Nɛ̄hīma̍yā 1 - Yāu̍ Mɛ̄lɛ̄ka̍a̍

^1-2 Yāu̍wo̍ ho̍ō ō chō māchūāā a̍ ko̍na̍ Nɛ̄hīma̍yā, po̍ Hākāla̍yā wo̍ ō dɔ̄ɔ̄nu᷄ŋ ndo̍ o̍kɔ̄ɔ̄. Bōōndi̍i̍ nda̍ kūɛ̄ a̍ na̍a̍ o̍ bīyɔ̄ɔ̍ ni᷄ŋ nde̍, pāa̍le̍ pi᷅lɛ̍, ya̍ Nɛ̍hīma̍yā, I̍ wa̍ Su̍sā chi̍e̍e̍, o̍ wa̍ chi̍e̍e̍ le̍bo̍llo̍ le̍ būŋgɛ̄ī Pa̍a̍sīāāve̍ wo̍, mi̍ Ha̍na̍nī wānāyɛ̍ī nīī pu̍m nda̍ pūa̍a̍ ā ti᷄ŋ ā cha᷄ŋ Chu̍dā ma̍ hūŋ Su̍sā chi̍e̍e̍. Wɔ̄sī māsāa̍ Āŋtāsa̍a̍sī, o̍ wa̍ māsāa̍ le̍ lɛ̄ŋndē lēŋ ndo̍ ō chīŋā wɔ̄sīla̍ŋ bi̍di̍i̍ŋ o̍ lēmāsā wo̍, o̍ pāŋgi̍i̍ Ki̍si̍līve̍ ni᷄ŋ, o̍ wɔ̄sī kōŋ ni᷄ŋ, sūɛ̍i̍ he̍ī yɔ̄nu᷄ŋ ni̍. Mɛ̄ɛ̍ na̍a̍ ŋ̄ chīīki̍āŋ na̍a̍ nda̍ā, mi̍ lo᷅ o̍ ko̍ŋ mi̍ nyu̍nā nda̍ a̍ Chu̍ūwāa̍ lo̍ yōōmū ma̍ hīālu᷄ŋ ā kūe̍ a̍ nda̍ o̍ bīyɔ̄ɔ̍ ni᷄ŋ te̍ wa̍ o̍kɔ̄ɔ̄. Ndu̍yɛ̍ mi̍ nyu̍nā nda̍ vɛ̄lɛ̄ a̍ Chūlu̍sɛ̄lɛ̄m o̍kɔ̄ɔ̄.

A̍ mɛ̄ɛ̍ Nɛ̄hīma̍yā chɔ̍m būūla᷄ŋ ndɔ̄ɔ̍ le̍ Chūlu̍sɛ̄lɛ̄m yɛ̍ o̍kɔ̄ɔ̄

³ Ma̍ dīmūl la̍ māā wānāa̍ hɛ̍lu᷄ŋ, ma̍ lō yōōmū ā kūe̍ a̍ nda̍ o̍ bīyɔ̄ɔ̍ ni᷄ŋ te̍, ndu̍yɛ̍ ma̍ mīīŋgū o̍ būŋgɛ̄ī Chu̍dāve̍ ni᷄ŋ nda̍, māā nyɛ̄ pālāa̍ chō nda̍ chōo̍ ta̍u̍ ta̍u̍, ndu̍yɛ̍ māā lɛ̄ŋīi̍ ba̍lu̍ nda̍ ve̍ ā chō nda̍ bɛ̄ɛ̄la̍ŋ tɛ̄ɛ̄mbūūwo̍ kpe̍e̍kpe̍i̍. O̍ ko̍ŋ kɔ̍ɔ̍lī, ma̍ dīmūl la̍ vɛ̄lɛ̄ māā sāāsāa̍ Chūlu̍sɛ̄lɛ̄m kāni̍ ya̍a̍mɔ̍ɔ̍wa̍ tɛ̄ɛ̄mbu̍u̍ ndu̍, ō chō wɔ̄ le̍nde̍ ndu̍yɛ̍ māā dīōlā sāāsā ko̍ŋ bɛ̍ɛ̍ lā chō wɔ̄ le̍nde̍ la̍ ŋu̍a̍lɛ̍i̍.

⁴ Mɛ̄ɛ̍ ya̍ I̍ tu̍e̍ī ko̍na̍ pūa̍a̍ ha̍ā ā dōōnu̍ŋ ya̍ wo̍, mi̍ cha᷅l lɛ̄ŋ wɔ̍yɔ̄ŋ mi̍ cha᷅ŋ. Le̍ pālɛ̍i̍ fa̍ŋgā, kɔ̄l nūu̍ wa̍ mɔ̍nɛ̍i̍ bīyɔ̄ɔ̍, mi̍ bi̍ī su᷅mndo̍. O̍ ko̍ŋ, mi̍ pi̍ɛ̍ī Mɛ̄lɛ̄ka̍ o̍ cho̍ ɛ̄chɛ̍nɛ̄ wo̍.

⁵ Mi̍ di̍mī a̍a̍, “O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ cho̍ ɛ̄chɛ̍nɛ̄ wo̍, ā chō ō bɛ̄ndū. Ndu̍yɛ̍, nūm wānā nɔ̍ ni̍, mā wo̍. Ā chō wāna̍ lo̍ o̍ lēdīōm. Ndu̍yɛ̍ kāālā ŋ̄ nɔ̄ le̍ wānāa̍ kɛ̍si̍ kpe̍ma̍ ŋ̄ yīi̍ a̍ nda̍ wo̍, o̍ ko̍ŋ kɔ̍ɔ̍lī, ma̍ kāālā nu̍m ndu̍yɛ̍ ma̍ tōsā nyɛ̄ ŋ̄ dīmūl nda̍ le̍ tōsāa̍ wo̍ wa̍, ō chō le̍ fɛ̍ɛ̍ŋ a̍ fɛ̍ɛ̍ŋ, ndu̍yɛ̍ a̍ fe̍ŋāŋ o̍ kpe̍ma̍ ko̍ŋ chōo̍ le̍.

⁶ Le̍la̍ŋ yāndi̍i̍ Mɛ̄lɛ̄ka̍, ya̍ŋ ni᷅la̍ŋ mā tūēī pīɛ̄īlē ya̍ bu̍ɛ̍ī nūmndo̍ chō īdīi̍ a̍ īchɔ̄l le̍ wānāā nūmnda̍ I̍sɔ̄lūɛ̄ī, bu̍ɛ̍i̍yāā nūm nda̍ le̍ŋ. Vi᷅ŋ ya̍ hɔ̄lāā nūmnda̍ le̍ Mɛ̄lɛ̄ka̍. I̍ cho̍ yɔ̄ŋ wɔ̄ɔ̍ŋ na̍a̍ wāŋnda̍ I̍sɔ̄lūɛ̄ī ŋ̄ tōsa̍ wo̍ chɔ̄ɔ̄mūūwo̍ nāa̍ nūm chu̍a̍. Ya̍ ni̍, fi̍nyāā nīāā ma̍māa̍ ni̍, ŋ̄ tōsa̍ yɔ̄ŋ wɔ̄ɔ̍ŋndo̍ a̍ nūm.

⁷ Ŋ̄ tōsa̍ dɛ̍nɛ̍ wɔ̍ɔ̍ŋ bɛ̄ndū a̍ nūm. Nyɛ̄ o̍ nyɛ̄ ŋ̄ dīmu̍l na̍a̍ le̍ tōsāa̍, ŋ̄ chɛ᷄l mī ŋ̄ tōsa̍ ndu̍ le̍. Sāwāla̍ ŋ̄ ke̍ bu̍ɛ̍ī nūmndo̍ Mūu̍sē le̍ na̍a̍ la̍ŋ ni̍, pɛ̄ɛ̄kūlā nūmnda̍ŋ ni̍, ŋ̄ tōsa̍ nyɛ᷅ la̍ di̍mi̍ wo̍ le̍.

⁸ Kɛ̍ ndu̍yɛ̍, yāndi̍i̍ Mɛ̄lɛ̄ka̍ lo̍o̍nu̍ŋ, a̍ nyɛ̄ ŋ̄ dīmu̍l bu̍ɛ̍ī nūmndo̍ Mūu̍sē wo̍ o̍kɔ̄ɔ̄. Ma̍ dīmī māā tē ŋ̄ sōli̍ nu̍m dīōm pɛ̍, ndu̍yɛ̍ mī ŋ̄ tōsa̍ nyɛ̄ ŋ̄ dīmu̍l na̍a̍ le̍ tōsāa̍ wo̍ le̍, māā ā chō na̍a̍ sɛ̄ŋī o̍ lɛ̄ŋnde̍ ni᷄ŋ o̍ chi̍e̍ēŋndo̍ chōo̍.

⁹ Kɛ̍ māā, tē ŋ̄ mīīŋgu̍ nu̍m o̍ ībūŋ pɛ̍, mī ŋ̄ tōsa̍ nyɛ̄ o̍ nyɛ̄ ŋ̄ dīmu̍l na̍a̍ le̍ tōsāa̍, māā ā yɔ᷄ŋ bɛ̍ɛ̍ mī ŋ̄ wa̍ o̍ chi̍e̍ēŋndo̍ mɛ̄ɛ̄lu̍la̍ŋ pɔ̍, sōlīo̍o̍ ŋ̄ sōlī na̍a̍ lo̍ŋ ni̍ mā hīŋ a̍ na̍a̍ o̍ fo̍ndāŋ ŋ̄ hɛ̄li̍ le̍ mī wānāā nūmnda̍ ā sōōlu̍u̍ nu̍m lo̍ŋ ndo̍.”

¹⁰ “Mɛ̄lɛ̄ka̍, bu̍ɛ̍i̍yāā nūmnda̍ wāŋnda̍ ha̍ā chō ni̍, ndu̍yɛ̍ wānāā nūmnda̍ kɛ̍sɛ̍ kɛ̍sɛ̍ nda̍ chō ni̍. Nu᷄m ba̍ŋa̍ wāŋnda̍ ha̍ā a̍ kpāāyā nu̍m bɛ̄ndōo̍, ndu̍yɛ̍ a̍ dīāllūŋ nūm ka̍la᷄ŋ ni̍.

¹¹ Le̍la̍ŋ, yāndi̍i̍ Mɛ̄lɛ̄ka̍, ya̍ŋ ni᷅la̍ŋ mā tūēī pīɛ̄īlē ya̍ bu̍ɛ̍ī nūmndo̍, ndu̍yɛ̍ a̍ pīɛ̄īlē bu̍ɛ̍i̍yāā nūmnda̍, a̍ nɔ̍ sīōōŋīī nūmnde̍ ndu̍yɛ̍ ma̍ nɔ̄ bɛ̄ɛ̄le̍ŋ le̍ nūm nda̍. To̍sa̍ a̍ sa̍bū mī māsā bɛ̍ndōo̍ le̍ lɛ̄ŋnde̍ŋ nde᷅ŋ kpo̍u̍ mbō chē ya̍ nyīnā pāa̍le̍ hāūle̍ŋ nde᷅ŋ. Sūɛ̍i̍ ya̍ I̍ cho̍ lākɔ̄ ndu̍ nyūnā le̍ ndi̍ ve̍, yāndi̍i̍ to̍sa̍ mbō mūlu̍l la̍ dīōm kɛ̄ndɛ̄.” A̍ te̍le̍ŋ ko̍ŋ yɛ̄, ya̍ wa̍ wāna̍ ndu̍ o̍o̍ ta̍lāl ma̍sā bɛ̍ndōo̍ mūɛ̄īya̍ŋ ndo̍ ni̍.