SAMRAMME 1 - KEMCI BIBLE (BSI)

Judabe benai Simeonbe Zatme ne Adoni-bezekbe je Nimbe

¹ Joshuabe chaidibe chângge Israelme Tingwang dage mâ-ka’mmêt te lei, “Anui ruage châu ne Kanaanme je ’nggi ra zuapat raî ra lau, penui je herei ra hangge zeu?” ze acheu zeu.

² Tingwang ne kak ze, “Juda zat ne hangraî ra de lei, pie le lau, pe ba ge heram ze I ne pei gai ’nde lei,” ze kacheu de lei.

³ Zai Juda zat ne pe kina Simeon zat je, “A hangge diepatkaibe heram ’mbe achu nguahang’mpam kei lei, dezai Kanaanme je anai ’nggichi le ra hangge zeu; zai chigum ze I du ning hangge diepatkaibe heram ge ningchu nguagut’mpam gai bu lei,” ze kacheu de lei. Chidadege pechu ngua’mpam lu ze Simeonbe zuapat ti de lei.

⁴ Chidadege Judabe hang di de lei, zai Tingwang ne Kanaanme benai Perizme je penui ba ge pei gai bei de lei; zai Bezek ge penui ne chang kereume je hereingam lu de lei.

⁵ Bezek ge Adoni-bezekbe dage penui wangchang de lei, zai pechu ka’nggi de lei, zai Kanaanme benai Perezme je ngam lu de lei.

⁶ Adoni-bezekbe pak ti de lei, kane penui ne pechu gua’nchumie de lei, zai pechu nîm lu de lei, zai pe ba ’nzûngpui kena benai pe pî ’nzûngpui kena duatap ’ndi de lei.

⁷ Zai Adoni-bezekbe ne sa ze, “A gu tak teube kaira kangge penui ba’nzûngpui ramme benai penui pî’nzûngpui ramme duatap’ndibe kau heguangme riaksename ne tak teuterakeube moîne kuaiteu ze bam de lei; a tatew luigum ze Hera ne peiruî gai kadai de lei,” ze kacheu de lei. Zai Jerusalem ge penui ne pechu teiwang gai de lei, zai chigene pa chai di de lei.

Juda Zatme ne Jerusalem benai Hebron je Ka’nggibe

⁸ Zai Judame ne Jerusalem je ’nggi ze, chize sut ’ndi de lei, zai hiazutkie ne bichat kam ’ndi de lei, zai chipau namdi ze hemitua gai ’ndi de lei.

⁹ Zai chipau châng dege peloaram ge lungme, Negeb ge bamme, zai bekâmram ge bamme Kanaanme je ’nggi ra Judame wangkeu de lei.

¹⁰ Zai Hebron ge lungme Kanaanme (besua’ngka ge â Hebron je Kiriath-arba ze kube) je ’nggi ra Juda zat zuapat te lei; zai penui ne Sheshai benai Ahiman zai Talmai je hereingam lu de lei.

Othni-elbe ne Debir Namdi Ka’nggibe

¹¹ Chigene Debir ge lungme je ’nggi ra penui tat te lei. Debir namdi ji ze besua’ngka ge â Kiriath-sepher ze ku lei.

¹² Zai Kalebbe ne, “Kiriath-sepher namdi je ’nggi ze chize sutlube kau je â a na heleu’mpui Aksale je pe nâu hang pei gu lei,” kacheu de lei.

¹³ Zai Kalebbe kinapeu Kenazbe na Othni-elbe ne chi namdi sut lu de lei, zai pa ne pechu pe na Aksale je pe nâu hang kai bei de lei.

¹⁴ Chipaupeu dage pa meiwang gai dege, pe pau dagene helu bâm hang kie ra pa ne Othni-elbe je gecheu gai de lei; zai Aksahle pe gu hekunmerângne ching gene zuakeu de lei, dadege Kalebbe ne pechu, “Nang ’ndaikau kaheguî lau,” kacheu de lei.

¹⁵ Pa ne pechu, “A hangge kela pei lau; Negeb kedei ge I bam ra nang ne kai bei daze, dekuaki ramme du achu pei lau,” ze kacheu de lei. Zai Kalebbe ne pechu ’nreibe depin ramme benai ’ngkangbe depin ramme pei bei de lei.

Juda benai Benjamin Zat Hereingambe

¹⁶ Zai Kenme chaname, Mosabe nâu peu zat â Judame je ngua lu mêupi bang ramme gu namdi gene zuapat ze Judaram gu tingkangram Arad hiage bambe Negeb ’mbe tat ti de lei; zai chige tat ze chime zat dage ngualung ze bam de lei.

¹⁷ Zai Juda zat ne pe kinapeu Simeon zat je ngua lu zuapat te lei, zai penui ne Kanaanme Zephath ge lungme je hereingam lu de lei, zai chipau namdi ze tew’nsia kam ’ndi de lei. Chipauziegene chi namdi ji ze Horma ze ku de lei.

¹⁸ Juda zat ne Gaza namdi benai chipau ramdei, zai Ashkelon namdi benai chipau ramdei, zai Ekron namdi benai chipau ramdei ze du lu ’ndi de lei.

¹⁹ Zai Juda zat dage Tingwang bam de lei, zai pa ne peloaram ze ’nram ’ndi de lei, kane bekâmram ge lungme je â pa gua’mpie lak tai de lei, hegeî ne tewbe hekuntimriang ramme penui dage bambe ziegeneu.

²⁰ Zai Mosabe ne ranggai’ndibe luigum ze Hebron ze â Kaleb zat hangge pei gai ’ndi lei; zai pa ne chigene Anakbe name ’mpeumi hangchum je guatua de lei.

²¹ Kane Benjamin zatme â Jerusalem ge lungme Jebusme je guatua mak tai de lei; chipauziegene chuna ting chang ze Jebusme â Jerusalem ge Benjamin zatme je ngualungherua ze bam de lei.

Ephraimbe Zat benai Manassebe Zat ne Bethel je Ka’nggibe

²² Josepbe kiriame ne du Bethel namdi ’nggi ra zuapat te lei; zai penui dage Tingwang bam de lei.

²³ Zai Josepbe kiriame ne Bethel namdi ze hekimpie ra langpat kai de lei (Chipau namdi ji ze besua’ngka â Luz kacheu de lei).

²⁴ Zai hekimpieme ne chi namdi gene ziemmena hangkat zuapatbe ngau de lei, zai penui ne pechu, “Ningchu kiam de lei, namdi lung ’mbe gutbe ’mpuî ze anui je ranglia lau, dezai ningchu â anui tewhereu ra mak lei,” acheu bei de lei.

²⁵ Zai Pa ne penui je namdi gutbe ’mpuî ze ngualia bei de lei; zai penui ne chipau namdi ze hiazutkie ne gechim’nsia kam ’ndi de lei, kane chipaupeu benai pe kiduîme je â ’mpat kai bei de lei.

²⁶ Zai chipaupeu ze Hethme ram ’mbe tat ze namdi tewchu gai de lei, zai pe ji Luz ze ’ntak kai de lei, chuna ting riâ chang ze chipau ji zene kû ze bam de lei.

Israelme ne Guatuamakbe Zat

²⁷ Beth-shean ge lungme benai chipau heram gu keloa ramme, Taanakram benai chipau heram gu keloa ramme, Dor ge lungme benai chipau heram gu keloa ramme, Iblean ge lungme benai chipau heram gu keloa ramme, Megiddo ge lungme benai chipau heram gu keloa ramme je Manassebe zat ne guatua mak tai de lei; kane Kanaanme â chipau dei ge ’ngngînmeluisui ze lung ze bam de lei.

²⁸ Israelme penui peranchipat dege â penui ne ’nchi-chine tâtew ra Kanaanme je chui gai ze bam de lei, kane penui je guatua ’nzâuchiak kai mak te lei.

²⁹ Zai Ephraim zat ne Gezer ge lungme Kanaanme je guatua mak te lei; kane Kanaanme â Gezer ge penui dage ngualung ze bam de lei.

³⁰ Zebulunme Kitron ge lungme benai Nahalol ge lungme je guatua mak tai lei; kane Kanaanme â penui ruage lung ze ’nchi-chine penui guâ ’nggua ra hangge tew gai ze bam de lei.

³¹ Asher zat ne Akko ge lungme, Sidon ge lungme, Ahlab ge lungme, Akzib ge lungme, Helba ge lungme, Aphik ge lungme, zai Rehob ge lungme je guatua mak tai de lei;

³² kane Asherme â Kanaanme heramdeiname je ngualungherua ze bam de lei; penui ne chime je guatua mak dadegeu.

³³ Naphtali zat ne Beth-shemes ge lungme, zai Beth-anath ge lungme je guatua mak ze, kane Kanaanme heram deiname dage ngualungherua ze bam de lei; acheusede Beth-shemes benai Beth-anath ge lungme je penui ne ’nchi-chine penui guâ ’nggua ra tew gai ze bam de lei.

³⁴ Amorme ne Danme je peloaram ’mbe guapat kai dai bei de lei, chime zene penui je bekâmram ’mbe wangkeu ra lun mak daseu;

³⁵ Amorme â ’ngngînmeluisui ze Har-heres ge, Aijalon ge, zai Sha-albim ge lung ze bam de lei, kane Josepbe kiria ba ne penui peireige dapritsit kai ze bam de lei, zai penui je â ’nchi-chine tâtew ra pei gai ze bam de lei.

³⁶ Zai Amorme gu heramrai â Akrabbim chak gene tatpelapat ze, Sela gene ’nrei ’mbia bam de lei.