Nāhu᷅m 1 - Yāu̍ Mɛ̄lɛ̄ka̍a̍

¹ Yōōŋgū Mɛ̄lɛ̄ka̍ ke̍ Nāhu᷅m, wānā wa̍ā Ɛ̄li̍kɔ̍ɔ̍sī chi̍e̍e̍ o̍ yi̍lāŋndo̍ ni᷄ŋ a̍ Ni̍ni̍vɛ̄ɛ̄ o̍kɔ̄ɔ̄ wo̍.

Mɛ̄lɛ̄ka̍ Ya̍a̍wɛ̄ɛ̄ dɔ̍ɔ̍nu᷄ŋ tu̍mbe̍ a̍ wāŋnda̍ Ni̍ni̍vɛ̄ɛ̄

² Mɛ̄lɛ̄ka̍ Ya̍a̍wɛ̄ɛ̄ pāŋālāa̍ pīla̍, o̍ chɛ᷅l mī wānā so̍o̍lu̍u̍ nyɛ̄ o̍ nyɛ̄ chēle̍ŋ te̍ mɛ̄ɛ̍ ndu̍. Wānāa̍ si̍mūl ndu̍ wa̍, mbō tūsi̍ nda̍ nyɛ̄ pālāa̍ chōo̍. Tē ō dɔ̄ɔ̄nu᷄ŋ tu̍mbe̍ pɛ̍, nyɛ̄ pālāa̍ o̍ tu̍sī nda̍ chōo̍ le̍ nyɛ̄ nda̍ tōsa̍ wo̍ ni̍.

³ Mɛ̄lɛ̄ka̍ Ya̍a̍wɛ̄ɛ̄ cho̍ wa᷅na̍ dɔ̍ɔ̍nu᷄ŋ tu̍mbe̍ chɔ̍ chɔ̍ le̍. Kɛ̍ ndu̍yɛ̍, wāna̍ kpāāyā bɛ̍ndōo̍ o̍ cho̍ ni̍. Wānāa̍ to̍sā sɔ̍ɔ̍ŋ wɔ̍ɔ̍ŋndo̍ŋ nda̍, nyɛ̄ pālāa̍ o̍ tu̍sī nda̍ chōo̍ ni̍. Tē ō wa̍ kɔ̄la̍ŋ pɛ̍, hūēīyīī kālɛ̄i̍ su̍ŋgū hɔ᷅ŋndo̍ ve̍, pēlūŋ ndɔ̄ɔ̍ŋ chu̍ndo̍o̍ chūa̍a̍ mbō kūmbū kpu̍.

⁴ Ō dīmu̍l pɛ̍ pe̍ē bɛ̍ndōo̍ āā, “Ve̍la̍, ō vēla̍ sɛ̍ɛ̍ŋ.” Mbō vēēli̍a̍a̍ pēēla̍ bɛ̄ndūla̍ŋ. O̍ ko̍ŋ kɔ̍ɔ̍lī, mbō vēēsi̍a̍a̍ yōndōo̍ o̍ tāndā Ba̍sīāŋndo̍ ni᷄ŋ, a̍ Pēmbīī Ka̍mɛ̄lve̍. Bīltā lā pe̍e̍ŋge̍la̍ŋ. A̍ nyɛ̄ o̍ nyɛ̄ pūīyāā o̍ Pēmbīī Le̍ba̍nɔ̄ŋnde̍ chōo̍, mī lā vēēsi̍a̍a̍ kpo̍u̍.

⁵ Tē Mɛ̄lɛ̄ka̍ Ya̍a̍wɛ̄ɛ̄ wa̍ kɔ̄la̍ŋ pɛ̍, pēmbūŋ bɛ̄ndo᷄ŋ kpo̍u̍ kɔ̄la̍ŋ a̍ nyīīyāa̍ ndu̍ lāchī, ndu̍yɛ̍ mī pēmbūŋ pɔ̄mbɔ᷄ŋ ŋ̄ tēēŋgīāā. Tē ō fūla̍ pɛ̍, lɛ̄ŋnde̍ŋ nyīīyāa̍, o̍ ko̍ŋ kɔ̍ɔ̍lī, chi̍e̍ēŋndo̍ mbō hīīlu̍ŋ, mī wāŋnda̍ nyīīya̍ a̍ sīōōŋīī bɛ̄ndūe̍i̍.

⁶ Tē ō dɔ̄ɔ̄nu᷄ŋ tu̍mbe̍ pɛ̍, wānā o̍ wānā lo᷅ yo̍o̍mū le̍. Tē ō tūūlu̍ kɔ̄l pɛ̍, wānā o̍ wānā lo᷅ yo̍o̍mū le̍. Kāni̍ fo̍ndōle̍, mɛ̄ɛ̍ yīŋnde̍ŋ lē wā nu̍a̍ā yɛ̍, le̍nde̍ kɔ̄l ndɔ̄ tu̍ūwo̍ chō ni̍. Tē ō tūūlu̍ kɔ̄l pɛ̍, pōūta̍ŋ tɛ̄ɛ̄ndīa̍a̍.

⁷ Mɛ̄lɛ̄ka̍ Ya̍a̍wɛ̄ɛ̄ o̍ cho̍ wānā kɛ̍ndɛ̄. Ō māndā wa̍nāā ndūa̍a̍ o̍ te̍le̍ŋ nyɛ̄ pālāa̍ ni᷄ŋ. Mbō mānda̍ wānāa̍ du̍a̍ū ti̍i̍nda᷄ŋ ndāa̍ o̍ ndu̍ ni̍ŋ nda̍.

⁸ Kɛ̍ ya̍a̍mɔ̍ɔ̍wa̍a̍ ndūa̍a̍ nda̍ nda̍, mɛ̄ɛ̍ mɛ̄ŋmā hūna᷄ŋ mā hu᷅ŋ nu̍a̍ā o̍ lē pīlɛ̍ ni᷄ŋ a̍ kpāāyā bɛ̍ndōo̍ mī mā tɛ̄ɛ̄mbu̍u̍ nyɔ̄ɔ̍ŋ yɛ̍, le̍nde̍ o̍ cho̍ hūnɔ̄ɔ̄ chīī a̍ nda̍ ni̍. Ō chō nda̍ yɔ̄ŋ chi̍e̍e̍ pīɔ̍m.

⁹ Nya̍ cho̍ ha̍ā Mɛ̄lɛ̄ka̍ Ya̍a̍wɛ̄ɛ̄ de̍fo̍o̍ yīīlūllo̍ wa̍, ō chō hūnɔ̄ɔ̄ chīī a̍ nya̍ le̍ pi᷅lɛ̍ kpe̍, ō pe̍i̍ ni̍ŋ di̍i̍ŋ ndɔ̄ɔ̍ le̍.

¹⁰ Kāni̍ fo̍ndōle̍, mɛ̄ɛ̍ yɔ̄ɔ̍ŋ ŋ̄ wā nu̍a̍ā ŋ̄ sāāmba᷅ŋ yɛ̍, le̍nde̍ wāŋnda̍ ha̍ā ā chō wā ni̍. Mɛ̄ɛ̍ wāŋnda̍ ā kōl nu̍a̍ā mūɛ̄īya̍ŋ mi̍ mā bīī nda̍ yɛ̍, le̍nde̍ nda̍ wā ni̍ŋ ni̍. Ā chō hūnɔ̄ɔ̄ wā ā tɛ̄ɛ̄mbāā mɛ̄ɛ̍ yīŋnde̍ŋ lē lūām nu̍a̍ā bīl vēsɛ̍i̍yo̍ yɛ̍.

¹¹ Wānā cho̍ nya̍ tɛ̄ɛ̄ŋ, nya̍ wāŋnda̍ Ni̍ni̍vɛ̄ɛ̄, mbo̍ nɔ̄ tūūlā wɔ̄ɔ̍ŋnda̍ŋ, mbo̍ yīī Mɛ̄lɛ̄ka̍ Ya̍a̍wɛ̄ɛ̍ de̍fe̍ wɔ̍ɔ̍ŋndo̍.

¹² Nya̍ wāŋnda̍ Chu̍dā, nyɛ̄ Mɛ̄lɛ̄ka̍ Ya̍a̍wɛ̄ɛ̄ di̍mi̍ wo̍ cho̍ ho̍ō ni̍, Ō dīmi̍ āā, “Mi̍ chē bɛ̍ɛ̍ mi̍ wāŋnda̍ Āsi̍i̍līāā a̍ nɔ᷅ kpāāyāa̍ ta̍u̍, ndu̍yɛ̍ mi̍ chē bɛ̍ɛ̍ ma̍ wā ku̍ndā bɛ̄ndōo̍, kɛ̍ ā chō hūnɔ̄ɔ̄ nda̍ tɛ̄ɛ̄mbūū mī chi̍i̍ a̍ nda̍. Mi̍ chē bɛ̍ɛ̍ mi̍ tu̍sī nya̍ nyɛ̄ pālāa̍ chōo̍ pa̍a̍ndū ni̍, kɛ̍ I̍ cho̍ lɛ̍ nya̍ nyɛ̄ pālāā tūsī chōo̍ le̍.

¹³ Kɛ̍ bōōnde̍i̍ he̍ī ni᷅ŋ I̍ cho̍ kpɛ̍ɛ̍la̍ nda̍ a̍a̍ be̍ŋi̍ nya̍ la̍ŋ yīmī, mī ki̍li̍ yɔ̄lɔ᷄ŋ nda̍ a̍a̍ ba̍i̍yi̍a̍a̍ nya̍ wo̍ŋ.”

¹⁴ Sāwa̍ Mɛ̄lɛ̄ka̍ Ya̍a̍wɛ̄ɛ̄ dɔ̄ū a̍ nya̍ wāŋnda̍ Āsi̍i̍līāā o̍kɔ̄ɔ̄ wo̍ cho̍ ho̍ō ni̍, ō dīmi̍ āā, “Wānā o̍ wānā lo᷅ ni̍ŋ o̍ pūlāle̍ nyāle̍ŋ chōo̍ o̍ to̍sā mī dīōlā nyāla̍ŋ lā hīōū lāchī a̍ wāa̍ le̍. Nyɛ̄m nya̍ tōōsi̍a̍a̍ mi̍ lā chūā mu̍ŋ māā mɛ̄lɛ̄ka̍a̍ nyā, mi̍ ŋ̄ wā o̍ chīɛ̄īlā nyā la̍ŋ ni᷄ŋ ndo̍ŋ, I̍ cho̍ mu̍ŋ tɛ̄ɛ̄mbūū. I̍ cho̍ sɛ̄īyo̍ tōūwɔ̄ɔ̄ le̍ nya̍ hūnɔ̄ɔ̍ chɔ̄ɔ̍ lēni᷄ŋ. Kāni̍ fo̍ndōle̍, lā chō wānāā dɛ̍nɛ̍ wɔ̍ɔ̍ŋāā bɛ̄ndū.”

¹⁵ Wāŋnda̍ Chu̍dā, lā tōfa̍ wɔ̍ o̍ pēmbēi̍ chōo̍, ki̍i̍la̍nɔ̍ɔ̍ chō hūnɔ̄ɔ̍ a̍ yōōŋgū kɛ̄ndɔ̄ɔ̍. O̍ chō hūnɔ̄ɔ̄ a̍ yōōŋgōo̍ āā, “Wāŋnda̍ Āse̍e̍līāā a̍ sɔ̍la̍ yōmɔ̄ɔ̍.” Le̍la̍ŋ wāŋnda̍ Chu̍dā, lā bīi̍ bɔ᷅ŋa᷅ŋndā nya̍ bīī le̍ Mɛ̄lɛ̄ka̍ sōōlūūwo̍, a̍ dīo̍la̍ŋ nda̍ŋ. Lā pēēlu̍ būŋgɛ̄ī nya̍ chūe̍l Mɛ̄lɛ̄ka̍ īkālā ka̍lā ve̍. Kāni̍ fo̍ndōle̍, Āse̍e̍līāāŋāā yɔ̄ŋ wɔ̄ɔ̍ŋnda̍ ha̍ā, ā de᷅l lɛ̍ nya̍ chōo̍ ō lɛ̄ŋndē nyāle̍ŋ ni᷅ŋ fɛ̍ɛ̍ŋ fɛ̍ɛ̍ŋ te̍. Nda̍ kpo̍u̍ ā tɛ̄ɛ̄mbāā nda̍ chō ni᷅ŋ ni̍.