JOEL 1 - KEMCI BIBLE (BSI)

¹ Aize Tingwang gu sam Pethuelbe na Joelbe dage wangchangbe ze de lei:

Penui gu Mâ-hîmra Tew’nsiakam’ndibe je Ziemmena Puîhapbe

² Aipau sam ’ngking le lau, ningnui gechîngme gau, heram ge bamme leine ’ngking gai lau! Aigumbe ze mâdauge â, ningnui ting ge mei nune ningnui peume ting ge mei ze wangchang gai de mei?

³ Aipau rasam ze ningnui name je ranglia gai lau, zai ningnui name ne peize penui name je ranglia gai lau, zai penui name ne penui chai lungleîrabe rehei je du peize ranglia gai lau.

⁴ Mâ-dûmbe tîngkau ne teu’nsakkaibe hekûmtîngkau ne teu ’ndi de lei. Hekûm tîngkau ne teu’nsakkaibe kêdabe tîngkau ne teu ’ndi de lei, zai pa’ngkit ne teu’nsakkaibe ze tinggûmbe ne teu kam ’ndi de lei.

⁵ Ningnui kameneume gau, ’nrakchu ze hap zu lau; hap’nrung zu lau, ningnui wain sakme leine gau, wain karchibe teleurabe hanggene grepchî ramme tew’nsia kam ’ndi daseu.

⁶ Tîngkaudung ne anui ram je ka’nggi de lei, penui ranchi zai sei de seikamchi lak lei; penui gim ramme â makau gim ramme gum lei, zai duiluipui gim ramme gum de lei.

⁷ Penui ne a gu grepchîria ramme tew’nsia kam ’ndi de lei, zai a gu ’mbeuchîbang gei ramme kelauteu kam ’ndi de lei; bekeî ramme ’nsangdu pegei gâuteu ’ndi ze pechingra hâ ze tuâ ’ndi de lei.

⁸ Hap zu lau, ningnui ziemmename gau, heleu’mpui ne miseigiriapaî bâ lu pe napeurabepeu chaidibe je puîhap gum zeu.

⁹ Hera ki ge teiwang gai ra hang mâ-himlei benai sakrabe ga de lei; Tingkume Tingwang guâ ka’ngguame hap te lei, pei ra gadibe ziegeneu.

¹⁰ Helu ramme hâmmuî ze ta de lei; kedei ne kadesui de lei; hemeu ramme tew’nsia kam ’ndi, zai grepchî merie chai kam di, zai olib bang ramme riamkeudibe ziegeneu.

¹¹ Desungra ze ningnui bam du lau, Hei ningnui helu tâ tewme gau; hap’nrung lau, Hei ningnui grepchî merie reîme gau, dekuîmeu, barlimeu zai mâ-hîmra ramme tew’ngga kam ’ndi daseu.

¹² Grepchî hiâm heguikeu de lei, zai ’mbeuchîbang ’ngguaipeniak ta de lei. Turiechî, mêupi, appilchî helu rachî bang leine ’nsangdu huikeu kam de lei; ziemmena dagene hesuiyibe huikeu de lei.

¹³ Meseigiriapaî bâ ze desui zu lau, Hei ningnui tingkume gau, hap’nrung zu lau, ningnui herâtewbe-kaira ge ka’ngguame gau. Ningnui a Rapeu guâ ka’ngguame gau, gut ze kemuîbe ting tâluî miseigiriapaî bâ ze desui lau! Ning Rapeu ki ge kela teiwang ra mâ-himlei benai sakrabe ga di daseu.

¹⁴ Ningnui teseureibe tew’nchi le lau, ’nsimrim ze wang’ndui ra kelau gai zu lau. Gechîngme benai heram lungge lungme leine je Tingwang ningnui Rapeu ki ge kûwang’ndui gai lu ze Tingwang dage hap kai zu lau.

¹⁵ Hei chipau mai hangge zeu! Tingwang gu naimikpui â na di de lei; mâgetaleitewchipeu Hera dagene tew’nggarabe wangchang gu daseu.

¹⁶ Anui mikngau sing gene anui hetak anui dagene lutua ’ndi de mak mei? Eu lei, hesuigut benai hesuiyika’ntabe anui Rapeu ki gene tew’ngga ’ndi de mak semei?

¹⁷ Helei ramme â kebauchimgaibe lungge hui gai kam de lei, hedua ramme ’nruahuang ze ta de lei; ’nseuki ramme riamkeu de lei, chêu sia kam di daseu.

¹⁸ Hekaune ramme ’nrakeleulia tai de lei! Kauruidung du penui duângga di de lei, penui deteurabe bâm hang ga di dadegeu; Eu lei, melidung du lunghereu di de lei.

¹⁹ Hei Tingwang, Ning dage I hapka’nrung lei, hemi ne hênamkang ge melitaning ramme rû kam ’ndi zai hemimelei ne helu ge hingbang ramme gapchat kam ’ndi daseu.

²⁰ Hênamkang ge hekaune ramme ne du ning dage hapka’nrung de lei: ’nggeuki ramme chip kam di, zai penui taning hemi ne rûkam ’ndi daseu.