Chōndi̍i̍ Sɔ̍lɔ̍mɔ̄ŋ Nde̍ 1 - Yāu̍ Mɛ̄lɛ̄ka̍a̍

¹ Chōndu̍ŋ Sɔ̍lɔ̍mɔ̄ŋ ndo̍ŋ, ŋ̍ hi̍o̍ū chōndo̍ŋ kpo̍u̍ na̍ŋɔ̄ɔ̄ wo̍ŋ, mu̍ŋ cho̍ mu᷅ŋ ni̍. Ndu̍yɛ̍ chōndo̍ŋ mu᷅ŋ, chōndu̍ŋ Sɔ̍lɔ̍mɔ̄ŋ ndo̍ŋ ŋ̍ cho̍ ni̍.

Chōndi̍i̍ tāse̍i̍ Nyɛ̄ chūa̍a̍ sōō wo̍

² O̍o̍, ndu̍ o̍o̍ bɛ̍ndā bɔ̍ɔ̍ mī nūm o̍o̍ sɔ̍sa̍ ya̍ sōndōo̍. Kāālā ŋ̄ chɔ̄m ya̍ wo̍ ō na᷄ŋ ō hīōū mūɛ̄īya̍ŋ.

³ Si̍ɛ̍ndīi̍ma̍ ŋ̄ sūūnūŋ nda̍ŋ, tē I̍ tu̍e̍ī ma̍ŋ chūŋ pɛ̍, nyɔ̄ɔ̍ hɛ̄na̍ŋ ya̍ bɔ̄ɔ̍. Bā o̍ bā wāŋnda̍ vēēlu̍ dīōlā nūmnda̍ŋ pɛ̍, mɛ̄ɛ̍ nda̍ tālā nu̍a̍ā chūɛ̄īmā chūŋ kɛ̄ndīa̍ŋ o̍ fo̍ndāa̍ mī chūŋ kōŋ ō tīu̍ si̍lɔ̍ yɛ̍, le̍nde̍ dīōlā nūmnda̍ŋ lā chō ni̍. Nyɛ̄ kōŋ bɛ̍ɛ̍ chūāā lāāndūa̍a̍ ā kāāla̍ nu̍m ni̍.

⁴ Chu̍a̍ ya̍ mī ŋ̄ kūɛ̄nu᷄ŋ. Ŋ̄ kēle̍ŋa̍ la̍kɔ̍ŋnɔ᷄ŋ chɔ̍chɔ̍. Māsa̍ nī bɛ̍ndōo̍, kɔ̍ a̍ ya̍ o̍ lu̍mūi̍ nu̍mndo̍ ni᷄ŋ fɔ̍. A̍ to̍sa̍ mi̍ ŋ̄ dūāūnu̍ŋ nya̍a̍le̍, ndu̍yɛ̍ mi̍ ŋ̄ hīnī kɔ̄l nyɛ̄ kɛ̄ndɛ̄ kɛ̍ndɛ̄. Ŋ̄ sāŋgālā ni̍ŋ ka̍ālā nūmndo̍ mbō hīōū mɛ̄ɛ̍ nda̍ sāŋgāla̍ nu̍a̍ā mūɛ̄īya̍ŋ le̍ nāŋɔ̄ɔ̍ yɛ̍. Nyɛ̄ kōŋ bɛ̍ɛ̍ wāŋ lāāndūa̍a̍ a̍ ka̍a̍la̍ nu̍m ni̍.

⁵ Chūāā lāāndūa̍a̍ Chūlu̍sɛ̄lɛ̄m, I̍ pi̍i̍mi̍a̍a̍ kɛ̍ I̍ na̍ŋ bɔ̄ɔ̍. I̍ cho̍ ō tīŋī kpi̍lo̍ mɛ̄ɛ̍ tɛ̍ndīi̍la̍ wāŋnda̍ Kɛ̍dāā la̍ cho̍ nu̍a̍ā o̍ lɛ̄ŋndē po̍lte̍ŋ ni᷄ŋ yɛ̍, kɛ̍ mɛ̄ɛ̍ kōlāla̍ŋ o̍ tɛ̍ndīi̍la̍ Sɔ̍lɔ̍mɔ̄ŋnda̍ŋ chōo̍ la̍a̍ na̍ŋ nu̍a̍ā nāŋɔ̄ɔ̄ bɛ̄ndōo̍ yɛ̍, le̍nde̍ ya̍ I̍ na̍ŋ ni̍.

⁶ Lā pɛ̍ɛ̍sā ya̍ le̍ mɛ̄ɛ̍ kɔ̄ɔ̍le̍ nīle̍ŋ lē chō nu̍a̍ā yɛ̍ le̍, le̍ mɛ̄ɛ̍ pāa̍le̍ŋ lē pīīmi̍a̍a̍ ya̍ nu̍a̍ā kpi̍lo̍ kpi̍lo̍ yɛ̍ le̍. Yēmāa̍ nīa̍a̍ nda̍ a̍a̍ dɔ̍ɔ̍nu᷄ŋ tu̍mbe̍ a̍ ya̍ ni̍, ma̍ tōsā mi̍ kɔ̍ wa᷅ wa̍llo̍ o̍ kpe̍le̍ yɔ̄mīī mākīle̍pīi̍yo̍ ni᷄ŋ. Ya̍ i̍i̍ nɔ̍ fo̍ndāŋ o̍ fo̍ndāŋ le̍ dīāllūŋ nūu̍ŋ bīyɔ̄ɔ̍ nyɛ̄ kɛ̄ndɛ̍ī le̍.

⁷ Nūm wāna̍ ya̍ I̍ ka̍a̍la̍ ho̍ō kāālā bɛ̄ndōo̍ wo̍, I̍ ye̍e̍ma̍ mī si̍na̍, kūɛ̍ɛ̍nɛ̍ ŋ̄ kūā yɛ̍ a̍ sāā nu̍m ā ku̍ndāa̍ le̍ dīo̍la̍ŋ? Kūɛ̍ɛ̍nɛ̍ ŋ̄ kūā yɛ̍ a̍ nda̍ a̍ pāa̍le̍ ka̍lāle̍ŋ le̍ mā pɛ̄ŋgi̍? I̍ ye̍e̍ma̍ mī wa̍ bālɔ̄ɔ̍ nu̍m nūūvīa̍a̍ chāāŋāā nūm a̍ ma̍ndāā lāchɔ̄lūa̍a̍ tɛ̄ɛ̄ŋ, o̍ fo̍ndāŋndā ndāla̍ ma̍ndāālā lāchɔ̄lūla̍ŋ a̍ kōlāa̍ ō kūūmba᷄ŋ o̍ hɔ̄l te̍.

Nyɛ̄ pōo̍ sōō wo̍

⁸ Tē a̍ si̍nā fo̍ndāŋ kōŋ te̍ tīŋgu̍e̍i̍nɔ̍ nūu̍, mɛ̄ɛ̍ di̍o̍m pe̍lūŋ sāa̍. Kɔ̍ a̍ chūīŋāā nūm a̍ fɔ̍ŋndu̍a̍a̍ o̍ fo̍ndā chɔ̄lūa̍a̍ ā dīā wo̍, mā kɔ̍ wa᷅ nda̍ māndāa̍ o̍ tɛ̍ndīi̍la̍ wānā ma̍ndāā lāsāa̍ īkɛ̄i̍.

⁹ Wāna̍ ya̍ ka̍a̍la̍ wo̍, a̍ na̍ŋ bɔ̄ɔ̍, ā chō māchūāā mɛ̄ɛ̍ su̍a̍ā la̍a̍ndūa̍a̍ na᷅ŋ nyɛ̍lā nyāāna᷄ŋnda̍ māsā bɛ̍ndōo̍ I̍chi̍pī wa̍ ā chō yɛ̍.

¹⁰ Kēla᷄ŋ ŋ̄ bāānu̍ŋ nu̍a̍ā o̍ lānī wo̍ŋ, ŋ̄ tōsa̍ ma̍ chɔ̄ɔ̄lū nāŋɔ̄ɔ̄ ta̍u̍. Yɔ̄lɔ᷄ŋ ba̍ā kālāŋ bɛ̄ndo᷄ŋ ŋ̄ chō nu̍m o̍ lābo̍lō.

¹¹ Kɛ̍ ŋ̄ chō nu̍m yɔ̄lɔ᷄ŋ ŋ̄ko̍o̍līi̍ŋ kɛ̍ndɛ̄ kɛ̍ndɔ᷄ŋ to̍o̍sīāl, ŋ̄ mūūli̍āŋ a̍ ka̍ni̍i̍ hu̍mbūe̍i̍.

Nyɛ̄ chūa̍a̍ sōō wo̍

¹² Bōōndi̍i̍ māsa̍ nī bɛ̍ndōo̍ ō wa̍ īhīni̍ o̍ ndu̍lo̍ kpēlē ve̍, chūɛ̄īmā chūŋ kɛ̄ndɛ̄mā ya̍ I̍ su̍u̍nu̍ŋ nda̍ŋ mi̍ chūŋ kɛ̄ndɛ̄ kōŋ ō tīū si̍lɔ̍.

¹³ Mɛ̄ɛ̍ bɔ̄lɔ̄ pɔ̍mbɔ̄ chūɛ̄īmā chūŋ kɛ̄ndɔ̄ɔ̍ ō wa̍ nu̍a̍ā wāŋndo̍ ō hānda᷄ŋ o̍ mɛ̄ɛ̄ya̍ŋ tɛ̍ɛ̍ŋ yɛ̍, le̍nde̍ wāna̍ ya̍ ka̍a̍la̍ wo̍ ō lɔ̄l la̍ o̍ ībūŋ pi̍i̍ ni̍.

¹⁴ Wāna̍ ni̍ ya̍ I̍ ka̍a̍la̍ wo̍ ō chō māchūāā, mɛ̄ɛ̍ bīl lāpe̍e̍ŋge̍ chūŋ kɛ̄ndɛ̄ bɛ̄ndōo̍ o̍ kpe̍le̍la̍ mākīle̍pīi̍la̍ŋ ni᷄ŋ Ɛ̄nīkɛ̍dī o̍ cho̍ nu̍a̍ā yɛ̍.

Nyɛ̄ pōo̍ sōō wo̍

¹⁵ A̍ na̍ŋ ō bɔ̄ɔ̍ nūm tīŋgu̍e̍i̍nɔ̍ nūu̍. Hɔ̄lta̍ŋ nu̍m nyɛ̄ kɛ̄ndɛ̄ ta̍fūlāā, nu̍a̍ā chāā hɔ̄ltā pīīŋndo̍ ni̍.

Nyɛ̄ chūa̍a̍ sōō wo̍

¹⁶ O̍o̍ fāl nūu̍, nūm bɛ̍ɛ̍ le̍nde̍ ko̍ni̍ ŋ̄ na̍ŋ ni̍. A̍ hi̍ni̍ ya̍ kɔ̄l bɔ̄ɔ̍. Bīl fɔ̄ɔ̄ndīɔ̄ŋ fɔ̄ɔ̄ndīɔ̄ŋ kɛ̄ndɛ̄ kɛ̍ndɔ̄ɔ̍ o̍ bɛ̍ɛ̄ ndu̍ cho̍ kpēle̍ nāa̍ ni̍.

¹⁷ Chīɛ̄ī nāa̍ mālɔ̄ɔ̍, pɛ̄ŋgɛ̍ŋ na̍a̍ ŋ̄ tāŋgu̍l ndu̍ wo̍ŋ, yɔ̄m si̍dāā wo̍ kpo̍sōŋ. Yɔ̄m sa̍i̍pu̍lūɛ̄ɛ̄ wo̍ a̍ pɛ̄ŋgɛ̍ŋ ndɔ̄ɔ̍ŋ na̍a̍ ŋ̄ tōōsi̍a̍a̍ kāa̍ kpo̍u̍ ni̍.