Ɛ̄fi̍sīāŋnda̍ 1 - Yāu̍ Mɛ̄lɛ̄ka̍a̍

¹ Ya̍ Pɔ̍ɔ̍l, ya̍ cho̍ ho̍ō māā wāna̍ Chi̍i̍sū Ki̍li̍tī ve᷅m hɔ̄ltē ndɔ̄ o̍ hɛ̄na᷄ŋ Mɛ̄lɛ̄ka̍a̍ ni᷄ŋ ndo̍, ya̍ cho̍ yāu̍wo̍ ho̍ō pōōnyīa̍a̍ ni̍. I̍ cho̍ ndu̍ pōōnyīa̍a̍ nāa̍ nya̍ wānāa̍ Mɛ̄lɛ̄ka̍a̍ chūā Ɛ̍fi̍sīā chi̍e̍e̍, nya̍ cho̍ ha̍ā īsīsi̍ yi̍ o̍ tīīnda᷄ŋ nya̍ nɔ̄ o̍ Chi̍i̍sū Ki̍li̍tī ni̍ŋ ndo̍ wa̍.

² I̍ cho̍ pīɛ̄īle̍ŋ māā Mɛ̄lɛ̄ka̍ fi̍nyā nāa̍ a̍ Māsānɔ̄ɔ̍ Chi̍i̍sū Ki̍li̍tī māā ā yīya̍ŋ nya̍ chōo̍, ndu̍yɛ̍, mā ke̍ nya̍ kɔ̄l nyūlōo̍ fɔ̍.

Mɛ̄lɛ̄ka̍ ke̍ na̍a̍ nyɛ̄m kɛ̄ndɔ᷄ŋ le̍ mɛ̄ɛ̍ na̍a̍ ŋ̄ chō dīōm pīlɛ̍ a̍ Ki̍li̍tī yɛ̍

³ Lā ŋ̄ mēlnu᷅ŋ Mɛ̄lɛ̄ka̍ ba̍li̍ka̍ o̍ cho̍ fi̍nyāa̍ le̍ Māsānɔ̍ nāa̍ Chi̍i̍sū Ki̍li̍tī wo̍. Kāni̍ fu̍u̍le̍, ō dɔ̄ū na̍a̍ sa̍lā mbo̍ kē na̍a̍ nyɛ̄m kɛ̄ndɔ᷄ŋ fa̍ū ŋ̍ cha᷅ŋ o̍ fo̍ndāŋ ndɔ̄ɔ̍ wo̍ŋ, le̍ mɛ̄ɛ̍ na̍a̍ ŋ̄ chō dīōm pīlɛ̍ na̍a̍ Ki̍li̍tī wa̍ā yɛ̍.

⁴ Ndu̍yɛ̍, le̍ chō na̍a̍ ŋ̄ chō ko̍ŋ o̍ dīōm pīlɔ̍ɔ̍ ni᷄ŋ na̍a̍ Ki̍li̍tī wa̍ā wo̍, mi̍ Mɛ̄lɛ̄ka̍ hɛ̄lī na̍a̍ le̍ wāa̍ wānāā ndɔ̄ lɔ̍ɔ̍ pa̍ bɛ̍ɛ̍ o̍ to̍o̍sīāā chi̍e̍ēŋndo̍. Ō hɛ̄li̍ na̍a̍ le̍ mī ŋ̄ wa̍ ā yɔ̄ŋga᷄ŋ le̍ ndu̍ Mɛ̍lɛ̄ka̍, ndu̍yɛ̍, mī kɔ̄ltā nāāla̍ŋ lā wa̍ lā dīāndāā wa̍la̍ŋ ndu̍ o̍ hɔ̄l. Ndu̍yɛ̍, le̍ kāālā Mɛ̄lɛ̄ka̍ kāāla̍ na̍a̍ wo̍

⁵ ō chīi̍ na̍a̍ ni᷅ŋ yūlɔ̄ɔ̄ o̍ sa̍bu̍ Chi̍i̍sū Ki̍li̍tīo̍o̍ ni᷄ŋ le̍ mbō sīīŋgu̍u̍ na̍a̍ chūāūwāā ndɔ̄, mɛ̄ɛ̍ ndu̍ Mɛ̍lɛ̄ka̍ pi̍la̍ kɛ̍ɛ̍si̍a̍a̍ o̍ hɛ̄na᷄ŋ ndɔ̄ɔ̍ ni᷄ŋ yɛ̍.

⁶ Ō tōsa̍ mātōsāā he̍ī le̍ mī ŋ̄ sāŋga̍la̍ ndu̍ le̍ kɛ̄ndɛ̄ī bɛ̍ndūī o̍ to̍sa̍l na̍a̍ he̍ī ye̍. Fo̍ndō o̍ to̍sa̍l na̍a̍ ndi̍ ni̍ sa̍na̍a̍ o̍ sa̍bu̍ wāna̍ o̍ ka̍a̍la̍ ho̍ō wo̍ ni᷄ŋ.

⁷ Ndu̍yɛ̍, pīɔ̍m Chi̍i̍sū Ki̍li̍tī vi᷅ wo̍, ndu̍ to̍sa̍ ni̍ mi̍ ŋ̄ sɔ̄lā bāŋa᷄ŋndo̍, ko̍ŋ cho̍ ni̍, mi̍ ŋ̄ sɔ̄lā mālɔ̄ɔ̍ le̍ yɔ̄ŋndā wɔ̄ɔ̍ŋndā na̍a̍ ŋ̄ tōsa̍ la̍ŋ. Kɛ̄ndɛ̄ī bɛ̍ndū bɛ̄ndūe̍i̍ Mɛ̄lɛ̄ka̍ tōsa̍l na̍a̍ he̍ī ni̍.

⁸ Kɛ̄ndɛ̄i̍ nɔ̍ la̍mɛ̍ɛ̍lu̍ le̍ ve̍ o̍ to̍sa̍l na̍a̍ he̍ī ni̍. Mɛ̄lɛ̄ka̍ nɔ̍ kɔ̄l kālo̍o̍ kpo̍u̍ o̍ bā ni̍, ndu̍yɛ̍, ō sīnā i̍sɔ̍ɔ̍ o̍ īsɔ̄ɔ̍ fe̍e̍ pɛ̍ŋgu̍.

⁹ Le̍ he̍ī, mbo̍ tōsā nyɛ̄ o̍ kɛ̍ɛ̍si̍a̍a̍ le̍ tōsāa̍ wo̍. Sɔ̄ɔ̍ŋ ndu̍ o̍o̍ kɛ̍ɛ̍si̍a̍a̍ ni᷅ŋ pāāndū le̍ tōsāa̍ sa̍na̍a̍ o̍ sa̍bu̍ Ki̍li̍tīo̍o̍ ni᷄ŋ, kɛ̍ mi̍ mu̍ŋ wa᷅ ŋ̄ vīāŋāā wo̍ŋ, mbo̍ tōsā mi̍ ŋ̄ sīnā mu̍ŋ.

¹⁰ Tē bōōndi̍i̍ Mɛ̄lɛ̄ka̍ pi̍la̍ bɛ̍ɛ̍ndi̍a̍a̍ ve̍ ī fūūlu̍u̍ pɛ̍, ō chō nyɛ̄ o̍ kɛ̍ɛ̍si̍a̍a̍ wo̍ sīōū tōsā. Ko̍ŋ cho̍ ni̍, nyɛ̄ o̍ nyɛ̄ fe̍e̍ Mɛ̄lɛ̄ka̍ to̍o̍si̍a̍a̍, mu᷅ŋ o̍ fo̍ndāŋ ndɔ̄ɔ̍ ni̍, a̍ mu᷅ŋ o̍ chi̍e̍ēŋndo̍ chōo̍, mbō chūūŋgi̍a̍a̍ mu̍ŋ dīōm pīlɛ̍ mī Ki̍li̍tī wa̍ mu̍ŋ bōlle̍ŋ kpo̍u̍.

¹¹ Mɛ̄lɛ̄ka̍ yūlū na̍a̍ māyūlāā le̍ wāa̍ wānāā ndɔ̄ mɛ̄ɛ̍ ndu̍ pi̍la̍ kɛ̍ɛ̍si̍a̍a̍ yɛ̍, ndu̍yɛ̍, mbo̍ tōsā mi̍ nyɛ̄ o̍ nyɛ̄ yɔ̄nu᷄ŋ o̍ hɛ̄na᷄ŋ ndɔ̄ɔ̍ ni᷄ŋ. Le̍la̍ŋ, le̍ chō na̍a̍ ŋ̄ chō o̍ dīōm pīlɛ̍ ni᷄ŋ na̍a̍ Ki̍li̍tī wa̍ā wo̍ mi̍ Mɛ̄lɛ̄ka̍ hɛ̄lī na̍a̍ le̍ wāa̍ wānāā ndɔ̄.

¹² Le̍ sa̍bū mu᷅ŋ ki̍nɛ̍i̍ ŋ̍ yɔ̍nu̍ŋ ndo̍ cho̍ ni̍ māā le̍ mī na̍a̍ ŋ̍ wa̍ ha̍ā wānāā tāsi̍a̍a̍ le̍ tīīnda᷄ŋndo̍ dɔ̄wɔ̄ɔ̍ o̍ Ki̍li̍tī ni̍ŋ nda̍ mī ŋ̄ tōsa̍ mī wāŋnda̍ sāŋga̍la̍ Mɛ̄lɛ̄ka̍ le̍ mɛ̄ɛ̍ o̍ cho̍ wāna̍ kɔ̄ndɔ̄fi̍li̍ yɛ̍.

¹³ Nya̍ bɛ̍ɛ̍ le̍nde̍ ko̍ni̍ i̍ yɔ̍nu̍ŋ a̍ nya̍ o̍kɔ̄ɔ̄ ni̍. Mɛ̄ɛ̍ nya̍ tūēī yōōŋgū tōnya̍a̍ ho̍ō, ndu̍ yɔ̍nūŋ ni̍ māā Yōōŋgū Kɛ̄ndɛ̍ Mɛ̄lɛ̄ka̍a̍ ō nya̍ sɔ̄la̍ pīōŋɔ̄ɔ̍ lēni᷄ŋ ndo̍, mi̍ lā dūāū tīīnda᷄ŋ nyāa̍ o̍ Ki̍li̍tī ni̍ŋ. Mi̍ Mɛ̄lɛ̄ka̍ tōsā mi̍ Nyi̍nā ndɔ̄ Kāsīo̍o̍ tūāl nya̍ kɔ̄ɔ̄lī mɛ̄ɛ̍ o̍ chu̍a̍ būŋgɛ̄i̍ yɛ̍, le̍ wāa̍ māā tāāmāsi̍ le̍ chɔ̄mndo̍ māā ndu̍ Mɛ̍lɛ̄ka̍ nɔ̍ nya̍ ni̍.

¹⁴ Ndu̍yɛ̍, tōlɔ̄ɔ̄ Nyi̍na̍ Mɛ̄lɛ̄ka̍a̍ tūāl na̍a̍ kɔ̄ɔ̄lī wo̍ chō māchūāā, māā tāāmāsi̍ le̍ chɔ̄mndo̍ māā na̍a̍ bɛ̍ɛ̍ Mɛ̄lɛ̄ka̍ chō na̍a̍ nyɛ̄ o̍ chu̍a̍ būŋgɛ̄i̍ le̍ wānāā ndūa̍a̍ kīo̍o̍ wo̍ kē. Ndu̍yɛ̍, mu᷅ŋ ki̍nɛ̍i̍ mɛ̄ɛ̄lu̍la̍ ndɔ̄la̍ŋ la̍ cho̍ ni̍ māā Mɛ̄lɛ̄ka̍ chō wānāa̍ cho̍ mīāl ndɔ̄ wa̍ bāŋā le̍ mbō lo̍ o̍ ko̍ŋ mī wāŋnda̍ ā sāŋga̍la̍ Mɛ̄lɛ̄ka̍ le̍ mɛ̄ɛ̍ o̍ cho̍ wāna̍ kɔ̄ndɔ̄fi̍li̍ yɛ̍.

Pɔ̍ɔ̍l pi̍ɛ̍i̍ Mɛ̄lɛ̄ka̍ le̍ wānāā o̍ yɔ̍ŋ yāu̍wo̍ wa̍

¹⁵ Le̍ sa̍bū kōŋ, chɔ̍ŋ a̍ bōōndi̍i̍ ya̍ I̍ tu̍e̍ī a̍ mɛ̄ɛ̍ kpɛ̍ nya̍ lāāla̍ŋ a̍ Māsānɔ̄ɔ̍ Chi̍i̍sū yɛ̍ ve̍ a̍ mɛ̄ɛ̍ nya̍ kāāla̍ wānāa̍ Mɛ̄lɛ̄ka̍a̍ kpo̍u̍ yɛ̍, le̍ te̍le̍ŋ o̍ te̍le̍ŋ

¹⁶ I̍ cho̍ Mɛ̄lɛ̄ka̍ ba̍li̍ka̍a̍ mēllo̍ le̍ nya̍, ndu̍yɛ̍, mi̍ wa᷅ ndu̍ pīɛ̄īyo̍ le̍ nya̍.

¹⁷ O̍ ko̍ŋ kɔ̍ɔ̍lī, Mɛ̄lɛ̄ka̍ ō Māsānɔ̍ nāa̍ Chi̍i̍sū Ki̍li̍tī o̍ pi̍ɛ̍ī yo̍, ndu̍ yɔ̍nūŋ ni̍ māā Fi̍nyā nāa̍ kɔ̄ndɔ̄fi̍li̍ bɛ̄ndōo̍, mi̍ pi̍ɛ̍ī ndu̍ le̍ nya̍. I̍ pi̍ɛ̍i̍ ndu̍ le̍ mbō tōsa̍ mī Nyi̍nā ndɔ̄ɔ̍ tōl nya̍ kɔ̄ɔ̄lī, ndu̍yɛ̍, mbō ke̍ nya̍ kɔ̄l kālu̍ Mɛ̄lɛ̄ka̍a̍, o̍ ko̍ŋ kɔ̍ɔ̍lī, mbō chɔ᷄m nya̍ sɔ̄ɔ̍ŋ a̍ Mɛ̍lɛ̄ka̍ o̍kɔ̄ɔ̄ le̍ mī lā chɔ̄ɔ̄lu̍ sīnā a̍ ndu̍ o̍kɔ̄ɔ̄ wa̍la̍ŋ.

¹⁸ I̍ cho̍ vɛ̄lɛ̄ pīɛ̄īle̍ŋ māā Mɛ̄lɛ̄ka̍ ō tōsa̍ mī nyɛ̄ wa̍wo̍ŋ ndɔ̄ɔ̍ tēŋga̍ o̍ kɔ̄ltā nyāla̍ŋ ni᷄ŋ le̍ mī lā sīna̍ nyɛ̄ o̍ ve̍e̍lu̍ nya̍ ho̍ō le̍ wāa̍ lēhɔ̄l o̍ nɛ̄ī le̍ ndu̍ wo̍. Ko̍ŋ cho̍ ni̍, mī lā sīna̍ nyɛ̄m ke᷅ŋ sūlāŋ bɛ̄ndūŋ o̍ chu̍a̍ būŋgɛ̄i̍ le̍ wānāā ndūa̍a̍ kīo̍o̍ wo̍ŋ.

¹⁹ Ndu̍yɛ̍, I̍ cho̍ pīɛ̄īle̍ŋ māā le̍ mī lā sīna̍ mɛ̄ɛ̍ kpāāya̍ ndɔ̍ cho̍ wa̍llo̍ o̍ na̍a̍ wānāa̍ ti̍i̍nda̍ŋ o̍ ndu̍ ni̍ŋ nda̍ wo̍, ō chō kpāāya̍ kɔ̄ndɔ̄fi̍li̍ bɛ̄ndū yɛ̍. Kpāāyā ko̍ŋ, ndu̍ ko̍ cho̍ kpāāyā bɛ̍ndū

²⁰ Mɛ̄lɛ̄ka̍ mīŋgi̍ Ki̍li̍tī yōōmū a̍ ndu̍ wo̍ ni̍, mbo̍ kɔ̍ kɛ̍si᷄ŋ ndu̍ īkɛ̄i̍ o̍ fo̍ndāŋ lēbīɔ̍ɔ̍ o̍ bā ndɔ̄ kɛ̍ndɔ̄ɔ̍ chōo̍ o̍ fo̍nda᷄ŋ Mɛ̄lɛ̄ka̍a̍ chōo̍ cho̍o̍.

²¹ Lo̍ŋ Mɛ̄lɛ̄ka̍ ke̍ ndu̍ nāa̍ si̍māa̍ ni̍, mbo̍ hīāū a̍ kpāāyā o̍ kpāāya̍ īnyi̍nāya̍ cho̍ o̍ ha̍la̍a̍ ni᷄ŋ. Ko̍ŋ cho̍ ni̍, Nyi̍nāā cho̍ māā lāmāsā wa̍ ni̍, a̍ nyi̍nāā nɔ̍ tɔ̍ɔ̍ wa̍, a̍ nyi̍nāā nɔ̍ kpāāyāa̍ wa̍, a̍ nyi̍nāā, ā fo̍ndāŋndā yɛ̍ yɛ̍la̍ŋ o̍ ha̍la̍a̍ ni᷄ŋ la̍ cho̍ o̍ bā bɛ̄ŋgu̍ wa̍, a̍ nyi̍nāā nɔ̍ nāa̍ si̍māā bɛ̄ndūa̍a̍ wa̍ kpo̍u̍, nāa̍ si̍māa̍ Ki̍li̍tīa̍a̍ nda̍ hi̍o̍ū po̍lo̍ŋ po̍lo̍ŋ. Kpāāya̍ Ki̍li̍tīo̍o̍ ho̍ō ō cho̍ ko̍ le̍ pɛ̍ŋgo̍o̍ ho̍ō le̍, kɛ̍ mbō kūɛ̄ bɛ̍ɛ̍ a̍ lāchī kɛ᷅.

²² Ndu̍yɛ̍, Mɛ̄lɛ̄ka̍ tōsa̍ mi̍ nyɛ̄ o̍ nyɛ̄ fe̍e̍ wa᷅ Ki̍li̍tī o̍ bā bɛ̄ŋgu̍. Ndu̍yɛ̍, mbo̍ yūlū ndu̍ le̍ wāa̍ bōllē ku̍ndā wānāā lāāla᷄ŋnda̍ o̍ nyɛ̄ o̍ nyɛ̄ fe̍e̍ ni̍ŋ.

²³ Ndu̍yɛ̍, Ki̍li̍tī o̍ cho̍ ho̍ō wāna̍ to̍sā mī nyɛ̄ o̍ nyɛ̄ bā o̍ bā fe̍e̍ o̍ si̍mnu᷄ŋ mɛ̄ɛ̍ o̍ nɔ̍ le̍ wāa̍ yɛ̍ wo̍, ndu̍ bɛ̍ɛ̍ mbo̍ sīmnu᷄ŋ mɛ̄ɛ̍ o̍ nɔ̍ le̍ wāa̍ yɛ̍, kāni̍ fu̍u̍le̍, le̍ mɛ̄ɛ̍ o̍ sɔ̍la̍ ku̍ndā wānāā lāāla᷄ŋnda̍ yɛ̍.