Hōōsi̍a̍ā 1 - Yāu̍ Mɛ̄lɛ̄ka̍a̍

¹ Ō wa̍ a̍ te̍le̍ŋ pi᷅lɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ Hōōsi̍a̍ā, po̍ Bi̍ɛ̍ɛ̍lūī wo̍ chūā, mbo̍ kē ndu̍ yōōŋgōo̍ le̍ I̍sɔ̄lūɛ̄ī. A̍ te̍le̍ŋ ko̍ŋ, Yūsi̍a̍ā, a̍ Cho̍tām, a̍ E̍ha̍a̍sī, a̍ Hɛ̄sɛ̄ki̍yā, nda̍ wa̍ māsāa̍ o̍ lɛ̄ŋndē Chu̍dāle̍ŋ ni᷄ŋ a̍ te̍le̍ŋnda̍ yɛ̍ yɛ̍la̍ŋ ni̍. O̍ ko̍ŋ kɔ̍ɔ̍lī, mi̍ Chɛ̄lōbo̍wām, po̍ Chɛ̄hōwa̍sī wo̍ ndu̍ wa᷅ māsāa̍ le̍ lɛ̄ŋndē I̍sɔ̄lūɛ̍i̍le̍ŋ.

A̍ yu̍ŋgu̍ Hōōsi̍a̍ā wo̍ o̍kɔ̄ɔ̄

² Lɔ̍ɔ̍pa̍ bɛ̍ɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Hōōsi̍a̍ā yōōŋgū o̍ wa̍ ndu̍ kīo̍o̍ le̍ I̍sɔ̄lūɛ̄ī yo̍, mi̍ Mɛ̄lɛ̄ka̍ dīmūl Hōōsi̍a̍ā āā, “Kɔ̍ mā kɔ̍ nu̍u̍wā wānā la̍nɔ̍ɔ̍ mā chu̍a̍ ndu̍ o̍ nɔ̄ɔ̍ ni᷄ŋ. Kɛ̍ la̍nɔ̍ ŋ̄ chō ho̍ō chūā wo̍, wānā la̍nɔ̍ ti̍a̍māā bɛ̄ndōo̍ pi̍la̍ o̍ wa᷅ ni̍ŋ ni̍. Ndu̍yɛ̍ chūāūwāā nya̍ chō vīōlɔ̄ɔ̍ nya̍ chūā kōŋ nda̍, nda̍ bɛ̍ɛ̍ wānāā tīāmāa̍ pīla̍ nda̍ wā ni̍ŋ ni̍. Tē ō wa̍ māā yɔ̄ŋɔ̄ɔ̄ pɛ̍, nyɛ̍ yɔ̍nūŋ ni̍ŋ nya̍ tɛ̄ɛ̄ŋ nya̍ la̍a̍ nu̍m ndo̍, le̍nde̍ i̍ yɔ̍nu̍ŋ na̍a̍ tɛ̄ɛ̄ŋ na̍a̍ wāŋnda̍ I̍sɔ̄lūɛ̄ī ni̍. Wāŋnda̍ I̍sɔ̄lūɛ̄ī a̍ bi̍ī ma̍ kɛ̄ɛ̄ ya̍ Mɛ̍lɛ̄ka̍ Ya̍a̍wɛ̄ɛ̄ ma̍ mūli᷄ŋ nyɛ᷅m chēle̍ŋndo̍ŋ sōōlūūwo̍ māā mɛ̄lɛ̄ka̍ā nda̍.”

³ O̍ ko̍ŋ, mi̍ Hōōsi̍a̍ā o̍ ku̍ā, mbo̍ kɔ̍ chu̍ā chūā pīlɛ̍ o̍ nɔ̄ɔ̍ ni᷄ŋ dīōla̍ŋ āā Ko̍mā. Ko̍mā ko̍ŋ yɛ̍, fi̍nyā ndɔ̍ wa̍ Di̍bi̍līm ni̍. Mɛ̄ɛ̍ te̍le̍ŋ ti̍ŋ hīo̍u̍, mi̍ Ko̍mā chu̍ā yo᷄llo̍, mbo̍ vīālū wānā pɔ̍nɔ̍ɔ̍.

⁴ Mɛ̄ɛ̍ o̍ ve̍lū, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Hōōsi̍a̍ā āā, “Ke̍ po̍ nya̍ vēlū ko̍ŋ ndo̍ dīōla̍ŋ āā, Chɛ̍si̍lūɛ̄ɛ̄, fo̍ndōle̍, te̍le̍ŋ ya̍ Mɛ̍lɛ̄ka̍ hīŋ yu̍ŋgu̍ Chɛ̍hū wo̍ nyɛ̄ pālāā bɛ̄ndōo̍ tūsī chōo̍ wo̍ ō hīŋ fūūlūū wo̍. Yōōmūlā Māsāa̍ Chɛ̍hū o̍ tɛ̍ɛ̍mbu̍u̍ Chɛ̍si̍lūɛ̄ɛ̄ chi̍e̍e̍ la̍ŋ, bōōndi̍i̍ yu̍ŋgu̍ ndɔ̄ɔ̍ hīŋ pāāwā kōŋ chūā ve̍ ndi̍ fu̍u̍lu̍u̍ he̍ī ni̍. I̍ cho̍ tōsā mī māsāle̍ŋ I̍sɔ̄lūɛ̄ī le̍ mɛ̍ɛ̍lu̍.

⁵ Ō fāŋa̍ŋ ndɔ̍ bɛ̍ɛ̍ o̍ ko̍ŋ kɔ̍ɔ̍lī, tē te̍le̍ŋ ko̍ŋ ō fūūlu̍u̍ pɛ̍, nyɛ̄m chɔ̄ū wāŋnda̍ I̍sɔ̄lūɛ̄ī a̍ ti̍i̍nda̍ŋ ndo̍ŋ bɛ̍ɛ̍ I̍ cho̍ mu̍ŋ hūnɔ̄ɔ̄ tɛ̍ɛ̍mbūū kpo̍u̍, o̍ lɛ̄ŋndē dɛ̍ŋgbɛ̍le̍ cho̍ o̍ pēmbo᷄ŋ tɛ̄ɛ̄ŋ Chɛ̍si̍lūɛ̄ɛ̄ le̍ŋ.”

⁶ O̍ ko̍ŋ kɔ̍ɔ̍lī, mɛ̄ɛ̍ te̍le̍ŋ ti᷄ŋ ō hīōū, mi̍ Ko̍mā o̍ chu̍ā vɛ̄lɛ̄ yo᷄llo̍ mbo̍ vīālū wānā la̍nɔ̍ɔ̍. Mɛ̄ɛ̍ o̍ ve̍lū, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Hōōsi̍a̍ā āā, “Ke̍ chu̍ā Ko̍mā ve̍lū ko̍ŋ ndo̍ dīōla̍ŋ āā, Lōlūha̍mā, ko̍ŋ cho̍ ni̍, Īnyīɛ̍ɛ̍ Bɛ̍ɛ̍, fo̍ndōle̍, nyīɛ̍ɛ̍yīī ya̍ i̍i̍ nɔ̍ pāāndū le̍ wāŋnda̍ I̍sɔ̄lūɛ̄ī ve̍, nyīɛ̍ɛ̍yīī kēŋ ī chūū. I̍ me᷅l lɛ̍ wāŋnda̍ I̍sɔ̄lūɛ̄ī le̍ nyɛ̄ nda̍ to̍sa̍ wo̍ le̍.

⁷ Kɛ̍ ndu̍yɛ̍, wāŋnda̍ Chu̍dā nda̍ te̍le̍ŋ cho̍ fūūlūū mī hu̍ŋ tu̍i̍i̍nu᷄ŋ nda̍ vɛ̄lɛ̄ īnyīɛ̍ɛ̍. Ya̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndāa̍, ya̍ pi̍la̍ cho̍ nda̍ hūnɔ̄ɔ̄ īnyīɛ̍ɛ̍ tūīīnɔ᷄ŋ ni̍, mī pi̍ŋi̍ yōōmūlā ndāla̍ŋ ya̍a̍mɔ̍ɔ̍wa̍a̍ ndāa̍ o̍ bā. Tē te̍le̍ŋ ko̍ŋ ō fūūlu̍u̍ pɛ̍, ō cho̍ a̍ chīɔ̄ū kɛ̄lɛ̄ŋgāā a̍ mūɛ̄ī īfāŋ te̍ ya̍ I̍ pi̍ŋī ni̍ŋ yo̍o̍mūlā ndāla̍ŋ te̍. I̍ cho̍ nda̍ mālā a̍ su̍a̍ā lāchɔ̄ū kɛ̄lɛ̄ŋgāā a̍ pūa̍a̍ sɔ̍ŋgā o̍ so᷅ chōo̍ le̍. Ya̍ pi̍la̍ kpe̍e̍kpe̍i̍ pi̍ŋī ni̍ŋ nda̍ ni̍.”

⁸ Mi̍ Hōōsi̍a̍ā nda̍ la̍a̍ ndɔ̄ a̍ hi̍vi᷄ŋ Lūlūha̍nā lābɛ̄ŋgu̍. Hīvi᷄ŋndo̍ ndu̍ lābɛ̄ŋgu̍, mi̍ Ko̍mā chu̍ā vɛ̄lɛ̄ yo᷄llo̍, mbo̍ vīālū wānā pɔ̍nɔ̍ɔ̍.

⁹ Mɛ̄ɛ̍ o̍ ve̍lū, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Hōōsi̍a̍ā āā, “Ho̍ō ndu̍ ke̍ ndu̍ dīōla̍ŋ āā, Lō-A̍mī, ko̍ŋ cho̍ ni̍, ā cho̍ wa̍nāā nī le̍, fo̍ndōle̍ nya̍ wāŋnda̍ I̍sɔ̄lūɛ̄ī lā cho̍ lɛ̍ wānāā nī le̍, ndu̍yɛ̍, ya̍ Mɛ̍lɛ̄ka̍ bɛ̍ɛ̍ I̍ cho̍ lɛ̍ Mɛ̄lɛ̄ka̍ nyā le̍.”

I̍sɔ̄lūɛ̄ī o̍ cho̍ vɛ̄lɛ̄ mīīŋgū māā pāāndū

¹⁰ Kɛ̍ ndu̍yɛ̍ te̍le̍ŋ cho̍ fūūlūū mī wāŋnda̍ I̍sɔ̄lūɛ̄ī a̍ ku̍i̍ vɛ̄lɛ̄ kūīyo̍ pīla̍. Wāŋnda̍ I̍sɔ̄lūɛ̄ī a̍ wa᷅ ni̍ŋ ku̍ndā ha̍a̍a̍, mɛ̄ɛ̍ si̍o̍ōŋnde̍ ī wā nu̍a̍ā ī kūāna᷄ŋ o̍ Pēē Mɛ̄ŋmā Īhɛ᷄llo̍ kɔ̄ŋgɔ̍, wānā nɔ̍lā mā chi̍i̍ ndi̍ chɔ̄m kɛ̄lɛ̄ŋgāā mā nɔ̍la̍ ndi̍ tūū le̍ yɛ̍, le̍nde̍ nda̍ wā ni̍ŋ ni̍. Ndu̍yɛ̍ tē te̍le̍ŋ ko̍ŋ fūūlu̍u̍ pɛ̍, lɛ̄ŋndē Mɛ̄lɛ̄ka̍ kɛ̄ɛ̍ nda̍ le̍ŋ ni᷄ŋ mbo̍ dīmūl nda̍ āā, “Lā cho̍ lɛ̍ wānāā nī le̍,” le̍ŋ, o̍ lɛ̄ŋnde̍ pīlɛ̍ lē lēŋ ni᷄ŋ ko̍ Mɛ̄lɛ̄ka̍ chō nda̍ vɛ̄lɛ̄ hūnɔ̄ɔ̄ dīmūl ni̍ āā, “Nya̍ cho̍ Mɛ̄lɛ̄ka̍ cho̍ yōōmū wo̍ chūāūwāā ndūa̍a̍ ni̍.”

¹¹ A̍ te̍le̍ŋ ko̍ŋ, wāŋnda̍ Chu̍dā ni̍, wāŋnda̍ I̍sɔ̄lūɛ̄ī ni̍, ā chō vɛ̄lɛ̄ mīīŋgū nāa̍ pi᷅lɛ̍, mā sīmnu᷄ŋ wa̍nāā pīlɛ̍, ndu̍yɛ̍ nda̍ kpo̍u̍ mā chūa̍ māsāa̍ ō pīlɛ̍ mbō wa̍ nda̍ chōo̍. Ā sīmnūŋ ni̍ŋ wa̍nāā kpāāyā bɛ̍ndū o̍ lɛ̄ŋnde̍ŋ nde᷅ŋ ni᷄ŋ. Chɛ̍si̍lūɛ̄ɛ̄ o̍ cho̍ hūnɔ̄ɔ̄ sīmnɔ᷄ŋ chi̍e̍e̍ tɔ̍ɔ̍ bɛ̍ndū.