PHILIPPIME 1 - KEMCI BIBLE (BSI)

¹ Paulbe benai Timothibe, Krista Isua gua ka’ngguame, Krista Isua gene keneime ka’nchime Philippi ge bamme dage zai melireîbe tâ tewme zai tâka’ngguame (baizame) dage:

² Hera anui Peu benai Heguang Isua Krista dagene ka’nggiabe benai desieyibe ningnui dage peize bam lau.

Paulbe ne Pa pe Samkelakaime hangge Kakellumbe

³ Ningnui je I ’nningdau tânege a Rapeu dage I a suiyibe sam pauliâ gai bam lei,

⁴ ningnui hangge I kellum gai tânege I kakellumbe ge a suiyibe ne puigit ze bam lei,

⁵ raîlangbe mai gene chuna riâ chang ze gospel ge ningnui nguatatewbambe ziegene I a suiyi lei.

⁶ Zai ningnui dage tâ-keyibe nguatâtewpeu (Hera) ne Isua Krista gu tingnaimikpui riâ ge ngua-tatew’nsang gai gu lei be I â ’nnumtew lei.

⁷ Achu banggaibe ge benai gospel je sagu ze chize tew’ntip ze bambe betâuyibe daube ge ningnui ’nteumename a dage nguatâtewme changbe ze I a lungge chibambe ziegene ningnui rasam a dage ’nningtâu bam ra a hangge yi di de lei.

⁸ Krista Isua kehungbe gene ningnui ’nteumena je I ’nningdau-desang bam de lei, Hera ne a gu sakki chang daseu.

⁹ Ningnui gu kehungbe ze mâ-gechîbe benai keyibe ne ’nningchibe ne puibi-bi bam ra I ne kaheguîbe de lei,

¹⁰ chidezai ningnui ne mâyi-kadesangbe kelâng lu zai Krista gu naimikpui hangge ’nchi ze heziâkgabe chang le ra hangge zeu,

¹¹ Hera ngeudibe benai getoabe hangge Isua Krista gene patbe kapelingbe rachî zene pui lu zeu.

Ringrabe ze â Krista ze de lei

¹² A puiname gau, a dage mâ-mâ wangchangbeibe zene gospel ’ntuachu ra tew gai bei de lei be ningnui je peize chî ra I lunei bam lei,

¹³ chidadege achu banggaibeibe ze Krista hanggene lei be heguangki pelane gu hekêtkaime benai kêdame dage chîchang kam di de lei;

¹⁴ zai achu bangbeibe ziegene mi puiname misonggame lungsui ze Heguangpeu gene tew’ndi gai bei, Hera gu sam hing mak ze sa ra kuu’nteu-teu ze bam di de lei.

¹⁵ Hanggesame â hemimeube benai kahelitbe gene Krista rasam paurua run de lei, kane kêdame â helungsuiyibe gene Krista rasam paurua lei.

¹⁶ Chipau chângge patkadaime zene, gospel I ne sagu ze bamrabe hanggene aige (Hera) achu kai lei be chî lu ze, chipau tâ ze kehungbe gene tew de lei;

¹⁷ chi hanggesame ne lungsang ne mak ze, kane achu bangbe ze a lungtew’nsia gai ra ’nning ze penui bau châmcheî ze Krista rasam paurua de lei.

¹⁸ ’Ndaikau-tewsua dai ra lau? Pahelîtewbe gene mei nune gesang ne mei zaidu Krista rasam ze â pau gai bei de lei; zai chige I ne a suiyigaihâ de lei.

¹⁹ Eu lei, I ne a suiyigaihâ gu lei. Ai a lung kahereube ze ningnui kellum benai Isua Krista gu Herui ka’ngngâbe gene achu lungzeune tew ra lupatkaibe hangge chang gu daseu,

²⁰ achu tewhelêu-’mpia gai mak, kane pelua’nsangne ge gum ze chunage du kuugiereu ze keringbe zene mei nu kechaibe zene mei zai du a pumgîm gene Krista ngeu-tew’ndigairabe deze I ne nei-desang ze heguîkuabe luigum zeu.

²¹ A hangge â ringrabe ze Krista ze de lei, zai chairabe ze â kegiebe de lei.

²² Hemeipum ring bam dizai â chize a hangge tâtew’ngkierabe de lei. Acheusede ’ndaibe ze I ne kelâng ra mei be â I rangliachi lak lei.

²³ I â kena kakge chia di de lei. I keneibe ze â rimna lu ze Krista dage bamderabe ze de lei.

²⁴ Kane ningnui deu hanggene hemeipum ge ringbamrabe ze betâudi-’nteu di de lei.

²⁵ Ningnui keneibe ge ’ntuachurabe benai hesuiyirabe hangge I ningnui dage ’nnai ze nguabam bam gu lei be I chî lei, aize I chîdesilube ziegeneu,

²⁶ chidezai ningnui dage I wangdaibeibe ziegene Krista Isua dage ningnui ’nrîmyi ze bam ra I gene ningnui mâ misongga ze ngau le ra hanggeneu.

²⁷ Ningnui kebambe tak ze Krista gu gospel benai runne hedautit ze bam lau, chidezai I wang ze ningnui je ngau mei nune I ga mei be ge gospel ge keneibe hangge lungkat-suikat gene ningnui ran-gaihâ kam ze bambe rasam,

²⁸ zai ningnui je ka’nggime ne ’ndaikau-kau tewgaibe ge ningnui hing gai mak ze bambe rasam I seu le ra hangge zeu. Aize ne penui hangge gagaiderabe hang teiliabe ’nchichiakbe de lei, Hera dagene changbe zeu.

²⁹ Krista hang ziegene ningnui pa ge ’nnum’mmirabe runne makse, kane pe hang ziegene hereuliechi ra du ningnui je pei gai ’ndi daseu,

³⁰ ningnui ne ngaudibe zai chuna seube, chigumbe a gu ka’nggibe singbe ge gut zeu.