Pītɛ̍ Tāso̍o̍ 1 - Yāu̍ Mɛ̄lɛ̄ka̍a̍

¹ Ya̍ Pītɛ̍, ya̍ cho̍ ho̍ō wāna̍ Chi̍i̍sū Ki̍li̍tī ve᷅m māā hɔ̄ltē ndɔ̄ wo̍, ya̍ cho̍ yāu̍wo̍ ho̍ō pōōnyīa̍a̍ ni̍. I̍ cho̍ ndu̍ pōōnyīa̍a̍ nāa̍ nya̍ wānāa̍ Mɛ̄lɛ̄ka̍a̍ chūā, nya̍ cho̍ mīālla̍ bā o̍ bā fe̍e̍ o̍ būŋga᷄ŋ mu᷅ŋ ni᷄ŋ nda̍, Po̍ŋtɔ̄ɔ̄, a̍ Kāle̍e̍sīā, a̍ Kāpādo̍o̍sīāā, a̍ E̍e̍sīā, a̍ Bi̍ti̍nīāā.

² Pāāndū pa̍ Mɛ̄lɛ̄ka̍ Fi̍nyā nāa̍ ō kɛ̄ɛ̄si̍a̍a̍ mbo̍ hɛ̄lī nya̍ le̍ wāa̍ wānāā ndɔ̍ ni̍. Ndu̍yɛ̍ nya̍ Nyi̍na̍ Mɛ̄lɛ̄ka̍a̍ ō sīīŋgu̍u̍ wānāa̍ kāsī wa̍ ni̍. Ō tōsa̍ he̍ī le̍ mī lā tōsa̍ nyɛ̄ Chi̍i̍sū Ki̍li̍tī di̍mūl nya̍ wo̍, o̍ ko̍ŋ, mī lā sɔ̄la̍ dīndīo̍o̍ a̍ kōo̍ma̍ Chi̍i̍sūa̍a̍ŋ, mī lā sīmnu᷄ŋ a̍ di̍a̍ndāā Mɛ̄lɛ̄ka̍ o̍ hɔ̄l. I̍ cho̍ pīɛ̄īle̍ŋ māā Mɛ̄lɛ̄ka̍ yīya̍ŋ nya̍ chōo̍ ta̍u̍, ndu̍yɛ̍ mbō ke̍ nya̍ kɔ̄l nyūlōo̍ cha̍po̍o̍li̍.

Wāna̍ na̍a̍ ŋ̄ tīīndāŋ kpe̍e̍kpe̍i̍ yo̍

³ Lā ŋ̄ līsa᷅ŋ Mɛ̄lɛ̄ka̍, Māsānɔ̍ nāa̍ Chi̍i̍sū Ki̍li̍tī fi̍nyā ndɔ̄. Ō tūīīnu̍ŋ na̍a̍ īnyīɛ̍ɛ̍ ta̍u̍, mbo̍ tōsā mi̍ ŋ̄ wā o̍ yōōmū sɛ̄nɛ̄ī ni᷄ŋ. Le̍ he̍ī mīīŋgū Chi̍i̍sū Ki̍li̍tī mi̍i̍ŋgu̍ yōōmū wo̍, ō tōsa̍ mi̍ ŋ̄ sɔ̄lā kɔ̄ltā sīmūlāāla̍ŋ nyɛ̄ kɛ̄ndɛ̄ yi̍.

⁴ Ndu̍yɛ̍ ō tōsa̍ mi̍ ŋ̄ wā lēhɔ̄l o̍ nɛ̄ī kpe̍e̍kpe̍i̍ le̍ mī Mɛ̄lɛ̄ka̍ kɔ̍ ke᷅ na̍a̍ nyɛ̄m kɛ̄ndɛ̄ŋ o̍ kɛ̍su̍l wānāā ndūa̍a̍ wo̍ŋ. Ō mānda̍ mu̍ŋ kɔ̍dɔ̍ ɛ̄chɛ̍nɛ̄ le̍ nya̍. Nāa̍ ŋ̍ cho̍ ka̍ŋ nda̍, lo̍ŋ ndu̍ ŋ̄ se᷅ le̍, ŋ̄ te̍mbū le̍, ndu̍yɛ̍ ŋ̄ fu̍lā o̍ ba̍ā ni᷄ŋ te̍.

⁵ Ndu̍yɛ̍ tīīnda᷄ŋ nya̍ nɔ̄ wo̍, ō tōsa̍ mi̍ Mɛ̄lɛ̄ka̍ wā nya̍ māndāa̍ a̍ kpāāya̍ ndɔ̄ bɛ̍ndōo̍. Ō chō he̍ī tōsāa̍ le̍ nya̍ hūnɔ̄ɔ̄ pīŋīo̍o̍ o̍ pāa̍le̍ mɛ̍ɛ̍lāāle̍ŋ chōo̍, le̍ŋ le̍ yɔ̍nūŋ ni̍ māā pāa̍le̍ o̍ cho̍ bɛ̄ɛ̄ndīa̍ŋ le̍ mbō chɔ᷄m mɛ̄ɛ̍ o̍ pi̍ŋī ni̍ŋ wa᷅ŋnda̍ yɛ̍ le̍ŋ.

⁶ Lā wa̍ a̍ kɔ̄ltā kɛ̄ndɛ̄ le̍ sɔ̄ɔ̍ŋ Mɛ̄lɛ̄ka̍ tōsa̍ mu᷅ŋ ki̍nɛ̍i̍ yo̍ŋ, mi̍ chē bɛ̍ɛ̍ mi̍ kɔ̄lta̍ŋ lā wā nya̍ lā tāmbɛ̍i̍ a̍ dɛ̍nɛ̍la̍ pa̍lāālā yɛ̍ yɛ̍la̍ cho̍ nya̍ chōo̍ pɛ̍ŋgo̍o̍ ho̍ō la̍ŋ. Lā sīna̍ pɛ̍ŋgu̍ māā le̍ te̍le̍ŋ bi̍ŋgī ko̍ni̍, dɛ̍nɛ̍la̍ pa̍lāāla̍ŋ nda᷅ŋ lā chō ni̍.

⁷ Le̍ sa̍bū nyɛ̄m pālāŋ mu᷅ŋ ŋ̄ yɔ̄nūŋ nya̍ wo̍ŋ cho̍ ni̍, māā le̍ sīnāa̍ tē lā nɔ̄ pɛ̍ ti̍i̍nda᷄ŋndo̍ o̍ Chi̍i̍sū ni̍ŋ le̍kɛ̍ndɛ̍ī. Le̍nde̍ ko̍ni̍ wāŋnda̍ tōsā a̍ ko̍o̍līi̍yo̍ŋ ni̍. Mi̍ chē bɛ̍ɛ̍ ko̍o̍līi̍yo̍ŋ ŋ̄ cho̍ nyɛ̍ cho̍ le̍ fɛ̍ɛ̍ŋ a̍ fɛ̍ɛ̍ŋ te̍ ni̍, kɛ̍ ndu̍yɛ̍ mɛ̄ɛ̍ mā kēēku̍ mu̍ŋ o̍ yīŋ, le̍ sīnāa̍ māā ko̍o̍līi̍yo̍ŋ kɛ̍sɛ̍ kɛ̍sɛ̍ ni̍. Tīīnda᷄ŋ nya̍ nɔ̄ o̍ Chi̍i̍sū ni̍ŋ ndo̍, ndu̍ hi̍o̍ū ba̍ā po̍lo̍ŋ a̍ ko̍o̍līi̍yo̍ŋ. Le̍la̍ŋ, le̍ sīnāa̍ tē lā nɔ̄ tīīnda᷄ŋndo̍ o̍ Chi̍i̍sū ni̍ŋ pɛ̍ le̍kɛ̍ndɛ̍ī, mɛ̄ɛ̍ mī sɔ̄ɔ̍ŋ nyɛ̄m pālāŋ mu᷅ŋ ŋ̄ kēēku̍ nya̍ chōo̍. O̍ he̍ī ni᷄ŋ, tē pāa̍le̍ Chi̍i̍sū Ki̍li̍tī chɔ̍mnūŋ ni̍ŋ ŋ̄wāŋndā chīe̍e̍ le̍ŋ lē fūūlu̍u̍ pɛ̍, lā chō chāndɔ̄ɔ̍ sɔ̄lā, a̍ nāŋɔ̄ɔ̄ bɛ̄ndōo̍, a̍ bɛ̄ɛ̄le̍ŋ Mɛ̄lɛ̄ka̍ o̍ bā.

⁸ Mi̍ chē bɛ̍ɛ̍ lā chi̍ wɔ̍ Chi̍i̍sū Ki̍li̍ti̍ lē pīlɛ̍ bɛ̍ɛ̍ le̍ ni̍, kɛ̍ ndu̍yɛ̍ mi̍ lā nɔ̄ kāālāa̍ le̍ ndu̍. O̍ ko̍ŋ kɔ̍ɔ̍lī, lā cho̍ ndu̍ chɔ̄ mɛ̄ɛ̍ na̍a̍ ŋ̄ sūāā bɛ̍ɛ̍ nu̍a̍ā yɛ̍ le̍ ni̍, kɛ̍ ndu̍yɛ̍ o̍ ko̍ŋ ni̍ŋ kpo̍u̍, mi̍ lā wā tīīnda᷄ŋ nyāa̍ dɔ̄wɔ̄ɔ̍ o̍ ndu̍ ni̍ŋ. Le̍ he̍ī, kɔ̄l kɛ̄ndɛ̄ bɛ̄ndū bɛ̍ndōo̍ chō nya̍ ni᷄ŋ, lāmɛ̄ɛ̄lu̍ bɛ̍ɛ̍ ō nɔ̍ le̍.

⁹ Le̍ sa̍bū nya̍ chō a̍ kɔ̄l kɛ̄ndɛ̄ wo̍ cho̍ ni̍, māā tīīnda᷄ŋ nya̍ dɔ̄ū o̍ Ki̍li̍tī ni̍ŋ ndo̍ tōsa̍ mi̍ Mɛ̄lɛ̄ka̍ wā nya̍ pīŋīo̍o̍.

¹⁰ Mi̍ wānāa̍ su̍a̍ā le̍ Mɛ̄lɛ̄ka̍ wa̍ ā yāāsīāā sīndɛ̄ fɛ̍sɛ̄ fɛ̍sɛ̄ bɛ̄ndū, a̍ pīōŋɔ̄ɔ̍ ho̍ō o̍kɔ̄ɔ̄. Ndu̍yɛ̍ ma̍ dīmī sūɛ̍i̍ wa̍ā lāchī a̍ kɛ̄ndɛ̄ī bɛ̍ndūī Mɛ̄lɛ̄ka̍ wa̍ nya̍ he̍ī hūnɔ̄ɔ̄ tōsāllo̍ ve̍ o̍kɔ̄ɔ̄.

¹¹ Ndu̍yɛ̍, mi̍ Ki̍li̍tī Nyi̍nā ndɔ̍ wa̍ nda̍ kɔ̄ɔ̄lī wo̍ dīmī a̍ mɔ̍nɛ̍i̍ Ki̍li̍tī ndu̍ o̍o̍ nɔ̍ le̍ hūnɔ̄ɔ̄ bīyɔ̄ɔ̍ ve̍ o̍kɔ̄ɔ̄, ndu̍yɛ̍ mbo̍ dīmī vɛ̄lɛ̄ a̍ dɛ̍nɛ̍ kɛ̍ndɛ̄ bɛ̄ndu̍ wa̍ hūnɔ̄ɔ̄ yɔ̄nɔ᷄ŋ o̍ ko̍ŋ kɔ̍ɔ̍lī wo̍. Ma̍ kīndī le̍ mī nda̍ a̍a̍ si̍na̍ bōōndi̍i̍ sūɛ̍i̍ ka̍lɛ̄i̍ ndi̍ i̍i̍ nɔ̍ le̍ yɔ̄nɔ᷄ŋndo̍ ve̍, a̍ mɛ̄ɛ̍ ndi̍ i̍i̍ nɔ̍ le̍ yɔ̄nɔ᷄ŋndo̍ yɛ̍.

¹² Mi̍ Mɛ̄lɛ̄ka̍ lō o̍ ko̍ŋ, mbo̍ chɔ̄m wānāa̍ su̍a̍ā le̍ Mɛ̄lɛ̄ka̍ wa̍ māā, sɔ̄ɔ̍ŋ nda̍ wa̍ dīmīo̍o̍ wo̍ŋ māā ō ve̍ le̍ nda̍ pi̍la̍ le̍, māā le̍ nya̍ nda̍ wa̍ mu̍ŋ dīmīo̍o̍ ni̍. Ndu̍yɛ̍, a̍ sɔ̄ɔ̍ŋ mu᷅ŋ o̍kɔ̄ɔ̄ nya̍ tūēī ni̍ mi̍ wānāa̍ di̍mūl wa᷅ŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ wa̍ ā dīmī. Ma̍ dīmūl nya̍ Yōōŋgū Kɛ̄ndɔ̄ɔ̍ ho̍ō, sa̍na̍a̍ o̍ kpāāya̍ Nyi̍na̍ Kāsīo̍o̍ ō ke̍ nda̍ wo̍ ni᷄ŋ, Nyi̍nā o̍ yɔ̍ŋ chɔ̄nɔ᷄ŋndo̍ ɛ̄chɛ̍nɛ̄ wo̍. Ki̍i̍la̍a̍ Mɛ̄lɛ̄ka̍a̍ bɛ̍ɛ̍ nda̍ a̍a̍ hɛ̍nāŋ mā sīna̍ sɔ̄ɔ̍ŋ mu᷅ŋ pɛ̄ŋgu̍.

Ka̍ālā wānāa̍ Mɛ̄lɛ̄ka̍a̍ nɔ̄ mā nɔ̄ la̍ŋ

¹³ Le̍la̍ŋ, lā bɛ̄ɛ̄ndi̍a̍a̍ kɔ᷅ltā nyāla̍ŋ le̍ nyɛ̄ Mɛ̄lɛ̄ka̍ hɛ̄na̍ŋ ndo̍ tōsāa̍. Lā mānda̍ nya̍ pi̍la̍ a̍ mɛ̄ɛ̍ ka̍ālā nyāla̍ŋ lā nɔ̄ mī lā wa̍ yɛ̍. Ndu̍yɛ̍ lā wa̍ le̍hɔ̍l o̍ nɛ̄ī kpe̍e̍kpe̍i̍ le̍ kɛ̄ndɛ̄i̍ Mɛ̄lɛ̄ka̍ chō nya̍ hūnɔ̄ɔ̄ tōsāl o̍ pāa̍le̍ Chi̍i̍sū Ki̍li̍tī chɔ̍mnūŋ ni̍ŋ ŋ̄wāŋndā chīe̍e̍ le̍ŋ chōo̍ ve̍.

¹⁴ Lā wa̍ wa̍nāa̍ tu̍e̍ī Mɛ̄lɛ̄ka̍ dīōm. Ndu̍yɛ̍ yēēma̍ŋ nya̍ a̍a̍ nɔ̍ ni᷄ŋ a̍ bōōndi̍i̍ nya̍ a̍a̍ si̍na̍ wɔ̍ to᷅nya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ le̍ wo̍ŋ, lā wa᷅ lɛ̄ nyɛ̄ yēēma̍ŋ mu̍ŋ ŋ̄ dīmūl nya̍ wo̍ŋ tōsā le̍.

¹⁵ Lā wa̍ a̍ di̍a̍ndāā o̍ ka̍ā o̍ ka̍ā ni᷄ŋ nya̍ tōsa̍, mɛ̄ɛ̍ Mɛ̄lɛ̄ka̍ o̍ ve̍e̍lu̍ nya̍ le̍ wāa̍ wānāā ndɔ̄ wo̍ chō ō dīāndāā yɛ̍.

¹⁶ Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ māā, mi̍ Mɛ̄lɛ̄ka̍ dīmī āā, “Lā wa̍ wa̍nāā dīāndāā mɛ̄ɛ̍ ya̍ I̍ cho̍ wānā di̍a̍ndāā yɛ̍.”

¹⁷ Tē lā bīī pɛ̍ lā vēēlu̍ Mɛ̄lɛ̄ka̍ o̍ pīɛ̄īle̍ŋ ni᷄ŋ āā, “Kɛ̄kɛ̍.” Mɛ̄lɛ̄ka̍ kōŋ ndu̍ kɔ̍ɔ̍sā a̍ wānā o̍ wānā mɛ̄ɛ̍ ka̍ā ndɔ̄ɔ̍ wā yɛ̍ ni̍. Ndu̍yɛ̍ ō chɔ᷅m yɛ̍ yɛ̍ ŋ̍wa᷅ŋ tɛ̄ɛ̄ŋ a̍ mɛ̄ɛ̍ o̍ kɔ̍ɔ̍sā a̍ nda̍ yɛ̍ le̍. Le̍la̍ŋ, lā nɔ̍ si̍o̍o̍ŋīi̍ Mɛ̄lɛ̄kɛ̍i̍ o̍ nyɛ̄ o̍ nyɛ̄ ni᷄ŋ nya̍ tōsa̍ kɔ̍ ha̍a̍a̍ a̍ bōōndi̍i̍ nya̍ chō yōōmū chi̍e̍ēŋ na̍nu᷄ŋ nde̍.

¹⁸ Kāni̍ fu̍u̍le̍, nya̍ pi̍la̍ lā sīnā nyɛ᷅ Mɛ̄lɛ̄ka̍ bāŋa̍ nya̍ a̍ ndu̍, mbo̍ sōlī nya̍ o̍ ka̍ālā nɔ̍ la᷅ŋ tɔ̍nɔ̄ le̍ni̍ŋ te̍ la̍ŋ ni᷄ŋ, lā nya̍ sɔ̄la̍ fi̍nyāā nyāā ma̍māa̍ o̍ bā la̍ŋ. Nyɛ̄ o̍ ba̍ŋa̍ nya̍ a̍ ndu̍ wo̍, ō cho̍ nyɛ᷅ ba̍ā ndɔ̄ɔ̍ tōl tōōlō mɛ̄ɛ̍ ba̍ā ka̍ni̍ŋ hu̍mbo᷄ŋ a̍ ko̍o̍līi̍yo̍ŋ ŋ̄ tūāl to̍o̍lō yɛ̍ le̍.

¹⁹ A̍ nyɛ̄ tɔ̍ɔ̍ma̍ bɛ̄ndū bɛ̍ndū o̍ ba̍ŋa̍ nya̍ ni̍, ndu̍ yɔ̍nūŋ ni̍ māā pīɔ̍m Ki̍li̍tī sɔ̍la̍ wo̍. Ki̍li̍tī wa̍ māwāā mɛ̄ɛ̍ sāā fɔ̍ŋndɔ̍ɔ̍ o̍ nɔ̍ sɔ᷅ŋ te̍ wo̍ wā nu̍a̍ā mā dīī ndu̍ le̍ sa̍lāa̍ yɛ̍.

²⁰ Mɛ̄lɛ̄ka̍ kɛ̄ɛ̄si̍a̍a̍ fɛ̍lɛ̍ŋ le̍ mī Ki̍li̍tī ba̍ŋa̍ ŋ̄wāŋndā chīe̍e̍ ba̍ŋā wāā nu̍a̍ā, mālāŋ o̍ to̍o̍sīāā bɛ̍ɛ̍ chi̍e̍ēŋndo̍. Ndu̍yɛ̍ le̍ sa̍bū nyāa̍ mi̍ Mɛ̄lɛ̄ka̍ tōsā mbo̍ hūŋ le̍ mī ŋ̄wāŋndā chīe̍e̍ kpo̍u̍ a̍ che᷅ ndu̍ bōōnde̍i̍ he̍ī, bōōndi̍i̍ chi̍e̍ēŋndo̍ chō ni᷅ŋ he̍ī fūūlūūwo̍ o̍ mɛ̄ɛ̄lu̍la̍ŋ nde̍.

²¹ Ndu̍ Ki̍li̍ti̍ to̍sa̍ a̍ sa̍bū ni̍, mi̍ lā dūāū tīīnda᷄ŋ nyāa̍ o̍ Mɛ̄lɛ̄ka̍ ni᷄ŋ, ndu̍ yɔ̍nūŋ ni̍ māā Mɛ̄lɛ̄ka̍ o̍ mi̍ŋgi̍ ndu̍ yōōmū, ndu̍yɛ̍, mbo̍ tōsā mi̍ Ki̍li̍tī sɔ̍lā bɛ̄ɛ̄le̍ bɛ̍ndūle̍ŋ ta̍u̍ wo̍. Le̍ sa̍bū kōŋ nya̍ dɔ̄ū tīīnda᷄ŋ nyāa̍ o̍ Mɛ̄lɛ̄ka̍ ni᷄ŋ ndu̍yɛ̍ mi̍ lā wā hɔ̄lte̍ŋ o̍ nɛ̄ī le̍ ndu̍ ni̍.

²² Lā nɔ̄la̍ mi̍ lā tōsā nyɛ̄ tōnya̍ Mɛ̄lɛ̄ka̍a̍ ō dīmu̍l nya̍ le̍ tōsāa̍ wo̍, o̍ he̍ī ni᷄ŋ, mi̍ lā dīndī nya̍ pi̍la̍. Ndu̍yɛ̍ mi̍ he̍ī ī tōsā mi̍ lā kāālā chāāŋāā nyāā wa̍nāā lāāla᷄ŋnda̍ kpe̍e̍kpe̍i̍. Māā lēkɛ̍ndɛ̍ī, lā kāāli̍āŋ ve̍llāa̍ vēllē nyɛ̄ kɛ̄ndɛ̄ kɛ̄ndɛ̍ī a̍ kɔ̄ltā nyāla̍ŋ kpo̍u̍.

²³ Kāni̍ fu̍u̍le̍, Mɛ̄lɛ̄ka̍ ke̍ nya̍ yōōmū sɛ̄nɛ̄īyo̍ sa̍na̍a̍ a̍ dīōm ndɔ̄ɔ̍ o̍ cho̍ yōōmū, ndu̍yɛ̍ mbo̍ wā le̍ fɛ̍ɛ̍ŋ a̍ fɛ̍ɛ̍ŋ ndo̍. Ō wa̍ māā yɔ̄ŋɔ̄ɔ̄ pɛ̍, lā mīīŋgu̍ māmīīŋgāā vīōlɔ᷄ŋ pi̍la̍. Ndu̍yɛ̍ māā wāna̍ to̍sa̍ mi̍ lā mīīŋgū vīōlɔ᷄ŋ ndo̍, māā wāna̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍ o̍ cho̍ ni̍. Ndu̍ ndu̍ cho̍ māā wānāa̍ ve̍lū nya̍ o̍ tāse̍la̍ ndɔ̄ɔ̍ wa̍, a̍ nɔ̍ mā vī wa̍ le̍.

²⁴ Ī chō ī dīmīa̍ŋ o̍ Yāu̍ Mɛ̄lɛ̄ka̍a̍ ni᷄ŋ āā, “Ŋ̄wāŋndā chīe̍e̍ kpo̍u̍ mɛ̄ɛ̍ bīl pūīyāa̍ chō yɛ̍ ko̍ni̍ nda̍ chō ni̍. Kpāāya̍ ndāa̍ kpo̍u̍ ō chō māchūāā mɛ̄ɛ̍ pe̍e̍ŋge̍la̍ kɛ̍ndɛ̄la̍ŋ lā pɛ̄ɛ̄ŋgā nu̍a̍ā ō tɔ̄lɔ̄ɔ̍ yɛ̍. Bīllo̍ mbō vēsa̍. Pe̍e̍ŋge̍la̍ kɛ̍ndɛ̄la̍ŋ bɛ̍ɛ̍ mī lā kēēndu̍ŋ mī lā dēli̍. Le̍nde̍ ko̍ni̍ ŋ̄wāŋndā chīe̍e̍ a̍ cho̍ ni̍.

²⁵ Kɛ̍ dīo̍m Māsānɔ̄ɔ̍ Mɛ̄lɛ̄ka̍a̍ ndu̍ ndu̍, le̍ fɛ̍ɛ̍ŋ a̍ fɛ̍ɛ̍ŋ o̍ cho̍ ni̍.” Dīōm ko᷄ŋ yɔ̍nūŋ ni̍ māā Yōōŋgū Kɛ̄ndɛ̍ Mɛ̄lɛ̄ka̍ nda̍ dīmu̍l nya̍ wo̍.