UHezekhiyeli 6:11 - iBhayibhili Elingcwele 1978

¹¹ INkosi uNkulunkulu ithi: Qakeza izandla zakho, ugide ngenyawo zakho uthi: Maye! ngenxa yawo wonke amanyala amabi akoIsrayeli; ngoba bazabulawa yimpi, layindlala, layisifo.

IBhayibhili Elingcwele LesiNdebele

¹¹ Nanku okutshiwo nguThixo Wobukhosi ukuthi: “Tshaya izandla zakho unyathele inyawo zakho ukhale uthi Maye! Ngenxa yobubi bonke lezenzo ezenyanyekayo zendlu ka-Israyeli, bonke bazakufa ngenkemba, langendlala kanye langesifo.”

UHezekhiyeli 6:11 Mawu Ofanana

U-Isaya 58:1

INkosi ithi: Memeza ngelizwi elikhulu, ungathuli, uphakamise ilizwi lakho njengelophondo, utshele abantu bami iziphambeko zabo, lendlu kaJakobe izono zayo.

UJeremiya 16:4

Bazabulawa yikufa okwesabekayo; kabayikulilelwa, futhi kabayikungcwatshwa; bazakuba njengamalongwe emhlabathini. Bazabhujiswa yimpi layindlala, lezidumbu zabo zibe yikudla kwenyoni zaphezulu lenyamazana zeganga.

UJeremiya 24:10

Ngizabehlisela impi lendlala lomkhuhlane, baze babhubhe baphele elizweni engibanika lona lokhokho babo.

UJeremiya 30:7

Maye! lukhulu lolosuku, kalukho olunye olunjengalo. Kuyisikhati sokuhlupheka kukaJakobe, kanti uzakukhululwa kukho.

UJeremiya 42:22

Yazini impela ukuba lizakubulawa yimpi layindlala langumkhuhlane endaweni elifisa ukuyahlala kiyo.

UJeremiya 9:1

Kungathi ngabe ikhanda lami lingamanzi, lamehlo ami angumthombo wenyembezi, ukuba ngikhalele ababuleweyo ebantwini bami emini lebusuku.

UJeremiya 9:10

Ngizakhala ngililele izintaba, lamadlelo asenkangala, ngoba kuchithiwe, kakusekho ohamba khona, kakusezwakali ukukhala kwezinkomo, inyoni zaphezulu lenyamazana zibalekile zahamba.

UHezekhiyeli 14:21

INkosi uNkulunkulu ithi: Phoke, kuzakuba njani eJerusalema nxa ngilehlisela lezizehlulelo zami ezine ezibuhlungu, impi, lendlala, lezilo ezimbi, lesifo, ukuba ngiqede kilo abantu lezinyamazana.

UHezekhiyeli 21:19

Ndoda, dweba indlela ezimbili zokufika kwenkosi yaseBabiloni, ilomkhonto wayo, zombili zisuke elizweni linye. Umise isiqondiso sendlela, usimise ekuhlanganeni kwezindlela.

UHezekhiyeli 25:6

INkosi uNkulunkulu ithi: Ngoba uqakezile izandla zakho, wagida ngenyawo zakho, wathokoza ugcwele umona ngelizwe lakoIsrayeli,

UHezekhiyeli 33:27

Tshono lokhu kibo uthi: INkosi uNkulunkulu ithi: Ngiyazifunga mina, impela labo abasendaweni ezichithekileyo bazakubulawa; labo abasegangeni ngizabanikela ezilweni zibabulale, lalabo abasezinqabeni labasembalwini bazabulawa yisifo.

UHezekhiyeli 5:12

Ingxenye yesithathu yenu izabulawa yisifo, iqedwe yindlala phakathi kwenu; ingxenye yesithathu izabulawa yimikhonto endaweni zonke zenu; lengxenye yesithathu ngiyichithachithele emimoyeni yonke, ngiyilandele ngiphethe umkhonto.

UHezekhiyeli 6:10

Bazakwazi ukuba mina ngiyiNkosi. Kangikhulumanga ize nxa ngisithi ngizakwenza lokho okubi kibo.

UHezekhiyeli 7:12

Isikhathi sesifikile, losuku lusondele. Umthengi kangathokozi, lothengisayo angazisoli, ngoba ulaka lwehlela phezu kwabo bonke.

UHezekhiyeli 7:15

Ngaphandle kukhona impi, ngaphakathi kukhona isifo lendlala; osegangeni ubulawa yimpi, lophakathi komuzi abulawe yindlala lesifo.

UHezekhiyeli 9:4

yathi kuye: Dabula phakathi komuzi waseJerusalema, ufake uphawu emabunzini abantu ababubulayo bekhala ngawo wonke amanyala enziwa phakathi kwawo.

UJoweli 1:15

Maye ngalolosuku! Ngoba usuku lweNkosi luseduze, luzafika njengokuchitheka okulethwa nguSomandla.

uAmosi 5:16

INkosi uNkulunkulu wamabandla ithi: Emidangeni yenu yonke kuzakuba khona ukulila, lakuzo zonke indlela bazakuthi: Maye! Maye! Bazabiza abalimi ukuba balile, labakwaziyo ukukhala ukuba balile.

AmaNani 24:10

UBalaki wamthukuthelela uBalami, waqakeza izandla zakhe, wathi kuBalami: Ngikubize ukuba uqalekise izitha zami, kodwa uzibusisile kathathu.

Isambulo 18:10

Azakuma khatshana ngokwesaba ukuhlupheka kwalo esithi: Maye, maye kuwe muzi omkhulu waseBabiloni! Ngesikhatshana kufikile kuwe ukuthonisiswa kwakho.