Chɔ̄ɔ̍sūāā 1 - Yāu̍ Mɛ̄lɛ̄ka̍a̍

Mɛ̄lɛ̄ka̍ dīmu̍l Chɔ̄ɔ̍sūāā le̍ kɔ̄la̍ŋ a̍ I̍sɔ̄lūɛ̍i̍ya̍ Ke̍nāŋ

¹ A̍ te̍le̍ŋ Mūu̍sē wa̍ wa̍llo̍ le̍ Mɛ̄lɛ̄ka̍ Ya̍a̍wɛ̄ɛ̄ wo̍, po̍ pi᷅lɛ̍ wa̍ dīōla̍ŋ āā Chɔ̄ɔ̍sūāā, fi̍nyā ndɔ̍ dīōla̍ŋ āā Nu᷅ŋ. Chɔ̄ɔ̍sūāā ko̍ŋ wa̍ wānā ma̍lāa̍ le̍ Mūu̍sē ni̍. Mɛ̄ɛ̍ Mūu̍sē vi᷅, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ Chɔ̄ɔ̍sūāā chu̍a̍.

² Mbo̍ dīmūl ndu̍ āā, “Bu̍ɛ̍ī nūu̍ Mūu̍sē o̍ vi᷅ ni᷅ŋ. Le̍la̍ŋ, lā bɛ̄ɛ̄ndi̍a̍ŋ nya̍ wāŋnda̍ I̍sɔ̄lūɛ̄ī kpo̍u̍ mī lā ta᷄ŋ Pēē Bɛ̍ndōo̍ Chɔ̍ɔ̍dāŋ, mī lā kūɛ̄ o̍ lɛ̄ŋndē ya̍ chu̍e̍l nya̍ būŋgɛ̄i̍ le̍ŋ ni᷄ŋ.

³ Lɛ̄ŋndē lēŋ kpo̍u̍ I̍ chi̍i̍ nya̍ le̍ŋ kē a̍ mɛ̄ɛ̍ ya̍ chu̍e̍l Mūu̍sē būŋgɛ̄i̍ yɛ̍. Bā o̍ bā nya̍ bālu̍ le̍ni̍ŋ, nya̍ nɔ̍ ni̍.

⁴ Pɛ̄ŋgu̍la̍ lɛ̄ŋndē nyāle̍ŋ lā cho̍ la᷅ŋ ni̍. Chɔ̍ŋ a̍ po̍llo̍ bā tōūwo̍ mbo̍ kūā o̍ pēmbūŋ Le̍ba̍nɔ̄ŋndo̍ŋ bā lūāŋ ndo̍. Pɛ̄ŋgu̍la̍ lɛ̄ŋndē nyāle̍ŋ lā chō fūūlūū o̍ pēē bɛ̍ndōo̍ Yūfi̍lu̍a̍tīī bā pāa̍le̍ŋ lē chāŋndo̍. Ndu̍yɛ̍ lɛ̄ŋndē Hi̍ta̍i̍tīi̍ya̍ a̍ nyɛ᷄m cho̍ lēni᷄ŋ ndo̍ŋ kpo̍u̍, mbo̍ kūā a̍ pēē bɛ̍ndū mɛ̄ŋmā īhɛ᷄llo̍ Mɛ̄dītālu̍e̍e̍nīāā, bā pāa̍le̍ŋ lē dēl lo̍, nya̍ nɔ᷅ ni̍ŋ ni̍.

⁵ Nūm Chɔ̄ɔ̍sūāā, chɔ̍ŋ a̍ te̍le̍ŋndo̍ ho̍ō mbō bīya᷅ŋ a̍ mɛ̄ɛ̍ kpɛ̍ ŋ̄ wā ni̍ŋ yo̍o̍mū yɛ̍, wānā o̍ wānā si̍mūl ni̍ŋ nu̍m mbō nɔ̄la̍ nu̍m yōmɔ̄ɔ̄ le̍. I̍ cho̍ wā a̍ nūm la̍tu̍lu̍ mɛ̄ɛ̍ ya̍ wa̍ a̍ Mūu̍sē yɛ̍. Le̍ te̍le̍ŋ o̍ te̍le̍ŋ I̍ me᷅l ni̍ŋ nu̍m te̍, ndu̍yɛ̍ I̍ pu̍ɛ̍ɛ̍nūŋ a̍ nūm te̍.

⁶ Si̍mu̍l kɔ᷅llo̍ ndu̍yɛ̍ mā ve̍sa̍ hɔ̄lla̍. Nu᷄m cho̍ wāŋnda̍ ha̍ā īsīsi̍ la̍chi̍ ni̍ mā bīī lɛ̄ŋndē ya̍ I̍ chu̍e̍l fi̍nyāā ndāā ma̍māa̍ būŋgɛ̄i̍ ī kālā ka̍lā le̍ nda̍ kīo̍o̍ le̍ŋ.

⁷ Nūm nɔ̍ kɔ᷅l sīmūlāa̍ tu̍ŋ, ndu̍yɛ̍ mā ve̍sa̍ hɔ̄lla̍. Sāwāla̍ bu̍ɛ̍ī nūu̍ Mūu̍sē o̍ ke̍ nya̍ la̍ŋ, pu̍ɛ̍ɛ̍nu᷄ŋ le̍ nyɛ̄ la̍ di̍mi̍ wo̍ tōsāa̍ le̍. Nyɛ̄ o̍ nyɛ̄ sāwāla̍ la̍ŋ lā pɛ̄ɛ̄ku̍ nya̍ le̍ tōsāa̍ ō pīlɛ̍ bɛ̍ɛ̍ fa̍ŋā lēchōo̍ mā kɛ̍ɛ̍ ndu̍ tōsā le̍. Ko̍ŋ to̍sā ni̍ mī dɛ̍nɛ̍ kɛ̍ndɔ̄ɔ̍ wa̍ le̍ nūm bā o̍ bā ŋ̄ kɔ̍.

⁸ Ndu̍yɛ̍ le̍ te̍le̍ŋ o̍ te̍le̍ŋ nya̍ dīi̍ŋ ku̍ndāa̍ le̍ ya̍ sōōlūūwo̍ pɛ̍, wānā pi᷅lɛ̍ tōfa̍ o̍ yāu̍ lāsāwāa̍ ni᷄ŋ, mbō tōmbo̍la̍l wāŋnda̍ sāwāla̍ŋ. Wa̍ la̍ŋ pɛ̄ɛ̄kōo̍ le̍ īdīi̍ a̍ īchɔ̄l. Nyɛ̄ o̍ nyɛ̍ cho̍ o̍ yāu̍ ko̍ŋ ni̍ŋ wa̍ ndu̍ tōsāa̍. Ko̍ŋ to̍sā ni̍ mī dɛ̍nɛ̍ kɛ̍ndɔ̄ɔ̍ wa̍ nu̍m chōo̍.

⁹ Lo̍o̍nu̍ŋ nyɛ᷅ ya̍ I̍ di̍mu̍l nu̍m ndo̍, māā nɔ̍ kɔ᷅l sīmūlāa̍ ndu̍yɛ̍ mā ve̍sa̍ hɔ̄lla̍. Yɔ᷅ŋ īsīōōŋ mā ma̍l te̍, kāni̍ fo̍ndōle̍ ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, I̍ cho̍ wā nu̍m kɔ̄ɔ̄lī bā o̍ bā nya̍ kɔ̍.”

I̍sɔ̄lūɛ̍i̍ya̍ bɛ̄ɛ̄ndi̍a̍ŋ le̍ Chɔ̍ɔ̍dāŋ nda̍ŋ tāŋɔ̄ɔ̍

¹⁰ O̍ ko̍ŋ kɔ̍ɔ̍lī, mi̍ Chɔ̄ɔ̍sūāā vi̍ām wānāā lēbōlla̍,

¹¹ ma̍ bālū wāŋnda̍ dīmūllo̍ o̍ dɔ̍ɔ̍ŋgɔ̍ nda̍ wa̍ ā chūūŋgi̍āŋ ndo̍ āā, “O̍ pālɛ̍i̍ ya̍a̍ bɛ̍ŋgu̍ ŋ̄ chō Chɔ̍ɔ̍dāŋ nda̍ŋ tāŋɔ̄ɔ̄ mī ŋ̄ kɔ̍ bi̍ī lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ o̍ cho̍ na̍a̍ le᷅ŋ kīo̍o̍ le̍ŋ. Le̍la̍ŋ lā bɛ̄ɛ̄ndi̍a̍a̍ nyɛ᷅ nyā di̍a̍a̍ le̍ kɔ̄la̍ŋ.”

¹² O̍ ko̍ŋ kɔ̍ɔ̍lī, mi̍ Chɔ̄ɔ̍sūāā di̍mūl yu̍ŋgu̍ Lūbɛ᷅ŋ ndo̍, a̍ yu̍ŋgu̍ Ka̍a̍dī wo̍, a̍ yu̍ŋgu̍ Mānāa̍sē wo̍ tɛ̄ndāa̍ tɛ̄ɛ̄ŋ āā,

¹³ “Mɛ̄lɛ̄ka̍ Ya̍a̍wɛ̄ɛ̄, bu̍ɛ̍ī ndɔ̄ɔ̍ Mūu̍sē nyɛ̄ o̍ di̍mu̍l nya̍ wo̍ la̍ kɛ̄si̍ŋ ndu̍ o̍ kɔ̄l. Mbo̍ dīmūl nya̍ māā Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ o̍ cho̍ nya̍ nāa̍ cha̍lāa̍ kē o̍ lɛ̄ŋnde̍ŋ nde᷅ŋ ni̍ŋ na̍nu᷄ŋ.

^14-15 Le̍la̍ŋ lā mɛ̄i̍ ni̍ko̍ la̍a̍ndāā nyāa̍, a̍ chūāūwāā nyāa̍, a̍ chɔ̄lūāā nyāa̍ o̍ lɛ̄ŋndē Mūu̍sē ke̍ nya̍ le᷅ŋ Chɔ̍ɔ̍dāŋ le̍e̍lōo̍ na̍nu᷄ŋ nde̍ŋ. Nya̍ so̍vɛ̄i̍ya̍a̍ bɛ̍nda̍ le̍ chɔ̄ūwo̍ wa̍, lā chūa̍ wōlɔ̄ɔ̄lā nyāla̍ chɔ̄ūla̍ŋ mī lā ta᷄ŋ chāāŋāā nyāā I̍sɔ̄lūɛ̍i̍ya̍ lāchī. Nya̍ chō nda̍ lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ o̍ cho̍ nda̍ kīo̍o̍ bā pāa̍le̍ŋ lē dēl lo̍ le̍ŋ mālā bīyɔ̄ɔ̄ ni̍. Tē Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ I̍sɔ̄lūɛ̍i̍ya̍a̍ tu̍a̍a̍ nāa̍ cha̍lāa̍ kē pɛ̍ kpo̍u̍ lā mīīŋgu̍ ni̍ko̍ na̍nu᷄ŋ o̍ lɛ̄ŋndē nyāle̍ Mūu̍sē bu̍ɛ̍ī Mɛ̄lɛ̄ka̍ Ya̍a̍wɛ̄ɛ̄ wo̍ ō ke̍ nya̍ le̍ŋ Chɔ̍ɔ̍dāŋ le̍e̍lōo̍ bā pāa̍le̍ŋ lē chāŋ ndo̍ le̍ŋ ni᷄ŋ.”

¹⁶ Ma̍ dīmūl Chɔ̄ɔ̍sūāā āā, “Nyɛ̄ o̍ nyɛ̄ ŋ̄ dīmu̍l na̍a̍ ŋ̄ tūēī, ndu̍yɛ̍ ŋ̄ chō tōsā. Bā o̍ bā ŋ̄ vīo̍m na̍a̍, kɔ̄la̍ŋ na̍a̍ ŋ̄ kūā ni̍.

¹⁷ Mɛ̄ɛ̍ na̍a̍ ŋ̄ wa̍ nyɛ̄ Mūu̍sē o̍ di̍mūl na̍a̍ wo̍ tōsāa̍ yɛ̍, le̍nde̍ ko̍ni̍ na̍a̍ ŋ̄ chō wā nyɛ̄ ŋ̄ dīmūl na̍a̍ wo̍ tōsāa̍ ni̍. Ndu̍yɛ̍ ŋ̄ chō Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūm ndo̍ pīɛ̄īyo̍ mbō wa̍ a̍ nūm la̍tu̍lu̍ mɛ̄ɛ̍ o̍ wa̍ a̍ Mūu̍sē yɛ̍.

¹⁸ Wānā o̍ wānā si̍mu̍l nu̍m pɛ̍ kɛ̄lɛ̄ŋgāā mbō kɛ̄ɛ̍ le̍ nyɛ̄ ŋ̄ dīmu̍l ndu̍ wo̍ tōsāa̍, wānā wa̍ā le̍nde̍ pīɔ̍mndo̍ o̍ sɔ̄lā ni̍. Le̍la̍ŋ nɔ̍ kɔ᷅l sīmūlāa̍ ndu̍yɛ̍ mā ve̍sa̍ hɔ̄lla̍.”