Lu̍fū 1 - Yāu̍ Mɛ̄lɛ̄ka̍a̍

Nyɛ̍ yɔ̍nu̍ŋ Nāo̍mī o̍ lɛ̄ŋndē Mo̍wa̍bīle̍ŋ ndo̍

^1-2 A̍ bōōndi̍i̍ Wānāa̍ Kɔ̍ɔ̍sā a̍ wāŋnda̍ wa̍ ā wa̍ sīndɛ̄ lāmāsā I̍sɔ̄lūɛ̄ī ye̍ mi̍ yīmā bɛ̄ndūa̍ŋ mā dēl I̍sɔ̄lūɛ̄ī kpo̍u̍. Po̍ pi᷅lɛ̍ wa̍ Bɛ̍ti̍lɛ̍hɛ̄m, o̍ lɛ̄ŋndē Chu̍dāle̍ŋ ni᷄ŋ dīōla̍ŋ, āā Ɛ̄līmɛ̍lɛ̍kī. La̍a̍ ndɔ̍ dīōla̍ŋ āā Nāo̍mī. Nda̍ a̍a̍ nɔ̍ pūa̍a̍ ā ŋīɔ̍ɔ̍ŋ. Ō pīlɔ̍ɔ̍ dīōla̍ŋ āā, Ma̍a̍lɔ̄ŋ, ō pīlɔ̍ɔ̍ āā, Chi̍līɔ̄ŋ. O̍ kāa̍le̍ E̍fi̍lu̍a̍tīle̍ŋ chōo̍ wāŋnda̍ ha̍ā nda̍ a̍a̍ fu̍la̍ ni̍. Mɛ̄ɛ̍ yīa̍a̍ŋ ma᷅ŋ mā de᷄l, mbo̍ chūā la̍a̍ ndɔ̍ a̍ pūa̍a̍ ndūāā ŋi̍ɔ̍ɔ̍ŋnda̍ ma̍ kūā o̍ lɛ̄ŋndē Mo̍wa̍bīle̍ŋ ni᷄ŋ, le̍ mī nda̍ a̍a̍ kɔ̍ cha᷅l lo̍ŋ le̍ te̍le̍ŋ ti̍ŋ.

³ Kɛ̍ o̍ ko̍ŋ kɔ̍ɔ̍lī, mi̍ Ɛ̄līmɛ̍lɛ̍kī o̍ wu᷅. Mi̍ Nāo̍mī lo᷅ ni᷅ŋ nda̍ pūa̍a̍ ndūāā ŋi̍ɔ̍ɔ̍ŋnda̍.

⁴ Mi̍ pūa̍a̍ ŋi̍ɔ̍ɔ̍ŋnda̍ ha̍ā ā chūā wāŋ lāāndūāā Mo̍wa̍bī wa̍ o̍ nɔ̄la̍ŋ ni᷄ŋ. Chūa̍a̍ pīlɔ̍ɔ̍ dīōla̍ŋ āā, Ɔ̍pāā, ō pīlɔ̍ɔ̍ āā, Lu̍fū. O̍ ko̍ŋ kɔ̍ɔ̍lī, mɛ̄ɛ̍ wɔ̄sīlā tɔ̍ la̍ hi̍o̍ū,

⁵ mi̍ Ma̍a̍lɔ̄ŋ nda̍ Chi̍līɔ̄ŋ a̍ wu̍ŋnu᷄ŋ vɛ̍lɛ̄. Mi̍ Nāo̍mī lo᷅ ni̍ko̍ ndu̍ pīlɛ̍, ndu̍ o̍o̍ nɔ̍ lɛ̍ pɔ̍nɔ̍ le̍, ndu̍ o̍o̍ nɔ̍ po̍ le̍.

Nāo̍mī mi̍i̍ŋgu̍ Bɛ̍ti̍lɛ̍hɛ̄m nda̍ Lu̍fū

⁶ Mɛ̄ɛ̍ te̍le̍ŋ ti̍ŋ ō hīōū, mi̍ Nāo̍mī tu̍ɛ̍ī o̍ lɛ̄ŋndē Mo̍wa̍bīle̍ŋ ni᷄ŋ māā Mɛ̄lɛ̄ka̍ Ya̍a̍wɛ̄ɛ̄ o̍ ma̍la̍ wāŋnda̍ I̍sɔ̄lūɛ̄ī, mbo̍ nɛ̄ŋī tɔ̄lɔ̄ɔ̄lā ndāla̍ŋ o̍ chīɔ̄ɔ̄ŋ ndāa̍ŋ ni᷄ŋ ma̍ sɔ̄lā nyɛ̄ dīa̍a̍ ta̍u̍. O̍ ko̍ŋ, mi̍ Nāo̍mī nda̍ lāāndāā pūa̍a̍ ndūa̍a̍ ā mɛ̄i̍ ya̍ ā bɛ̄ɛ̄ndīa̍ŋ le̍ mīīŋgōo̍ Bɛ̍ti̍lɛ̍hɛ̄m.

⁷ Mbo̍ māl nāa̍ o̍ wa̍ īchāli̍ wa̍ ma̍ kāndū kɔ̄la̍ŋ o̍ lɛ̄ŋndē Chu̍dāle̍ŋ ni᷄ŋ nda̍ nda̍ā. Kɛ̍ kɔ̄la̍ŋ ti᷄ŋ si̍ī,

⁸ mi̍ Nāo̍mī di̍mūl nda̍ āā, “Lā mīīŋgu̍ o̍ lā nya̍ lo̍ nāa̍ kālāa̍ nyāa̍ chūā. Dɛ̍nɛ̍ kɛ̍ndɛ̄ nya̍ tōsa̍l la̍ a̍ wānāā nīa̍a̍ vi᷅ wa̍ wo̍, mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍ nya̍ sa̍lā fɔ̍.

⁹ Mbɔ̄ Mɛ̄lɛ̄ka̍ Ya̍a̍wɛ̄ɛ̄ ō tōsa̍ a̍ sa̍bū mī lā sɔ̄la̍ pīāāndūāā chēle̍ŋ, mi̍ wānā o̍ wānā o̍ sɔ̍la̍ nāa̍ cha̍lāa̍ a̍ ndūa̍a̍ fɔ̍.” O̍ ko̍ŋ kɔ̍ɔ̍lī, mbo̍ kɔ̄ma᷄ŋ nda̍ vēllāa̍ vēllē, mbo̍ chōŋgu̍ŋ nda̍. Kɛ̍ ma̍ kāndū cha᷄ŋndo̍.

¹⁰ Ma̍ dīmūl ndu̍ āā, “Ŋ̄ cho̍ mi̍i̍ŋgū le̍. Ŋ̄ chō lākɔ̄ nu̍m kɔ̄ɔ̄lī o̍ wānāā nūmnda̍ lo̍.”

¹¹ Mi̍ Nāo̍mī mu̍lūl nda̍ āā, “Lā mīīŋgu̍ chūāūwāā nīa̍a̍. Le̍ yɛ̄ɛ̍nɛ̍ nya̍ yēēma̍ yɛ̄ mī lā kūɛ̄ ya̍ kɔ̄ɔ̄lī? I̍ hi̍o̍ū ni᷅ŋ bōōndi̍i̍ vi̍a̍lāā le̍ mī ve̍lū vɛ̄lɛ̄ pūa̍a̍ che᷅le̍ŋ mā su᷄l mī lā hu᷄ŋ cha᷅l nya̍ nda̍ā o̍ nɔ̄la̍ŋ ni᷄ŋ.

¹² Le̍la̍ŋ lā mīīŋgu̍ chūāūwāā nīa̍a̍, I̍ hi̍o̍ū ni᷅ŋ bōōndi̍i̍ ya̍ I̍ chu̍ā pɔ̍nɔ̍ che᷅le̍ŋ. Kɛ̍ mī ya̍ i̍i̍ hi̍u̍ wɔ̍ bɛ̍ɛ̍ bo̍o̍ndi̍i̍ chu̍a̍ā pɔ̍nɔ̍ le̍, ā yɔ᷄ŋ bɛ̍ɛ̍ mī chu̍a̍ pɔ̍nɔ̍ɔ̍ chūɛ̄llɛ̄ŋ, mī chu̍a̍ chūɛ̄llɛ̄ŋ yo᷄llo̍ mī ve̍lū pūa̍a̍ ā ŋīɔ̍ɔ̍ŋ,

¹³ bāā lā nɔ̄lā mī lā chu᷄m nda̍ mā su᷄l mī lā hu᷄ŋ cha᷅l nya̍ nda̍ā o̍ nɔ̄la̍ŋ ni᷄ŋ? Lā nɔ̄lā ni̍ŋ pa̍ mī lā cha᷄l nda̍ chūm lā chu̍ē pi̍a̍a̍ndūāā chēle̍ŋ te̍? Sāko̍ chūāūwāā nīāā, ke̍ŋ i̍ yɔ̍nūŋ te̍. Nyɛ̄ pālāa̍ cho̍ ya̍ chōo̍ wo̍ ō chō ō bɔ̍ɔ̍, kāni̍ fu̍u̍le̍ Mɛ̄lɛ̄ka̍ Ya̍a̍wɛ̄ɛ̄ o̍ mu̍lu̍l la̍ kɔ̄ɔ̍. Le̍la̍ŋ I̍ ye̍e̍ma̍ nya̍ mī lā wa̍ lēbɛ̄ŋgu̍ le̍.”

¹⁴ O̍ ko̍ŋ, ma̍ kāndū vɛ̄lɛ̄ cha᷄ŋndo̍. Mi̍ Ɔ̍pāā kɔ̍ma᷄ŋ Nāo̍mī mbo̍ chōŋgu᷄ŋ ndu̍, mbo̍ mīīŋgu᷄ŋ chi̍e̍e̍. Kɛ̍, mi̍ Lu̍fū ndu̍ ba̍a̍mba᷄ŋ ndu̍.

¹⁵ Mi̍ Nāo̍mī di̍mūl Lu̍fū āā, “Lu̍fū, chāa̍ŋ nūm cho̍ mīīŋgɔ᷄ŋndo̍ o̍ wānāā ndūa̍a̍ lo̍ a̍ o̍ Mɛ̄lɛ̄ka̍ ndɔ̄ɔ̍ lo̍. Lā mīīŋgu̍ nya̍ ndu̍ la̍tu̍lu̍.”

¹⁶ Kɛ̍, mi̍ Lu̍fū di̍mūl ndu̍ āā, “Nyɔ̍ɔ̍lū ya̍ le̍, I̍ cho̍ mi̍i̍ŋgu̍ le̍. Na̍a̍ nu᷄m cho̍ lākɔ̄ ni̍. Bā o̍ bā ŋ̄ kɔ̍, I̍ cho̍ nu̍m lākɔ̄ kɔ̄ɔ̄lī. Nāa̍ ŋ̄ chō wā wa̍, lo̍ŋ ya̍ bɛ̍ɛ̍ ya̍ I̍ cho̍ wā ni̍. Wānāā nūmnda̍ cho̍ wā wānāā nīa̍a̍ ni̍. Ndu̍yɛ̍ Mɛ̄lɛ̄ka̍ ŋ̄ pīɛ̄īyo̍, Mɛ̄lɛ̄ka̍ kōŋ ya̍ I̍ cho̍ wā pīɛ̄īyo̍ ni̍.

¹⁷ Nāa̍ ŋ̄ cho̍ wu̍ mā chɔ̍ nu̍m nda̍, lo̍ŋ ya̍ bɛ̍ɛ̍ ya̍ I̍ cho̍ wu̍ ni̍ mā chɔ̍ ya̍ lo̍ŋ. Mɛ̄ɛ̍ pīɔ̍mndo̍ mbō pīɔ̍u̍ na̍a̍ tɛ̄ɛ̄ŋ na̍a̍ nūm. Kɛ̍ tē I̍ chɛ᷅l pɛ̍ mī nyɛ̄ o̍ nyɛ̄ chēle̍ŋ ō pīɔ̍u̍ na̍a̍ tɛ̄ɛ̄ŋ, Mɛ̄lɛ̄ka̍ Ya̍a̍wɛ̄ɛ̄ o̍ tu̍si̍ ya̍ nyɛ̄ pālāā bɛ̄ndōo̍ chōo̍.”

¹⁸ Mɛ̄ɛ̍ Nāo̍mī che᷅ māā Lu̍fū chi̍i̍ kɛ̄ɛ̄sīa̍ŋ o̍ kɔ̄l ndɔ̄ɔ̍ ni᷄ŋ le̍ mā kūɛ̄ nda̍ ndu̍, ndu̍ bɛ̍ɛ̍ ō sūu̍ lɛ̍ le̍.

¹⁹ Ma̍ kūā nda̍ ndu̍ la̍tu̍lu̍ ma̍ fūūlūū Bɛ̍ti̍lɛ̍hɛ̄m. Mɛ̄ɛ̍ nda̍ fūūlu̍u̍, mi̍ tɔ̍ɔ̍ tīū kpo̍u̍ māā Nāo̍mī hi᷅ŋ. Mi̍ wāŋ lāāndūa̍a̍ ā wā nyūūni̍āŋndo̍ āā, “Lēkɛ̍ndɛ̍ī Nāo̍mī cho̍ ho̍ō ni̍?”

²⁰ Mi̍ Nāo̍mī di̍mūl nda̍ āā, “Lā ve̍e̍lū ya̍ āā, Nāo̍mī, wāna̍ kɔ̄l kɛ̄ndɔ̄ɔ̍ le̍. Lā vēēlu̍ ya̍ āā Ma̍a̍lūāā, wāna̍ kɔ̄l tāmbɛ̍i̍yo̍. Kāni̍ fu̍u̍le̍, Mɛ̄lɛ̄ka̍ nɔ̍ kpāāyāa̍ kpo̍u̍ wa̍ ō ke̍ ya̍ kɔ̄l tāmbɛ̍i̍ bɛ̄ndōo̍.

²¹ Bōōndi̍i̍ ya̍ I̍ wa̍ ma̍lɔ̄ɔ̍ na̍nu᷄ŋ nde̍, I̍ wa̍ a̍ bāla̍ŋ lā pīāā. Kɛ̍, Mɛ̄lɛ̄ka̍ Ya̍a̍wɛ̄ɛ̄ o̍ mi̍ŋgi̍ ya̍ na̍nu᷄ŋ ba̍lā fo̍ndō. Le̍la̍ŋ, lā ve̍e̍lu̍ lɛ̄ ya̍ āā, Nāo̍mī le̍. Kāni̍ fu̍u̍le̍, Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ō kpōōsa̍ ya̍.”

²² Mɛ̄ɛ̍ nu̍a̍ā Nāo̍mī, nda̍ Lu̍fū, la̍nɔ̍ Mo̍wa̍bīnɔ̄ po᷄ ndɔ̄ɔ̍ ō mɛ̄i̍ yo̍ ā lōōku̍ chɔ̄nɔ᷄ŋ o̍ lɛ̄ŋndē Mo̍wa̍bīle̍ŋ ni᷄ŋ ni̍ ma̍ mīīŋgū Bɛ̍ti̍lɛ̍hɛ̄m. Ndu̍yɛ̍, a̍ te̍le̍ŋ wāŋnda̍ kāndū ba̍a̍līi̍yo̍ŋ kīōlɔ̄ɔ̍ o̍ chīɔ̍ɔ̍ŋ ni᷄ŋ ndo̍ ki̍nɛ̍i̍ nda̍ fūūlu̍u̍ Bɛ̍ti̍lɛ̍hɛ̄m ni̍.