UMikha 6:9 - iBhayibhili Elingcwele 1978

⁹ Ilizwi leNkosi liyamemeza kuwo umuzi — kuyikuhlakanipha okuqotho ukwesaba ibizo lakho. Zwanini, lina bantu lomphakathi womuzi.

IBhayibhili Elingcwele LesiNdebele

⁹ Lalelani! UThixo umemezela kulo idolobho, lokwesaba ibizo lakho kuyikuhlakanipha, “Qaphelani umqwayi laLowo owubekileyo.

UMikha 6:9 Mawu Ofanana

2 USamuyeli 21:1

Kwaba khona indlala ensukwini zikaDavida iminyaka emithathu ngokulandelana; uDavida wabuza iNkosi uNkulunkulu. Yathi: USawuli ulecala legazi kanye lendlu yakhe, ngoba wabulala abaseGibeyoni.

UJobe 10:2

ngithi kuNkulunkulu: Ungangilahli; ungazise ukuba kungani uphikisana lami,

UJobe 23:14

Ngoba uzaphelelisa lokho angimisele khona; lezinto ezinengi ezinjalo zisengqondweni yakhe.

UJobe 5:17

Ubusisiwe lowomuntu uNkulunkulu amlayayo; ngalokhoke ungakudeleli ukukhuza kukaSomandla.

AmaHubo 107:43

Lowo ohlakaniphileyo kaqaphelise lokhu, aqedisise uthando olungapheliyo lweNkosi.

AmaHubo 48:10

Njengalo ibizo lakho, Nkulunkulu, ukudunyiswa kwakho kufinyelela emikhawulweni yomhlaba; isandla sakho sokunene sigcwele ukulunga.

AmaHubo 83:18

Kabazi ukuthi nguwe wedwa oyiNkosi, ongoPhezukonke emhlabeni wonke.

AmaHubo 9:16

INkosi izibonakalisile, yahlulela; ababi bathiywe emsebenzini wezandla zabo.

Izaga 22:3

Olengqondo ehlakaniphileyo nxa ebona ingozi isiza uyacatsha, kodwa ongelalwazi uqonda kuyo ahlupheke.

U-Isaya 26:11

Nkosi, isandla sakho siphakanyisiwe, kodwa izitha zakho kazisiboni. Kazibone ukutshisekela kwakho abantu bakho, zibe lenhloni. Umlilo olungiselwe zona kawuziqede.

U-Isaya 27:10

Umuzi obiyelweyo usulunxiwa, usuyindawo engelalutho, esele iyinkangala; lapho ithole lidla khona, lilale khona, lidle liqede lamahlamvu awo.

U-Isaya 30:27

Khangela, iNkosi ivela khatshana, ulaka lwayo luyavutha, lutshengiswa ngentuthu ethunqayo; ikhuluma ithukuthele, lamazwi ayo anjengomlilo oquthulayo;

U-Isaya 66:6

Zwanini umsindo phakathi komuzi; umsindo ophuma ethempelini ngumsindo wokuphindisela kweNkosi ezitheni zayo.

U-Isaya 9:13

Abantu kababuyelanga kulowo owabatshayayo, futhi kabayidinganga iNkosi yamabandla.

UJeremiya 26:18

UMika waseMoreshethi watshumayela ensukwini zikaHezekiya, inkosi yakoJuda, wathi kibo bonke abantu bakoJuda: INkosi yamabandla ithi: IZiyone lizalinywa njengensimu; iJerusalema libe lunxiwa oludilikileyo, lentaba okwakhiwe kuyo ithempeli ibe lisandle.

UJeremiya 26:6

ngizakwenza lindlu ibe njengeShilo, ngenze lumuzi ube yisiqalekiso kuzo zonke izizwe zomhlaba.

UJeremiya 47:7

Kodwa ungaphumula kanjani lapho iNkosi iwulayile na? Iwumisele iAshikeloni lezinkumbi zolwandle.

UHezekhiyeli 7:9

Kangiyikuliyekela, kangiyikulihawukela, kodwa ngizalitshaya ngenxa yezenzo zenu langamanyala enu asesephakathi kwenu. Ng’khona lizakwazi ukuba ngiyiNkosi etshayayo.

UHosiya 13:16

ISamariya lizathwala icala lalo, ngoba lihlamukile uNkulunkulu walo; bazakubulawa yimpi, labantwana babo bachotshozwe, labakhulelweyo babo baqhaqhwe.

UHosiya 14:9

Lowo ohlakaniphileyo aziqedisise lezizinto; lowo oqondayo azazi; ngoba indlela zeNkosi zilungile, labaqotho bayahamba ngazo, kodwa izoni ziyakhubeka kuzo.

uAmosi 2:5

Ngakho ngizathumela umlilo koJuda ozakuqeda izinqaba zeJerusalema.

uAmosi 6:1

Maye kubo abachelesileyo eZiyone labalondolozekileyo entabeni yaseSamariya, amadoda adumileyo esizwe sokuqala abaya kuwo abakoIsrayeli!

UMikha 3:12

Ngakhoke ngenxa yenu iZiyone lizalinywa njengensimu, leJerusalema libe lunxiwa oludilikileyo, lentaba yethempeli iphenduke ibe lihlathi.

UMikha 6:10

Ngingayikhohlwa inotho ezuzwa ngokubi esendlini yababi, lezilinganiso ezikhohlisayo na?

UMikha 6:8

Ikutshengisile okuhle, wena muntu, iNkosi ifunani kuwe na? Ifuna kuphela ukwenza ukulunga, lokuthanda okungapheliyo, lokuzithoba phambi kwayo.

UZefaniya 3:2

Kawulaleli lizwi, kawamukeli kulaywa, kawuthembeli eNkosini, kawusondeli kuNkulunkulu wawo.

Isambulo 3:19

Bonke engibathandayo ngiyabasola ngibatshaye; ngakhoke tshisekela ukuphenduka.