Īsi̍kīāā 1 - Yāu̍ Mɛ̄lɛ̄ka̍a̍

YI̍LĀŊ TĀSE̍ MƐ̄LƐ̄KA̍ CHƆ᷄M ĪSI̍KĪĀĀ WO̍ ( Īsi̍kīāā 1:1–7:27 ) Īsi̍kīāā che᷅ kpe̍ŋgbe̍i̍ Mɛ̄lɛ̄ka̍a̍ o̍ yi̍lāŋndo̍ ni᷄ŋ

^1-3 Ya̍ cho̍ Īsi̍kīāā ni̍, po̍ Bu̍u̍sī wo̍. Wānā so̍līāā lāsa̍lāa̍ ya̍ I̍ cho̍ ni̍. Mɛ̄ɛ̍ Māsāa̍ Nɛ̄bu̍kānɛ̍ɛ̍sā o̍ bi̍ī Māsā Bɛ̍ndōo̍ Chɛ̄hōwa̍chīŋ, a̍ I̍sɔ̄lūɛ̍i̍ya̍a̍ bɔ̍ɔ̍ bɔ̍ɔ̍ mbo̍ kūā a̍ na̍a̍ o̍ bīyɔ̄ɔ̍ ni᷄ŋ Ba̍bi̍lɔ̄ŋ, ŋ̄ wa̍ o̍ Pīo̍o̍ Chɛ̍bāā kɔ̍ŋgɔ̍ na̍a̍ I̍sɔ̄lūɛ̍i̍ya̍ ā pīli̍a̍a̍. Ŋ̄ wa̍ lo̍ŋ le̍ wɔ̄sīla̍ŋ lā ŋūɛ̍ɛ̍nu̍. Pāŋgi̍i̍ hi̍ɔ̍ɔ̍lu̍e̍i̍ o̍ wɔ̄sī be̍le̍-ya̍a̍ wo̍ ni᷄ŋ, lɔ̄mā lē ŋūɛ̍ɛ̍nu̍, mi̍ ha̍la̍a̍ kūmbi᷄ŋ, mi̍ Mɛ̄lɛ̄ka̍ Ya̍a̍wɛ̄ɛ̄ chɔ᷅m ya̍ yi̍lāŋnda̍ŋ. O̍ lɔ̄mā lē ŋūɛ̍ɛ̍nu̍a̍ŋ chōo̍ o̍ pāŋgi̍i̍ ke̍ŋ ni᷄ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ chu̍a̍, mi̍ kpāāya̍ Mɛ̄lɛ̄ka̍ Ya̍a̍wɛ̄ɛ̄ wo̍ o̍ tūāl la̍ kɔ̄ɔ̄lī.

⁴ Mɛ̄ɛ̍ ya̍ I̍ chu̍a̍ hɔ̄lla̍, mi̍ cha᷅ hūēīyīī bɛ̄ndūe̍i̍ hūnɔ̄ɔ̍ a̍ yu̍mbu̍ yu̍mbu̍ i̍kpu̍ŋgbā bɛ̄ndōo̍, chɔ̄nɔ᷄ŋndo̍ bā lūāŋndo̍. Pa̍ŋgēle̍ bɛ̄ndōo̍ ō wa᷄ yu̍mbu̍ yu̍mbu̍ ho̍ō ō bālāā kpɔ̍kɔ̍su̍. Yīŋnde̍ŋ lē wa᷄ hūnɔ̄ɔ̍ a̍ ndu̍ kīōlōo̍ lāchī ŋu̍āla̍lɛ̍ī ŋūāla̍lɛ̍ī. Ndu̍yɛ̍ o̍ yīŋndē lēŋ tɛ̄ɛ̄ŋ, nyɔ̄ɔ̍ wa᷄ dīōndɔ̄ɔ̍ ŋɛ̍lɛ̄ŋgi̍ ŋɛ̍lɛ̄ŋgi̍ nu̍a̍ā ŋ̄ chā āā būlɔ̍ŋsīi̍ye̍ ni̍.

⁵ O̍ ko̍ŋ kɔ̍ɔ̍lī, mi̍ cha᷅ nyāa̍ ā pūm o̍ yu̍mbu̍ yu̍mbo̍o̍ ho̍ō tɛ̄ɛ̄ŋ nda̍ hi̍ɔ̍ɔ̍lu̍ māā nyāā yōōmāā, kɛ̍ ndu̍yɛ̍ wāna̍ a̍a̍ che᷅ nda̍ pɛ̍ āā wāŋndā chīe̍e̍ya̍ ni̍.

⁶ Kɛ̍ nyāa̍ ha̍ā ō kɛ᷅ o̍ kɛ᷅ ndu̍ o̍o̍ nɔ̍ hɔ̄lla̍ sālā hīɔ̍ɔ̍lu̍ a̍ kūmba᷅ŋnda̍ŋ lā hīɔ̍ɔ̍lu̍.

⁷ Ndu̍yɛ̍, pe̍lo᷄ŋ wa᷄ nda̍ ŋ̄ sāndāā sa̍kpō, a̍ būūkūla̍ŋ māā būūkūla̍ nāū. Wānā a̍a̍ che᷅ nda̍ pēlo̍ŋ īŋɛ̄lɛ̄ŋgi̍ ŋɛ̍lɛ̄ŋgi̍e̍i̍ pɛ̍, āā būlɔ̍ŋsīi̍ye̍ nda̍ bɛ̄ɛ̄ndi̍a̍a̍ ni̍.

⁸ Nyāa̍ ha̍ā ō kɛ᷅ o̍ kɛ᷅, ō fūla̍ o̍ hɔ̄lāā sālā hīɔ̍ɔ̍lu̍a̍a̍ ndu̍ o̍o̍ nɔ̍ o̍ kpēŋgo᷄ŋ nda̍ŋ kɔ̄ɔ̄lī, ō kɛ᷅ o̍ kɛ᷅ ndu̍ o̍o̍ nɔ̍ vɛ̄lɛ̄ nyɛ̄la̍ŋ o̍ kūmba᷅ŋndā hīɔ̍ɔ̍lu̍ la̍ŋ bɛ̄ŋgu̍ māā bā wāna̍ chi̍e̍e̍.

⁹ Ndu̍yɛ̍, nyāa̍ ha̍ā nda̍ hi̍ɔ̍ɔ̍lu̍ kpo̍u̍ mā bɔ̄ŋā kūmba᷅ŋndā ndāla̍ŋ vēllāa̍ vēllē. Ndu̍yɛ̍ bā o̍ bā nda̍ wa᷄ kɔ̄la̍ŋ pɛ̍, kɔ̄la̍ŋ sa̍kpō, ō kɛ᷅ o̍ kɛ᷅ mu̍li̍ŋ te̍.

¹⁰ Nyāa̍ ha̍ā ō kɛ᷅ o̍ kɛ᷅ ndu̍ o̍o̍ nɔ̍ hɔ̄lla̍ sālā hīɔ̍ɔ̍lu̍, lāchī ki̍nɛ̍i̍ hɔ̄lla̍ māā hɔ̄lāā wāna̍ chi̍e̍e̍, kūmbū bā kɛ̄ndɔ̄ɔ̍ hɔ̄lla̍ māā hɔ̄lāā kpɔ̍kūŋ, kūmbū bā mīāllo̍ hɔ̄lla̍ māā hɔ̄lāā nāū tōōyē, kɔ̄ɔ̄lī hɔ̄lla̍ māā hɔ̄lāā kōvɛ̍.

¹¹ Le̍nde̍ hɔ̄lāā ndāa̍ ā wa᷄ ni̍. Ndu̍yɛ̍, ō kɛ᷅ o̍ kɛ᷅ mbo̍ sīɛ̄ndī kūmba᷅ŋndā ndɔ̄la̍ŋ lā tīɔ̍ɔ̍ŋ chōo̍ cho̍o̍ mbo̍ bɔ̄ŋā a̍ kūmba᷅ŋndā chāāŋāā ndūa̍a̍ vēllāa̍ vēllē. Mi̍ lā tīɔ̍ɔ̍ŋ nda̍ŋ lā lō lā tūwāā le̍ dīāllūŋ ndɔ̄ɔ̍ŋ kūmbɔ̄ɔ̍.

¹² Nda̍ kpo̍u̍ bā o̍ bā kpāāya̍ Mɛ̄lɛ̄ka̍a̍ ndu̍ o̍o̍ ye̍e̍ma̍ nda̍ pɛ̍ mā kūɛ̄, kɔ̄la̍ŋ sa̍kpō, ō kɛ᷅ o̍ kɛ᷅ ndu̍ o̍o̍ mu̍līŋ te̍.

¹³ O̍ nyāā yōōmāa̍ ha̍ā tɛ̄ɛ̄ŋ, nyɔ̄ɔ̍ wa᷄ lo̍ŋ nu̍a̍ā chā āā dɛ̄ŋgūlta̍ŋ ni̍, mbo̍ wā nda̍ hīŋnɔ᷄ŋndo̍ tɛ̄ɛ̄ŋ pɛ̍ɛ̄ pɛ̄ɛ̄, māā tɛ̄ŋgɛ̍ lēyīŋ. Nyɔ̄ɔ̍ ho̍ō ō wa᷄ hīŋnɔ᷄ndo̍ nda̍ tɛ̄ɛ̄ŋ hēēlōo̍ a̍ tūūsōo̍ māā lēyīŋ, mi̍ nyɛ̄ ŋūāla̍lɛ̍ī ŋūāla̍lɛ̍īyo̍ ō wā fūlāa̍ lēni᷄ŋ.

¹⁴ Wānā a̍a̍ che᷅ nyāa̍ ha̍ā hēēlōo̍ a̍ tūūsōo̍ īpi̍li̍kū pi̍li̍kūe̍i̍ pɛ̍, nu̍a̍ā ŋ̄ chā āā nyɛ̄ ŋūlāla̍lɛ̍ī ŋūāla̍lɛ̍īyo̍ cho̍ tōsāa̍ ni̍.

¹⁵ I̍ lo̍ nyāa̍ ha̍ā tōfāa̍, mi̍ cha᷅ nyɛ̄la̍ŋ lā hīɔ̍ɔ̍lu̍ lā tīīla᷄ŋ māā lākāndū, mi̍ lā tūāl lɛ̄ŋ. Mi̍ ō kɛ᷅ o̍ kɛ᷅ hu᷄ŋ si᷅m nyāā yōōmāa̍ ha̍ā ō pīlɛ̍ īkɛ̄i̍.

¹⁶ Nyɛ̄lā tīīla᷄ŋnda̍ŋ nda᷅ŋ, la̍ŋ hi̍ɔ̍ɔ̍lu̍ kpo̍u̍, nyɛ̄ pīlɛ̍ kpe̍ la̍ wa̍ ni̍. Wānā a̍a̍ che᷅ la̍ŋ dīōndɔ̄ɔ̍ īŋɛ̄lɛ̄ŋgi̍ ŋɛ̍lɛ̄ŋgīe̍i̍ pɛ̍, āā pōū ba̍ā kālā ka̍lāa̍ nda̍ bɛ̄ɛ̄ndi̍a̍a̍ ni̍. Ndu̍yɛ̍, nyɛ̄lā tīīla᷄ŋnda̍ŋ nda᷅ŋ, wānā a̍a̍ che᷅ pɛ̍ āā ō kɛ᷅ kɛ᷅, ndu̍ o̍o̍ nɔ̍ nyɛ̄ tīīla᷄ŋ che᷅le̍ŋ lēni᷄ŋ.

¹⁷ Ndu̍yɛ̍ nyɛ̄lā tīīla᷄ŋnda̍ŋ nda᷅ŋ bɛ̍ɛ̍, kpēŋgūŋ hi̍ɔ̍ɔ̍lo̍ŋ kpo̍u̍, la̍a̍ ku̍ā o̍ īkpēŋgū o̍ īkpēŋgū. Ndu̍yɛ̍ bā la̍ wā ko̍ kɔ᷅la̍ŋ, kɔ̄la̍ŋ sa̍kpō, ō kɛ᷅ o̍ kɛ᷅ mu̍līŋ te̍.

¹⁸ Ndu̍yɛ̍ nyɛ̄lā tīīla᷄ŋnda̍ŋ nda᷅ŋ, ō kɛ᷅ o̍ kɛ᷅ ndu̍ o̍o̍ nɔ̍ kāndūla̍ŋ, a̍ hɔ̄lta̍ŋ lā bālāā chɛ̍ chɛ̍, ndu̍yɛ̍ a̍ chīli̍ŋu̍ŋ pɔ̍mbɔ᷄ŋ o̍ kāndūlā lāŋ tɛ̄ɛ̄ŋ.

¹⁹ Nyāā yōōmāā hīɔ̍ɔ̍lu̍a̍a̍ ha̍ā ni̍, nyɛ̄lā tīīla᷄ŋnda̍ hi̍ɔ̍ɔ̍lu̍la̍ la̍ŋ ni̍, kɔ̄la̍ŋ dīōm pīlɛ̍ kpɛ̍kpɛ̄lɛ̄ɛ̄. Tē nyāā yōōmāa̍ ha̍ā ā bīī dɔ̍ɔ̍ kɔ̄la̍ŋ pɛ̍, la̍ŋ bɛ̍ɛ̍ la̍ bi̍ī kɔ̄la̍ŋ. Tē ā chɛ᷄ŋ cho̍o̍ cho̍o̍ pɛ̍, la̍ŋ bɛ̍ɛ̍ la̍ chɛ̍ŋ cho̍o̍ cho̍o̍.

²⁰ Ndu̍yɛ̍ nyāā yōōmāa̍ ha̍ā, bā o̍ bā kpāāya̍ Mɛ̄lɛ̄ka̍a̍ ndu̍ o̍o̍ ye̍e̍ma̍ nda̍ le̍ kɔ̄la̍ŋ pɛ̍, lo̍ŋ nda̍ a̍a̍ ku̍ā ni̍. Tē nyɛ̄la̍ŋ nda᷅ŋ la̍a̍ chɛ̍ŋ cho̍o̍ cho̍o̍ pɛ̍, nyɛ̄lā tīīla᷄ŋnda̍ŋ nda᷅ŋ bɛ̍ɛ̍ la̍a̍ chɛ̍ŋ cho̍o̍ cho̍o̍, kāni̍ fo̍ndōle̍, nyāā yōōmāa̍ ha̍ā, kpāāya̍ ndāa̍ ō wa̍ nyɛ̄lā tīīla᷄ŋnda̍ŋ nda᷅ŋ chōo̍.

²¹ Le̍la̍ŋ dīmīo̍o̍ nu̍a̍ā mī nda̍ a̍a̍ chɛ̍ŋ kɔ᷅la̍ŋ mī nyɛ̄lā tīīla᷄nda̍ŋ nda᷅ŋ bɛ̍ɛ̍ la̍a̍ chɛ̍ŋ kɔ᷅la̍ŋ a̍ nda̍ lātūlu̍. Tē ā si᷄m pɛ̍, la̍ŋ bɛ̍ɛ̍ la̍ si̍m, tē ā chɛ᷄ŋ cho̍o̍ cho̍o̍ pɛ̍, la̍ŋ bɛ̍ɛ̍ la̍ chɛ̍ŋ cho̍o̍ a̍ nda̍ lātūlu̍.

²² Nyāā yōōmāa̍ ha̍ā, nyɔ̄ɔ̍ wa̍ nda̍ ō tīīla̍ŋ o̍ bōlle̍ŋ chōo̍ dɛ̍ū bɛ̄ndū. Nyɛ̄ tīīla᷄ŋndo̍ ho̍ō wāna̍ a̍a̍ che᷅ ndu̍ dīōndɔ̄ɔ̍ īŋɛ̄lɛ̄ŋgi̍ ŋɛ̍lɛ̄ŋgi̍e̍i̍ pɛ̍ āā tōfa᷅ŋndo̍ ni̍.

²³ O̍ nyɛ̄ tīīla᷄ŋndo̍ ho̍ō bɛ̄ŋgu̍ nyāā yōōmāā hīɔ̍ɔ̍lu̍a̍a̍ ha̍ā ā wa᷄ īsīsi̍ ni̍. Ndu̍yɛ̍ ō kɛ᷅ o̍ kɛ᷅ mbo̍ sīɛ̄ndī kūmba᷅ŋndā ndɔ̄la̍ ti̍ɔ̍ɔ̍ŋnda̍ŋ, mbo̍ bɔ̄ŋā la̍ŋ a̍ kūmba᷅ŋndā chāāŋāā ndūa̍a̍ vēllāa̍ vēllē, mi̍ lā tīɔ̍ɔ̍ŋda̍ŋ lā pīlɛ̍ la̍ŋ lā lō la̍ tu̍wāā le̍ dīāllūŋ ndɔ̄ɔ̍ŋ kūmbɔ̄ɔ̍.

²⁴ Mɛ̄ɛ̍ nyāa̍ ha̍ā ā wā kɔ̄la̍ŋ, wānā a̍a̍ tu̍e̍ī īdīkī dīkīī kūmba᷅ŋndā ndālāŋ lā wa̍ ve̍ pɛ̍, āā bāl bɛ̄ndōo̍ cho̍ hīōūwɔ̄ɔ̍ ni̍, vɛ̄lɛ̄ wānā a̍a̍ tu̍e̍ī pɛ̍ āā Mɛ̄lɛ̄ka̍ nɔ̍ kpāāyāa̍ kpo̍u̍ wo̍ cho̍ sūɛ̍i̍ ni̍. Kɔ̄lā nda̍ wa̍ la̍ŋ, wānā a̍a̍ tu̍e̍ī īkpūūve̍ pɛ̍, āā so̍vɛ̄i̍ya̍a̍ ku̍ndāa̍ bɛ̄ndūa̍a̍ cho̍ bɔ̄ɔ̄lūūwo̍ ni̍. Ndu̍yɛ̍ dīmīo̍o̍ nu̍a̍ā mī nda̍ a̍a̍ si̍m, mī o̍ kɛ᷅ ō kɛ̍ tūsi̍ kūmba᷅ŋndā ndɔ̄la̍ŋ mbō mīŋgi̍ la̍ŋ tūwɔ̄ɔ̄.

²⁵ Mɛ̄ɛ̍ nyāā yōōmāa̍ ha̍ā ā si᷄m ma̍ mīŋgī kūmba᷅ŋndā ndāla̍ŋ tūwɔ̄ɔ̄, mi̍ tu̍ɛ̍ī dīōmndo̍ fūlāa̍ o̍ nyɛ̄ tīīla᷄ŋ wa̍ nda̍ ko̍ŋ o̍ bōlle̍ŋ chōo̍ wo̍ kɔ̍ɔ̍lī.

²⁶ O̍ ko̍ŋ kɔ̍ɔ̍lī, mi̍ cha᷅ nyɔ̄ɔ̍ o̍ nyɛ̄ tīīla᷄ŋ ko̍ŋ chōo̍ māā kpe̍ŋgbe̍i̍ lēmāsā, ō wa᷄ dīōndɔ̄ɔ̍ ŋɛ̄lɛ̄ŋgi̍ ŋɛ̍lɛ̄ŋgi̍e̍i̍ nu̍a̍ā chā āā pōū Sāfa̍lūɛ̄ wo̍ ni̍. O̍ ko̍ŋ kɔ̍ɔ̍lī, mi̍ cha᷅ nyɔ̄ɔ̍ īchāli̍ o̍ nyɛ̍ wa̍ ko̍ŋ māā kpe̍ŋgbe̍i̍ lēmāsā wo̍ chōo̍, māā wāna̍ chi̍e̍e̍.

²⁷ Nyɔ̄ɔ̍ ho̍ō chɔ̍ŋ pɛ̍ŋgu̍ chāŋnda̍ mbo̍ hēl lūāŋ, wānā a̍a̍ che᷅ ndu̍ dīōndɔ̄ɔ̍ īŋɛ̄lɛ̄ŋgi̍ ŋɛ̍lɛ̄ŋgi̍e̍i̍ pɛ̍ āā būlɔ̍ŋsīi̍ye̍ ni̍. Chɔ̍ŋ vɛ̄lɛ̄ o̍ chāŋnda̍ to̍l ma̍to̍ū, mɛ̄ɛ̍ yīŋnde̍ŋ lē wā nu̍a̍ā sānde̍i̍ īwūle̍ wu᷅lu̍e̍i̍ yɛ̍ le̍nde̍ o̍ wa̍ ni̍. O̍ ko̍ŋ kɔ̍ɔ̍lī, pa̍ŋgēle̍ bɛ̄ndōo̍ ō wa̍ ndu̍ ō bālāā kpɔ̍kɔ̍su̍.

²⁸ Pa̍ŋgēlo̍o̍ ho̍ō, mɛ̄ɛ̍ pīɔ̍ɔ̍ ō hēl nu̍a̍ā mī ni̍ŋgi̍na̍ŋgāa̍ ō hīni̍ yɛ̍, le̍nde̍ o̍ wa̍ ni̍. O̍ ko̍ŋ, mi̍ si̍nā māā pa̍ŋgēle̍ chɔ᷅m na̍ŋɔ̄ɔ̍ bɛ̄ndu̍ Mɛ̄lɛ̄ka̍ Ya̍a̍wɛ̄ɛ̄ wo̍ wo̍, māā ndu̍ ya̍ I̍ wa̍ ko̍ŋ chɔ̍ɔ̍ ni̍. Mɛ̄ɛ̍ ya̍ I̍ che᷅ pa̍ŋgēlo̍o̍ ho̍ō, mi̍ hi̍ni̍ mi̍ fu̍u̍lūū hɔ̄lla̍ lɛ̄ŋ mɛ̍ɛ̄. O̍ ko̍ŋ kɔ̍ɔ̍lī, mi̍ tu̍ɛ̍ī dīōmndo̍ sūɛ̍i̍ nāa̍ ya̍ chu̍a̍.