Ōbāda̍yā 1 - Yāu̍ Mɛ̄lɛ̄ka̍a̍

¹ Yōōŋgū Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍ ō ke̍ wāna̍ su̍a̍ā le̍ Mɛ̄lɛ̄ka̍ wo̍ Ōbāda̍yā o̍ yi̍lāŋndo̍ ni᷄ŋ a̍ I̍dɔ̄m o̍kɔ̄ɔ̄ wo̍. Mɛ̄lɛ̄ka̍ Ya̍a̍wɛ̄ɛ̄ ve᷅m ki̍i̍la̍nɔ̍ ndɔ̄ɔ̍ o̍ lɛ̄ŋnde̍ ni᷄ŋ a̍ yōōŋgōo̍. Ndu̍yɛ̍ ŋ̄ tūēī yōōŋgū kālāa̍. Ō dīmi̍ āā “Lā bɛ̄ɛ̄ndi̍a̍ŋ le̍ sɔ̍ŋgɔ̄ɔ̍. Lā ŋ̄ kɔ̄ŋnu᷅ŋ mī ŋ̄ kɔ̍ sɔ̍ŋgā a̍ wāŋnda̍ I̍dɔ̄m.”

A̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍sī ni̍ŋ wa᷅ŋnda̍ I̍dɔ̄m nyɛ̄ pālāa̍ chōo̍ yɛ̍ o̍kɔ̄ɔ̄

² Mɛ̄lɛ̄ka̍ Ya̍a̍wɛ̄ɛ̄ di̍mu̍l nya̍ wāŋnda̍ I̍dɔ̄m āā, “I̍ cho̍ tōsā lɛ̄ŋnde̍ tɛ̄ɛ̄ŋ ki̍nɛ̍i̍ mī kpāāya̍ nyāa̍ dɔ̄ɔ̄na᷄ŋ. I̍ cho̍ tōsā mī wāŋnda̍ chu̍a̍ nya̍ wānāā fo̍ndō fu̍u̍.

³ Nya̍ wāŋnda̍ i̍dɔ̄m, lā hūīnu̍ŋ nya̍ pi̍la̍, a̍ yōŋga̍ nya̍ kēlū wo̍. Lā yīya̍ŋ māā wānā o̍ wānā nɔ̍lā nya̍ le̍. Le̍ mɛ̄ɛ̍ chi̍e̍e̍ nyā le̍bo̍llo̍ chō ō bālāā a̍ pōūtā kālā ka̍lā la̍ŋ yɛ̍, le̍ mɛ̄ɛ̍ fo̍ndāŋndā nyāla̍ cha̍lāā la̍ŋ lā chō o̍ pēmbūŋ vīlɛ̄īyo̍ŋ chōo̍ pɔ̍ pɔ̍ yɛ̍, nyɛ̄ kōŋ nya̍ dīmi̍ ni̍ māā wānā o̍ wānā nɔ̍lā nya̍ nyɛ̄ yɔ̄ŋ te̍.

⁴ Kɛ̍ mi̍ chē bɛ̍ɛ̍ mī lā tāŋgūl nāa̍ nyāā cha̍lāa̍ chōo̍ cho̍o̍ pɔ̍, mɛ̄ɛ̍ kōwɔ̍ɔ̍ tāŋgūl nu̍a̍ā wāa̍ŋnde̍ ndɔ̄le̍ŋ chōo̍ cho̍o̍ yɛ̍, mi̍ chē bɛ̍ɛ̍ mi̍ lā tāŋgu̍l cha᷄lta̍ nyāla̍ŋ chōo̍ cho̍o̍ pɔ̍ o̍ lōo̍ŋ tɛ̄ɛ̄, kɛ̍ I̍ cho̍ nya̍ tūsī lɛ̄ŋ.

⁵ Wāŋnda̍ I̍dɔ̄m, ya̍a̍mɔ̍ɔ̍wa̍a̍ nyāa̍ chō nya̍ hūnɔ̄ɔ̄ tɛ̄ɛ̄mbūū. Ā yɔ᷄ŋ bɛ̍ɛ̍ āā vīīya̍ tē ā kūɛ̄ vīīle̍ŋ īchɔ̄l pɛ̍, nyɛ̄ nda̍ nɔ̄lā le̍ chūa̍a̍ wo̍ ko̍ni̍ nda̍ chūā ni̍, ŋ̄ tɔ̄ɔ̍ŋ mā mɛ̄i̍ lo̍ŋ. Wānāa̍ ke̍ndī kīle̍pīi̍ya̍ŋ nda̍ bɛ̍ɛ̍, tē ā wa̍ kīle̍pīi̍ya̍ŋ kēndīo̍o̍ pɛ̍, ā di̍ndī ma̍ŋ kēndīo̍o̍ fo̍ fo̍ le̍, mā mɛ̄i̍ mā ti᷄ŋ kɔ̄ɔ̄lī. Kɛ̍ nya̍ nya̍ ya̍a̍mɔ̍ɔ̍wa̍a̍ nyāa̍ ā chō nya̍ hūnɔ̄ɔ̄ tɛ̄ɛ̄mbūū kpo̍u̍ wānā pi᷅lɛ̍ bɛ̍ɛ̍ ā mɛ̍ī ni̍ŋ te̍.

⁶ Nya̍ wāŋnda̍ I̍dɔ̄m, nya̍ fu̍la̍ o̍ pūlāle̍ I̍īsɔ̄le̍ŋ chōo̍ wa̍, ya̍a̍mɔ̍ɔ̍wa̍a̍ nyāa̍ ā chō nya̍ hūnɔ̄ɔ̄ sōlī a̍ sɔ̍ŋgɔ̄ɔ̍, mā kūɛ̄nu᷄ŋ a̍ nyɛ̄m nyāa̍ŋ. Ā chō hūnɔ̄ɔ̄ nyɛ̄m nyāa̍ŋ nūūvīāā tɛ̍ɛ̍ tɛ̍ɛ̍, mā kūɛ̄nu᷄ŋ a̍ mu̍ŋ.

⁷ Chāāŋāā nyāa̍ nya̍ chō o̍ chɛ̄la᷅ŋndo̍ ni᷄ŋ le̍ Māāli̍āŋndo̍ a̍ te̍le̍ŋnda̍ chɔ̄ūla̍ŋ nda̍ kpo̍u̍, ā chō nya̍ hūnɔ̄ɔ̄ hūī. Ā chō hūnɔ̄ɔ̄ sɔ̍ŋgā a̍ nya̍ mā sōli̍ nya̍ o̍ lɛ̄ŋndē nyāle̍ŋ ni᷄ŋ. Wānāā nya̍ chō o̍ dīōm pīlɔ̍ɔ̍ ni᷄ŋ nda̍ chō nya̍ chīŋa̍la᷅ŋ a̍ sɔ̍ŋgɔ̍ɔ̍ mā yēm nya̍. Ndi̍a̍a̍mɔ̍ɔ̍wa̍a̍ nyāa̍ nya̍ tīīnda̍ŋ nda̍ chō nya̍ yāŋɔ̄ɔ̄le̍ŋ yēŋ, kɛ̍ lā si̍nā ni̍ŋ ndi̍ pɛ̄ŋgu̍ le̍.”

⁸ Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “Pāa̍le̍ cho̍ hūnɔ̄ɔ̄ fūūlūū mī tu̍si̍ wāŋnda̍ I̍dɔ̄m nyɛ̄ pālāa̍ chōo̍. Pāa̍le̍ le̍ŋ I̍ cho̍ wānāā kɔ̄l kālu̍a̍a̍ I̍dɔ̄m kpo̍u̍ tɛ̍ɛ̍mbūū.

⁹ Nya̍ wāŋnda̍ I̍dɔ̄m, I̍ cho̍ tōsā mī sīōōŋnde̍ bīī ku̍u̍ba̍a̍ nyāa̍ chɔ̄ūwa̍, a̍ cho̍ o̍ chi̍e̍e̍ nyā bɛ̍ndōo̍ ni᷄ŋ Tɛ̍māŋ nda̍. So̍vɛ̄i̍ya̍ I̍dɔ̄m kpo̍u̍ ya̍a̍mɔ̍ɔ̍wa̍ chō nda̍ hūnɔ̄ɔ̄ dīū.”

Le̍ sa̍bū Mɛ̄lɛ̄ka̍ chō wāŋnda̍ I̍dɔ̄m nyɛ̄ pālāa̍ tūsī chōo̍ wo̍

¹⁰ Nya̍ wāŋnda̍ I̍dɔ̄m, si̍ɔ̍mbu̍la̍ŋ lā chō nya̍ hūnɔ̄ɔ̄ bīyɔ̄ɔ̄, kāni̍ fo̍ndōle̍ le̍ mɛ̄ɛ̍ nya̍ pūŋga̍ nyɛ̄m wānāya᷅ŋ nyāa̍ yɛ̍, nda̍ yɔ̍nūŋ māā wānāā fūla̍ o̍ pūlāle̍ Che̍kɔ̍pūle̍ŋ chōo̍ wa̍ vi̍. I̍ cho̍ hūnɔ̄ɔ̄ nya̍ tɛ̄ɛ̄mbūū mī chi̍i̍ a̍ nya̍ le̍ fɛ̍ɛ̍ŋ a̍ fɛ̍ɛ̍ŋ.

¹¹ Pāa̍le̍ ya̍a̍mɔ̍ɔ̍wa̍ hu᷄ŋ de᷅l nda̍ chōo̍ ma̍ pēsī dīōlā sāāsāa̍ Chūlu̍sɛ̄lɛ̄m nde̍ŋ, lā māla̍ nda̍ le̍. Wānāā lēkāa̍ hu̍ŋ pu̍ŋgā ka̍ŋ Chūlu̍sɛ̄lɛ̄m ma̍ pīɔ̄ūvi̍āŋ nyɛ᷅m ndāa̍ŋ ma̍ kūānu᷄ŋ a̍ mu̍ŋ nda̍, nya̍ nda̍ā to̍sa̍ dɛ̍nɛ̍ wɔ̍ɔ̍ŋ kōŋ ni̍.

¹² Nya̍ a̍a̍ nɔ̍ mī nya̍ a̍a̍ ma̍m wānāā nyāa̍ Chu̍dā, bōōndi̍i̍ dɛ̍nɛ̍ pa̍lāā kōŋ ō wa̍ nda̍ chōo̍ o̍ ve̍ le̍. Nya̍ a̍a̍ ve᷅ a̍ kɔ̄ltā kɛ̄ndɛ̄ le̍ tɛ̄ɛ̄mbūū ya̍a̍mɔ̍ɔ̍wa̍a̍ ndāa̍ ā tɛ̄ɛ̄mbu̍u̍ nda̍ wo̍ le̍. Nya̍ a̍a̍ nɔ̍ ku̍e̍ē mī nya̍ a̍a̍ to̍sa̍ nya̍a̍lo̍o̍ le̍ nyɛ̄ kīndīlāa̍ wa̍ nda̍ chōo̍ wo̍ le̍.

¹³ Nya̍ a̍a̍ nɔ̍ mī nya̍ a̍a̍ he̍l o̍ wānāā nīa̍a̍ lo̍ chi̍e̍e̍ a̍ nda̍ māmɔ̄ɔ̍ le̍ kpūndɛ̍ wa̍ nda̍ chōo̍ wo̍ le̍. Nya̍ a̍a̍ chu̍ē nyɛ᷅m ndāa̍ŋ mī nya̍ a̍a̍ ku̍ɛ̍ŋnu᷄ŋ a̍ mu̍ŋ te̍.

¹⁴ Nya̍ a̍a̍ nɔ̍ mī nya̍ a̍a̍ kɔ̍ si᷅m o̍ nɛ̄īla̍ ba᷅ŋnda̍ŋ le̍ a̍ hɛ̍lu᷄ŋ ma̍ wā nyāānɔ᷄ŋndo̍ wa̍ bīyɔ̄ɔ̍ le̍. Nya̍ āā nɔ̍ ku̍e̍ē mī nya̍ a̍a̍ bi̍ī nda̍ o̍ pālɛ̍i̍ ndɛ̄i̍ nyɛ̄ pālɛ̍i̍ kēŋ chōo̍ mī nya̍ a̍a̍ yɔ̍ŋgu̍ nda̍ o̍ ya̍a̍mɔ̍ɔ̍wa̍a̍ ndāa̍ lo̍ le̍.

A̍ mɛ̄ɛ̍ Mɛ̄lɛ̄ka̍ tūsī ni̍ŋ lɛ᷅ŋnde̍ nyɛ̄ pālāa̍ chōo̍ yɛ̍ o̍kɔ̄ɔ̄

¹⁵ Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “Pāa̍le̍ŋ lē chō ni᷅ŋ kpɛ̍ɛ̍lūŋ, pāa̍le̍ ya̍ Mɛ̄lɛ̄ka̍ Ya̍a̍wɛ̄ɛ̄ ki̍lūl ni̍ŋ lɛ᷅ŋnde̍ kpo̍u̍ ya̍mɛ̍i̍ le̍ nda̍ nyɛ̄ pālāa̍ tūsīo̍o̍ chōo̍ le̍ŋ. Wāŋnda̍ I̍dɔ̄m, nyɛ̄ o̍ nyɛ̄ nya̍ tōsa̍l chāānda̍ nya̍ bɛ̍ɛ̍ ā chō nya̍ ndu̍ tōsāl. Dɛ̍nɛ̍ wɔ̍ɔ̍ŋ nya̍ tōsa̍l chāānda̍ wo̍ ō chō mīīŋgū nya̍ pi̍la̍ o̍ lēbōl.”

¹⁶ Wāŋnda̍ Chu̍dā, Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “Nya̍ wānāā nīa̍a̍, I̍ to̍sa̍ mi̍ lā kōl o̍ tāāla̍ nyɛ̄ pālāā bɛ̄ndōo̍ ni᷄ŋ o̍ pēmbīī nīi̍ kāsīe̍i̍ chōo̍, ndu̍ yɔ̍nūŋ ni̍ māā dɛ̍nɛ̍ pa̍lāā ya̍ I̍ tu̍si̍ nya̍ chōo̍ wo̍. Kɛ̍ wānāa̍ cho̍ o̍ lɛ̄ŋīi̍ ba̍lu̍ nya̍ ve̍ ni᷄ŋ nda̍, tāāla̍ nyɛ̄ pālāā nda̍ nda̍ kōl ni̍ŋ le̍ni̍ŋ ndo̍, ndu̍ wɔ̍ū ni̍ŋ mbō hīōū tāāla̍ nya̍ ko᷄l lēni᷄ŋ ndo̍. Ndu̍yɛ̍ ā lō ni̍ŋ ko̍lɔ̄ɔ̍ lēni᷄ŋ ha̍a̍a̍, nda̍ kpo̍u̍ mā chūu̍ kpe̍nde̍ wānā pi᷅lɛ̍ bɛ̍ɛ̍ lo᷅ le̍.”

A̍ mɛ̄ɛ̍ wāŋnda̍ I̍sɔ̄lūɛ̄ī a̍ ya᷅m ni̍ŋ ya̍a̍mɔ̍ɔ̍wa̍a̍ ndāa̍ yɛ̍ o̍kɔ̄ɔ̄

¹⁷ Kɛ̍ wāŋnda̍ ā ti᷄ŋ o̍ Pēmbīī Sa̍a̍yɔ̄ŋnde̍ chōo̍ ā hīālūŋ ni̍ŋ. Ndu̍yɛ̍ Sa̍a̍yɔ̄ŋ wa᷅ ni̍ŋ fo̍ndāŋ kāsī. Wānāa̍ fu̍la̍ o̍ pūlāle̍ Che̍kɔ̍pūle̍ŋ chōo̍ wa̍, ā chō hūnɔ̄ɔ̄ lɛ̄ŋndē ndāle̍ nda̍ pōōnda̍ nda̍ o̍ bā le̍ŋ mīŋgī bīyɔ̄ɔ̄.

¹⁸ Che̍kɔ̍pū nda̍ Chōo̍sɛ̍ pūlālē ndāle̍ŋ lē wā ni̍ŋ ko̍ mɛ̄ɛ̍ yīŋnde̍ŋ lē chō nu̍a̍ā yɛ̍. Pūlāle̍ I̍īsɔ̄le̍ŋ lē wā ni̍ŋ ko̍ mɛ̄ɛ̍ bīl vēsɛ̍i̍yo̍ chō nu̍a̍ā yɛ̍. Ā chō hūnɔ̄ɔ̄ pūlāle̍ I̍i̍sɔ̄le̍ŋ tɛ̄ɛ̄mbūū mɛ̄ɛ̍ yīŋnde̍ŋ lē lūām nu̍a̍ā bīl vēsɛ̍i̍yo̍ yɛ̍. Wānā pi᷅lɛ̍ bɛ̍ɛ̍ lo᷅ ni̍ŋ yo̍o̍mū le̍.

¹⁹ Wānāa̍ cho̍ o̍ lɛ̄ŋndē Chu̍dāle̍ŋ ni᷄ŋ bā tōū wo̍ wa̍, ā chō hūnɔ̄ɔ̄ lɛ̄ŋndē īpēmbūle̍ŋ I̍dɔ̄m bi̍yɔ̄ɔ̄. Ō ko̍ŋ kɔ̍ɔ̍lī, wānāa̍ cho̍ o̍ pēmbo᷄ŋ bɛ̄ŋgu̍ ba᷅ pāa̍le̍ŋ lē dēl lo̍ wa̍ ā chō lɛ̄ŋndē Fīli̍i̍tīāāle̍ŋ bīyɔ̄ɔ̄. I̍sɔ̄lūɛ̍i̍ya̍ chō hūnɔ̄ɔ̄ būŋgɛ̄ī E̍fi̍lūēmnde̍ bīyɔ̄ɔ̄, mā bīī būŋgɛ̄ī Sāme̍e̍līāāve̍. Wānāa̍ fu̍la̍ o̍ pūlāle̍ Bɛ̍ŋnja̍mīŋnde̍ŋ chōo̍ wa̍ ā chō hūnɔ̄ɔ̄ būŋgɛ̄ī Ki̍i̍li̍a̍dīve̍ bīyɔ̄ɔ̄.

²⁰ Wānāā nda̍ sōli̍ o̍ lɛ̄ŋndē I̍sɔ̄lūɛ̍i̍le̍ŋ bā lūāŋndo̍ wa̍, ā chō hūnɔ̄ɔ̄ mīīŋgū o̍ nda̍lo̍ mā bīī lɛ̄ŋnde̍ŋ, chɔ̍ŋ o̍ lɛ̄ŋndē Fōni̍i̍sīāāle̍ŋ mbō kūɛ̄ Pɔ̍ɔ̍li̍ Sa̍lu̍ɛ̍fa̍tī chi̍e̍e̍. O̍ ko̍ŋ kɔ̍ɔ̍lī, mī wānāā nda̍ sōli̍ Chūlu̍sɛ̄lɛ̄m ma̍ wā Sa̍a̍dīī chi̍e̍e̍ wa̍, ā bīī chi̍e̍e̍ŋ cho̍ o̍ būŋgɛ̄ī Chu̍dāve̍ ni᷄ŋ ba᷅ tōūwo̍ wo̍ŋ.

²¹ Ku̍u̍ba̍a̍ chɔ̄ūwa̍ Chūlu̍sɛ̄lɛ̄m, ā cho̍ hūnɔ̄ɔ̄ lɛ̄ŋndē I̍dɔ̄mnde̍ŋ dēlɔ̄ɔ̄ chōo̍ mā yēm nde̍ŋ, mī lē wa̍ nda̍ o̍ bā bɛ̄ŋgu̍. Ndu̍yɛ̍ mī Mɛ̄lɛ̄ka̍ Ya̍a̍wɛ̄ɛ̄ pi̍la̍ wa̍ nda̍ chōo̍ ma̍sāa̍.