Ɛ̍si̍lūā 1 - Yāu̍ Mɛ̄lɛ̄ka̍a̍

Sa̍i̍lɔ̄ɔ̄ chɛ̍l le̍ mī Chu̍ūwa̍ mīīŋgu̍ o̍ nda̍ lo̍

¹ Mɛ̄ɛ̍ Sa̍i̍lɔ̄ɔ̄ si̍mnu᷄ŋ ma̍sāa̍ le̍ Pa̍a̍sīāā, mi̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sā mi̍ nyɛ̄ ndu̍ Mɛ̄lɛ̄ka̍ dɔ̄ū sīndɛ̄ wāna̍ su̍a̍ā le̍ Mɛ̄lɛ̄ka̍ wo̍ Chɛ̄lūīma̍yā o̍ sōndō wo̍ ō chīŋā lāsōndō. O̍ wɔ̄sī Sa̍i̍lɔ̄ɔ̄ o̍ si̍mnu᷄ŋ ma̍sāa̍ wo̍ ni᷄ŋ kpe̍e̍kpe̍i̍ sūɛ̍i̍ he̍ī ī yɔ̍nu̍ŋ ni̍. Mi̍ Mɛ̄lɛ̄ka̍ tōsā mi̍ Sa̍i̍lɔ̄ɔ̄ yu̍sā kɔ̄llo̍, mbo̍ yɔ̄ŋgū yōōŋgōo̍ o̍ lɛ̄ŋndē ndɔ̄le̍ŋ ni᷄ŋ kpo̍u̍, ndu̍yɛ̍ mbo̍ tōsā ma̍ pōōnyīāā yōōŋgū kālāa̍ o̍ yāu̍wo̍ ni᷄ŋ. Yōōŋgū o̍ yɔ̍ŋ ndo̍ ndu̍ cho̍ ho̍ō ni̍ āā,

² “Ya̍ Sa̍i̍lɔ̄ɔ̄, māsā bɛ̍ndōo̍ le̍ Pa̍a̍sīāā kpo̍u̍, nyɛ̄ ya̍ di̍mi̍ wo̍ cho̍ ho̍ō ni̍. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ cho̍ ɛ̄chɛ̍nɛ̄ wo̍, ō ke̍ ya̍ māsɛ̄i̍ kpo̍u̍ o̍ chi̍e̍ēŋndo̍ ni᷄ŋ. Ndu̍yɛ̍ mbo̍ kē ya̍ di̍o̍o̍ le̍ mī te̍ŋgu̍l ndu̍ chīɛ̄īyo̍ Chūlu̍sɛ̄lɛ̄m, o̍ lɛ̄ŋndē Chu̍dāle̍ŋ ni᷄ŋ.

³ Le̍la̍ŋ, nya̍ cho̍ wānāā ndūāā wa̍, lā nɔ̄ mī lā mīīŋgu̍ Chūlu̍sɛ̄lɛ̄m o̍ lɛ̄ŋndē Chu̍dāle̍ŋ ni᷄ŋ, mī lā kɔ̍ ta̍ŋgūl chīɛ̍i̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ I̍sɔ̄lūɛ̍i̍ya̍, o̍ cho̍ Chūlu̍sɛ̄lɛ̄m ndo̍. Ndu̍yɛ̍, mbɔ̄ māā Mɛ̄lɛ̄ka̍ nyāa̍ ō wa̍ nyā kɔ̄ɔ̄lī fɔ̍.

⁴ Ndu̍yɛ̍, bā o̍ bā Chu̍ūwa̍ a̍ lo̍ ha̍ā yōōmū wa̍ ā chō īchāli̍, wānāā nda̍ chō īchāli̍ tɛ̍ɛ̄ŋ nda̍ ā nɔ̄ mā mālā nda̍ a̍ nyɛ̄m nda̍ hāū bā le̍ mu̍ŋ ndo̍ŋ. Nyɛ̄ o̍ nyɛ̄ nda̍ hāu̍ bā le̍ kɔ̄la̍ŋ nda᷅ŋ, ka̍ni̍ŋ hu̍mbū ni̍, ŋ̄ko̍o̍līi̍ ni̍, nyɛ̄ dīa̍a̍ le̍ kēīyo̍ dīo̍o̍ nɛ̄ī tɛ̍ɛ̄ŋ ni̍, lāchɔ̄lū ni̍, o̍ ko̍ŋ kɔ̍ɔ̍lī, a̍ nyɛ̄m nda̍ nɔ̄ le̍ yɔ̄ŋgōo̍ māā kē le̍ chīɛ̄ī nda̍ nɔ̄ ho̍ō le̍ tāŋgūllo̍ Chūlu̍sɛ̄lɛ̄m ndo̍ ni᷄ŋ, mu̍ŋ kpo̍u̍ ā nɔ̄ mā māla̍ nda̍ a̍ mu̍ŋ.”

⁵ Mɛ̄ɛ̍ yōōŋgōo̍ ho̍ō ō kōma̍l wāŋnda̍ kpo̍u̍, mi̍ Mɛ̄lɛ̄ka̍ sūāā wāŋnda̍ ā ti᷄ŋ o̍ lākɔ̄l Chu̍ūwa̍ tɛ̄ɛ̄ŋ, ma̍ bɛ̄ɛ̄ndīa̍ŋ le̍ kɔ̄la̍ŋ Chūlu̍sɛ̄lɛ̄m, le̍ mā kɔ̍ ta̍ŋgūl chīɛ̄īyo̍ le̍ Mɛ̄lɛ̄ka̍ Ya̍a̍wɛ̄ɛ̄. Wānāā Mɛ̄lɛ̄ka̍ sōō ka̍ŋ o̍ lākɔ̄l la̍ wa̍ ha̍a̍ ni̍, wānāa̍ wa̍ yu̍ŋgu̍ Chu̍dā wo̍, a̍ yu̍ŋgu̍ Bɛ̍ŋnja̍mīŋndo̍ bōlle̍ wa̍, a̍ wānāā sōlīāā lāsa̍lāa̍, a̍ Līva̍īya̍, a̍ wānāā chēle̍ŋ.

⁶ Ndu̍yɛ̍, mi̍ wānāā nda̍ chīɛ̄ɛ̄li̍āŋ nda̍ ā mālā nda̍ ma̍ kē nda̍ nyɔ̄ɔ̍ŋ ta̍u̍ ta̍u̍. Ma̍ kē nda̍ nyɛ̄m lāāndu᷄ŋ wa̍ ŋ̄ tōōsīāā a̍ ka̍ni̍i̍ hu̍mbūe̍i̍ yo̍ŋ, a̍ ŋ̍ wa̍ ŋ̄ tōōsīāā a̍ ko̍o̍līi̍yo̍ŋ ndo̍ŋ, a̍ nyɛ̄ dīa̍a̍ le̍ kēīyo̍ dīo̍o̍ nɛ̄ī tɛ̍ɛ̄ŋ, a̍ chɔ̄lūa̍a̍ a̍ ti᷄ŋ, a̍ nyɛ̄m ba̍ā kāla᷄ŋ ŋ̄ ti᷄ŋ, o̍ ko̍ŋ kɔ̍ɔ̍lī, a̍ nyɔ̄ɔ̍ŋ le̍ yɔ̄ŋgōo̍ o̍ Mɛ̄lɛ̄ka̍ lo̍ māā lā kē o̍ chīɛ̍i̍ Mɛ̄lɛ̄ka̍a̍ ni᷄ŋ.

⁷ O̍ ko̍ŋ kɔ̍ɔ̍lī, nyɛ̄m lāāndūŋ Māsāa̍ Bɛ̍ndōo̍ Nābi̍u̍kānɛ̍ɛ̍sā ndu̍ o̍o̍ chu̍a̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ ni᷄ŋ Chūlu̍sɛ̄lɛ̄m, mi̍ ndu̍ o̍o̍ kɔ̍ kɛ̍sī mu̍ŋ o̍ chīɛ̍i̍ mɛ̄lɛ̄ka̍a̍ ndūa̍a̍ ni᷄ŋ ndo̍ŋ, mi̍ Māsāa̍ Sa̍i̍lɔ̄ɔ̄ o̍ kɔ̍ so̍lī mu̍ŋ kpo̍u̍ mbo̍ hūŋ a̍ mu̍ŋ.

⁸ O̍ ko̍ŋ kɔ̍ɔ̍lī, mi̍ māsāa̍ Sa̍i̍lɔ̄ɔ̄ o̍ di̍mūl Mītīlu̍ɛ̍da̍tī, wāna̍ kɛ̍sī nyɛ᷅ sɔ̄lāā lēmāsāa̍ wo̍, le̍ mbō chɔ᷄m nyɔ̄ɔ̍ŋ mu᷅ŋ chɛ̍kpɛ̍ chɛ̍kpɛ̍, mbō dɔ̄ū mu̍ŋ o̍ yāu̍ ni̍ŋ mbō kē Sīɛ̄sība̍a̍sā, wāna̍ wa̍ māsa̍ ībūŋgāa̍ le̍ Chu̍dā wo̍.

^9-10 Nyɛ̄m mu̍ŋ cho̍ mu᷅ŋ ni̍, hɛ̄ŋgɛ̍i̍la̍ nda̍ tōōsi̍a̍a̍ a̍ ko̍o̍līi̍ye̍ la̍ŋ, be̍le̍-ya̍a̍ (30), a̍ hɛ̄ŋgɛ̍i̍la̍ nda̍ tōōsi̍a̍a̍ a̍ ka̍ni̍i̍ hu̍mbūe̍i̍ la̍ŋ, wāa̍ ō pīlɛ̍ (1,000), a̍ hɛ̄ŋgɛ̍i̍la̍ che᷅le̍ŋ nda̍ŋ bi̍dīi̍ŋ a̍ lā ŋɔ̄ma̍hīɔ̍ɔ̍lu̍ (29), a̍ hɛ̄ŋgɛ̍i̍la̍ pɔ̍mbɔ̄lā nda̍ tōōsi̍a̍a̍ a̍ ko̍o̍līi̍ye̍ la̍ŋ, be̍le̍-ya̍a̍ (30), a̍ hɛ̄ŋgɛ̍i̍la̍ pɔ᷅mbɔ̄lā nda̍ tōōsi̍a̍a̍ a̍ ka̍ni̍i̍ hu̍mbūe̍i̍ la̍ŋ, kɛ̄mɔ̄ɔ̍ lē hīɔ̍ɔ̍lu̍ a̍ tɔ̍ (410), a̍ nyɛ̄m lāāndūŋ chēle̍ŋ ndo̍ŋ, wāa̍ ō pīlɛ̍ (1,000).

¹¹ Mɛ̄ɛ̍ fa̍ū fa̍ū nyɛ̄m lāāndūŋ nda̍ tōōsi̍a̍a̍ a̍ ka̍ni̍i̍ hu̍mbūe̍i̍ yo̍ŋ ni̍, a̍ ŋ̄ nda̍ tōōsi̍a̍a̍ a̍ ko̍o̍līi̍ye̍ wo̍ŋ, ŋ̄ wa̍ wāa̍la̍ŋ lā ŋūɛ̍ɛ̍nu̍, a̍ kɛ̄mɔ̄ɔ̍ lē hīɔ̍ɔ̍lu̍ (5,400). O̍ ko̍ŋ, mi̍ Sīɛ̄sība̍a̍sā o̍ chu̍ā nyɔ̄ɔ̍ŋ mu᷅ŋ kpo̍u̍ nāa̍ nda̍ wa̍ o̍ bīyɔ̄ɔ̍ ni᷄ŋ Ba̍bi̍lɔ̄ŋ nda̍, mbo̍ kūā a̍ mu̍ŋ Chūlu̍sɛ̄lɛ̄m.