Cha᷄ŋ Īmɔ̍nɛ̍ Chɛ̄lūīma̍yā Wo̍ 1 - Yāu̍ Mɛ̄lɛ̄ka̍a̍

A̍ mɔ̍nɛ̍i̍ Chūlu̍sɛ̄lɛ̄m o̍ bi̍ī ye̍ o̍kɔ̄ɔ̄

¹ Chūlu̍sɛ̄lɛ̄m, chi̍e̍e̍ wa̍ pāāndū ō pīāā a̍ wāŋndā chīe̍e̍ya̍ wo̍, ō lo᷄ pɔ̄m. Chi̍e̍e̍ wa̍ pāāndū chi̍e̍e̍ tɔ̍ɔ̍ bɛ̍ndōo̍ lɛ̄ŋnde̍ tɛ̄ɛ̄ŋ ndo̍, ō sīmnu᷄ŋ mɛ̄ɛ̍ wānā la̍nɔ̍ vi̍i̍kūū ho̍ō pɔ̍nɔ̍ɔ̍ wo̍ ō wā nu̍a̍ā yɛ̍. Chi̍e̍e̍ wa̍ pāāndū māā chūā māsā bɛ̍ndū wo̍ ō sīmnu᷄ŋ chi̍ɔ̍ɔ̍.

² Īchɔ̄l pi̍i̍ pi̍i̍ Chūlu̍sɛ̄lɛ̄m o̍ lɔ̍ɔ̍lū cha̍ŋndo̍. Mɛ̍mi̍a̍ŋ mā līīvi̍a̍a̍ ndu̍ būŋnde̍ yɔ̍ yɔ̍ a̍ cha᷄ŋndo̍. Chāāŋāā ndūa̍a̍ nda̍ a̍a̍ na̍a̍ŋa᷅ŋ pa̍a̍ndū wa̍ kpo̍u̍, ō pīlɛ̍ bɛ̍ɛ̍ o̍ sɔ̍ɔ̍ŋgūū lɛ̍ ndu̍ īkɛ̄i̍ mbō nyɔ̄ɔ̄lu̍ ndu̍ le̍. Wānāā ndūa̍a̍ nda̍ a̍a̍ na̍a̍ŋa᷅ŋ nda̍ kpo̍u̍, ā yīi̍ ndu̍ de̍fo̍o̍, ā sīmnu᷄ŋ ni᷅ŋ hāū ya̍a̍mɔ̍ɔ̍wa̍a̍ ndɔ̄.

³ Ya̍a̍mɔ̍ɔ̍wa̍ ā tūsi̍ lɛ̄ŋndē Chu̍dāle̍ŋ nyɛ̄ pālāā bɛ̄ndōo̍ chōo̍, ndu̍yɛ̍ ma̍ sāāŋgīāā wāŋnda̍, ma̍ kūā a̍ nda̍ o̍ bīyɔ̄ɔ̍ ni᷄ŋ. Wāŋnda̍ Chu̍dā a̍ cho̍ o̍ bīyɔ̄ɔ̍ ni᷄ŋ o̍ lɛ᷅ŋnde̍ ni᷄ŋ, ndu̍yɛ̍ ā sɔ̍lā fo̍ndā o̍ fo̍ndā nda̍ wā mā pɛ̄ŋgi̍ le̍. Ya̍a̍mɔ̍ɔ̍wa̍a̍ ndāa̍ wa̍ nda̍ tōūwɔ̄ɔ̍ le̍ nda̍ bīyɔ̄ɔ̍ wa̍ ā bīī nda̍, ndu̍yɛ̍ ā nɔ̍lā mā hɛ̄lu᷄ŋ nda̍ le̍.

⁴ Nɛ̄īla̍ he̍l Sa̍a̍yɔ̄ŋ chi̍e̍e̍ la̍ŋ kpo̍u̍ lā yīmbū, fo̍ndōle̍ wānā o̍ wānā o̍ ku̍ē lɛ̍ lo̍ŋ o̍ pālɛ̍i̍ ndɛ̄i̍ lābɔ̄ŋa᷅ŋnde̍ chōo̍ le̍. Dīōlā sāāsāla̍ ndɔ̄la̍ŋ kpo̍u̍ lā chō lā tāmbɛ̍i̍. Wānāā ndūāā so̍līāā lāsa̍lāa̍ kpo̍u̍ ā chō kūŋnda̍ŋ a̍ nyɛ̄ nɛ̄īyāa̍. Chūāā lāāndūāā nda̍ a̍a̍ so̍lī cho̍ndo̍ŋ lo̍ŋ nda̍ kpo̍u̍ ā chō cha᷄ŋnda̍ŋ. Chūlu̍sɛ̄lɛ̄m o̍ cho̍ o̍ sāŋgā bɛ̄ndōo̍ ni᷄ŋ.

⁵ Chūlu̍sɛ̄lɛ̄m, ya̍a̍mɔ̍ɔ̍wa̍a̍ ndūa̍a̍ nda̍ si̍mnu᷄ŋ ni᷅ŋ wānāā ndūāā bɛ̍ndūa̍a̍ ni̍. Ndu̍yɛ̍ ya̍a̍mɔ̍ɔ̍wa̍a̍ ndūa̍a̍ ā su᷄l, mi̍ nyɛ̄ o̍ nyɛ̄ wā ō kɛ̄ndɛ̄ a̍ nda̍. Le̍ yɔ̄ŋndā wɔ̄ɔ̍ŋndā Chūlu̍sɛ̄lɛ̄m o̍ to̍sa̍ ki̍nɛ̍i̍ la̍ŋ, nyɛ̄ kōŋ Mɛ̄lɛ̄ka̍ Ya̍a̍wɛ̄ɛ̄ o̍ tu̍si̍ ndu̍ sāŋgāa̍ chōo̍ ni̍. Ya̍a̍mɔ̍ɔ̍wa̍a̍ ndūa̍a̍ ā bīī chūāūwāā ndūa̍a̍ ma̍ kūā a̍ nda̍ o̍ bīyɔ̄ɔ̍ ni᷄ŋ.

⁶ Bɛ̄ɛ̄le̍ bɛ̍ndūlē Sa̍a̍yɔ̄ŋ ndu̍ o̍o̍ nɔ̍ le̍ŋ lē chūū. Wānāā ndūāā bɛ̍ndūa̍a̍ ā sīmnu᷄ŋ mɛ̄ɛ̍ kīa̍la̍a̍ yīa̍a̍ŋ mā wā ha̍ā nɛ̄īyo̍, kɛ̍ ā sɔ̍lā bi᷅l pūīyāā le̍ dīo̍ le̍ wa̍ ā wā nu̍a̍ā yɛ̍. Ā nyāānu̍ŋ ni᷅ŋ ya̍a̍mɔ̍ɔ̍wa̍a̍ ndāa̍ te̍i̍, yōōmūle̍ŋ bɛ̍ɛ̍ ā nɔ̍ lɛ̍ le̍.

⁷ Nyɛ̄ pālāā bɛ̄ndōo̍ ō tōl Chūlu̍sɛ̄lɛ̄m chōo̍, ndu̍yɛ̍ mi̍ kɔ̄l tāmbɛ̍i̍ bɛ̍ndōo̍ ō kōmāl ndu̍, mbo̍ lōōnu̍ŋ a̍ nyɛ̄m ba̍ā kālāŋ ndu̍ o̍o̍ nɔ̍ pāāndū wo̍ŋ. Mɛ̄ɛ̍ o̍ de̍l ya̍a̍mɔ̍ɔ̍wa̍a̍ ndūa̍a̍ o̍ ba᷄, wānā o̍ wānā ve̍ mbō māla̍ ndu̍ le̍. Mi̍ ya̍a̍mɔ̍ɔ̍wa̍a̍ ndūa̍a̍ ā mām ndu̍, ndu̍yɛ̍ ma̍ dūāūnu᷄ŋ nya̍a̍le̍ le̍ dēlɔ̄ɔ̄ o̍ de̍l lo̍.

⁸ Yɔ̄ŋ wɔ̄ɔ̍ŋ Chūlu̍sɛ̄lɛ̄m o̍ to̍sa̍ wo̍ ō chō ō bɔ̄ɔ̍. Le̍ he̍ī, mi̍ Chūlu̍sɛ̄lɛ̄m o̍ si̍mnu᷄ŋ fo̍ndā nɔ̄ɔ̄lɛ̍i̍. Wānāā nda̍ a̍a̍ ke᷅ ndu̍ bɛ̄ɛ̄le̍ŋ pāāndū wa̍ kpo̍u̍, ā chō ni᷅ŋ ndu̍ pɛ̄ɛ̄sāa̍. Kāni̍ fo̍ndōle̍, ō yɔ̄nu̍ŋ nda̍ o̍ hɔ̄l mɛ̄ɛ̍ wāŋndo̍ ō wā nu̍a̍ā tūū fo̍ndō fu̍u̍ yɛ̍. Chūlu̍sɛ̄lɛ̄m o̍ cho̍ kūnda̍ŋ a̍ nyɛ̄ nɛ̄īyāa̍ kpe̍e̍kpe̍i̍. Si̍ɔ̍mbu̍la̍ŋ lā bīī ndu̍ mbo̍ vīāŋ hɔ̄lla̍.

⁹ Sīmnɔ᷄ŋ Chūlu̍sɛ̄lɛ̄m o̍ si̍mnu᷄ŋ o̍ nɔ̍ɔ̍lɛ̍i̍ yo̍, tē wānā a̍a̍ che᷅ dɔ̍ɔ̍ ndu̍ pɛ̍ a̍ si̍na̍ bɛ̍ɛ̍. Kɛ̍ Chūlu̍sɛ̄lɛ̄m o̍ ve̍ yi̍ya᷄ŋ a̍ nyɛ̄ ndɔ̄ pa̍lāa̍ o̍kɔ̄ɔ̄ le̍. Nyɛ̄ ko̍ŋ to̍sa̍ ni̍ mbo̍ dēl dēlɔ̄ɔ̄ wɔ̄ɔ̍ŋ wɔ̄ɔ̍ŋ bɛ̄ndōo̍, wānā o̍ wānā cho̍ mbō nyɔ̄ɔ̄lu̍ ndu̍ le̍. Mbo̍ pīɛ̄ī Mɛ̄lɛ̄ka̍ āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, to̍fa̍ mā chē dɛ̍nɛ̍ pa̍lāa̍ to᷅l la̍ chōo̍ wo̍. Ya̍a̍mɔ̍ɔ̍wa̍a̍ nīa̍a̍ ā yēm ya̍.”

¹⁰ Ya̍a̍mɔ̍ɔ̍wa̍a̍ ndūa̍a̍ ā pūŋga̍ sūltā ndɔ̄la̍ŋ kpo̍u̍ ma̍ kūānu᷄ŋ a̍ la̍ŋ. Ō lo᷄ nda̍ tōfāa̍ ma̍ lūɛ̄ī o̍ fo̍ndā dīāndāa̍ Mɛ̄lɛ̄ka̍a̍, wānāā Mɛ̄lɛ̄ka̍ o̍ kūūna̍ māā ā lu̍ɛ̍ī bɛ̍ɛ̍ wa̍nāā ndūa̍a̍ tɛ̄ɛ̄ŋ te̍ wa̍.

¹¹ Wānāā ndūa̍a̍ ā chō kēlā nyɛ̄ dīa̍a̍ a̍ kūnda̍ŋ. Ā chō wāŋnda̍ nyɛ̄m ndāa̍ŋ kīo̍o̍, le̍ hāli̍kpe̍ŋ mī wānāā kāŋ ā ke᷄ nda̍ nyɛ̄ dīa̍a̍ le̍ mā sɔ̄la̍ yōōmūa̍ŋ. Chūlu̍sɛ̄lɛ̄m o̍ cho̍ cha᷄ŋndo̍ nāa̍ Mɛ̄lɛ̄ka̍ chūā āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, to̍fa̍ mā chē mɛ̄ɛ̍ wāŋnda̍ ā chu̍a̍ ya̍ chɔ̍dɔ̄ yɛ̍.”

¹² Ō chō wānāa̍ cho̍ hīōūwɔ̄ɔ̍ wa̍ dīmūllo̍ āā, “Nya̍ wānāā hīāūwa᷄ŋnda̍ ha̍ā, mɛ̄ɛ̍ sāŋgā ya̍ I̍ cho̍ ho̍ō wo̍ lā chō ndu̍ chɔ̄ le̍? Kāni̍ bɛ̍ɛ̍ nyɛ̄ nɛ̄īyāā wāā nu̍a̍ā ō kōma̍l lɔ̍ wa̍nā o̍ wānā le̍, nyɛ̄ nɛ̄īyāā Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū ya̍ chōo̍, o̍ tu̍mbe̍ bɛ̍ndū o̍ dɔ̍u̍nu᷄ŋ a̍ ya̍ wo̍ ni᷄ŋ ndo̍.

¹³ “Ō yɔ᷄ŋ yīŋnde̍ŋ, chɔ̄nɔ᷄ŋndo̍ o̍ fo̍ndā ndɔ̄ɔ̍ chōo̍ cho̍o̍, mi̍ lē wā ya̍ lūmī lūmīo̍o̍ o̍ pāāla̍ŋ ni᷄ŋ. Ō ye᷄ŋ ya̍ yāŋɔ̄ɔ̄le̍ŋ nāa̍ ya̍ I̍ hi̍a̍ū wa̍, mbo̍ tōsā mi̍ mi̍i̍ŋgū a̍ mākɔ̄ɔ̄. Ō kɛ̄ɛ̍ ya̍, mbo̍ māl la̍, mi̍ wa᷅ o̍ nyɛ̄ nɛ̄īyāa̍ ni᷄ŋ le̍ te̍le̍ŋ o̍ te̍le̍ŋ.

¹⁴ “Ō yīi̍ yɔ̄ŋndā nīla̍ wɔ̍ɔ̍ŋnda̍ŋ kpo̍u̍ bɔ̍ndīi̍yo̍. Ō chūa̍ la̍ŋ kpo̍u̍ mbo̍ hāndū ya̍ la̍ŋ o̍ īkɛ̄su̍, mɛ̄ɛ̍ nda̍ yīī nu̍a̍ā nāūwo̍ yɔ̄mnde̍ o̍ īkɛ̄su̍ le̍ wāa̍ yɛ̍. Ō tōsa̍ yōōmūle̍ŋ bɛ̍ɛ̍ I̍ nɔ̍ lɛ̍ le̍, a̍ kīndīlā la̍ cho̍ ya̍ wo̍. Māsānɔ̄ɔ̍ Mɛ̄lɛ̄ka̍ ō ma᷄l la̍ ya̍a̍mɔ̍ɔ̍wa̍a̍ nīa̍a̍ o̍ bā, ya̍a̍mɔ̍ɔ̍wa̍a̍ ya̍ I̍ nɔ̍lā bɛ̍ɛ̍ mī si̍mu̍l te̍ wa̍.

¹⁵ “Ku̍u̍ba̍a̍ nīa̍a̍ chɔ̄ūwa̍ kpo̍u̍, Māsānɔ̄ɔ̍ Mɛ̄lɛ̄ka̍ ō chūa̍ nda̍ nyɛ̄ fo̍ndō fu̍u̍. Ō chūūŋgi̍a̍a̍ so̍vɛ̄i̍ya̍ nāa̍ pi᷅lɛ̍ le̍ mā hu᷄ŋ tɛ̍ɛ̍mbūū chūāā pīāāndūāā nīa̍a̍ kpo̍u̍. Mɛ̄ɛ̍ nda̍ nīɔ̄ū nīɔ̄ū nu̍a̍ā kīle̍pīi̍ya̍ŋ o̍ fo̍ndā tōōsīāā māmūɛ̄īyo̍ yɛ̍, le̍nde̍ o̍ tɛ̍ɛ̍mbu̍u̍ wānāā nīa̍a̍ ni̍.

¹⁶ “Sɔ̄ɔ̍ŋ mu᷅ŋ to̍sa̍ ni̍ mi̍ cha᷅ŋ, mi̍ mɛ̍mi̍a̍ŋ mā līīvīāā ya̍ būŋnde̍ yɔ̍ yɔ̍. Wānā o̍ wānā o̍ cho̍ ya̍ bɛ̍ɛ̍ ma̍chɛ̍lū mbō nyɔ̄ɔ̄lu̍ ya̍ le̍. Wānā o̍ wānā cho̍ mbō tōsa̍ mī sɔ̍la̍ vɛ̄lɛ̄ yōōmūa̍ŋ te̍. Chūāūwāā nīa̍a̍ ā nɔ̍ lɛ̍ nyɛ̄ o̍ nyɛ̄ nda̍ tīīnda̍ŋ te̍. Kāni̍ fo̍ndōle̍, ya̍a̍mɔ̍ɔ̍wa̍ ā yēm na̍a̍.”

¹⁷ Sa̍a̍yɔ̄ŋ o̍ si̍ɛ̍ndi̍ bāa̍ le̍ wāna̍ ma̍lā ndu̍ wo̍, kɛ̍ wānā bɛ̍ɛ̍. Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ mi̍ lɛ̄ŋīi̍ chi̍ɛ̍ɛ̍li̍āŋ a̍ yu̍ŋgu̍ Che̍kɔ̍pū wo̍ ve̍ ī sīmnu᷄ŋ ya̍a̍mɔ̍ɔ̍wa̍a̍ ndā. Chūlu̍sɛ̄lɛ̄m o̍ si̍mnu᷄ŋ lɛ᷅ŋnde̍ he̍ī tɛ̄ɛ̄ŋ māā yūūlu̍ wa̍ā o̍ sa᷄l chōo̍.

¹⁸ Chūlu̍sɛ̄lɛ̄m o̍ di̍mi̍ āā, “Kɛ̍ Mɛ̍lɛ̄ka̍ Ya̍a̍wɛ̄ɛ̄ o̍ nɔ̍ ya̍ di̍, ya̍ so̍li̍ ndu̍ dīōm ni̍. Wāŋnda̍ kpo̍u̍ lā ya᷄ŋ ya̍ nīla̍ŋ. Lā mɛ̄ɛ̄nda̍ŋ sa᷅ŋga̍ cho̍ ya̍ chōo̍ wo̍. Chūāā nīāā pīāāndūāā a̍ chūāā nīāā la̍a̍ndūa̍a̍ kpo̍u̍ ā chīi̍ lākɔ̄ a̍ nda̍ o̍ bīyɔ̄ɔ̍ ni᷄ŋ.

¹⁹ “I̍ ve̍e̍lu̍ chāāŋāā nīa̍a̍ le̍ mālāa̍, kɛ̍ nda̍ kpo̍u̍ ā hūi̍ ya̍. Wānāā nīāā so̍līāā lāsa̍lāa̍ ni̍, bɛ̄ndūāā chi̍e̍e̍ ya̍ ni̍, ā chō pīɔ̍mnda̍ŋ o̍ bɛ̍ɛ̄la̍ŋ, ā chō bālɔ̄ɔ̍ le̍ nyɛ̄ nda̍ dīā le̍ hāli̍kpe̍ŋ mā sɔ̄la̍ yōōmūa̍ŋ ndo̍.

²⁰ “O̍o̍ Mɛ̄lɛ̄ka̍ Ya̍a̍wɛ̄ɛ̄, mɛ̍ɛ̍nda̍ŋ mā chē nyɛ̄ pālāa̍ cho̍ ya̍ chōo̍ wo̍. Yōōmū nūu̍ ō chō sāŋgāa̍ bɔ̄ɔ̍. Mɔ̍nɛ̍i̍ bɛ̍ndūe̍i̍ ī chō o̍ kɔ̄l nūu̍ ni᷄ŋ, fo̍ndōle̍, le̍ sōlī ya̍ I̍ so̍li̍ nu̍m dīōm ndo̍. O̍ bɛ̍ɛ̄la̍ŋ ni̍, wāŋnda̍ chō yōōmūlā wāŋndā chīe̍e̍ya̍ tɛ̄ɛ̄mbūūwo̍, chīɛ̄īla̍ŋ ni᷄ŋ ni̍, ā chō wāŋnda̍ dīūwo̍.

²¹ “Wānā o̍ wānā o̍ cho̍ ya̍ tūēīyɔ̄ɔ̍ kūŋnda̍ŋ a̍ nyɛ̄ nɛ̄īyāa̍, kɛ̍ wānā o̍ wānā cho̍ mbō māla̍ ya̍ le̍. Ya̍a̍mɔ̍ɔ̍wa̍a̍ nīa̍a̍ kpo̍u̍ ā tūēī a̍ dɛ̍nɛ̍ pa̍lāa̍ to᷅l la̍ chōo̍ wo̍ o̍kɔ̄ɔ̄, nda̍ kpo̍u̍ ā dɔ̄ɔ̍ŋ nya̍a̍le̍ le̍ nyɛ̄ ŋ̄ tōsa̍ a̍ ya̍ wo̍. Kɛ̍ ndu̍yɛ̍ nda̍ bɛ̍ɛ̍, to̍sa̍ mī pāa̍le̍ ŋ̄ dīmi̍ le̍ nda̍ le̍ŋ lē fūūlu̍u̍, o̍ ko̍ŋ nda̍ bɛ̍ɛ̍ mā sīmnu᷄ŋ mɛ̄ɛ̍ ya̍ I̍ cho̍ nu̍a̍ā yɛ̍.

²² “Dɛ̍nɛ̍ wɔ̍ɔ̍ŋ o̍ dɛ̍nɛ̍ wɔ̍ɔ̍ŋ nda̍ tōsa̍ chɔ̍m nda̍ ndu̍ chōo̍ kpo̍u̍. Tu̍si̍ nda̍ nyɛ̄ pālāa̍ chōo̍, mɛ̄ɛ̍ ŋ̄ tūsi̍ ya̍ chōo̍ le̍ yɔ̄ŋndā nīla̍ wɔ̍ɔ̍ŋnda̍ŋ yɛ̍. Kūŋnda̍ŋ tu̍ŋ ya̍ I̍ cho̍ a̍ nyɛ̄ nɛ̄īyāa̍ cho̍ ya̍ chōo̍ wo̍ ni̍, I̍ nɔ̍lā mī me̍i̍ le̍. Kɔ̄l nūu̍ ō chō o̍ sāŋgāa̍ ni᷄ŋ bɔ̍ɔ̍.”