Ha̍kāī 1 - Yāu̍ Mɛ̄lɛ̄ka̍a̍

Mɛ̄lɛ̄ka̍ Ya̍a̍wɛ̄ɛ̄ di̍mu̍l wāŋnda̍ Chūlu̍sɛ̄lɛ̄m le̍ mā mīŋgi̍ chīɛ̍i̍ Mɛ̄lɛ̄ka̍a̍ tāŋgūl

¹ Ō wa̍ a̍ te̍le̍ŋ pi᷅lɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ Ha̍kāī, wāna̍ su̍a̍ā le̍ Mɛ̄lɛ̄ka̍ wo̍ yōōŋgōo̍ le̍ Sɛ̄lūba̍bɛ̄l, o̍ wa̍ māsa̍ ībūŋgāa̍ Chu̍dā wo̍, po̍ Si̍ɛ̍ɛ̍tīɛ̄l wo̍, a̍ Chɔ̄ɔ̍sūāā, māsa̍ wānāā sōlīāā lāsa̍lāa̍, po̍ Chɛ̄hōsa̍da̍kī wo̍. Wɔ̄sī Māsā Bɛ̍ndōo̍ Da̍līɔ̄ɔ̄ o̍ chi̍ŋa̍ wɔ̄sīla̍ŋ lā tīɔ̍ɔ̍ŋ o̍ lēmāsā Pa̍a̍sīāā wo̍, o̍ pāa̍le̍ tāse̍le̍ŋ chōo̍ o̍ pāŋgi̍i̍ ŋɔ̍mpu᷅mnde̍ ni᷄ŋ, pāa̍le̍ le̍ŋ Ha̍kāī o̍ di̍mi̍ yōōŋgōo̍ ho̍ō ni̍.

² Mi̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ ō dīmūl Ha̍kāī āā, “Wāŋnda̍ ha̍ā ā chō dīmīo̍o̍ māā te̍le̍ŋ nda̍ mīŋgī chi̍ɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ tāŋgūllo̍ ō fūūlu̍u̍ wɔ̍ le̍.”

³ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ ke᷅ Ha̍kāī, wāna̍ su̍a̍ā le̍ Mɛ̄lɛ̄ka̍ wo̍ yōōŋgōo̍ le̍ wāŋnda̍ Chūlu̍sɛ̄lɛ̄m. Mbo̍ dīmī āā,

⁴ “Wāŋnda̍ Chūlu̍sɛ̄lɛ̄m, vɛ᷅ mi̍ nya̍ wānu᷄ŋ o̍ chīɛ̄īlā kɛ̄ndɛ̄ kɛ̍ndɛ̄ la̍ŋ ni᷄ŋ, mi̍ chīɛ̄ī nūu̍ ndu̍ wa᷅ ō kōōmbi̍ɛ̍i̍?

⁵ Le̍la̍ŋ ya̍ Mɛ̍lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, nyɛ̄ ya̍ I̍ di̍mi̍ wo̍ cho̍ ho̍ō ni̍. Nya̍ pi̍la̍ lā cha᷄l lɔ̍ mī lā yīya̍ŋ a̍ mɛ̄ɛ̍ sɔ̄ɔ̍ŋ ŋ̄ chō nya̍ yɔ̄nɔ᷄ŋndo̍ yɛ̍.

⁶ Mī lā tōsa̍ wa̍lta̍ īchīɛ̄ɛ̄la̍ŋ ta̍u̍ ta̍u̍, kɛ̍ lā sɔ̍lā nyɛ̍ dīāā bɔ̄ɔ̍ le̍. Mī lā dē nyɛ̄ dīa̍a̍ kɛ̍ lā pi᷅m te̍. Mī lā sɔ̄la̍ mūɛ̄īmā kīle̍pīi̍ya̍ŋ le̍ kōlɔ̄ɔ̍, kɛ̍ lā hi̍nī kɔ᷅l te̍. Mī lā wōōnu̍ŋ nyɛ̍lā īhūēīla̍ŋ, kɛ̍ hūēīye̍ ī ki̍o̍lū nya̍ lēkɔ̄ɔ̍ le̍. Wānāa̍ cho̍ wa̍lta̍ pa̍a̍wāāla̍ŋ nda̍ bɛ̍ɛ̍, ka̍ni̍ŋ nda̍ sɔ̄lā wo̍ŋ ŋ̄ che᷅l nda̍ o̍ lābā le̍.

⁷ Nyɛ̄ ya̍ Mɛ̍lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍ dīmi̍ wo̍ cho̍ ho̍ō ni̍. Lā yīya᷄ŋ ndɔ̍ sɔ̍ɔ̍ŋ cho̍ mu᷅ŋ nya̍ yɔ̄nɔ᷄ŋndo̍ ki̍nɛ̍i̍ yo̍ŋ.

⁸ Le̍la̍ŋ, lā kɔ̍ o̍ pēmbo᷄ŋ chōo̍, mī lā kɔ̍ tɛ̍ndā pɛ̄ŋgɔ̍ŋ mī lā hu᷄ŋ mi̍ŋgī chīɛ̄ī nūu̍ tāŋgūl. Ko̍ŋ to̍sā ni̍ mī ya̍ Mɛ̍lɛ̄ka̍ hīni̍ kɔ̄l a̍ nya̍, ndu̍yɛ̍ mī lā mīīŋgu̍ vɛ̄lɛ̄ ya̍ bɛ̄ɛ̄le̍ŋ kīo̍o̍ māā pāāndū.

⁹ “Mɛ̄ɛ̍ nya̍ tōsa̍ chīɔ̄ɔ̄ŋ nyāa̍ŋ, mi̍ lā yīya᷄ŋ māā lā wa̍ nyɛ̄ dīa̍a̍ sɔ̄lā ta̍u̍ ta̍u̍, kɛ̍ lā sɔ̄la̍ nyɛ̍ dīāā bɔ̍ɔ̍ le̍. Ndu̍yɛ̍ ō pɔ̄mbɔ̄ nya̍ sɔ̄la̍ wo̍ bɛ̍ɛ̍, mɛ̄ɛ̍ nya̍ hēēlu̍ ndu̍ chi̍e̍e̍, mi̍ tɛ̍ɛ̍mbūū ndu̍. Le̍ sa̍bū he̍ī ī yɔ̄nu̍ŋ ndo̍ cho̍ ni̍, le̍ mɛ̄ɛ̍ nya̍ ma᷄l chīɛ̄ī nūu̍ mbo̍ wā īsīsi̍ fo̍ndō fo̍ndo̍, mi̍ wānā o̍ wānā ba᷅ŋ bōlle̍ŋ le̍ chīɛ̄ī ndɔ̍ ndu̍ pi̍la̍a̍ bɛ̄ɛ̄ndīa̍a̍ yɛ̍.

¹⁰ Le̍ sa̍bōo̍ ho̍ō ya̍ Mɛ̄lɛ̄ka̍ tōsa̍ ni̍ mɔ᷄mndo̍ bɛ̍ɛ̍ ō chu̍chū o̍ chīɔ̄ɔ̄ŋ nya᷄ŋ ni᷄ŋ te̍. Le̍ he̍ī, mi̍ tɔ̄lɔ̄ɔ̄lā nyāla̍ŋ lā kɛ̄ɛ̄ nāŋɔ̄ɔ̍ o̍ chīɔ̄ɔ̄ŋ nyāa̍ŋ ni᷄ŋ.

¹¹ Mi̍ to̍sā mi̍ wālū bɛ̄ndōo̍ sīm o̍ lɛ̄ŋndē nya̍le̍ŋ ni᷄ŋ, ndu̍yɛ̍ a̍ o̍ pēmbūŋ nyāa̍ŋ chōo̍. Tɔ̄lɔ̄ɔ̄la̍ŋ o̍ chīɔ̄ɔ̄ŋ nyāa̍ŋ ni᷄ŋ ni̍, yɔ̄mīī nyɛ̄i̍ ni̍, yɔ̄mīī nya̍ tōōsīāā chu̍ɛ̍i̍mā ɔ̄li̍fīi̍ya̍ŋ nde̍ ni̍, a̍ nyɛ̄ o̍ nyɛ̄ chēle̍ŋ wu᷅l o̍ lɛ̄ŋndē nyāle̍ŋ chōo̍, kpo̍u̍ mbo̍ tāmbū a̍ wālū kōŋ. Wāŋndā chīe̍e̍ya̍ bɛ̍ɛ̍ kpo̍u̍, a̍ chɔ̄lūa̍a̍ ma̍ sɔ̄lā dɛ̍nɛ̍ pa̍lāa̍ o̍ wālū bɛ̄ndōo̍ ho̍ō ni᷄ŋ. Nyɛ̄ o̍ nyɛ̄ nya̍ fāfa̍la̍ le̍ tōsāa̍ o̍ chīɔ̄ɔ̄ŋ nyāa̍ŋ ni᷄ŋ.”

Wāŋnda̍ I̍sɔ̄lūɛ̄ī a̍ to̍sa̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ wo̍

¹² O̍ ko̍ŋ, mi̍ Sɛ̄lūba̍bɛ̄l, po̍ Si̍ɛ̍ɛ̍ti̍ɛ̄l wo̍, a̍ Chɔ̄ɔ̍sūāā, māsa̍ wānāa̍ sōlīāā lāsa̍lāa̍, po̍ Chɛ̄hōsa̍da̍kī wo̍, a̍ wānāā tūa̍a̍ lo̍ yōōmū wa̍ mɛ̄ɛ̍ nda̍ tūēī nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndāa̍ ō dɔ̄ū Ha̍kāī, wāna̍ su̍a̍ā le̍ Mɛ̄lɛ̄ka̍ wo̍ o̍ sōndō mbo̍ dīmūl nda̍ wo̍, mi̍ sīōōŋnde̍ bīī nda̍ ma̍ tōsā nyɛ̄ Mɛ̄lɛ̄ka̍ dīmu̍l nda̍ wo̍.

¹³ O̍ ko̍ŋ kɔ̍ɔ̍lī, mi̍ Ha̍kāī, ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍, ō dīmūl nda̍ yōōŋgu̍ Mɛ̍lɛ̄ka̍ ke̍ ndu̍ le̍ nda̍ wo̍. Mbo̍ dīmūl nda̍ māā Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “I̍ cho̍ wā a̍ nya̍ lātūlu̍, būŋgɛ̄ī ya̍ I̍ chu̍e̍l nya̍ ve̍ cho̍ ke̍ŋ ni̍.”

¹⁴ Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ to̍sā mi̍ kɔ̄llo̍ yūsā Sɛ̄lūba̍bɛ̄l, māsa̍ ībūŋgāa̍ Chu̍dā, po̍ Si̍ɛ̍ɛ̍ti̍ɛ̄l wo̍, a̍ Chɔ̄ɔ̍sūāā, māsa̍ wānāā sōlīāā lāsa̍lāa̍, a̍ wānāā tūa̍a̍ kpo̍u̍, a̍ fu̍la̍ o̍ bīyɔ̄ɔ̍ ni᷄ŋ ma̍ mīīŋgū wa̍ le̍ mā tōsa̍ nyɛ̄ Mɛ̄lɛ̄ka̍ dīmu̍l nda̍ wo̍. Nda̍ kpo̍u̍ ma̍ chūūŋgi̍āŋ nāa̍ pi᷅lɛ̍, ma̍ kāndū chīɛ̍i̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, Mɛ̄lɛ̄ka̍ ndāa̍ mīŋgīo̍o̍ tāŋgūllo̍.

¹⁵ Wɔ̄sī māsāa̍ Da̍līɔ̄ɔ̄ chi̍ŋa̍ wɔ̄sīla̍ŋ lā tīɔ̍ɔ̍ŋ o̍ lēmāsā Pa̍a̍sīāā wo̍, pāŋgi̍i̍ ŋɔ̍mpu᷅mnde̍ o̍ wɔ̄sī kōŋ ni᷄ŋ, mālɔ̄ bi̍di̍i̍ŋ a̍ lē hīɔ̍ɔ̍lu̍, pāa̍le̍ le̍ŋ kpe̍e̍kpe̍i̍ nda̍ kāndu̍ chīɛ̍i̍ Mɛ̄lɛ̄ka̍a̍ ho̍ō mīŋgīo̍o̍ tāŋgūllo̍ ni̍.