nànù mɛnɛ ndi è ò hwɛ, inyɛ è hwɛ nanù.

Hwèwulùwèlì 20:12

Aŋga ndi nà mà ɛnɛ hwatò ema hwa mà màa lì ŋwa, hwatò ema hwa hwèlì wòlìto nà hwaŋga ema hwa rza enje wòlìtò, hwa tɛ̀mì ò worzò wò eŋge kònda yà lìkànèyà. È kààti ema Lohwɛ̀ à mà tile hwɛ̀ɛ̀mɛ̀ hwe awu ò tenì, hwa mà è lìhvowa, ndèŋgànɛ̀lɛ̀ ehvɛhvɛ è mà lìhvowàhwa. Èŋge ndi è mà ohva mìinà mà hwatò ema hwa ò hwɛ̀ɛ̀ nà Lohwɛ̀ natɛ̀ɛ nà ò gbìndèyà. Lohwɛ̀ à ò kàyìrzɛ̀ hwatò ema hwa mà ŋwɛ̀ɛ̀, lì wowàna hwɛ̀ɛ̀mɛ̀ hwe awu nà oma è tìlahwì ò tenì yà eŋge kààti.