PHILEMON 1 - KEMCI BIBLE (BSI)

¹ Paulbe, Krista Isua hanggene kebangki ge bampeu benai anui puina’mpeu Timothibe dagene, Philemonbe, anui kehungbe anui nguatâtewpeu

² benai anui sikinapui Apphiale benai anui ngua-sipaitewpeu Arkippasbe, zai ning ki gene herakiangna wangka’nduime bau dage:

³ Hera anui Peu benai Heguang Isua Krista dagene ka’nggiabe benai desieyibe ningnui dage peize bam lau.

Philemonbe gu Kehungbe benai Keneibe

⁴ I kakellumbe ge I ne ningchu ’nningdau tânege a Rapeu dage I hesuiyibe sam pau gai ze bam bam lei,

⁵ Heguang Isua benai keneime ka’nchime hangge ning dage kehungbe benai keneibe bambe rasam I ne seulube ziegeneu,

⁶ anui gu keneibe kat kaheruabe ze Krista ji gene ning dage mâ-keyibe leine hangge mâ-gechîbe bambe ziegene tâtewchibe pat ra I ne lunei de lei.

⁷ A kina gau, nang kehungbe gene misuiyibe benai helung katemibe I ngau lu de lei, nang ziegene keneime ka’nchime lung ramme ze tewrechi gai ze bam daseu.

Onesimasbe Deu hangge Kiambe

⁸ Krista gene I ne ningchu mâ-mâ-ka’nnangbe tâ tew ra hingmeluisui ze die gai ra yi leusedu,

⁹ kehungbe bambe ziegene ningchu I ne kiâm ra nei di de lei—I, Paulbe, desieyibe heguttewpeu zai chunage Krista Isua hangge kebang ge du I bambepeu—

¹⁰ achu bang ze bambe gene I ne pe peu hang changdibe chi a na Onesimasbe deu hanggene I ne ningchu kiâm gai de lei.

¹¹ (Tingtie ge â ning hangge pa ze betâugabe chang ze bam de lei, kane chunage â gesang sing ze pa ze ning hang benai a hangge betâudibe chang di de lei.)

¹² I ne pechu ning dage lang gai kadai de lei, a lungtak du I lang gai zeu.

¹³ Gospel hanggene I kebang ge bambe ting ge ning kelei ge pa ne achu tâ’nggua ra hang pechu I ne a taige kai be nei de lei;

¹⁴ kane nang ne nguahezuâgaibe ga ze I mâ tâ de tewgailak lei, dezai nang mâ-keyibe tewbe ze tew-mak-kuaklakbe gene tewbe chang mak ze, kane ning runne ne nei ze tewbe chang le ra hangge zeu.

¹⁵ Aipauziegene pa ze ning dagene beting keduîne hangge tatrimnadibe hang ’nnum gai lei, chidezai betingbeta hang nang ne pechu ngua dai le ra hangge zeu,

¹⁶ Hemeipumsie gene benai Heguangpeu gene pa ze mi puina kehungpeu chang ze, ’ngkeune ze a hangge kane ning hang â chisuadu ’ngkeune ze pa ze kebang gum bam ta di ze kane kebang suadu yibe chang zeu.

¹⁷ Chigum ze nang ne achu ning meri hang gum ze riam gai dizai â, achu nang ka’nchâbe gum ze pechu ’nchâ gai lau.

¹⁸ Pa ne ning peireige tâtewmau gai mei nune mâ-mâ-hepâupung gai mei dizai â, chize I ne peiruîrabe hang achu kesia’ndam gai be du lau.

¹⁹ I, Paulbe ne a ba sing ne aize raw de lei, chize I ne peiruî gu lei—a dage nang hepâupungbe ge ning pumgîm zene du peipatrabe hepâu bambe ze mâ de sa mak zeu.

²⁰ Eu lei, a kina gau, ning dage mâge â kegiebe Heguangpeu gene ngau ra I nei de lei. Krista gene a suitew’ntaza gai lau.

²¹ Nang hekuâpheuchibe geze ning lung lumtew ze bam lei, I ne sabe suadu mua ze nang ne bepeirei du tewtat bam gu lei be chî lu ze ning dage I ne raw gai de lei.

²² Chipau peireige du hesangrêubeki a hangge kedâ gai lau, ningnui kakellumbe kuâ ramme ziegene ningnui dage achu pei gai dai ra I ne heguî la daseu.

Nâlangbe Rechâgaibe Sam ramme

²³ Epaphrasbe, Krista Isua gene achu nguabangpeu ne ningchu rechâ gai de lei,

²⁴ zai chigum ze achu nguatâtewme Markabe, Aristarkabe, Demasbe benai Lukabe ne ningchu rechâ gai de lei.

²⁵ Heguangpeu Isua Krista ka’nggiabe peize ningnui dage bam bam lau.