Ta̍i̍tɔ̄ɔ̄ 1 - Yāu̍ Mɛ̄lɛ̄ka̍a̍

¹ Ya̍ Pɔ̍ɔ̄l ya̍ cho̍ ho̍ō bu̍ɛ̍i̍ Mɛ̄lɛ̄ka̍a̍ ndu̍yɛ̍, mi̍ wa᷅ māā wāna̍ Chi̍i̍sū Ki̍li̍tī ve᷅m hɔ̄ltē ndɔ̄ wo̍, ya̍ cho̍ yāu̍wo̍ ho̍ō pōōnyīa̍a̍ ni̍. Mɛ̄lɛ̄ka̍ vēm ya̍ māvīāmāā le̍ mī I̍ to̍sa̍ mī wānāā Mɛ̄lɛ̄ka̍ hɛ̄li̍ wa̍ ā dɔ̄ū tīīnda᷄ŋ ndāa̍ o̍ Mɛ̄lɛ̄ka̍ ni᷄ŋ. Ndu̍yɛ̍, ō vēm ya̍ le̍ mī ma̍la̍ nda̍ mā sīna̍ tōnya̍ cho̍ ho̍ō a̍ Mɛ̄lɛ̄ka̍ tīīnda᷄ŋndo̍ o̍kɔ̄ɔ̄ wo̍.

² Tīīnda᷄ŋndo̍ ho̍ō o̍ Mɛ̄lɛ̄ka̍ ni᷄ŋ ō chɛ᷄ŋ tu̍m o̍ nyɛ̄ na̍a̍ ŋ̄ chō ho̍ō lēhɔ̄l o̍ nɛ̄ī le̍ ndu̍ wo̍, ndu̍ yɔ̍nūŋ ni̍ māā yōōmu̍ nɔ̍ la̍mɛ̍ɛ̍lu̍ le̍ wo̍. Mɛ̄lɛ̄ka̍ o̍ di̍mī ho̍ō lāchōōwā le̍ wo̍, ō chūe̍l na̍a̍ būŋgɛ̄i̍ lɔ̍ɔ̍ pa̍ bɛ̍ɛ̍ o̍ to̍o̍sīāā chi̍e̍ēŋndo̍, māā ō chō na̍a̍ yōōmōo̍ ho̍ō kē.

³ Ndu̍yɛ̍, mɛ̄ɛ̍ te̍le̍ŋ kpe̍e̍kpe̍i̍yo̍ fūūlu̍u̍ mbo̍ chɔ̄ɔ̄mūū ndi̍ nāa̍ wāŋnda̍ chūā sa̍na̍a̍ o̍ yōōŋgū ndɔ̄ɔ̍ ni᷄ŋ. Ndu̍yɛ̍, ō chu̍a̍ yōōŋgū ndɔ̄ɔ̍ ho̍ō mbo̍ kē ya̍ ndu̍. Ndu̍yɛ̍, I̍ cho̍ wāŋnda̍ ndu̍ dīmūllo̍, kāni̍ fu̍u̍le̍, Mɛ̄lɛ̄ka̍ o̍ pi̍ŋī na̍a̍ wo̍ ndu̍ ve᷅m ya̍ ndu̍ dīmīo̍o̍ ni̍.

⁴ I̍ cho̍ yāu̍wo̍ ho̍ō pōōnyīa̍a̍ nāa̍ nūm Ta̍i̍tɔ̄ɔ̄ chu̍a̍, nu᷄m si̍mnu᷄ŋ ho̍ō po̍ nī kpe̍e̍kpe̍i̍ o̍ tīīnda᷄ŋ pi᷅lɛ̍ na̍a̍ ŋ̄ nɔ̄ o̍ Mɛ̄lɛ̄ka̍ ni᷄ŋ ndo̍ wo̍. I̍ cho̍ Mɛ̄lɛ̄ka̍ fi̍nyā nāa̍ pīɛ̄īyo̍ a̍ Chi̍i̍sū Ki̍li̍tī o̍ pi̍ŋī na̍a̍ wo̍ māā ā yīya̍ŋ nu̍m chōo̍ mā ke̍ nu̍m kɔ̄l nyūlōo̍ fɔ̍.

Mɛ̄ɛ̍ wānāa̍ cho̍ ku̍ndā wānāā lāāla᷄ŋnda̍ lāchī wa̍ nɔ̄ mā wa̍ yɛ̍

⁵ Nūm Ta̍i̍tɔ̄ɔ̄, sa̍bū ya̍ I̍ mɛ̍i̍ nu̍m o̍ lɛ̄ŋndē ībūŋgāle̍ŋ Ki̍le̍tī wo̍ cho̍ ni̍ māā le̍ mā bɛ̍ɛ̍ndi̍a̍a̍ sɔ̄ɔ̍ŋ lo̍ le̍ bɛ̄ɛ̄ndīa̍a̍ lo̍ŋ ndo̍ŋ. Ndu̍yɛ̍ o̍ ko̍ŋ kɔ̍ɔ̍lī, mā hɛ̍li̍ lāŋgba̍ā kālla̍ a̍ wa᷅ ku̍ndālā wānāā lāāla᷄ŋnda̍ lāchī o̍ chi̍e̍e̍ o̍ chi̍e̍e̍ wa̍ mɛ̄ɛ̍ ya̍ I̍ di̍mu̍l nu̍m yɛ̍.

⁶ Wānā o̍ wāna̍ cho̍ lāŋu̍nɔ̄ ka̍lā o̍ ku̍ndālā wānāā lāāla᷄ŋnda̍ chōo̍, mɛ̄ɛ̍ o̍ nɔ̍ le̍ wāa̍ yɛ̍ cho̍ ho̍ō ni̍. Ō ve᷅ wa᷅na̍ tɔ̍ɔ̍ wɔ̍ɔ̍ŋ chō chōo̍ le̍. La̍nɔ̍ɔ̍ ō pīlɛ̍ kpe̍ o̍ nɔ̍ ni̍ mbō nɔ̄. Ndu̍yɛ̍, mɛ̄ɛ̍ mī chūāūwāā ndūa̍a̍ bɛ̍ɛ̍ mā wa̍ wānāā lāāla᷄ŋ. Chūāūwāā ndūa̍a̍ ā ve᷅ wa̍nāā ka̍ā wɔ̄ɔ̍ŋ te̍. Ā ve᷅ wa̍nāa̍ kɛ̍ɛ̍ wānāa̍ ve̍lū nda̍ wa̍ dīōm tūēīyɔ̄ɔ̄ le̍.

⁷ Wāna̍ wa᷅ ku̍ndā wānāā lāāla᷄ŋnda̍ lāchī wo̍ ō ve᷅ wa᷅na̍ tɔ̍ɔ̍ wɔ̍ɔ̍ŋ chō chōo̍ le̍. Kāni̍ fu̍u̍le̍, bu̍ɛ̍i̍ Mɛ̄lɛ̄ka̍a̍ o̍ cho̍ ni̍. O̍ ko̍ŋ kɔ̍ɔ̍lī ō ve᷅ wa᷅na̍ ki̍ndi̍la̍ chāa̍ŋ ndɔ̄ wa᷅na̍ chi̍e̍e̍ le̍. Ō ve᷅ wa᷅na̍ dɔ̍u̍nu᷄ŋ tu̍mbe̍ chɔ̍ chɔ̍ le̍. Ō ve᷅ wa᷅na̍ ko̍l māmūɛ̄ī mī mā bīī ndu̍ le̍. Ō ve᷅ wa᷅na̍ lāsɔ̍ŋgɔ̄ le̍. Ō ve᷅ wa᷅na̍ hɔ̄ltē nyɛ̄ sɔ̄lāā le̍.

⁸ Ō nɔ̄ mbō wa̍ wāna̍ cha̍a̍ lāmīāl bīyɔ̄ɔ̄ o̍ ndu̍ lo̍ chi̍ɛ̍ī ni̍ŋ. Ō nɔ̄ mbō wa̍ wāna̍ ka̍a̍la̍ le̍ ŋ̄wāŋndā chīe̍e̍ dɛ̍nɛ̍ kɛ̍ndɛ̄ tōsāl. Ō nɔ̄ mbō wa̍ wāna̍ ti̍u̍ kɔ̄l ndɔ̄ɔ̍ bā. Ō nɔ̄ mbō wa̍ wāna̍ to̍sa̍ sūɛ̍i̍ cho̍ o̍ nɛ̄ī sa̍na̍a̍. Ndu̍yɛ̍, ō nɔ̄ mbō wa̍ wāna̍ cho̍ ō yɔ̄ŋga᷄ŋ o̍ Mɛ̄lɛ̄ka̍ lo̍. Ō nɔ̄ mbō wa̍ wāna̍ nɔ̍ māndā kɛ̄ndɛ̄.

⁹ Ō nɔ̄ mbō si᷄m ō kālā kpo᷅ke̍ o̍ yōōŋgu̍ cho̍ ho̍ō lētūu̍ mī wānā ti̍i̍nda̍ŋ ndo̍ chōo̍, mɛ̄ɛ̍ nda̍ pɛ̄ɛ̄ku̍ ndu̍ yɛ̍. Ō he̍ī ni᷄ŋ, wānā wa̍ā le̍nde̍, ō nɔ̄lā mbō dɛ̄ɛ̄ni̍a̍a̍ chāāŋāā ndūa̍a̍ kɔ̄lta̍ŋ a̍ pɛ̄ɛ̄kū sa̍kpōo̍ ho̍ō. Ndu̍yɛ̍ vɛ̍lɛ̄, ō nɔ̄lā mbō chɔ᷄m wānāa̍ sɛ̍ɛ̍ŋgīāā pɛ̍ɛ̍kū sa̍kpōo̍ ho̍ō wa̍ māā ā cho̍ o̍ nɛ̄ī le̍.

¹⁰ Kāni̍ fo̍ndōle̍, wānāa̍ tu̍i̍ī wa̍nā di̍o̍m te̍ wa̍ a̍ wānāa̍ hu̍ī wa᷅ŋnda̍ a̍ sɔ̄ɔ̍ŋ ŋ̄dīɔ̄mndo̍ŋ nda̍ ā chō cha̍po̍, tāāma̍ ku̍ndā wānāā lāāla᷄ŋnda̍ tɛ̄ɛ̄ŋ a̍ cho̍ Chu̍ūwa̍ wa̍.

¹¹ Ku̍u̍na̍ nda̍ ā ti̍ū pɛ̄ɛ̄kūlā ndāla̍ la̍ŋ wāŋnda̍ tɛ̄ɛ̄ŋ te̍. Kāni̍ fu̍u̍le̍, wāŋnda̍ ha̍ā chō yu̍ŋgu̍la̍ŋ lāāsīa̍a̍, ō pūm yu̍ŋgo̍o̍ kpu̍lu̍ku̍u̍ mā chi̍i̍ lāāsīāā a̍ pɛ̄ɛ̄kūlā ndāla̍ŋ nda᷅ŋ. Ā nɔ̍ mā pɛ̄ɛ̄ku̍ wāŋnda̍ pɛ̄ɛ̄kūlā lāŋ te̍. Le̍ nyɛ̄ sɔ̄lāa̍ ko̍ni̍ nda̍ chō ke̍ŋ to̍sāa̍ ni̍, ī chō sūɛ̍i̍ lāsi̍ɔ̍mbu̍i̍ bɛ̍ndū.

¹² Wānā wa̍ā lɛ̄ŋndē Ki̍le̍tīle̍ŋ, ō wāŋnda̍ lo̍ŋ a̍ chu̍a̍ māā wāna̍ su̍a̍ā le̍ Mɛ̄lɛ̄ka̍ wo̍ o̍ cho̍ ni̍ wo̍, ndu̍ kpe̍e̍kpe̍i̍ di̍mi̍ dīōmnda̍ŋ nda᷅ŋ ni̍ āā, “Le̍ lɔ̍ɔ̍ lɔ̍ɔ̍ wānāā lāchōōwāa̍ wāŋnda̍ Ki̍le̍tī a̍ cho̍ ni̍. Wānāā pi̍la̍a̍ dɛ̍nɛ̍ wɔ̍ɔ̍ŋ, wānāā lēpūlu̍a̍a̍, kɛ̍ ndu̍yɛ̍, ā cho̍ yɛ̍ wānāā tōsāā nyɛ̄ le̍.”

¹³ Nyɛ̄ o̍ di̍mi̍ a̍ nda̍ o̍kɔ̄ɔ̄ wo̍, tōnya̍a̍ o̍ cho̍ ni̍. Le̍ he̍ī, si̍la̍ nda̍ ō kālā ka̍lā le̍ mā mīīŋgu̍ tīīnda᷄ŋ kpe̍e̍kpe̍i̍yo̍ dɔ̄wɔ̄ɔ̄ o̍ Mɛ̄lɛ̄ka̍ ni᷄ŋ.

¹⁴ Bu̍ndɔ᷄ŋ Chu̍ūwa̍ kɛ̄ɛ̄si̍a̍a̍ wo̍ŋ a̍ wānāa̍ kɛ̍ɛ̍ tōnya̍ Mɛ̄lɛ̄ka̍a̍ wa̍ sāwāla̍ nda̍ pi̍la̍ kɛ̄ɛ̄si̍a̍a̍ ma̍ dūāū la̍ŋ, si̍la̍ nda̍ ā tu̍āl lɛ̄ sɔ̄ɔ̍ŋ mu̍ŋ kɔ̄ɔ̄lī le̍.

¹⁵ Wānāa̍ cho̍ ā dīāndāā Mɛ̄lɛ̄ka̍ o̍ hɔ̄l la̍ nda̍ nda̍, nyɛ̄ o̍ nyɛ̄ chō ō dīāndāā le̍ nda̍. Kɛ̍, wānāa̍ cho̍ ā nɔ̄ɔ̄lɛ̍i̍ Mɛ̍lɛ̄ka̍ o̍ hɔ̄l ndu̍yɛ̍, ā lāāla̍ŋ a̍ Mɛ̄lɛ̄ka̍ le̍ wa̍ nda̍ nda̍, nyɛ̄ o̍ nyɛ̄ cho̍ mbō wa̍ ō dīāndāā le̍ nda̍ le̍. Wāŋnda̍ ha̍ā yīya᷄ŋnda̍ nda̍la̍ŋ a̍ kɔ̄ltā nda̍la̍ŋ lā sīmnu᷄ŋ la̍ nɔ̍ɔ̍lɛ̍i̍ a̍ yɔ̄ŋ wɔ̄ɔ̍ŋndo̍.

¹⁶ Wāŋnda̍ ha̍ā dīmi̍ māā Mɛ̄lɛ̄ka̍ nda̍ chō pīɛ̄īyo̍ ni̍. Kɛ̍, sɔ̄ɔ̍ŋ nda̍ tōsā wo̍ŋ ŋ̄ chɔ᷄m māā ā cho̍ Mɛ̍lɛ̄ka̍ pīɛ̄ī le̍. Ā kūīsi̍ŋ Mɛ̍lɛ̄ka̍ o̍ kɔ̄l kpu̍. Nyɛ̄ Mɛ̄lɛ̄ka̍ dīmūl nda̍ wo̍ ā to̍sā ndu̍ le̍. Ā bɛ̄nda̍ a̍ wa̍li̍ kɛ̍ndɛ̄ le̍.