Ti̍mo̍tī Tāso̍o̍ 1 - Yāu̍ Mɛ̄lɛ̄ka̍a̍

¹ Ya̍ Pɔ̍ɔ̍l ya̍ cho̍ ho̍ō wāna̍ Chi̍i̍sū Ki̍li̍tī ve᷅m māā hɔ̄ltē ndɔ̄ wo̍, ya̍ cho̍ yāu̍wo̍ ho̍ō pōōnyīa̍a̍ ni̍. Mɛ̄lɛ̄ka̍ o̍ pi̍ŋī na̍a̍ wo̍ nda̍ Chi̍i̍sū Ki̍li̍tī, ō na̍a̍ ŋ̄ chō lēhɔ̄l o̍ nɛ̄ī le̍ ndu̍ wo̍, nda̍ di̍mu̍l la̍ le̍ wāa̍ wāna̍ Chi̍i̍sū Ki̍li̍tī ve᷅m māā hɔ̄ltē ndɔ̄ wo̍ ni̍.

² I̍ cho̍ ndu̍ pōōnyīa̍a̍ nāa̍ nūm Ti̍mo̍tīī chu̍a̍, nu᷄m si̍mnu᷄ŋ ho̍ō māā po̍ nī kpe̍e̍kpe̍i̍ o̍ tīīnda᷄ŋ na̍a̍ ŋ̄ nɔ̄ o̍ Mɛ̄lɛ̄ka̍ ni᷄ŋ ndo̍ wo̍. I̍ cho̍ Mɛ̄lɛ̄ka̍ Fi̍nyā nāa̍ pīɛ̄īyo̍ a̍ Māsānɔ̍ nāa̍ Chi̍i̍sū Ki̍li̍tī māā ā yīya̍ŋ nu̍m chōo̍, mā tūīīnu̍ŋ nu̍m īnyīɛ̍ɛ̍, ndu̍yɛ̍ mā ke̍ nu̍m kɔ̄l nyūlōo̍ fɔ̍.

Sīlāa̍ a̍ pɛ̄ɛ̄kūlā lāchōōwāla̍ŋ o̍kɔ̄ɔ̄

³ Bōōndi̍i̍ ya̍ I̍ wa̍ kɔ̄la̍ŋ o̍ lɛ̄ŋndē Māsīdo̍o̍nīāāle̍ŋ ni᷄ŋ nde̍ mi̍ nyɔ̍ɔ̍lū nu̍m le̍ mā lo̍ Ɛ̍fi̍sɔ̄ɔ̄ chi̍e̍e̍. Ndu̍ ko̍ ya̍ cho̍ vɛ̄lɛ̄ nu̍m dīmūllo̍ ni̍. Cha̍l Ɛ̍fi̍sɔ̄ɔ̄ mā kpa̍a̍ wānāa̍ cho̍ wāŋnda̍ pɛ̄ɛ̄kū lāchōōwāa̍ wa̍.

⁴ Di̍mu̍l nda̍ ā pɛ̄ŋgi̍ te̍le̍ŋnda̍ŋ chūa̍a̍ le̍ pɛ̄ɛ̄kōo̍ a̍ bu̍ndɔ᷄ŋ lāchōōva᷄ŋ o̍kɔ̄ɔ̄ a̍ pɛ̄ɛ̄kōo̍ a̍ dīōlā wānāā māsīndīāā fāŋgā fāŋgāa̍ tōmbōlā kōŋ kɛ᷅ kɛ᷅. Kāni̍ fo̍ndōle̍, dīōmndā hīŋa᷅ŋnda̍ŋ ko̍ni̍ pɛ̄ɛ̄kūlā wāā le̍nde̍la̍ŋ lā lūēī wa᷅ŋnda̍ tɛ̄ɛ̄ŋ ni̍. Ndu̍yɛ̍, nyɛ̄ Mɛ̄lɛ̄ka̍ kɛ̄ɛ̄si̍a̍a̍ le̍ tōsāa̍ wo̍, ō wāna̍ chi̍o̍o̍ sīnā ho̍ō sa̍na̍a̍ o̍ tīīnda᷄ŋndo̍ nɔ̄ɔ̍ o̍ Mɛ̄lɛ̄ka̍ ni᷄ŋ ndo̍, pɛ̄ɛ̄kūlā wāā le̍nde̍ la̍ ma̍lā le̍ ndu̍ hīvī lāchī le̍.

⁵ Le̍ sa̍bū ya̍ cho̍ sīlāla̍ŋ nda᷅ŋ ndo̍ cho̍ ni̍ māā le̍ mī ŋ̄ lo̍ o̍ ko̍ŋ mī ŋ̄ kāāli̍āŋ ka̍a̍lā kpe̍e̍kpe̍i̍yo̍ ve̍llāa̍ vēllē. Ko̍ŋ cho̍ ni̍, kāālāa̍ o̍ cha᷅ŋ o̍ kɔ̄l dīāndāa̍ ni᷄ŋ, a̍ yīya᷄ŋ kɛ̍ndɔ̄ɔ̍, a̍ tīīnda᷄ŋndo̍ o̍ Mɛ̄lɛ̄ka̍ ni᷄ŋ ndo̍.

⁶ Sɔ̄ɔ̍ŋ mu᷅ŋ wāŋnda̍ ā pūm ā ma᷄l ni̍ ma̍ wōū bāla̍ŋ o̍ sɔ̄ɔ̍ŋ ŋ̄dīɔ̄mndo̍ŋ ni᷄ŋ, di̍ōmnda̍ŋ hīŋa᷅ŋndo̍ o̍ sɔ̄ɔ̍ŋ fo̍ndo᷄ŋ chōo̍.

⁷ Wāŋnda̍ ha̍ā ā hɛ̄na̍ŋ mā pɛ̄ɛ̄ku̍ wāŋnda̍ sāwāla̍ Mɛ̄lɛ̄ka̍ la̍ŋ. Kɛ̍ ndu̍yɛ̍, dīōmndā kālālā nda̍ pi̍la̍ dīmī la̍ŋ bɛ̍ɛ̍ ā si̍nā la̍ŋ pɛ̄ŋgu̍ le̍. Ndu̍yɛ̍, sɔ̄ɔ̍ŋ nda̍ sūāā mu̍ŋ a̍ mu̍ŋ o̍kɔ̄ɔ̄ wānā che᷅ pɛ̍ āā ā sīnā mu̍ŋ pɛ̄ŋgu̍ wo̍ŋ, ā si̍nā mu̍ŋ pɛ̄ŋgu̍ si̍nā kālāa̍ le̍.

⁸ Ŋ̄ sīnā māā sāwāla̍ Mɛ̄lɛ̄ka̍ ke̍ Mūu̍sē la̍ŋ, nyɛ̄ kɛ̄ndɔ̄ɔ̍ la̍ cho̍ ni̍, kɛ̍ ndu̍yɛ̍, mɛ̄ɛ̍ mī wānā so̍li̍ŋ kpe̍ku̍ a̍ la̍ŋ mɛ̄ɛ̍ i̍ nɔ̍ le̍ wāa̍ yɛ̍.

⁹ Ndu̍yɛ̍, ŋ̄ sīnā vɛ̍lɛ̄ māā ō cho̍ le̍ wānāā sa̍kpūa̍a̍ le̍ nda̍ dūāū sa̍wāla̍ŋ te̍. Wānāā nda̍ dūāū sa̍wāla̍ŋ le̍ nda̍ wa̍ cho̍ ha̍ā ni̍. Wānāa̍ tɛ̍ɛ̍mbūū sa̍wāla̍ŋ nda̍, a̍ wānāa̍ chu̍ē sa̍wā le̍ wa̍, a̍ wānāa̍ ke᷅ Mɛ̍lɛ̄ka̍ lēbɛ̄ɛ̄ le̍ wa̍, a̍ wānāā yɔ̄ŋ wɔ̄ɔ̍ŋnda̍, a̍ wānāa̍ cho̍ a̍ yɔ̍ŋga᷄ŋ o̍ Mɛ̄lɛ̄ka̍ lo̍ le̍ wa̍, a̍ wānāa̍ bu̍u̍la̍ŋ a̍ su̍ɛ̍i̍ Mɛ̄lɛ̄kɛ̍i̍ le̍ wa̍, a̍ wānāa̍ di̍ī fi̍nyāā ndāa̍, kɛ̄lɛ̄ŋgāā kālāa̍ ndāa̍ wa̍, a̍ wānāā dīyāā ŋ̄wāŋndā chīe̍e̍ya̍,

¹⁰ a̍ wānāa̍ su̍u̍ndā a̍ wānāā nda̍ cho̍ o̍ nɔ̄ ni̍ŋ te̍ wa̍, a̍ wānāa̍ to̍sā ma̍āla̍ŋ nda̍ chāāŋāā ndāa̍ wa᷅ŋ pīāāndūa̍a̍, kɛ̄lɛ̄ŋgāā nda̍ chāāŋāā ndāā wa᷅ŋ lāāndūa̍a̍ wa̍, a̍ wānāa̍ bi̍ī wa᷅ŋndā chīe̍e̍ya̍ mā pīsī nda̍ o̍ chɛ̄le̍ŋ ni᷄ŋ nda̍, a̍ wānāā lāchōōwāa̍, a̍ wānāa̍ tɛ̍ndā se̍īlē lāka̍fāle̍ŋ nda̍, a̍ wānāa̍ to̍sā sɔ̍ɔ̍ŋ che᷅le̍ŋ ndo̍ŋ ŋ̄ pɛ̄ɛ̄kū sa̍kpōo̍ ho̍ō ō kūūna̍ wo̍ŋ nda̍.

¹¹ Pɛ̄ɛ̄kū kālāa̍ yɛ̄ o̍ Yōōŋgū Kɛ̄ndɛ̍ Mɛ̄lɛ̄ka̍a̍ ni᷄ŋ wānā sa̍a̍lūŋ ndu̍ ni̍, yōōŋgū Mɛ̄lɛ̄ka̍ ō ke̍ ya̍ le̍ mī I̍ kɔ̍ di̍mūl wāŋnda̍ ndu̍ wo̍. Mɛ̄lɛ̄ka̍ ō na̍a̍ ŋ̄ nɔ̄ ho̍ō mī ŋ̄ līsa̍ wo̍, o̍ ndu̍ lo̍ yōōŋgū kɛ̄ndɛ̄ bɛ̄ndōo̍ ho̍ō chɛ᷄ŋ ni̍.

Pɔ̍ɔ̄l yi̍l Mɛ̄lɛ̄ka̍ ba̍li̍ka̍a̍ le̍ nyīɛ̍ɛ̍yīī ndūɛ̍i̍

¹² Māsānɔ̍ nāa̍ Chi̍i̍sū Ki̍li̍tī o̍ ke̍ ya̍ kpāāyāa̍ le̍ wa̍llo̍ ho̍ō tōsāa̍ wo̍, I̍ yi̍l ndu̍ ba̍li̍ka̍ le̍ mɛ̄ɛ̍ o̍ la̍a̍la̍ŋ a̍ ya̍ le̍ wa̍llo̍ ho̍ō tōsāa̍ yɛ̍. Ndu̍yɛ̍, I̍ me̍l ndu̍ ba̍li̍ka̍ le̍ mɛ̄ɛ̍ o̍ hɛ̍li̍ ya̍ le̍ wa̍llo̍ ho̍ō yɛ̍.

¹³ Mi̍ chē bɛ̍ɛ̍ o̍ tāse̍la̍ ndɔ̄ɔ̍ mi̍ I̍ tɛ̍ɛ̍mbūū dīōlā ndɔ̄la̍ŋ, o̍ ko̍ŋ kɔ̍ɔ̍lī, mi̍ I̍ tu̍sī ndu̍ nyɛ̄ pālāa̍ chōo̍, ndu̍yɛ̍ mi̍ yi̍o̍ū ndu̍ ni̍, kɛ̍ o̍ ko̍ŋ ni̍ŋ kpo̍u̍, mi̍ Mɛ̄lɛ̄ka̍ tūīīnu᷄ŋ ya̍ īnyīɛ̍ɛ̍. Kāni̍ fu̍u̍le̍ nyɛ̄ o̍ nyɛ̄ ya̍ I̍ wa̍ tōsāa̍ I̍ wa̍ māvāā ndu̍ tōsāa̍ o̍ lāāla᷄ŋ le̍pɛ᷅ŋ ndo̍ ni᷄ŋ a̍ sīnā pɛ̄ŋgu̍ le̍pɛ᷅ŋ ndo̍.

¹⁴ Mi̍ Māsānɔ̄ɔ̍ Mɛ̄lɛ̄ka̍ tōsāl la̍ kɛ̄ndɛ̄ī bɛ̍ndū bɛ̄ndū. Ndu̍yɛ̍, mbo̍ dūāū tīīnda᷄ŋ Mɛ̄lɛ̄ka̍a̍ ya̍ o̍ kɔ̄l a̍ kāālāa̍ ō wānā sɔ̍lā o̍ wāa̍ o̍ dīōm pīlɔ̍ɔ̍ ni᷄ŋ nya̍ Chi̍i̍sū Ki̍li̍tī wo̍.

¹⁵ Dīōmnda̍ di̍mi̍ŋ la᷅ŋ nda̍ŋ lā chō tōnya̍ āā, “Chi̍i̍sū Ki̍li̍tī hi᷅ŋ o̍ chi̍e̍ēŋndo̍ chōo̍ le̍ wānāā yɔ̄ŋ wɔ̄ɔ̍ŋnda̍ pīŋīo̍o̍.” Ndu̍yɛ̍, lā chō dīōmndā wānā o̍ wānā nɔ̍ mā la̍a̍la̍ŋ. Ndu̍yɛ̍, a̍ yɔ̄ŋ wɔ̄ɔ̍ŋndo̍ o̍kɔ̄ɔ̄ ndu̍ ndu̍, I̍ nɔ̍lā mī di̍mi̍ māā ya̍ hi̍o̍ū kpo̍u̍.

¹⁶ Kɛ̍ ndu̍yɛ̍, mi̍ Mɛ̄lɛ̄ka̍ tūīīnu᷄ŋ ya̍ īnyīɛ̍ɛ̍. Ndu̍yɛ̍, le̍ sa̍bū o̍ tu̍i̍i̍nu̍ŋ ya̍ īnyīɛ̍ɛ̍ yo̍ cho̍ ni̍ māā mī Chi̍i̍sū Ki̍li̍tī si̍i̍ŋgu̍u̍ ya̍ māā tāāmāsi̍ le̍ wānāa̍ nda̍ a̍a̍ nɔ̍ le̍ hūnɔ̄ɔ̄ tīīnda᷄ŋndo̍ dɔ̄wɔ̄ɔ̍ o̍ ndu̍ ni̍ŋ le̍ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ sɔ̄lāa̍ wa̍. Ki̍li̍tī to̍sa̍ mātōsāā he̍ī sa̍na̍a̍ a̍ bīūwɔ᷄ŋ bɛ̍ndū o̍ bi̍u̍ŋ ya̍ wo̍ ni᷄ŋ, ya̍ cho̍ ho̍ō bōllē wānāā yɔ̄ŋ wɔ̄ɔ̍ŋnda̍ kpo̍u̍ wo̍.

¹⁷ Lā ŋ̄ yɔ̄ŋgu᷅ŋ bɛ̄ɛ̄le̍ŋ a̍ sāŋgālāa̍ o̍ Mɛ̄lɛ̄ka̍ lo̍ le̍ fɛ̍ɛ̍ŋ a̍ fɛ̍ɛ̍ŋ. Ŋ̄ sāŋga̍la᷅ŋ Mɛ̄lɛ̄ka̍ o̍ cho̍ Māsāa̍ le̍ fɛ̍ɛ̍ŋ a̍ fɛ̍ɛ̍ŋ ndo̍, Mɛ̄lɛ̄ka̍ vi᷅ le̍ wo̍, Mɛ̄lɛ̄ka̍ wāna̍ chi̍e̍e̍ chi᷅ le̍ wo̍, o̍ cho̍ ho̍ō Mɛ̄lɛ̄ka̍ ndu̍ pīlɛ̍ kpe̍ wo̍. Ī yɔ̄nu̍ŋ le̍nde̍ fɔ̍.

¹⁸ Po̍ nūu̍ Ti̍mo̍tīī, sɔ̄ɔ̍ŋ ya̍ I̍ ye̍e̍ma̍ nu̍m mā to̍sa̍ wo̍ŋ mu̍ŋ cho̍ mu᷅ŋ ni̍. Lo̍o̍nu̍ŋ a̍ dīōmndā wānāa̍ su̍a̍ā le̍ Mɛ̄lɛ̄ka̍ wa̍ ā dīmi̍ a̍ nūm o̍kɔ̄ɔ̄ la̍ŋ. Chu̍a̍ di̍ōmndā lāŋ māā wōlɔ̄ɔ̄lā nūmnda̍ chɔ̄ū, mā chɔ̄ū kpe̍e̍kpe̍i̍ a̍ la̍ŋ.

¹⁹ O̍ ko̍ŋ kɔ̍ɔ̍lī, mā hīōū lāchī a̍ tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ ni᷄ŋ a̍ kɔ̄l wa̍la̍ŋndo̍ nɔ̄ɔ̍. Kāni̍ fu̍u̍le̍, wāŋnda̍ ā pūm ā bīī ma̍ kɛ̄ɛ̄ le̍ sīlā kɛ̄ndɛ̄ kɔ̄ltā ndāla̍ŋ lā kē nda̍ wo̍ bīyɔ̄ɔ̍. O̍ he̍ī ni᷄ŋ ma̍ tɛ̄ɛ̄mbūū tīīnda᷄ŋ nda̍ a̍a̍ nɔ̍ pāāndū o̍ Mɛ̄lɛ̄ka̍ ni᷄ŋ ndo̍.

²⁰ Wānāā wāā le̍ndi̍a̍a̍ ā ti᷄ŋ a̍ cho̍ mɛ̄ɛ̍ Hāīmāni̍yā nda̍ Ālɛ̄kīsa̍ŋndā a̍ cho̍ nu̍a̍ā yɛ̍ ni̍. Le̍ nyɛ̄ nda̍ tōsa̍ wo̍ mi̍ ma᷅l nda̍ ni̍ko̍ Sēta̍nā, māsa̍ nyi̍nāā wɔ̄ɔ̍ŋnda̍, o̍ bā le̍ mā sīla̍ŋ, mā pɛ̄ŋgi̍ dīōmndā wɔ̄ɔ̍ŋnda̍ŋ dīmīo̍o̍ a̍ Mɛ̄lɛ̄ka̍ o̍kɔ̄ɔ̄.