Dītɔ̍nɔ̍mi̍ī 1 - Yāu̍ Mɛ̄lɛ̄ka̍a̍

Sɔ̄ɔ̍ŋ le̍bo̍llo̍ŋ

¹ Yāu̍wo̍ ho̍ō ō chō māchūāā ko̍na̍a̍ a̍ dīōmndā Mūu̍sē o̍ so̍ō nāa̍ I̍sɔ̄lūɛ̍i̍ya̍ chūā la̍ŋ o̍kɔ̄ɔ̄, bōōndi̍i̍ nda̍ wa̍ o̍ lɛ̄ŋndē po̍lte̍ŋ ni᷄ŋ Chɔ̍ɔ̍dāŋ le̍e̍lōo̍, bā pāa̍le̍ŋ lē chāŋndo̍ ve̍. A̍ te̍le̍ŋ ko̍ŋ, I̍sɔ̄lūɛ̍i̍ya̍ ā wa̍ o̍ dɔ̍ɔ̍ŋgɔ̍ɔ̍ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ Chɔ̍ɔ̍dāŋ, Su̍fī i̍kɛ̍i̍. Dɔ̍ɔ̍ŋgɔ̍ɔ̍ ho̍ō ō wa̍ Pa̍lūāŋ chi̍e̍e̍ tɛ̍ɛ̄ŋ a̍ chi̍o̍o̍ŋ ŋ̄ pīlɔ̍ŋ, mu̍ŋ yɔ̍nūŋ ni̍ māā To̍fɛ̄ɛ̄l, a̍ Le̍bāŋ, a̍ Hāsɛ̍lɔ̍tī, a̍ Dīsa̍ha̍bī.

² (Ndu̍yɛ̍ chɔ̍ŋ o̍ Pēmbīī Sa̍a̍nāīve̍ kɔ̍ Ka̍dɛ̍sī Ba̍a̍nīāā, kēēkōo̍ a̍ lɛ̄ŋndē īpēmbūle̍ŋ I̍dɔ̄m, ō chō ti᷅ŋ kɔ̄lā pālɛ̍i̍ tɔ̍ a̍ lē pīlɛ̍).

³ Mɛ̄ɛ̍ I̍sɔ̄lūɛ̍i̍ya̍ ā ma᷄l I̍chi̍pī le̍ kɔ̄la̍ŋ Ke̍nāŋ, wɔ̄sī nda̍ chīŋa̍ wɔ̄sīla̍ŋ be̍le̍-hi̍ɔ̍ɔ̍lu̍ o̍ ti᷅ŋndo̍ tɛ̄ɛ̄ŋ ndo̍, pāa̍le̍ tāse̍le̍ŋ o̍ pāŋgi̍i̍ tɔ̍ a̍ ī pīlɛ̍i̍ o̍ wɔ̄sī kōŋ ni᷄ŋ, pāa̍le̍ le̍ŋ Mūu̍sē o̍ di̍mu̍l I̍sɔ̄lūɛ̍i̍ya̍ nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū ndu̍ o̍ sōndō le̍ nda̍ dīmūllo̍ ni̍.

⁴ Ndu̍yɛ̍ a̍ te̍le̍ŋ ko̍ŋ, Mūu̍sē ndu̍ o̍o̍ ye᷅m ni᷅ŋ Māsā Bɛ̍ndōo̍ Si̍hɔ̄ŋ, māsa̍ A̍mɔ̍lu̍a̍i̍tīi̍ya̍ o̍ wa̍ īchāli̍ Hɛ̍si̍bɔ̄ŋ chi̍e̍e̍ wo̍, a̍ Māsā Bɛ̍ndōo̍ Ɔ̍kū, māsāa̍ o̍ lɛ̄ŋndē Ba̍a̍sīāŋnde̍ŋ ni᷄ŋ o̍ wa̍ īchāli̍ Āsi̍ta̍lɔ̍tī chi̍e̍e̍ a̍ I̍du̍lūēī chi̍e̍e̍ wo̍.

⁵ I̍sɔ̄lūɛ̍i̍ya̍ ā wa̍ Chɔ̍ɔ̍dāŋ le̍e̍lōo̍, bā pāa̍le̍ŋ lē chāŋndo̍, o̍ būŋgɛ̄ī Mo̍wa̍bīve̍ ni᷄ŋ, mi̍ Mūu̍sē o̍ ka̍ndū nda̍ nyɛ̄ Mɛ̄lɛ̄ka̍ o̍ dīmūl nda̍ wo̍ tɛ̄ɛ̄sīāllo̍. Mbo̍ dīmūl nda̍ āā,

⁶ “Bōōndi̍i̍ na̍a̍ ŋ̄ wa̍ o̍ Pēmbīī Sa̍a̍nāīve̍ ve̍, mi̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō dīmūl na̍a̍ āā, ‘Lā vīōū ni᷅ŋ bɔ̍ɔ̍ o̍ pēmbēi̍ he̍ī.

⁷ Lā Pūūsi̍a̍a̍ dɔ̍ɔ̍ŋgɔ̍ɔ̍ mī lā hīōū lāchī a̍ kɔ̄la̍ŋ. Lā kɔ̍ o̍ lɛ̄ŋnde̍ īpēmbūlē A̍mɔ̍lu̍a̍i̍tīi̍ya̍, ndu̍yɛ̍ a̍ wānāā nda̍ chīɛ̄ɛ̄li̍āŋnda̍ o̍ fo̍ndāŋndā ndāla̍ŋ kpo̍u̍. La̍ŋ la̍ yɔ̍nūŋ ni̍ māā dɛ̍ŋgbɔ̍ɔ̍ o̍ pēmbo᷄ŋ tɛ̄ɛ̄ŋ Chɔ̍ɔ̍dāŋ, a̍ o̍ lɛ̄ŋndē īpēmbūle̍ŋ, ndu̍yɛ̍ a̍ o̍ lɛ̄ŋnde̍ dɛ̍ŋgbɛ̍le̍ŋ o̍ pēmbo᷄ŋ bɛ̄ŋgu̍, a̍ o̍ būŋgɛ̄i̍ cho̍ bā tōūwo̍ ve̍ ni᷄ŋ, o̍ ko̍ŋ kɔ̍ɔ̍lī, a̍ o̍ Pēē Mɛ̄ŋmā Īhɛ᷄llo̍ Mɛ̄dītālu̍e̍e̍nīāā kɔ̍ŋgɔ̍. Mī lā hīōū o̍ lɛ̄ŋndē Ke̍nāŋnde̍ŋ ni᷄ŋ ndu̍yɛ̍ a̍ o̍ pēmbūŋ Le̍ba̍nɔ̄ŋndo̍ŋ lēkɔ̍ɔ̍lī, ndu̍yɛ̍ mī lā kūɛ̄ di̍ o̍ Pēē Bɛ̍ndōo̍ Yūfi̍lu̍a̍tīī.

⁸ Lɛ̄ŋnde̍ŋ nde᷅ŋ kpo̍u̍, nya̍ ya̍ Mɛ̍lɛ̄ka̍ ke̍ le̍ŋ ni̍. Le̍ŋ ya̍ Mɛ̍lɛ̄ka̍ Ya̍a̍wɛ̄ɛ̄ I̍ chu̍e̍l fi̍nyāā nyāā ma̍māa̍, E̍bīlāha᷅m, a̍ Āa̍se̍, a̍ Che̍kɔ̍pū būŋgɛ̄i̍ sīndɛ̄ ni̍ māā I̍ cho̍ nda̍ le̍ŋ kē māā nyɛ̄ ndā, nda̍ ni̍ a̍ chūāūwāā ndāa̍ lēpūlā kɛ᷅. Le̍la̍ŋ lā kɔ̍ mī lā kɔ̍ chu̍ā le̍ŋ māā nyɛ̄ nyā.’ ”

A̍ mɛ̄ɛ̍ Mūu̍sē o̍ hɛ̍li̍ māsāa̍ kɔ̍ɔ̍sā a̍ wāŋnda̍ wa̍ yɛ̍ o̍kɔ̄ɔ̄

⁹ Mi̍ Mūu̍sē o̍ hi̍a̍ū lāchī a̍ sūɛ̍i̍ nāa̍ I̍sɔ̄lūɛ̍i̍ya̍ chūā, mbo̍ dīmūl nda̍ āā, “Bōōndi̍i̍ na̍a̍ ŋ̄ wa̍ ke̍ŋ o̍ Pēmbīī Sa̍a̍nāīve̍ ve̍, mi̍ lo᷅ o̍ ko̍ŋ mi̍ di̍mūl nya̍ a̍a̍, ‘Le̍ ya̍ pīlɛ̍ mī wa̍ nya̍ chīla̍ŋ I̍ ti̍ū ba̍ le̍, ī chō bɔ̍ɔ̍ wo̍lɔ̄ɔ̄lā lūsu̍lɛ̍i̍la̍ bɛ̍ndū le̍ ya̍.

¹⁰ Kāni̍ fu̍u̍le̍, Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō tōsa̍ mi̍ lā kūī kūīyo̍ pīla̍. Lā kūi̍ ha̍a̍a̍, mɛ̄ɛ̍ lōo̍ŋ ŋ̄ chō nu̍a̍ā o̍ ha̍la̍a̍ ni᷄ŋ fa̍ŋgā yɛ̍, le̍nde̍ nya̍ chō ni̍.

¹¹ Ndu̍yɛ̍ mbɔ̄ māā Mɛ̄lɛ̄ka̍ Ya̍a̍wɛ̄ɛ̄, Mɛ̄kɛ̄la̍ fi̍nyāā nyāā ma̍māa̍ nda̍ a̍a̍ pi̍ɛ̍īyo̍ ō pēēlu̍ būŋgɛ̄ī o̍ chu̍e̍l nya̍ ve̍, mbō tōsa̍ mī lā hīōū lāchī a̍ kūīyo̍ wāa̍la̍ŋ o̍ wāa̍la̍ŋ ni᷄ŋ fɔ̍, ndu̍yɛ̍ mbɔ̄ māā ō tōsa̍ mī dɛ̍nɛ̍ kɛ̍ndɛ̄ bɛ̄ndōo̍ ō wa̍ le̍ nya̍ fɔ̍.

¹² Kɛ̍ ndu̍yɛ̍ ya̍ pīlɛ̍, I̍ nɔ̍lā mī ti̍u̍ o̍ sɔ̄ɔ̍ŋ nyāa̍ŋ ni᷄ŋ te̍, bālā hāvɛ̍i̍la̍ nyāla̍ŋ sōlīo̍o̍, ndu̍yɛ̍ a̍ sɔ̄ɔ̍ŋ nya̍ dīmīo̍o̍ tɛ̄ɛ̄ŋ te̍.

¹³ Mi̍ lo᷅ o̍ ko̍ŋ mi̍ di̍mūl nya̍ māā o̍ yu̍ŋgu̍ o̍ yu̍ŋgu̍ cho̍o̍, lā hɛ̄li̍ pu̍a̍a̍ kɔ̄l kālu̍a̍a̍, a̍ nɔ̍ sīnā pɛ̄ŋgo̍o̍ ndu̍yɛ̍ a̍ tāāsi̍o̍o̍ wa̍, mī ha̍ndu̍ nda̍ nya̍ bōlle̍ŋ.’

¹⁴ Ndu̍yɛ̍ mi̍ lā chɛ̄la᷅ŋ a̍ nyɛ̄ ya̍ I̍ di̍mi̍ wo̍ mi̍ lā dīmī māā kɛ̄ɛ̄sīāā kɛ̄ndɔ̄ɔ̍ pi̍la̍ cho̍ ko̍ŋ ni̍.

¹⁵ O̍ ko̍ŋ kɔ̍ɔ̍lī, mi̍ chu̍ā pūa̍a̍ kɔ̄l kālu̍a̍a̍ nya̍ hɛ̄li̍ o̍ yu̍ŋgu̍la̍ nyāla̍ŋ chōo̍ wa̍, a̍ nɔ̍ sīnā pɛ̄ŋgo̍o̍ ndu̍yɛ̍ ma̍ nɔ̄ tāāsi̍o̍o̍ wa̍, mi̍ kɛ̍sī nda̍ nya̍ bōlle̍ŋ. Mi̍ kɛ̍sī ā ti᷄ŋ wāŋnda̍ tɔ̍ tɔ̍la̍ŋ bōlle̍, mi̍ kɛ̄sī ā ti᷄ŋ be̍le̍-ŋu̍ɛ̍ɛ̍nu̍la̍ŋ bōlle̍, mi̍ kɛ̍sī ā ti᷄ŋ kɛ̄mɛ̄la̍ŋ bōlle̍, o̍ ko̍ŋ kɔ̍ɔ̍lī, mi̍ kɛ̍sī ā ti᷄ŋ wāa̍la̍ŋ bōlle̍, ndu̍yɛ̍ mi̍ si̍i̍ŋgūū ā ti᷄ŋ wānāā bɛ̄ndūa̍a̍ o̍ yu̍ŋgu̍la̍ nyāla̍ŋ chōo̍.

¹⁶ “Mi̍ lo᷅ o̍ ko̍ŋ mi̍ si̍lā pūa̍a̍ ya̍ I̍ si̍i̍ŋgu̍u̍ māsāa̍ le̍ nya̍ sɔ̄ɔ̍ŋ dīmīo̍o̍ tɛ̄ɛ̄ŋ nda̍, mi̍ di̍mūl nda̍ a̍a̍, ‘Tē wānāā nyāa̍ hīŋ a̍ īsɔ̄ɔ̍ o̍ īsɔ̄ɔ̍ nāa̍ nya̍ chūā le̍ dīmīo̍o̍ pɛ̍, lā ya᷄ŋ sūɛ̍i̍ ke̍ŋ nīla̍ŋ nyɛ̄ kɛ̄ndɛ̄ kɛ̍ndɛ̄, ndu̍yɛ̍ mī lā dīmi̍ ndi̍ o̍ nɛ̄ī sa̍kpō, ō wa̍ I̍sɔ̄lūɛ̍i̍nɔ̍ɔ̍ nda̍ chāa̍ŋ ndɔ̄ I̍sɔ̄lūɛ̍i̍nɔ̍ɔ̍ tɛ̍ɛ̄ŋ ni̍, ō wa̍ I̍sɔ̄lūɛ̍i̍nɔ̍ɔ̍ nda̍ wānāā lēkāa̍wa̍a̍ cho̍ nya̍ tɛ̄ɛ̄ŋ nda̍ ō pīlɛ̍ ni̍, lā dīmi̍ ndi̍ o̍ nɛ̄ī sa̍kpō.

¹⁷ Lā si᷅m wānā o̍ wānā kɔ̍ɔ̍lī, o̍ īsɔ̄ɔ̍ o̍ īsɔ̄ɔ̍ ni̍ŋ te̍. Ō wa̍ wa̍nā bɛ̍ndū, ō wa̍ wa̍nā yɔ̍ŋāā, lā bīi̍ sɔ̍ɔ̍ŋ ndāa̍ŋ nyɛ̄ pīlɛ̍ kpe̍. Lā wo᷅ wānā o̍ wānā le̍ hɔ̄lta̍ŋ te̍. Kāni̍ fo̍ndōle̍, īyāma̍ o̍ īyāma̍ nya̍ kīlu̍l wāŋndo̍ pɛ̍, Mɛ̄lɛ̄ka̍ pīla̍ ke̍lū ndi̍ ni̍. I̍sɔ̄ɔ̍ o̍ īsɔ̄ɔ̍ ke̍ndū nya̍ o̍ bā le̍ dīmī pɛ̍, lā hīŋ a̍ ndi̍ nāa̍ ya̍ pi̍la̍ chu̍a̍ I̍ hu̍ŋ di̍mī.’

¹⁸ Ndu̍yɛ̍ o̍ ko̍ŋ kɔ̍ɔ̍lī, mi̍ di̍mūl nya̍ I̍sɔ̄lūɛ̍i̍ya̍ a̍ te̍le̍ŋ ko̍ŋ nyɛ̄ o̍ nyɛ̄ nya̍ nɔ̄ le̍ tōsāa̍.”

A̍ mɛ̄ɛ̍ I̍sɔ̄lūɛ̍i̍ya̍ ā vēm su̍a̍ŋsu̍a̍ŋnda̍ Ke̍nāŋ chɔ̄nɔ᷄ŋndo̍ Ka̍dɛ̍sī Ba̍a̍nīāā yɛ̍ o̍kɔ̄ɔ̄

¹⁹ Mi̍ Mūu̍sē o̍ hi̍a̍ū lāchī a̍ sūɛ̍i̍, mbo̍ dīmī āā, “O̍ ko̍ŋ kɔ̍ɔ̍lī, mi̍ ŋ̄ māl nāa̍ na̍a̍ ŋ̄ wa̍ o̍ Pēmbīī Sa̍a̍nāīve̍ wa̍, mi̍ ŋ̄ kūā kūmbū lɛ̄ŋndē īpēmbūlē A̍mɔ̍lu̍a̍i̍tīi̍ya̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l na̍a̍ yɛ̍. Mi̍ ŋ̄ kēēkū o̍ lɛ̄ŋndē po̍lte̍ wɔ̍ɔ̍ŋndē bɛ̄ndūle̍ŋ ni᷄ŋ, lē nya̍ kēi̍ le̍ŋ chɔ᷅ le̍ŋ, mi̍ ŋ̄ hūŋ Ka̍dɛ̍sī Ba̍a̍nīāā.

²⁰ Mɛ̄ɛ̍ na̍a̍ fūūlu̍u̍ lo̍ŋ, mi̍ di̍mūl nya̍ a̍a̍, ‘Lā fūūlu̍u̍ o̍ lɛ̄ŋndē īpēmbūlē A̍mɔ̍lu̍a̍i̍tīi̍ya̍, lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō dīmi̍ le̍ na̍a̍ kīo̍o̍ le̍ŋ.

²¹ Lɛ̄ŋnde̍ŋ nde᷅ŋ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō kɛ̄si̍ le̍ nya̍ ni̍. Le̍la̍ŋ, lā kɔ̍ mī lā kɔ̍ hi̍ɔ̍lū le̍ŋ, mī lā kɔ̍ chu̍a̍ le̍ŋ māā nyɛ̄ nyā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ fi̍nyāā nyāā ma̍māa̍ o̍ dīmu̍l nya̍ yɛ̍. Lā yɔ᷅ŋ īsīōōŋ te̍, ndu̍yɛ̍ lā bu̍u̍la᷄ŋ te̍.’

²² “O̍ ko̍ŋ kɔ̍ɔ̍lī, nya̍ kpo̍u̍ mi̍ lā cha᷄ŋ mi̍ lā hūŋ nāa̍ ya̍ chu̍a̍. Mi̍ lā dīmūl la̍ āā, ‘Ŋ̄ sōli᷅ŋ ndɔ̄ pūa̍a̍ mī ŋ̄ vēm nda̍ na̍a̍ lāchī su̍a̍ŋsu̍a̍ŋnde̍ŋ mā kɔ̍ mɛ̍ɛ̍nda᷄ŋ lɛ᷅ŋndē kālā le̍ŋ mā hu᷄ŋ chɔ᷅m na̍a̍, nɛ̄i̍ na̍a̍ ŋ̄ kēēkū kpe̍e̍kpe̍i̍ le̍ kɔ̄la̍ŋ lɛ̄ŋndē kālāle̍ŋ bīyɔ̄ɔ̍ wo̍, ndu̍yɛ̍ mā chɔ᷄m na̍a̍ chi̍e̍e̍ŋ bɛ̍ndu᷄ŋ cho̍ na̍a̍ lāchī wo̍ŋ.’

²³ “Ndu̍yɛ̍ mi̍ cha᷅ māā kɛ̄ɛ̄sīāā kɛ̄ndɔ̄ɔ̍ pīla̍ nya̍ kɛ̄ɛ̄si̍a̍a̍ ko̍ŋ ni̍. O̍ ko̍ŋ, mi̍ hɛ̍lī pūa̍a̍ ŋ̄wāŋ tɔ̍ a̍ wānāā ŋīɔ̍ɔ̍ŋ nya̍ tɛ̍ɛ̍ŋ, yu̍ŋgu̍ o̍ yu̍ŋgu̍ pōo̍ ō pīlɛ̍ mi̍ vi̍ām nda̍.

²⁴ Ma̍ mālnu᷄ŋ ma̍ hēl lɛ̄ŋndē īpēmbūle̍ŋ, ma̍ hūŋ o̍ lɛ̄ŋndē dɛ̍ŋgbɛ̍le̍ cho̍ o̍ pēmbo᷄ŋ tɛ̄ɛ̄ŋ Ɛ̍si̍kɔ̄ɔ̄ le̍ŋ, ma̍ mɛ̄ɛ̄nda᷄ŋ nde̍ŋ kpo̍u̍.

²⁵ O̍ ko̍ŋ kɔ̍ɔ̍lī, ma̍ mīīŋgū na̍a̍ o̍ ībūŋ a̍ ko̍na̍a̍. Mɛ̄ɛ̍ nda̍ wa̍ hūnɔ̄ɔ̍, ma̍ kēndī yɔ̄mīī kūāmɛ̄ī nda̍ kōma̍l o̍ lɛ̄ŋnde̍ŋ nde᷅ŋ ni᷄ŋ nde̍, ma̍ hūŋ a̍ ndi̍, ma̍ hu᷄ŋ chɔ᷅m na̍a̍. Ma̍ hu᷄ŋ do̍o̍nu᷄ŋ na̍a̍ ko̍na̍ māā lɛ̄ŋndē Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ o̍ chō na̍a̍ kīo̍o̍ le̍ŋ, māā lɛ̄ŋndē kɛ̄ndɛ̄ kɛ̍ndɛ̄lē tɔ̄lɔ̄ɔ̄la̍ŋ lā nāŋ nde̍ŋ le̍ cho̍ ni̍.

²⁶ “Kɛ̍ nya̍ a̍a̍ ye̍e̍ma̍ mī nya̍ a̍a̍ ku̍ɛ̄ le̍ lɛ̄ŋnde̍ŋ nde᷅ŋ bīyɔ̄ɔ̍ le̍. Mi̍ lā kɛ̄ɛ̄ nyɛ̄ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ō dīmu̍l nya̍ wo̍ tōsāa̍.

²⁷ Mi̍ lā chāl ŋɔ̄ɔ̄chīa̍ŋnda̍ŋ a̍ Mɛ̄lɛ̄ka̍ o̍ tɛ̍ndīi̍la̍ nyāla̍ŋ ni᷄ŋ, mī lā dīmu̍la᷅ŋ āā, ‘Mɛ̄lɛ̄ka̍ Ya̍a̍wɛ̄ɛ̄ ndu̍ yɛ̄le̍ŋ kpe̍e̍kpe̍i̍ o̍ tu̍l na̍a̍ ni̍. Nyɛ̄ kōŋ o̍ so̍li̍ na̍a̍ I̍chi̍pī ni̍, mbo̍ hūŋ a̍ na̍a̍ na̍nu᷄ŋ, le̍ mbō hu᷄ŋ ma᷅l na̍a̍ A̍mɔ̍lu̍a̍i̍tīi̍ya̍ o̍ bā mā tɛ̄ɛ̄mbu̍u̍ na̍a̍.

²⁸ Kūɛ̍ɛ̍nɛ̍ kpe̍e̍kpe̍i̍ na̍a̍ ŋ̄ chō yɛ̄ lākɔ̄? Chāāŋāā nāa̍ ku̍ɛ̄ su̍a̍ŋsu̍a̍ŋnde̍ŋ nda̍, ā hu᷄ŋ to̍sā mi̍ sīōōŋnde̍ ī bīī na̍a̍. Ā hu᷄ŋ di̍mu̍l na̍a̍ māā wānāa̍ cho̍ o̍ lɛ̄ŋndē lēŋ ni᷄ŋ nda̍, ā nɔ̄ kpāāyāa̍, ndu̍yɛ̍ ā bāndu̍ ā hīōū na̍a̍. Ndu̍yɛ̍ māā chi̍e̍e̍ŋ ndāa̍ŋ bɛ̍ɛ̍ chi̍e̍e̍ŋ bɛ̍ndū bɛ̄ndo᷄ŋ pi̍la̍ ŋ̄ cho̍ ni̍, ŋ̄ bālāā kpɔ̍kɔ̍su̍ a̍ sāāsāla̍ vi̍lɛ̄īlā bɛ̄ndūla̍ŋ, sāāsāla̍ŋ chɔ̄nɔ᷄ŋndo̍ lɛ̄ŋ mi̍ la̍ fūūlūū o̍ ha̍la̍ di̍. Ndu̍yɛ̍ ma̍ dīmūl na̍a̍ māā ma̍ chā A̍na̍ka̍i̍tīi̍ya̍ lo̍ŋ, ku̍u̍ba̍a̍ chɔ̄ūwāā bɛ̄ndūa̍a̍.’

²⁹ “Kɛ̍ mi̍ ya̍ Mūu̍sē lo᷅ o̍ ko̍ŋ mi̍ di̍mūl nya̍ a̍a̍, ‘Sīōōŋīī bi̍ī nya̍ le̍. Lā yɔ᷅ŋ īsīōōŋ le̍ wānāā kāŋ te̍.

³⁰ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍, o̍ si̍m nya̍ lāchī mbo̍ wā kɔ̄la̍ŋ a̍ nya̍ wo̍, ō chō sɔ̍ŋgā le̍ nya̍, mɛ̄ɛ̍ o̍ sɔ̍ŋga̍ le̍ nya̍ I̍chi̍pī mi̍ nya̍ pi̍la̍ chā pɛ̍ɛ̍ŋ yɛ̍.

³¹ Ndu̍yɛ̍ bōōndi̍i̍ nya̍ wa̍ o̍ po̍llo̍ ni᷄ŋ nde̍, nya̍ pi̍la̍ lā chē, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ nyāa̍ ō wa̍ kɔ̄la̍ŋ a̍ nya̍, mɛ̄ɛ̍ kāla̍ chūa̍a̍ ō bīī nu̍a̍ā chūā ndɔ̄ɔ̍ o̍ chōŋgu̍ mbō wa̍ kɔ̄la̍ŋ a̍ ndu̍ yɛ̍. Mbo̍ lō nya̍ māndāa̍ o̍ ti᷅ŋndo̍ tɛ̄ɛ̄ŋ ha̍a̍a̍, mī lā fūūlūū na̍nu᷄ŋ le̍nde̍ yɛ̍lɛ̍kɛ̍lɛ̍ɛ̍ bɛ̍ndū.’

³² Kɛ̍ a̍ dīōmndā ya̍ I̍ di̍mu̍l nya̍ la̍ŋ nda̍ŋ kpo̍u̍, lā chɛ᷄l mī lā dɔ̄ū tīīnda᷄ŋ nyāa̍ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni᷄ŋ te̍.

³³ Ndu̍ Mɛ̍lɛ̄ka̍ ndu̍ wa̍ nya̍ hūnɔ̄ɔ̍ lāchī ni̍, mbō chɔ̄m nya̍ fo̍ndāŋndā nya̍ a̍a̍ nɔ̍ le̍ dɔ̍ɔ̍ŋgɔ̍ɔ̍ kīōlɔ̄ɔ̍ la̍ŋ. Īchɔ̄l o̍ pa̍ŋgēle̍ lēyīŋndo̍ ni᷄ŋ ndu̍ o̍o̍ ku̍ā nya̍ lāchī ni̍ le̍ nya̍ nɛ̄īyo̍ chɔ̄mndo̍ ni̍, o̍ ko̍ŋ kɔ̍ɔ̍lī, īpāla̍ o̍ yu̍mbu̍ yu̍mbu̍ i̍kpu̍ŋbāa̍ ni᷄ŋ ndu̍ o̍o̍ ku̍ā nya̍ lāchī ni̍.”

A̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍si̍ I̍sɔ̄lūɛ̍i̍ya̍ nyɛ̄ pālāa̍ chōo̍ yɛ̍ o̍kɔ̄ɔ̄

³⁴ Mi̍ Mūu̍sē o̍ hi̍a̍ū lāchī a̍ sūɛ̍i̍ mbo̍ dīmī āā, “Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍e̍ī ŋɔ̍ɔ̍chīa̍ŋnda̍ nya̍ wa̍ a̍ ndu̍ la̍ŋ, mbo̍ dūāūnu᷄ŋ tu̍mbe̍ a̍ nya̍. O̍ ko̍ŋ kɔ̍ɔ̍lī, mbo̍ tīāŋnu᷄ŋ, mbo̍ dīmī āā,

³⁵ ‘Nya̍ yu̍ŋgu̍ dɛ̍nɛ̍ wɔ̍ɔ̍ŋndo̍ ho̍ō ki̍nɛ̍i̍, wāŋndo̍ ō pīlɛ̍ bɛ̍ɛ̍ ō lu̍e̍ī o̍ lɛ̄ŋndē ya̍ I̍ chu̍e̍l fi̍nyāā nyāā ma̍māa̍ būŋgɛ̄i̍ le̍ nda̍ kīo̍o̍ le̍ŋ ni᷄ŋ te̍, lɛ̄ŋndē kɛ̄ndɛ̄lē tɔ̄lɔ̄ɔ̄la̍ŋ lā nāŋ nde̍ŋ.

³⁶ Mɛ̄ɛ̍ Ke̍lɛ̍bī, po̍ Chɛ̍fu̍nɛ̄ɛ̄ wo̍ ndu̍ pīlɛ̍ kpe̍ mbō lūɛ̄ī o̍ lɛ̄ŋndē lēŋ ni᷄ŋ. Ndu̍yɛ̍ lēlɛ̄ŋ o̍ lēlɛ̄ŋ o̍ ba̍lu̍ chōo̍ bōōndi̍i̍ nda̍ kūɛ̄ su̍a̍ŋsu̍a̍ŋnde̍ŋ nde̍, I̍ cho̍ ndu̍ le̍ŋ kē kpo̍u̍, nda̍ wānāa̍ fu̍la̍ o̍ pūlālē ndɔ̄le̍ŋ chōo̍ wa̍. Kāni̍ fo̍ndōle̍, le̍ mɛ̄ɛ̍ o̍ dɔ̍ū tīīnda᷄ŋ ndɔ̄ɔ̍ kpo̍u̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ ni̍ŋ yɛ̍.’

³⁷ O̍ ko̍ŋ kɔ̍ɔ̍lī, le̍ nya̍, ya̍ bɛ̍ɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ du̍a̍u̍nu᷄ŋ tu̍mbe̍ a̍ ya̍. Mbo̍ dīmūl la̍ āā, ‘Nūm bɛ̍ɛ̍ a̍ lu̍e̍ī o̍ lɛ̄ŋndē lēŋ ni᷄ŋ te̍.

³⁸ Kɛ̍ wānā nu̍m mālāa̍ Chɔ̄ɔ̍sūāā, po̍ Nu᷅ŋ ndo̍ ndu̍ cho̍ lūɛ̄īyɔ̄ɔ̄ o̍ lɛ̄ŋnde̍ŋ nde᷅ŋ ni᷄ŋ. Ndu̍ cho̍ I̍sɔ̄lūɛ̍i̍ya̍ īsīsi̍ la̍chi̍ ni̍, mā kɔ̍ bi̍ī le̍ŋ. Le̍la̍ŋ to̍sa̍ mbō sīmu̍l kɔ̄l.’

³⁹ “Chūāā nyāā pɔ̍mbūa̍a̍, ā nya̍ dīmi̍ āā, ‘Ā chō nda̍ bīū mā kūɛ̄ a̍ nda̍ o̍ bīyɔ̄ɔ̍ ni᷄ŋ nda̍, a̍ si̍nā wɔ̍ bɛ̍ɛ̍ īwɔ̄ɔ̍ŋnde̍ a̍ īkɛ̄ndɛ̄i̍ le̍ wa̍, nda̍ cho̍ lākɔ̄ o̍ lɛ̄ŋnde̍ŋ nde᷅ŋ ni᷄ŋ ni̍. Nda̍ ya̍ I̍ cho̍ lɛ̄ŋnde̍ŋ nde᷅ŋ kē nī, ndu̍yɛ̍ mā bīī le̍ŋ mī lē sīmnu᷄ŋ nyɛ̍ ndā.

⁴⁰ Kɛ̍ nya̍ nya̍, lā mūli̍ŋ mī lā mīīŋgu̍ o̍ lɛ̄ŋndē po̍lte̍ŋ ni᷄ŋ mī lā kūɛ̄ a̍ nɛ̄i̍ ku̍ɛ̄ kūmbū Pēē Si̍a̍ŋā Mɛ̄ŋmā Īhɛ᷄llo̍ wo̍.’

⁴¹ “O̍ ko̍ŋ kɔ̍ɔ̍lī, mi̍ lā mūlī ya̍ dīōm, mi̍ lā dīmūl la̍ āā, ‘Mūu̍sē, ŋ̄ tōsa̍ yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍ Ya̍a̍wɛ̄ɛ̄. Ŋ̄ chō lākɔ̄ mī ŋ̄ kɔ̍ sɔ̍ŋgā a̍ wānāā kāŋ, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ o̍ dīmu̍l na̍a̍ yɛ̍.’ O̍ ko̍ŋ, mi̍ wānā o̍ wānā o̍ bɛ̍ɛ̍ndīa̍ŋ a̍ wōlɔ̄ɔ̄lā ndɔ̄la̍ chɔ̄ūla̍ŋ le̍ kɔ̄la̍ŋ sɔ̍ŋgɔ̄ɔ̍. Lā wa̍ ko̍ kɔ̍l māā kɔ̄la̍ŋ sɔ̍ŋgɔ̄ɔ̍ o̍ pēmbūŋ mu᷅ŋ chōo̍, māā sūɛ̍i̍ bɛ̍ɛ̍ŋ bɛ̍ɛ̍ŋ i̍ cho̍ ni̍.

⁴² “Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ dīmūl la̍ āā, ‘Si̍la̍ nda̍ māā ā kɔ̍ chi᷅ŋa̍la᷅ŋ wa̍nāā kāŋ a̍ sɔ̍ŋgɔ̄ɔ̍ le̍, fo̍ndōle̍ ya̍ Mɛ̍lɛ̄ka̍ I̍ cho̍ wa᷅ a̍ nda̍ la̍tu̍lu̍ le̍. Tē ā fūla̍ kɔ̄ɔ̄lī pɛ̍ mā kūɛ̄, ya̍a̍mɔ̍ɔ̍wa̍a̍ ndāā ka̍ŋ ā chō nda̍ yōmɔ̄ɔ̄.’

⁴³ Mi̍ lo᷅ o̍ ko̍ŋ mi̍ di̍mūl nya̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍. Kɛ̍ lā ye᷄ŋ ya̍ lānī le̍. Mi̍ lā sōlī Mɛ̄lɛ̄ka̍ Ya̍a̍wɛ̄ɛ̍ dīōm mi̍ lā kīālū yōŋgāa̍ mi̍ lā hēl lɛ̄ŋndē īpēmbūle̍ŋ le̍ kɔ̄la̍ŋ wāŋnda̍ ha̍ā chīŋa̍la᷅ŋndo̍.

⁴⁴ O̍ ko̍ŋ, mi̍ A̍mɔ̍lu̍a̍i̍tīi̍ya̍ wa̍ o̍ pēmbūŋ mu᷅ŋ chōo̍ wa̍ ā fūlā ma̍ hu᷄ŋ sa̍ā nya̍ a̍ sɔ̍ŋgɔ̄ɔ̍, ma̍ lāālū nya̍ mɛ̄ɛ̍ līāā ku̍ndāa̍ ā lāālū nu̍a̍ā wāŋndo̍ kɔ̄ɔ̄lī yɛ̍. Ma̍ chūa̍ nya̍ tōūwɔ̄ɔ̍ lo̍ŋ ma̍ fūūlūū a̍ nya̍ di̍ Hɔ̍ɔ̍māā chi̍e̍e̍. Ndu̍yɛ̍ ma̍ yām nya̍ o̍ lɛ̄ŋndē īpēmbūle̍ŋ I̍dɔ̄m lo̍ŋ.

⁴⁵ O̍ ko̍ŋ kɔ̍ɔ̍lī, mi̍ lā mīīŋgū mi̍ lā hu᷄ŋ cha᷅ŋ nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍, le̍ mbō māla̍ nya̍. Kɛ̍ Mɛ̄lɛ̄ka̍ Ya̍a̍wɛ̄ɛ̄ o̍ ye̍ŋ nya̍ lānī le̍. Ō to̍fa̍ nya̍ bɛ̍ɛ̍ le̍.”

Wɔ̄sīlā I̍sɔ̄lūɛ̍i̍ya̍ chīi̍ o̍ lɛ̄ŋndē po̍lte̍ŋ ni᷄ŋ nda̍ŋ

⁴⁶ Mi̍ Mūu̍sē o̍ hi̍a̍ū lāchī a̍ sūɛ̍i̍ mbo̍ dīmī āā, “Le̍ te̍le̍ŋ vi̍lɛ̍i̍ ŋ̄ wa̍ Ka̍dɛ̍sī.