147 Mau a Mulungu Pa Nzeru ndi Miyambi

Kuopa Yehova ndiko chiyambi cha kudziwa; opusa anyoza nzeru ndi mwambo.

Khulupirira Yehova ndi mtima wako wonse, osachirikizika pa luntha lako; umlemekeze m'njira zako zonse, ndipo Iye adzaongola mayendedwe ako.

Nzeru ipambana, tatenga nzeru; m'kutenga kwako konseko utenge luntha.

Chiyambi cha nzeru ndicho kuopa Yehova; kudziwa Woyerayo ndiko luntha.

Koma wina wa inu ikamsowa nzeru, apemphe kwa Mulungu, amene apatsa kwa onse modzala manja, niwosatonza; ndipo adzampatsa iye.

Pakuti Yehova apatsa nzeru; kudziwa ndi kuzindikira kutuluka m'kamwa mwake.

Pakudza kudzikuza padzanso manyazi; koma nzeru ili ndi odzichepetsa.

Kodi kulandira nzeru sikupambana ndi golide, kulandira luntha ndi kusankhika koposa siliva?

Tamvera uphungu, nulandire mwambo, kuti ukhale wanzeru pa chimaliziro chako.

Njira ya chitsiru njolungama pamaso pakepake; koma wanzeru amamvera uphungu.

Kuopa Yehova ndiko mwambo wanzeru; ndipo chifatso chitsogolera ulemu.

Kudzikuza kupikisanitsa; koma omwe anauzidwa uphungu ali ndi nzeru.

Wosakwiya msanga apambana kumvetsa; koma wansontho akuza utsiru.

Wolandira nzeru akonda moyo wake; wosunga luntha adzapeza zabwino.

Mayankhidwe ofatsa abweza mkwiyo; koma mau owawitsa aputa msunamo.

Pochuluka mau zolakwa sizisoweka; koma wokhala chete achita mwanzeru.

Wopanda chikamwakamwa apambana kudziwa; ndipo wofatsa mtima ali wanzeru.

Chitsiru chivumbulutsa mkwiyo wake wonse; koma wanzeru auletsa nautontholetsa.

Wochenjera aona zoipa, nabisala; koma achibwana angopitirira, nalipitsidwa.

Wodala ndi wopeza nzeru, ndi woona luntha; pakuti malonda a nzeru aposa malonda a siliva, phindu lake liposa golide woyengeka.

Pakuti nzeru iposa ngale, ndi zonse tizifunitsa sizilingana nayo.

Zolingalira zizimidwa popanda upo; koma pochuluka aphungu zikhazikika.

Wokonda mwambo akonda kudziwa; koma wakuda chidzudzulo apulukira.

Nzeru imangitsa nyumba; luntha liikhazikitsa. Ndinapita pa munda wa waulesi, polima mphesa munthu wosowa nzeru. Taonani, ponsepo panamera minga, ndi kuwirirapo khwisa; tchinga lake lamiyala ndi kupasuka. Pamenepo ndinayang'ana ndi kuganizira, ndinaona ndi kulandira mwambo. Tulo tapang'ono, kungoodzera pang'ono, kungomanga manja pang'ono m'kugona, ndipo umphawi wako udzafika ngati mbala; ndi kusauka kwako ngati munthu wachikopa. Kudziwa kudzaza zipinda zake ndi chuma chonse chofunika cha mtengo wake.

Pakuti nzeru itchinjiriza monga ndalama zitchinjiriza; koma kudziwa kupambana, chifukwa nzeru isunga moyo wa eni ake.

Masewero a chitsiru ndiwo kuchita zoipa; koma masewero a wozindikira ndiwo nzeru.

Mtima wa wozindikira umaphunzira; khutu la anzeru lifunitsa kudziwa.

Kulingalira kwa munthu kuchedwetsa mkwiyo; ulemerero wake uli wakuti akhululukire cholakwa.

Chinjiriza mtima wako koposa zonse uzisunga; pakuti magwero a moyo atulukamo.

Mwini mtima wanzeru amalandira malamulo; koma chitsiru cholongolola chidzagwa.

Wanzeru amaopa nasiya zoipa; koma wopusa amanyada osatekeseka.

Nyumba ndi chuma ndizo cholowa cha atate; koma mkazi wanzeru achokera kwa Yehova.

Alipo golide ndi ngale zambiri; koma milomo yodziwa ndiyo chokometsera cha mtengo wapatali.

Zoganizira za wakhama zichulukitsadi katundu; koma yense wansontho angopeza umphawi.

Kulibe nzeru ngakhale luntha ngakhale uphungu wotsutsana ndi Yehova.

Tchera makutu ako, numvere mau a anzeru, nulozetse mtima wako kukadziwa zanga.

Mwamuna wanzeru ngwamphamvu; munthu wodziwa ankabe nalimba.

Usadziyese wekha wanzeru; opa Yehova, nupatuke pazoipa;

Mwananga, usaiwale malamulo anga, mtima wako usunge malangizo anga; motero nkhokwe zako zidzangoti thee, mbiya zako zidzasefuka vinyo. Mwananga, usapeputse mwambo wa Yehova, ngakhale kutopa ndi kudzudzula kwake; pakuti Yehova adzudzula omwe awakonda; monga atate mwana amene akondwera naye. Wodala ndi wopeza nzeru, ndi woona luntha; pakuti malonda a nzeru aposa malonda a siliva, phindu lake liposa golide woyengeka. Mtengo wake uposa ngale; ndipo zonse zikukondweretsa sizilingana naye. Masiku ambiri ali m'dzanja lamanja lake; chuma ndi ulemu m'dzanja lake lamanzere. Njira zake zili zokondweretsa, mayendedwe ake onse ndiwo mtendere. Ndiyo mtengo wa moyo wa akuigwira; wakuiumirira ngwodala. Yehova anakhazika dziko ndi nzeru; naika zamwamba ndi luntha. pakuti adzakuonjezera masiku ambiri, ndi zaka za moyo ndi mtendere.

Ukachenjeza wanzeru adzakulitsa nzeru yake; ukaphunzitsa wolungama adzaonjezera kuphunzira.

Miyambo ya Solomoni: Mwana wanzeru akondweretsa atate; koma mwana wopusa amvetsa amake chisoni.

Chipatso cha wolungama ndi mtengo wa moyo; ndipo wokola mtima ali wanzeru.

Ukayenda ndi anzeru udzakhala wanzeru: koma mnzao wa opusa adzaphwetekedwa.

Mkazi yense wanzeru amanga banja lake; koma wopusa alipasula ndi manja ake.

Nzeru ya wochenjera ndiyo yakuti azindikire njira yake; koma utsiru wa opusa ndiwo chinyengo.

Ilipo njira yooneka kwa mwamuna ngati yoongoka; koma matsiriziro ake ndi njira za imfa.

Mtima wa wozindikira ufunitsa kudziwa; koma m'kamwa mwa opusa mudya utsiru.

Khutu lomvera chidzudzulo cha moyo lidzakhalabe mwa anzeru.

Wolabadira mau adzapeza bwino; ndipo wokhulupirira Yehova adala.

Nzeru ili pamaso pa wozindikira; koma maso a wopusa ali m'malekezero a dziko.

Mau a m'kamwa mwa munthu ndiwo madzi akuya; kasupe wa nzeru ndiye mtsinje wodzala.

Milomo ya wopusa ifikitsa makangano; ndipo m'kamwa mwake muputa kukwapulidwa. M'kamwa mwa wopusa mumuononga, milomo yake ikhala msampha wa moyo wake.

Kukhumba kosadziwa sikuli kwabwino; ndipo wofulumira ndi mapazi ake amachimwa.

Vinyo achita chiphwete, chakumwa chaukali chisokosa; wosochera nazo alibe nzeru.

Mbiri yabwino ifunika kopambana chuma chambiri; kukukomera mtima anzako kuposa siliva ndi golide.

Gula ntheradi, osaigulitsa; nzeru, ndi mwambo, ndi luntha.

Pakuti udzaponya nkhondo yako ndi upo, ndi kupulumuka pochuluka aphungu.

Monga mphete yagolide ndi chipini chagolide woyengeka, momwemo wanzeru wodzudzula pa khutu lomvera.

Kodi uona munthu wodziyesa wanzeru? Ngakhale chitsiru chidzachenjera koma ameneyo ai.

Wokhulupirira mtima wakewake ali wopusa; koma woyenda mwanzeru adzapulumuka.

Zapang'ono, ulikuopa Yehova, zipambana ndi katundu wambiri pokhala phokoso.

Tenga nzeru, tenga luntha; usaiwale, usapatuke pa mau a m'kamwa mwanga; usasiye nzeru, ndipo idzakusunga; uikonde, idzakutchinjiriza.

Mwananga, zisachokere kumaso ako; sunga nzeru yeniyeni ndi kulingalira; ndipo mtima wako udzatengapo moyo, ndi khosi lako chisomo.

Pereka zochita zako kwa Yehova, ndipo zolingalira zako zidzakhazikika.

Popanda upo wanzeru anthu amagwa; koma pochuluka aphungu pali chipulumutso.

Chidzudzulo chilowa m'kati mwa wozindikira, kopambana ndi kukwapula wopusa kwambiri.

Wosakwiya msanga aposa wamphamvu; wolamulira mtima wake naposa wolanda mudzi.

Woipa athawa palibe momthamangitsa; koma olungama alimba mtima ngati mkango.

Uphungu utsimikiza zolingalira, ponya nkhondo utapanga upo.

Ukalefuka tsiku la tsoka mphamvu yako ichepa.

Mkazi wodekha ndiye korona wa mwamuna wake; koma wochititsa manyazi akunga chovunditsa mafupa a mwamunayo.

Chiyembekezo chozengereza chidwalitsa mtima; koma pakufika chifunirocho ndicho mtengo wa moyo.

Wobisa cholakwa afunitsa chikondano; koma wobwerezabwereza mau afetsa ubwenzi.

Wopusa sakondwera ndi kuzindikira; koma kungovumbulutsa za m'mtima mwake.

Lilime lili ndi mphamvu pa imfa ndi moyo; wolikonda adzadya zipatso zake.

Anthu ambiri abukitsa yense kukoma mtima kwake; koma ndani angapeze munthu wokhulupirika?

Wosalamulira mtima wake akunga mudzi wopasuka wopanda linga.

Posowa nkhuni moto ungozima; ndi popanda kazitape makangano angoleka.

Kodi uona munthu wansontho m'mau ake? Ngakhale chitsiru chidzachenjera, koma ameneyo ai.

Pakuti yemwe Mulungu amuyesa wabwino ampatsa nzeru ndi chidziwitso ndi chimwemwe; koma wochimwa amlawitsa vuto la kusonkhanitsa ndi kukundika, kuti aperekere yemwe Mulungu amuyesa wabwino. Ichinso ndi chabe ndi kungosautsa mtima.

Kumva chidzudzulo cha anzeru kupambana kumva nyimbo ya zitsiru.

Mtima wa munthu ulingalira njira yake; koma Yehova ayendetsa mapazi ake.

Gwira mwambo, osauleka; uusunge; pakuti ndiwo moyo wako.

Usanyadire zamawa, popeza sudziwa tsiku lina lidzabala chiyani?

Mkwiyo wa chitsiru udziwika posachedwa; koma wanzeru amabisa manyazi.

Nkhawa iweramitsa mtima wa munthu; koma mau abwino aukondweretsa.

Kuchiza lilime ndiko mtengo wa moyo; koma likakhota liswa moyo.

Bwenzi limakonda nthawi zonse; ndipo mbale anabadwira kuti akuthandize pooneka tsoka.

Phunzitsa mwana poyamba njira yake; ndipo angakhale atakalamba sadzachokamo.

Udani upikisanitsa; koma chikondi chikwirira zolakwa zonse.

Kazitape woyendayenda amawanditsa zinsinsi; koma wokhulupirika mtima abisa mau.

Chinyengo chili m'mitima ya oganizira zoipa; koma aphungu a mtendere amakondwa.

Wonyoza anzake achimwa; koma wochitira osauka chifundo adala.

Mau okoma ndiwo chisa cha uchi, otsekemera m'moyo ndi olamitsa mafupa.

Woyanjana ndi ambiri angodziononga; koma lilipo bwenzi lipambana ndi mbale kuumirira.

Usayanjane ndi munthu wokwiya msanga; ngakhale kupita ndi mwamuna waukali; kuti ungaphunzire mayendedwe ake, ndi kutengera moyo wako msampha.

Mwananga, mtima wako ukakhala wanzeru, mtima wanga wa inedi udzakondwa. Imso zanga zidzasangalala, polankhula milomo yako zoongoka.

Mau oyenera a pa nthawi yake akunga zipatso zagolide m'nsengwa zasiliva.

Wokumba dzenje adzagwamo, wogubuduza mwala, udzabweranso pa iye mwini.

Chitsulo chinola chitsulo; chomwecho munthu anola nkhope ya mnzake.

Chitsulo chikakhala chosathwa, ndipo ukaleka kunola, uzipambana kulimbikira; koma nzeru ipindulira pochenjeza.

Wobisa machimo ake sadzaona mwai; koma wakuwavomereza, nawasiya adzachitidwa chifundo.

Kuopa Yehova kupatsa moyo; wokhala nako adzakhala wokhuta; zoipa sizidzamgwera.

Wosunga mwambo ali m'njira ya moyo; koma wosiya chidzudzulo asochera.

Ilipo njira yooneka kwa mwamuna ngati yoongoka, koma matsiriziro ake ndi njira za imfa.

Wosunga m'kamwa mwake ndi lilime lake asunga moyo wake kumavuto.

Wochenjera aona zoipa, nabisala; koma achibwana angopitirira, nalipitsidwa.

Mtima wokondwa usekeretsa nkhope; koma moyo umasweka ndi zowawa za m'mtima.

Anzeru adzalandira ulemu cholowa chao; koma opusa adzakweza manyazi.

Muyeso wonyenga unyansa Yehova; koma mulingo wamphumphu umsekeretsa.

Zilipo zinthu zisanu ndi chimodzi Yehova azida; ngakhale zisanu ndi ziwiri zimnyansa: Maso akunyada, lilime lonama, ndi manja akupha anthu osachimwa; mtima woganizira ziwembu zoipa, mapazi akuthamangira mphulupulu m'mangum'mangu; mboni yonama yonong'ona mabodza, ndi wopikisanitsa abale.

Mzimu wa munthu ndiwo nyali ya Yehova; usanthula m'kati monse mwa mimba.

Kuopa anthu kutchera msampha; koma wokhulupirira Yehova adzapulumuka.

Wogwira pakamwa pake asunga moyo wake; koma woyasamula milomo yake adzaonongeka.

Wolekerera mwanake osammenya amuda; koma womkonda amyambize kumlanga.

Lozetsa mtima wako kumwambo, ndi makutu ako ku mau anzeru.

M'ntchito zonse muli phindu; koma kulankhulalankhula kungopatsa umphawi.

Kunyada kutsogolera kuonongeka; mtima wodzikuza ndi kutsogolera kuphunthwa.

Wolemera alamulira osauka; ndipo wokongola ndiye kapolo wa womkongoletsa.

Dzina la Yehova ndilo nsanja yolimba; wolungama athamangiramo napulumuka.

Munthu wokhulupirika ali ndi madalitso ambiri; koma wokangaza kulemera sadzapulumuka chilango.

Mphotho ya chifatso ndi kuopa Yehova ndiye chuma, ndi ulemu, ndi moyo.

Zakudya zikwanira wolima minda yake; koma wotsata anthu opanda pake asowa nzeru.

Moyo wa waulesi ukhumba osalandira kanthu; koma moyo wa akhama udzalemera.

Wachibwana akhulupirira mau onse; koma wochenjera asamalira mayendedwe ake.

Kodi upenya munthu wofulumiza ntchito zake? Adzaima pamaso pa mafumu, osaima pamaso pa anthu achabe.

Njira zonse za munthu zilungama pamaso pake; koma Yehova ayesa mitima.

Wosunga mkuyu adzadya zipatso zake; wosamalira ambuyake adzalemekezedwa.

Mtima wa mataya udzalemera; wothirira madzi nayenso adzathiriridwa.

Wochitira waumphawi chifundo abwereka Yehova; adzambwezera chokoma chakecho.

Oipa samvetsetsa chiweruzo; koma omwe afuna Yehova amvetsetsa zonse.

Madalitso a Yehova alemeretsa, saonjezerapo chisoni.

Wotseka makutu ake polira waumphawi, nayenso adzalira koma osamvedwa.

Kuopa Yehova ndiko kasupe wa moyo, kupatutsa kumisampha ya imfa.

Mwini diso lamataya adzadala; pakuti apatsa osauka zakudya zake.

Oyenera kulandira zabwino usawamane; pokhoza dzanja lako kuwachitira zabwino. Usanene kwa mnzako, Ukabwerenso, ndipo mawa ndidzakupatsa; pokhala uli nako kanthu.

Yehova atalikira oipa; koma pemphero la olungama alimvera.

Koma mayendedwe a olungama akunga kuunika kwa mbandakucha, kunkabe kuwala kufikira usana woti mbee. Njira ya oipa ikunga mdima; sadziwa chimene chiwaphunthwitsa.

Maso a Yehova ali ponseponse, nayang'anira oipa ndi abwino.

Wokonda zoseketsa adzasauka; wokonda vinyo ndi mafuta sadzalemera.

Mtima wako usachitire nsanje akuchimwawo; koma opabe Yehova tsiku lonse. Pakutitu padzakhala mphotho; ndipo chiyembekezo chako sichidzalephereka.

Udziwitsitse zoweta zako zili bwanji, samalira magulu ako;

Mwini muyeso ndi mulingo wolungama ndiye Yehova; ndiyenso anapanga miyala yonse yoyesera ya m'thumba.

Yehova anakhazika dziko ndi nzeru; naika zamwamba ndi luntha. pakuti adzakuonjezera masiku ambiri, ndi zaka za moyo ndi mtendere. Zakuya zinang'ambika ndi kudziwa kwake; thambo ligwetsa mame.

Mboni yonama sidzakhala yosalangidwa; wolankhula mabodza sadzapulumuka.

Chifundo ndi choonadi zisakusiye; uzimange pakhosi pako; uzilembe pamtima pako; Usakangane ndi munthu chabe, ngati sanakuchitire choipa. Usachitire nsanje munthu wachiwawa; usasankhe njira yake iliyonse. Pakuti wamphulupulu anyansa Yehova; koma chinsinsi chake chili ndi oongoka. Yehova atemberera za m'nyumba ya woipa; koma adalitsa mokhalamo olungama. Anyozadi akunyoza, koma apatsa akufatsa chisomo. Anzeru adzalandira ulemu cholowa chao; koma opusa adzakweza manyazi. motero udzapeza chisomo ndi nzeru yabwino, pamaso pa Mulungu ndi anthu.