Ma̍kāl 1 - Yāu̍ Mɛ̄lɛ̄ka̍a̍

¹ Bōōndi̍i̍ Cho̍tām, a̍ E̍ha̍a̍sī, a̍ Hɛ̄sɛ̄ki̍yā, a̍ wa̍ Māsāā Bɛ̍ndūa̍a̍ le̍ lɛ̄ŋnde̍ Chu̍dāle̍ŋ a̍ te̍le̍ŋnda̍ yɛ̍ yɛ̍la̍ŋ nde̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ Ma̍kāl, wānā wa̍ā Mōlu̍ɛ̍si̍ɛ̍tī chi̍e̍e̍ chu̍a̍. Mbo̍ chɔ̄m ya̍ sɔ̄ɔ̍ŋ mu᷅ŋ o̍ yi̍lāŋndo̍ ni᷄ŋ, a̍ Sāme̍e̍līāā ndu̍yɛ̍ a̍ Chūlu̍sɛ̄lɛ̄m o̍kɔ̄ɔ̄.

Ma̍kāl cha̍ŋ le̍ mɛ̄ɛ̍ Mɛ̄lɛ̄ka̍ tɛ̄ɛ̄mbūū ni̍ŋ Sāme̍e̍līāā a̍ Chūlu̍sɛ̄lɛ̄m yɛ̍

² Nya̍ ŋ̄wāŋndā chīe̍e̍ kpo̍u̍, lā ya᷄ŋ ya̍ nīla̍ŋ. Nya̍ nyɛ̄ o̍ nyɛ̄ cho̍ o̍ chi̍e̍ēŋndo̍ ni᷄ŋ, lā tūe̍i̍ nyɛ᷅ ya̍ I̍ cho̍ dīmīo̍o̍ wo̍. Mɛ̄lɛ̄ka̍ Kpu̍lu̍ŋgūma̍ Bɛ̄ndōo̍ ō chō nya̍ hūnɔ̄ɔ̄ se̍īle̍ŋ tɛ̄ndāl a̍ nyɛ̄ o̍ nyɛ̄ wɔ̄ɔ̍ŋ nya̍ tōsa̍ o̍kɔ̄ɔ̄. Ndu̍yɛ̍ o̍ chīɛ̄ī ndɔ̄ di̍a̍ndāa̍ ni᷄ŋ he̍ī chō hūnɔ̄ɔ̄ yɔ̄nɔ᷄ŋ ni̍.

³ Lā tōfa̍ wɔ̍, Mɛ̄lɛ̄ka̍ Ya̍a̍wɛ̄ɛ̄ cho̍ chɔ̄nɔ᷄ŋndo̍ o̍ fo̍ndā ndɔ̄ɔ̍ chōo̍ cho̍o̍ mbo̍ wā hūnɔ̄ɔ̍, ō chō hūnɔ̄ɔ̄ mbo̍ wa̍ kɔ̄la̍ŋ o̍ pēmbo᷄ŋ chōo̍.

⁴ Ndu̍yɛ̍ pēmbo᷄ŋ ŋ̄ tēŋgā ni̍ŋ mī ŋ̄ fāŋa̍ŋ ndu̍ lāchī, ndu̍yɛ̍ mi̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̍ɛ̄ŋ lē tɛ̄ɛ̄ndi̍a̍a̍, pēmbo᷄ŋ ŋ̄ tēŋgā ni̍ŋ mɛ̄ɛ̍ ma̍ŋga̍a̍ ō tēŋgā nu̍a̍ā o̍ yīŋ yɛ̍. Lɛ̄ŋndē dɛ̍ŋgbɛ̍le̍ŋ lē chō hūnɔ̄ɔ̄ kīōlū mɛ̄ɛ̍ mɛ̄ŋnda̍ŋ mā wā nu̍a̍ā chɔ̄nɔ᷄ŋndo̍ o̍ pēmbēi̍ chōo̍ mī mā ma᷄l kpōlōŋ kpo̍lo̍ŋndo̍ bɛ̄ndōo̍ o̍ dɛ̍ŋgbɔ̍ɔ̍ ni᷄ŋ yɛ̍.

⁵ Mu᷅ŋ kpo̍u̍, ŋ̄ chō yɔ̄nɔ᷄ŋ le̍ yɔ̄ŋndā wɔ̄ɔ̍ŋndā wāŋnda̍ I̍sɔ̄lūɛ̄ī a̍ to̍sa̍ la̍ŋ, ma̍ lō o̍ ko̍ŋ ma̍ sīmūl Mɛ̄lɛ̄ka̍. Ō nɛ̄ɛ̍nɛ̍ wānā bi̍ī yɛ̍ tɛ̄ɛ̄ le̍ yɔ̄ŋ wɔ̄ɔ̍ŋ wāŋnda̍ I̍sɔ̄lūɛ̄ī a̍ to̍sa̍ wo̍? Ō cho̍ Sāme̍e̍līāā le̍? Ō nɛ̄ɛ̍nɛ̍ wānā bi̍ī yɛ̍ tɛ̄ɛ̄ŋ le̍ yɔ̄ŋ wɔ̄ɔ̍ŋ wāŋnda̍ Chu̍dā a̍ to̍sa̍ wo̍? Ō cho̍ Chūlu̍sɛ̄lɛ̄m te̍?

⁶ Le̍la̍ŋ, Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “I̍ cho̍ Sāme̍e̍līāā tɛ̄ɛ̄mbūū, mbō sīmnu᷄ŋ be̍mbe̍la̍ŋ, nāa̍ wāŋnda̍ tūāl kīle̍pīi̍ya̍ŋ nda̍ŋ, ndu̍yɛ̍ mī pe̍si̍ pōūtā nda̍ sīmi̍ chīɛ̄īla̍ŋ nda̍ŋ mī vi̍o̍ū la̍ŋ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ. I̍ cho̍ chīyūŋ nda̍ sīmi̍ chīɛ̄īla̍ŋ lē chōo̍ wo̍ŋ tɛ̍ɛ̍mbūū kpo̍u̍.

⁷ Nyɛ̄m nda̍ tūūli̍a̍a̍ māā mɛ̄lɛ̄ka̍a̍ nda̍ wo̍ŋ, mi̍ pe̍si̍ mu̍ŋ kpo̍u̍. Nyɛ̄ o̍ nyɛ̄ chēle̍ŋ nda̍ sōōlūū māā mɛ̄lɛ̄ka̍ā ndā, I̍ cho̍ mu̍ŋ lōmɔ̄ɔ̄ kpo̍u̍. Ndu̍yɛ̍ mī to̍sa̍ mī mɛ̄lɛ̄ka̍a̍ ndāa̍ nda̍ tōōsi̍a̍a̍ ka̍ŋ a̍ lābā wa̍ a̍ si̍mnu᷄ŋ nyɛ᷅ tāmbɛ̍i̍. Ā bīī ma̍ wā nyɛ̄m chēle̍ŋndo̍ŋ sōōlūūwo̍, ndu̍yɛ̍ mā pīsī nyɛ᷅m sɔ̄la᷄ŋ le̍ mu̍ŋ. Le̍la̍ŋ ya̍a̍mɔ̍ɔ̍wa̍ chō hūnɔ̄ɔ̄ nyɛ̄m mu᷅ŋ chūā kpo̍u̍ mā kūɛ̄nu᷄ŋ a̍ nyɛ̄m o̍ fo̍ndā chēle̍ŋ.”

⁸ Mi̍ Ma̍kāl o̍ hi̍a̍ū lāchī a̍ sūɛ̍i̍ mbo̍ dīmī āā, “Le̍ he̍ī, I̍ cho̍ cha᷄ŋ cha̍ŋ īmɔ̍nɔ̍ɔ̍. I̍ nyɛ̄la̍ŋ sōli᷄ŋ le̍kɔ̍ɔ̍ mī ba̍lu̍ kɔ̄ɔ̍le̍ fo̍ndō, I̍ cho̍ cha᷄ŋ cha̍ŋ īmɔ̍nɔ̍ɔ̍ mɛ̄ɛ̍ tūŋ yōndōo̍ ō chāŋ nu̍a̍ā yɛ̍, I̍ cho̍ kōŋu̍l kpe̍le̍ŋ mɛ̄ɛ̍ hu̍o̍o̍ ō chāŋ nu̍a̍ā yɛ̄.

⁹ Kāni̍ fo̍ndōle̍, yɔ̄ŋūl nda̍ yɔ̄ŋūl ni̍ŋ Sāme̍e̍līāā wo̍ ō nɔ᷅ ni̍ŋ chi̍ɔ̍u̍ le̍. Ndu̍yɛ̍ yɔ̄ŋūl pīlɛ̍ kōŋ kpe̍ Chu̍dā sɔ̍lā ni̍ŋ ni̍. Dɛ̍nɛ̍ pa̍lāa̍ ō fūūlūū ni̍ŋ di̍, o̍ dīōlā sāāsāa̍ Chūlu̍sɛ̄lɛ̄m nāa̍ wānāā nīa̍a̍ ā chō īchāli̍ wa̍.”

A̍ mɛ̄ɛ̍ ya̍a̍mɔ̍ɔ̍wa̍ ā chīŋa̍la᷅ŋ ni̍ŋ Chūlu̍sɛ̄lɛ̄m yɛ̍ o̍kɔ̄ɔ̄

¹⁰ Mi̍ Ma̍kāl hi̍a̍ū lāchī a̍ sūɛ̍i̍ mbo̍ dīmī āā, “Ya̍a̍mɔ̍ɔ̍wa̍ chō na̍a̍ wāŋnda̍ Chu̍dā chīŋa̍la᷅ŋ mā yēm na̍a̍. Kɛ̍ ndu̍yɛ̍, lā di̍mūl ya̍a̍mɔ̍ɔ̍wa̍a̍ nāa̍ Ka̍tī a̍ ndi̍ o̍kɔ̄ɔ̄ le̍. Lā cha᷅ŋ kpo̍so̍ŋ te̍. Wāŋnda̍ Bɛ̄tīli̍a̍fi̍lūā, lā hīni̍ lɛ᷅ŋ mī lā pīmbu̍l o̍ chu̍ndo̍o̍ ni᷄ŋ le̍ kɔ̄l nyā ta̍mbɛ̍i̍yo̍ chūmndo̍.

¹¹ Nya̍ wāŋnda̍ Si̍a̍fīɛ̄ɛ̄, ya̍a̍mɔ̍ɔ̍wa̍ ā chō lākɔ̄ a̍ nya̍ o̍ bīyɔ̄ɔ̍ ni᷄ŋ, ā chō lākɔ̄ a̍ nya̍ kɔ̍ɔ̍le̍ fo̍ndō, mī si̍ɔ̍mbu̍la̍ŋ lā bīī nya̍. Nya̍ wāŋnda̍ Sa̍a̍nāŋ, lā ma᷅l chi̍e̍e̍ nyāa̍ mī lā fūla̍ le̍. Tē lā tūēī wāŋnda̍ Bɛ̍ti̍sɛ̄ɛ̄ cha᷄ŋnda̍ŋ pɛ̍, ko̍ŋ chɔ᷅m nya̍ ni̍ māā nāa̍ vi̍a̍ŋna᷄ŋ a̍ cho̍ lo̍ŋ le̍ nya̍ le̍.

¹² Wāŋnda̍ Ma̍lɔ̍tī chi̍e̍e̍ a̍ cho̍ chūmndo̍ kpe̍e̍kpe̍i̍ le̍ mālāa̍ sɔ̄lāa̍, kāni̍ fo̍ndōle̍ Mɛ̄lɛ̄ka̍ Ya̍a̍wɛ̄ɛ̄ o̍ hi᷅ŋ Chūlu̍sɛ̄lɛ̄m dɛ̍nɛ̍ pa̍lāa̍ tūsī chōo̍.

¹³ Nya̍ cho̍ īchāli̍ La̍ki̍sī chi̍e̍e̍ wa̍, lā bāāyi̍a̍a̍ su̍a̍ā nyɛ̄lā nyāāna᷄ŋnda̍ su̍a̍a̍ ā nāŋnda̍ŋ mī lā nyāānu̍ŋ. Nya̍ wāŋnda̍ Chūlu̍sɛ̄lɛ̄m ā tōl kɔ̄ɔ̄lī ni̍ ma̍ wā yɔ̄ŋndā wɔ̄ɔ̍ŋnda̍ŋ tōsāa̍. Kāni̍ fo̍ndōle̍, yɔ̄ŋndā wɔ̄ɔ̍ŋnda̍ nya̍ chō tōsāa̍ la̍ŋ, la̍ŋ ko̍ni̍ wāŋnda̍ I̍sɔ̄lūɛ̄ī a̍ cho̍ tōsāa̍ ni̍.

¹⁴ Nya̍ wāŋnda̍ Chu̍dā, lā chōŋgu̍ŋ wāŋnda̍ Mōlu̍ɛ̍si̍ɛ̍tī Ka̍tī chi̍e̍e̍ a̍ nyɛ̄m nyāa̍ŋ. Kāni̍ fo̍ndōle̍, ya̍a̍mɔ̍ɔ̍wa̍ ā chō hūnɔ̄ɔ̄ chi̍o̍o̍ ho̍ō bīyɔ̄ɔ̄. Māsāā bɛ̍ndūa̍a̍ I̍sɔ̄lūɛ̄ī, a̍ sɔ̍lā ni̍ŋ ma̍lā o̍ mālā wāŋnda̍ A̍ki̍si̍bī chi̍e̍e̍ o̍ bā le̍, ā chō nda̍ hūī.

¹⁵ “Nya̍ wāŋnda̍ Mālu̍ɛ̍sīāā chi̍e̍e̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ nya̍ mālɔ̄ɔ̄ ya̍a̍mɔ̍ɔ̍wa̍ o̍ bā mā yēm nya̍. Wāŋ bɛ̄ndūa̍a̍ I̍sɔ̄lūɛ̄ī a̍ cho̍ nyāānɔ᷄ŋ mā kɔ̍ vi̍o̍ŋnu᷄ŋ o̍ būūlōo̍ ni᷄ŋ A̍du̍lām.

¹⁶ Wāŋnda̍ Chu̍dā, lā sēndi̍ yu̍ŋgu̍lta̍ŋ, mī lā cha᷄ŋ le̍ chūāūwāā nyāa̍ nya̍ kāāla̍ wa̍. Lā sēndi̍ mī bōlle̍ yɔ̄nu̍ŋ nya̍ mɛ̄ɛ̍ yi̍bɛ̍i̍ya̍ ā chō nu̍a̍ā yɛ̍, kāni̍ fo̍ndōle̍ ya̍a̍mɔ̍ɔ̍wa̍ chō hūnɔ̄ɔ̄ chūāūwāā nyāa̍ sōlī nya̍ o̍ lābā, mā kūɛ̄ a̍ nda̍ o̍ bīyɔ̄ɔ̍ ni᷄ŋ.”