1 Kɔ̀rintìyà 4:1 - Mokpwe: Bakwery (New Testament)

¹ È aŋgàmɛ̀nɛ̀yi lì jo lùtèyà nàa hwàgbèèlì hwa ama Krirztò, ema Mɔ̀ a ikayi o lì telɛlɛ hwatò e wùndɛ̀ ya ama Lohwɛ̀ ya jɔ̀kɛ̀ ema e utami.

1 Kɔ̀rintìyà 4:1 Mawu Ofanana

Matiyò 13:11

Yerzù rzìi a hwa alàhwɛ̀ nanù ema, “Lìhwiye la è wùndɛ̀ ya Lìkànèyà la ŋmanyu yà lohwà lì e ŋgbààhwi ndì inyɔ, ndi rzeketɛ ò hwahvɛhvɛ hwatò.

Matiyò 24:45

“Njɛnɛ rzɔ a hwèlì e mògbèèlì hwa lìhwiyè na e jɔ̀kɛ̀ e? Mɔ̀ ndi rzàŋgɛ wa eni wa èwòlò a ŋgba e wònja ò lì kànèyà hwanɛ̀yi hwàgbèèlì ò lì hwa ŋgba mòlelì mò awu ò e hvònda ema e hvòmɛ̀nɛ̀.

Makòrzì 4:11

À mà hwa òhweyà nanù ema, “Lohwɛ̀ à è ŋgbèlì è wònjà ò lì hwiyà è wùndɛ̀ yà Lìkànèyà la ama Lohwɛ̀. Ndi ò hwanɛ̀yi hwatò Lohwɛ̀ à hwa gbèyi ò lì hwiyà hwenè hweyà ò meyànà mɛ̀nɛ̀.

Lukàrzɛ̀ 1:2

Wɔ̀ hwa mà tìla ndi ŋgàna hvɔ̀kɔ, nà òmà irzɔ imà hweyàne hwaŋga hwatò, ema hwà mà ɛnɛ hwenè hweyà nà mìirzɔ̀ ma awu ò hwèwòtelì ndèŋgàna wɔ̀ hwa mà hwɛ ndi lì òhwà Eyà ya Lohwà.

Lukàrzɛ̀ 12:42

Rzàŋgò rzìi a alàhwɛ̀ nanù ema, “O èŋgànɛ̀lɛ̀ tɔ̀ ima mɔ̀ wa anyu à hwɛ ndi nàa mògbèèlì ema à òhvi lìhwiyè, rzìi a gbeyà mamɛ rzàŋgò wà enì wà èwòlò a òhwì ema a gbèyè. A hwèlì ndi è mògbèèlì ema rzàŋgò wa eni wa èwòlò a ŋgbèlì è wònjà lì kànèyà hwanɛ̀yi hwàgbèèlì, nà lì ɛnɛ nanù ema, tɔ̀ ima mɔ̀ wa awu a luwe e mò eni mòlelì na òma a hwɛnì lì lùwa.

Lukàrzɛ̀ 8:10

Yerzù à mà hwa alàhwɛ̀ nanù ema, “Lohwɛ̀ à è ŋgbèlì è wònjà yà lì hwiyà ìwùndɛ̀ jà Lìkànèyà là ama Lohwɛ̀. Ndi hwanɛ̀yi hwatò hwa arzɛ hwa hweyànà ndì Lìkànèyà là ama Lohwɛ̀ nàa meyànà aŋga nanù, tɔ̀ nɛ̀ hwa ɔ̀ŋgɔ, hwa rzà èmba, hwa hweyà, ndi hwa rzà rzɔ̀ŋgìtɛ̀nɛ̀.

Ròmànì 11:25

Ìi wònyànyàŋgò wa ami kòkò, na arza nanù ema e rzɔ̀ŋgìtɛ̀nɛ̀ eyà ema natɛ̀ɛ na nàŋgɛ tɔ̀ mòtò a rzi rzɔ̀ŋgìtɛ̀nɛ̀, aŋga nanù e rzi lùteyà nanù ema e òhvi lìhwiyè rzayi-rzayi. Nà arza nanù ema e rzɔ̀ŋgìtɛ̀nɛ̀ nanù ema, maniyà mà lòŋgò la hwatò hwa Irzàyɛ̀lì ma ò hwɛ natɛ̀ɛ na ò hwaŋga hwatò hwa arzɛ ema hwa rza enje wònyà Yudà ema hwa rza lòkɛ̀ hwa ò lòkɛ̀.

Ròmànì 16:25

Inyɛ̀ i ŋgbe Lohwɛ̀ èluhwe èhwanja a òhvi màyìmbì ma lì ètìrzɛ̀ lìlòkɛ̀ la anyu. Ndeŋgànɛ̀lɛ̀ nanù ndi nà mà e òhweyà e hvònda ema nà mà e òhweyà Ŋmɛ̀ndì mò Gbamù mò ama Yerzù Krirztò. Mòŋgò Ŋmɛ̀ndì mò hwèlì ndi e jɔ̀kɛ̀ ema Lohwɛ̀ à mà ute natɛ̀ɛ na e hvònda kòòhwa, ema a rzi uŋmɛ̀lɛ̀ hwatò.

1 Kɔ̀rintìyà 2:7

Lìhwiye ema i gbeyàna, lì hwèlì ndi lìhwiyè ema Lohwɛ̀ a jo ŋgbelì. Lìhwiye ema lì ma ùtàhwa natɛ̀ɛ na ò hwèwòtelì, o lìhwiyè la arzu ema Lohwɛ̀ à mà tɛ̀yirzɛ ndèŋgàna hwewòtelì hwe rze.

1 Kɔ̀rintìyà 3:5

Nàŋgɛ rzɔ, njɛnɛ a hwèlì Apòlòrzì e? Njɛnɛ a hwèlì Pàwolò e? Irzɔ i hwèlì ndi hwàgbèèlì hwa ama Lohwɛ̀ ema i ma e òŋgòwàna o lì lòkɛ̀ Krirztò. Tɔ̀ ima mɔ̀ wa arzu à mà gbeyà ndi èwòlò ema Rzàŋgo à mà jo ŋgbe.

1 Kɔ̀rintìyà 4:13

Hwatò hwa jo òhwìrzɛ̀nɛ̀ tɛ hweyà hwe wòhwe, irzɔ i hwa tìmbìrzɛ̀lɛ̀ ndi nà hweyà hwe gbamù. Ndi tɔ̀ nanù, natɛ̀ɛ nà naŋgɛ, hwatò hwa jò ɛnɛ ndi nàa mbìndo ò mìrzɔ̀ mà awu.

1 Kɔ̀rintìyà 4:2

Mamɛ ema e arzàhwà na hwanù hwàgbèèlì e hwèlì ndi nanù ema hwa hwɛ jɔ̀kɛ̀ na èwòlò ya awu, ema Rzàŋgo wa awu a hwa ŋgbelì.

2 Kɔ̀rintìyà 11:23

Wɔ̀ hwa ohwa nanù ema hwa hwèlì ndi hwàgbèèlì hwa ama Yerzù Krirztò, imba hvɛ na e ohweyà nàŋgɛ nanù ema, imba nà mà gbeyà èwòlò lì hwa aka. Nà ohwa ndi nàŋgɛ nanù nàa ŋmɛnyɛ. Nà ma gbeyà èwòlò ya ŋginyà lì hwa aka, nà mà aŋgɛ̀hwɛ̀ o hwèwòwà ŋgèlì rzayi-rzayi lì hwa aka, nà mà gbiyɛhwɛ hvonji rzayi-rzayi lì hwa aka, ndèŋgàna nà mà uŋgbɛlɛlɛ e kpelì rzayi-rzayi ja ŋgèlì lì hwa aka.

2 Kɔ̀rintìyà 12:6

Nà hwɛnì tɛ lì ohva kumba, na rza o ɛnɛhwɛ ndi nàa èèti ya mòtò èhwanja na hwɛ ndi o lì ohwa e jɔ̀kɛ̀. Nà rza o kumba lìya la ami o kòkò ò iŋgi nyayi ja hweyà, aŋga nanù e rzi no ŋgba elùhwe o iŋgi nyayi ja hweyà, ndi na lìŋgàna nanù ema e no wowe nàa njɛnɛ ema na hwèlì o lì hvomɛ̀nɛ̀ hweyà ema na gbeyà na e hweyɔ ema na e okolɛ̀.

2 Kɔ̀rintìyà 4:5

Ɔ̀ndeŋgàtɛ̀ i rza ohwa ndi o lì ayèkirzɛ̀ irzɔ hwiti. Ndi irzɔ je e ohweyà nanù ema Yerzù ndi à hwèlì e Rzàŋgo. O nyòla ama Yerzù irzɔ i hwèlì ndi hwàgbèèlì hwa anyu.

2 Kɔ̀rintìyà 6:4

Ndi nàa hwàgbèelì hwa ama Lohwà, irzɔ ja awuŋmɛ̀lɛ̀ irzɔ hwiti nàa hwatò ema hwa gbeyà mamɛ ya arzɛ ema e hvomɛ̀nɛ̀. I kaka mèèmà rzayi-rzayi o tenì ya mètàkà ema i luwa, o lòŋgɛ ema la eti ema i hwèlì o tenì na i ndùtù hvɛ ema i jo ùŋmànɛ̀lɛ̀yi.

Ɛ̀hvìrzìyà 1:9

Lohwɛ̀ à mà gbèeya hweyà hwe arzɛ na oma mɔ̀ à mà arze nanù ema a hwe gbèye. A jo gbèyi o lì hwiya hweyà ema natɛ̀ɛ na naŋgɛ, tɔ̀ mòtò a rza rzɔ̀ŋgìtɛ̀nɛ̀. Hwene hweyà hwe hwèlì ndi hweyà ema mɔ̀ à mà gbeye lì akeyà na Krirztò.

Ɛ̀hvìrzìyà 6:19

È no kànɛ̀lɛlɛ imba hvɛ, ema tɔ̀ ima hvonda ema na ohwa Èya ya ama Krirztò, Lohwɛ̀ a no ŋgba e mbɔrzi ema e hvomɛ̀nɛ̀yi. Aŋga nanù, na o tànɛyi lì ohweyà hwatò Ŋmɛ̀ndì mò Gbamù ema hwa rza rzɔ̀ŋgìtɛ̀nɛ̀ e rzìi hwɛ lì oka tɔ̀ wɔ̀ŋgɔ̀.

Kòlòrzìyà 2:2

Nà gbeyà ndi nanù o lì hwa ètìrzɛ̀ mèèmà me awu. Aŋga nanù e ndìŋgɛ ema e hwèlì o ìtììtènì ja anyu e o gbèeyà o lì hwɛ mòtò mɔ̀kɔ. Imba na arza nanù ema o wa na wɔ e ika mèèmà me anyu me arzɛ nàa hwatò ema hwa rzɔ̀ŋgìtɛ̀nɛ̀ eyà ya ama Lohwɛ̀ ema hwatò hwa rzi rzɔ̀ŋgìtɛ̀nɛ̀. Èŋge eyà ya Lohwà e hwèlì ndi Krirztò mɔ̀ ŋmìti.

Kòlòrzìyà 4:3

È a jo kànɛlɛlɛ irzɔ hvɛ, aŋga nanù Lohwɛ̀ a jo lìhvoweya e njiya o lì ohwa ŋmɛ̀ndì lì hvomɛ̀nɛ̀ Krirztò, ema hwatò hwa rzi rzɔ̀ŋgìtɛ̀nɛ̀ o mòlòmɛ. Moŋgo ŋmɛ̀ndì ema imba na ohwa mɔ̀ ndi mo gbèyi ɔndèŋgàtɛ̀ imba na hwèlì o hwèwòwà.

1 Tìmotì 3:16

Lohwɛ̀ à mà jo gbeyà o lì hwiya nanù ema ŋmɛ̀ndì mo eni mo hwɛni wòlìto rzayi-rzayi. Nànù ndi mo hwèlì: Krirztò à mà jà, ndèŋgàna mɔ̀ à mà hwɛ ndi mòtò wa hwènàmà, Èlìŋgɛ̀ yà Wòtani e ma jo uŋmɛ̀lɛ̀ nanù ema a hwèlì ndi è Ŋmanà wà Mùnyanà wa ama Lohwɛ̀, ndeŋgànɛ̀lɛ̀ i aŋgèlì i ma mo ɛnɛ. Hwà mà ohweyà hwatò hwa arzɛ hwa ene rze ya mɔ̀nyɛ̀ ndèŋgànɛ̀lɛ̀ hwà mà mo lòkɛ̀. Lohwɛ̀ à mà mo hvùmùlɛ̀, à mà ɛndɛ o ŋmanyu ya Lohwà o tenì ya ŋmàye.

1 Tìmotì 3:6

A rza àŋgàmɛ̀nɛ̀yi ndi lì hwɛ mòtò ema a rzi ku mbɔ, o lì lòkɛ̀ Krirztò, ene e tànɛyi lì mo gbeyà ema, ayèkirzɛ, o lì kpa, na o lì luwa kɔ̀kìrzɛ̀ molemilemi na oma Mòkarzɛ̀ à mà kpe rzìi a luwa kɔ̀kìrzɛ̀.

1 Tìmotì 3:9

Hwa àŋgàmɛ̀nɛ̀yi lì oŋgama e jɔ̀kɛ̀ ema Lohwɛ̀ a gbèeyà ema hwatò hwa hwiye màlùtèyà na ɛ̀ɛ̀mɛ̀ ema a arza nanù ema hwa hwɛnɛ. Hwa hwɛni lì gbeyà nanù na ŋmèma ema mo hwi mamɛ ema e lɔ̀wu.

Tàyìtùrzì 1:7

Kànàtɛ e mòtimbèlì wa ŋmèmba ndi à kànèyà ewòlo ya ama Lohwɛ̀, a àŋgàmɛ̀nɛ̀yi ndi lì hwɛ mòtò ema a rza ohvɛ tɔ̀ njɔ̀mi. A àŋgàmɛ̀nɛ̀ ndi lì hwɛ mòtò ema a rza enje lìhvàma, na mòtò ema a ambi lì tata. A rza àŋgàmɛ̀nɛ̀ lì hwɛ mòtò ema a aŋgbɛ mɔ̀ ŋmìti o lì nyɔ la mimba, tɔ̀ mòtò ema a jànà mòhvùŋgu. Ndèŋgànɛ̀lɛ̀ a rza àŋgàmɛ̀nɛ̀ lì hwɛ njɔ̀ŋgu.

1 Pètrò 4:10

È hwɛ hwàgbèèlì hwa gbamù ndèŋgànɛ̀lɛ̀ e gbeyàne màahweyà ma anyu o lì oŋgowàna mɔ̀kɔ na ɔ̀nɛyi.