Sɛ̄kāla̍yā 1 - Yāu̍ Mɛ̄lɛ̄ka̍a̍

Mɛ̄lɛ̄ka̍ Ya̍a̍wɛ̄ɛ̄ ve̍e̍lu̍ wānāā ndūa̍a̍ le̍ mā mīīŋgu̍ ndu̍ o̍ ībūŋ

¹ Mɛ̄ɛ̍ Da̍līɔ̄ɔ̄ o̍ si̍mnu᷄ŋ ma̍sā bɛ̍ndōo̍ le̍ lɛ̄ŋndē Pa̍a̍sīāāle̍ŋ kpo̍u̍, ō tōsa̍ māsāle̍ŋ le̍ wɔ̄sīo̍o̍ ō pīlɛ̍, o̍ wɔ̄sī dīi̍ŋ ndɔ̄ɔ̍ ni̍ŋ pāŋgi̍i̍ ŋɔ̍ma̍a̍ve̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ wāna̍ su̍a̍ā le̍ Mɛ̄lɛ̄ka̍ wo̍ Sɛ̄kāla̍yā yōōŋgōo̍, po̍ Bɛ̍lu̍i̍chīāā wo̍, ndu̍ yɔ̍nūŋ māā po̍ ma᷅ma̍ I̍dɔ̄ɔ̄ wo̍ ni̍. Mbo̍ dīmūl Sɛ̄kāla̍yā āā,

² “Ya̍ Mɛ̍lɛ̄ka̍ Ya̍a̍wɛ̄ɛ̄, mi̍ ya̍ i̍i̍ du̍a̍u̍nu᷄ŋ tu̍mbe̍ o̍ ka̍lā ka̍lā a̍ fi̍nyāā nyāā ma̍māa̍.

³ Le̍la̍ŋ, di̍mu̍l wāŋnda̍ I̍sɔ̄lūɛ̄ī māā ya̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpa̍a̍yāa̍ kpo̍u̍ wo̍ ō dīmi̍ āā, ‘Lā mīīŋgu̍ ya̍ o̍ ībūŋ, ya̍ bɛ̍ɛ̍ mī mu̍li̍ hɔ̄lāā nīa̍a̍ nāa̍ nya̍ chūā.

⁴ Lā wa᷅ māā fi̍nyāā nyāā ma̍māa̍ le̍. Mi̍ wānāā tāsi̍a̍a̍ nda̍ a̍a̍ su̍a̍ā si̍ndɛ̄ le̍ ya̍ Mɛ̄lɛ̄ka̍ Ya̍a̍wɛ̄ɛ̄ wa̍ ā dīmūl nda̍ māā ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nɔ̍ kpāāyāa̍ kpo̍u̍ wo̍ dīmi̍ māā, ā pɛ̄ŋgi̍ sɔ̍ɔ̍ŋ wɔ̍ɔ̍ŋndo̍ŋ tōsāa̍, ndu̍yɛ̍ mā sōli̍ bāla̍ŋ o̍ pɛ̄ɛ̄kūlā wɔ̄ɔ̍ŋnda̍ŋ ni᷄ŋ. Kɛ̍ fi̍nyāā nyāā ma̍māa̍ ā ye᷄ŋ ya̍ lānī le̍, kɛ̄lɛ̄ŋgāā ni᷅ŋ te̍, mā tōsa̍ nyɛ̄ ya̍ I̍ di̍mu̍l nda̍ wo̍.

⁵ Fi̍nyāā nyāā ma̍māā kāŋ ni̍, wānāā nda̍ a̍a̍ su̍a̍ā ka̍ŋ le̍ Mɛ̍lɛ̄ka̍ wa̍ ni̍.

⁶ Kɛ̍ ndu̍yɛ̍ dīōm o̍ dīōm ya̍ I̍ di̍mu̍l fi̍nyāā nyāā ma̍māa̍, ndu̍yɛ̍ a̍ nyɛ̄ o̍ nyɛ̄ ya̍ I̍ di̍mu̍l nda̍ a̍ sāwāla̍ nīla̍ŋ o̍kɔ̄ɔ̄, sa̍na̍a̍ a̍ bu̍ɛ̍i̍yāā nīa̍a̍ su̍a̍ā le̍ ya̍ wa̍, ō pīlɛ̍ bɛ̍ɛ̍ lo̍ le̍ fi̍nyāā nyāā ma̍māa̍ yɔ̄nɔ᷄ŋndo̍ le̍. O̍ ko̍ŋ kɔ̍ɔ̍lī, mi̍ mɔ̍nɛ̍i̍ bīī fi̍nyāā nyāā ma̍māa̍ nda̍ pi̍la̍ le̍ yɔ̄ŋndā ndāla̍ wɔ̍ɔ̍ŋnda̍ŋ ma̍ dīmī āā, le̍ nīīlūlā nāāla̍ wɔ̍ɔ̍ŋnda̍ŋ, ndu̍yɛ̍ a̍ le̍ yɔ̄ŋndā nāāla̍ wɔ̍ɔ̍ŋnda̍ŋ kpe̍e̍kpe̍i̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, ō tūsi̍ na̍a̍ nyɛ̄ pālāa̍ ho̍ō chōo̍ ni̍. Ndu̍yɛ̍ mɛ̄ɛ̍ o̍ kɛ̍ɛ̍si̍a̍a̍ le̍ na̍a̍ ndu̍ tūsīo̍o̍ chōo̍ yɛ̍, le̍nde̍ o̍ tu̍si̍ na̍a̍ ndu̍ chōo̍ ni̍.’ ”

Wāna̍ su̍a̍ā le̍ Mɛ̄lɛ̄ka̍ wo̍ chē yi̍lāŋndo̍ a̍ su̍a̍a̍ o̍kɔ̄ɔ̄

⁷ Mɛ̄ɛ̍ Da̍līɔ̄ɔ̄ o̍ to̍sa̍ māsāle̍ŋ le̍ wɔ̄sīo̍o̍ ō pīlɛ̍, o̍ wɔ̄sī dīi̍ŋ ndɔ̄ɔ̍ ni᷄ŋ, o̍ pāŋgi̍i̍ tɔ̍ a̍ ī pīlɛ̍i̍ ni᷄ŋ, pāŋgi̍i̍ nda̍ vēēlū o̍ Hi̍būlūi̍ye̍ ni᷄ŋ āā Si̍ɛ̍ba̍tī ve̍ mālɔ̄ bi̍di̍i̍ŋ a̍ lē hīɔ̍ɔ̍lu̍ nyūmmā māŋ mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ ya̍ Sɛ̄kāla̍yā, wāna̍ su̍a̍ā le̍ Mɛ̄lɛ̄ka̍ wo̍ yōōŋgōo̍ o̍ yi̍lāŋndo̍ ni᷄ŋ.

⁸ O̍ yi̍lāŋndo̍ ho̍ō ni᷄ŋ, mi̍ cha᷅ pōo̍ īchāli̍ o̍ so᷅ sīāŋāa̍ chōo̍. So̍ō ho̍ō ō wa̍ īsīsi̍ o̍ yɔ̄mīī ma̍tɔ̄ɔ̄ve̍ tɛ̄ɛ̄ŋ, o̍ lɛ̄ŋndē dɛ̍ŋgbɛ̍ pu̍m ni᷄ŋ o̍ pēmbo᷄ŋ tɛ̍ɛ̄ŋ. O̍ ko̍ŋ kɔ̍ɔ̍lī, mi̍ cha᷅ vɛ̄lɛ̄ su̍a̍ā chēle̍ŋ ndu̍ kɔ̄ɔ̄lī. So᷅ sīāŋāa̍, a̍ ō hūmbōo̍.

⁹ Mi̍ I̍ nyu̍nā po̍ na̍a̍ ŋ̍ wa̍ sūūki̍āŋndo̍ wo̍, ndu̍ yɔ̄nūŋ māā ki̍i̍la̍nɔ̍ Mɛ̄lɛ̄ka̍a̍ ni̍ āā, “Fāllo̍, le̍ sa̍bu̍ yɛ̄ɛ̍nɛ̍ su̍a̍a̍ ha̍ā ā si᷄m yɛ̄?” Mi̍ ki̍i̍la̍nɔ̍ Mɛ̄lɛ̄ka̍ na̍a̍ ŋ̄ wa̍ ho̍ō sūūki̍āŋndo̍ wo̍ mūlūl la̍ āā, “I̍ cho̍ nu̍m chɔ̄m le̍ sa̍bū nda̍ si᷄m ndo̍.”

¹⁰ Mi̍ po̍ wa̍ ko̍ŋ i̍si̍si̍ o̍ yɔ̄mīī ma̍tɔ̄ɔ̄ve̍ tɛ̄ɛ̄ŋ ndo̍ ō dīmī āā, “Ha̍ā Mɛ̄lɛ̄ka̍ Ya̍a̍wɛ̄ɛ̄ o̍ ve᷅mm ni̍ le̍ mā kɔ̍ ba̍lū o̍ chi̍e̍ēŋndo̍ chōo̍ kpo̍u̍, mā chē nyɛ̍ cho̍ yɔ̄nɔ᷄ŋndo̍ wo̍.”

¹¹ Mi̍ tu̍ɛ̍ī, mi̍ wānāa̍ wa̍ o̍ su̍a̍a̍ ā pīli̍a̍a̍ chōo̍ wa̍ ā dōōnu᷄ŋ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wa̍ īsīsi̍ o̍ yɔ̄mīī ma̍tɔ̄ɔ̄ve̍ tɛ̄ɛ̄ŋ ndo̍ ko̍na̍ āā, “Ŋ̄ bālu̍ o̍ chi̍e̍ēŋndo̍ ni᷄ŋ kpo̍u̍, ndu̍yɛ̍ mi̍ ŋ̄ sāālu᷄ŋ māā chi̍e̍ēŋndo̍ kpo̍u̍, ō chō a̍ kɔ̄l nyūlū.”

¹² Mi̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō mūlī āā, “O̍o̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, lɔ̍ɔ̍ kūɛ̍ɛ̍nɛ̍ kpe̍e̍kpe̍i̍ ŋ̄ chō yɛ̄ Chūlu̍sɛ̄lɛ̄m, a̍ chi̍e̍e̍ŋ bɛ̍ndo᷄ŋ Chu̍dā īnyīɛ̍ɛ̍ tūīīnɔ᷄ŋ nɛ̍? Kāni̍ fu̍u̍le̍, chɔ̍ŋ a̍ te̍le̍ŋ ŋ̄ dɔ̄ɔ̄nu᷄ŋ tu̍mbe̍ a̍ chi̍o̍o̍ŋ mu᷅ŋ ndo̍, ō chō ni᷅ŋ hāū wɔ̄sīla̍ŋ be̍le̍-ŋɔ̍mmɛ̍ū, ā chō wɔ̄ o̍ tu̍mbo̍o̍ ni᷄ŋ a̍ nda̍ kɛ᷅.”

¹³ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā dīōmndā kɛ̄ndɛ̄la̍ŋ, a̍ dīōmndā nyɔ̄ɔ̄lāā la̍ŋ nāa̍ ki̍i̍la̍nɔ̍ na̍a̍ ŋ̄ wa̍ sūūki̍āŋndo̍ wo̍ chūā.

¹⁴ O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍a̍ ho̍ō ō dīmūl la̍ āā, “Yo̍nda̍ nāa̍ wāŋnda̍ chūā kpo̍u̍ mā tūēī. Di̍mu̍l nda̍ māā Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, ō dīmi̍ māā, kāālā ya̍ I̍ nɔ̍ le̍ Chūlu̍sɛ̄lɛ̄m ndu̍ yɔ̍nūŋ māā Sa̍a̍yɔ̄ŋ ni̍ ō chō lō bɔ̄ɔ̍, ndu̍yɛ̍ I̍ bu̍u̍la̍ŋ ta̍u̍ le̍ ndu̍.

¹⁵ Kɛ̍ I̍ dɔ̍u̍nu᷄ŋ tu̍mbe̍ ta̍u̍ a̍ lɛ̄ŋnde̍ he̍ī, ndi̍ yɔ̍nūŋ māā lɛ̄ŋīi̍ cho̍ŋnu̍ŋ he̍ī o̍ bā ndāa̍ chōo̍, mi̍ ī wānu᷄ŋ o̍ kɔ̄l nyūlōo̍ ni᷄ŋ nde̍. Tu̍mbe̍ ya̍ i̍i̍ do̍u̍nu᷄ŋ wānāā nīa̍a̍ wo̍, ō ve̍ bɛ̍ɛ̍ tu̍mbe̍ bɔ̍ɔ̍ le̍. Kɛ̍ mi̍ lɛ̄ŋnde̍ he̍ī ī chɔ̄ɔ̄lū wānāā nīa̍a̍ nyɛ̄ pālāa̍ tūsī chōo̍ mbo̍ hīāū bɛ̍ɛ̍ mɛ̄ɛ̍ ya̍ i̍i̍ yi̍ya̍ŋ yɛ̍.”

¹⁶ Le̍la̍ŋ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ ndu̍ cho̍ ho̍ō nī. Ō dīmi̍ āā, “I̍ cho̍ mīīŋgū Chūlu̍sɛ̄lɛ̄m, ndu̍yɛ̍ mī tūīīnu̍ŋ ndu̍ īnyīɛ̍ɛ̍. I̍ cho̍ chīɛ̄ī nūu̍ mīŋgī tāŋgūl, ndu̍yɛ̍ o̍ ko̍ŋ kɔ̍ɔ̍lī, mī to̍sa̍ mā mīŋgi̍ vɛ̄lɛ̄ chīɛ̄īla̍ŋ Chūlu̍sɛ̄lɛ̄m tūū a̍ yōōlē tūwāāle̍ŋ mā mīŋgi̍ Chūlu̍sɛ̄lɛ̄m tāŋgūl māā pāāndū.” Nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, nyɛ̄ ō dīmi̍ wo̍ ndu̍ cho̍ ko̍ŋ ni̍.

¹⁷ O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍a̍ ho̍ō ō dīmūl la̍ āā, “Yo̍nda̍ vɛ̍lɛ̄ nāa̍ wāŋnda̍ chūā. Mā di̍mu̍l nda̍ māā nyɛ̄ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmi̍ wo̍ ndu̍ cho̍ ho̍ō ni̍, ō dīmi̍ māā, chi̍e̍e̍ŋ nu᷄ŋ ŋ̄ chō vɛ̄lɛ̄ mīīŋgū sūl mī ŋ̄ pɛ̄ cha̍ cha̍ a̍ nyɛ̄m kɛ̄ndɔ᷄ŋ. Ya̍ Mɛ̍lɛ̄ka̍ Ya̍a̍wɛ̄ɛ̄, I̍ cho̍ vɛ̄lɛ̄ wāŋnda̍ Sa̍a̍yɔ̄ŋ chi̍e̍e̍ kɔ᷅lta̍ŋ mīŋgī dɛ̄ɛ̄nīāā, ndu̍yɛ̍ mī chu̍a̍ vɛ̄lɛ̄ Chūlu̍sɛ̄lɛ̄m māā chi̍e̍e̍ ni̍.”

Yi̍lāŋndo̍ a̍ lēēlā vīsīa̍a̍ o̍kɔ̄ɔ̄

¹⁸ O̍ ko̍ŋ kɔ̍ɔ̍lī, mi̍ I̍ cha᷅ vɛ̄lɛ̄ yi̍lāŋ chēle̍ŋ. O̍ yi̍lāŋndo̍ ho̍ō ni᷅ŋ, mi̍ cha̍ lēēlā vīsīa̍a̍ lā hīɔ̍ɔ̍lu̍.

¹⁹ Mi̍ I̍ nyu̍nā ki̍i̍la̍nɔ̍ Mɛ̄lɛ̄ka̍ na̍a̍ ŋ̄ wa̍ sūūki̍āŋndo̍ wo̍ āā, “Le̍ yɛ̄ɛ̍nɛ̍ lēēla̍ŋ nda᷅ŋ lā si᷄m yɛ̄?” Mbo̍ mūlūl la̍ āā, “Lēēla̍ŋ nda᷅ŋ lā si᷄m le̍ lɛ̄ŋīī kpāāyɛ̄ī pu̍u̍si̍a̍a̍ Chu̍dā, a̍ I̍sɔ̄lūɛ̄ī, a̍ Chūlu̍sɛ̄lɛ̄m nde̍ ni̍.”

²⁰ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ᷅m ya̍ sūmnda̍ ā hīɔ̍ɔ̍lu̍.

²¹ Mi̍ I̍ nyu̍nā ndu̍ āā, “Ō yɛ̄ɛ̍nɛ̍ sūmnda̍ ha̍ā ā hīŋ yɛ̄ tōsāa̍?” Mbo̍ mūlī āā, “Ā hīŋ le̍ lɛ̄ŋīī kpāāyɛ̄ī tɛ̍ɛ̍mbu̍u̍ Chu̍dā, mi̍ ī pūūsīāā wāŋnda̍ ve̍ sīōōŋnde̍ lūēīyo̍, o̍ ko̍ŋ kɔ̍ɔ̍lī mā tɛ̄ɛ̄mbu̍u̍ ndi̍ kpo̍u̍.”