Da̍a̍ni̍ɛ̍ɛ̄ 1 - Yāu̍ Mɛ̄lɛ̄ka̍a̍

BU̍NDƐ̄I̍ A̍ DA̍A̍NI̍Ɛ̍Ɛ̄ NDA̍ CHĀĀŊĀĀ NDŪĀĀ YA̍A̍WA̍ O̍KƆ̄Ɔ̄ ( Da̍a̍ni̍ɛ̍ɛ̄ 1:1–6:28 ) Pūa̍a̍ chu̍a̍ pīāāndūa̍a̍ si᷄m o̍ tōŋgo̍ kɔ̍ɔ̍sɔ̍ Māsāa̍ Nābi̍u̍kānɛ̍ɛ̍sā wo̍ ni᷄ŋ

¹ Mi̍ ī yɔ̄nu᷄ŋ a̍ te̍le̍ŋ ko̍ŋ, mi̍ māsā pi᷅lɛ̍ dīōla̍ŋ āā Nābi̍u̍kānɛ̍ɛ̍sā o̍ lɛ̄ŋndē Ba̍bi̍lɔ̄ŋnde̍ŋ ni᷄ŋ ō hūŋ, mbo̍ hu᷄ŋ de᷅l Chūlu̍sɛ̄lɛ̄m chōo̍ a̍ sɔ̍ŋgɔ̄ɔ̍, mbo̍ bīī chi̍e̍e̍ le̍bo᷅llo̍ le̍ lɛ̄ŋndē Chu̍dāle̍ŋ. Wɔ̄sī māsā bɛ̍ndōo̍ Chɛ̄hōwa̍kīm chi̍ŋa̍ wɔ̄sīla̍ŋ lā ya̍a̍ o̍ lēmāsā Chu̍dā wo̍, wɔ̄sī kōŋ sūɛ̍i̍ he̍ī ī yɔ̄nu̍ŋ ni̍.

² Ndu̍yɛ̍, Māsānɔ̄ɔ̍ Mɛ̄lɛ̄ka̍ pi̍la̍ chɛ̍l ni̍ mi̍ Nābi̍u̍kānɛ̍ɛ̍sā de᷅l chi̍e̍e̍ bɛ̍ndōo̍ Chūlu̍sɛ̄lɛ̄m chōo̍ mbo̍ bīī Māsā Bɛ̍ndōo̍ Chɛ̄hōwa̍kīm, mbō chɔ̄ɔ̄vīāā nyɛ̄m ba̍ā kālā ka̍la̍ŋ ŋ̄ ti᷄ŋ o̍ chīɛ̍i̍ Mɛ̄lɛ̄ka̍a̍ ni᷄ŋ, mbo̍ kūānu᷄ŋ a̍ mu̍ŋ, mbo̍ kɔ̍ kɛ̍sī mu̍ŋ o̍ fo̍ndāŋ nda̍ kɛ̄sī nyɔ̄ɔ̍ŋ o̍ chīɛ̍i̍ mɛ̄lɛ̄ka̍ā ndūa̍a̍ wo̍ ni᷄ŋ Ba̍bi̍lɔ̄ŋ. Ndu̍yɛ̍, mbo̍ bīū bīū wāŋnda̍ ā ti᷄ŋ mbo̍ kūānu᷄ŋ a̍ nda̍.

³ O̍ ko̍ŋ kɔ̍ɔ̍lī, mi̍ māsā bɛ̍ndōo̍ Nābi̍u̍kānɛ̍ɛ̍sā ō ke᷅ po̍ pi᷅lɛ̍ di̍o̍o̍ dīōla̍ŋ āā, A̍si̍pɛ̍na̍sī. Pōo̍ ho̍ō ndu̍ wa̍ wānāā wa̍lla̍ bōlle̍ŋ o̍ chīɛ̄ī lēmāsa̍ Nābi̍u̍kānɛ̍ɛ̍sā wo̍ ni᷄ŋ ni̍. Mbo̍ dīmūl ndu̍ āā, “A̍si̍pɛ̍na̍sī, mɛ̍ɛ̍ndīa̍ŋ wānāā na̍a̍ ŋ̄ bīī ha̍ā Chu̍dā o̍ chɔ̄ūwo̍ wa̍ tɛ̄ɛ̄ŋ, mā hɛ̍li̍ pūa̍a̍ chu̍ā pīāāndūāā kɛ̍ndɛ̄ kɛ̍ndīa̍a̍. A̍ wa̍ nda̍ hɛ̄līo̍o̍ pɛ̍, hɛ̍li̍ a̍ fu̍la̍ o̍ yu̍ŋgu̍la̍ lēmāsāla̍ŋ chōo̍, a̍ o̍ yu̍ŋgu̍la̍ wānāā tɔ̍ɔ̍wa̍a̍ bɛ̍ndūa̍a̍ chōo̍ wa̍.

⁴ Ndu̍yɛ̍, mɛ̄ɛ̍ mā na᷄ŋ nāŋɔ̄ɔ̄ lā hɔ̄llo̍, mā wa᷄ wānāā tāāsi̍ o̍ nyɛ̄ o̍ nyɛ̄ tōsāa̍ ni᷄ŋ, mā wa᷄ wānāā kɔ̄l kālu̍, mā nɔ̄ māndā kɛ̄ndɔ̄ɔ̍, ā ve᷅m wānāa̍ nɛ̄i̍ pɛ̄ɛ̄kū le̍, ā nɔ᷅ sɔ̍ŋ o̍ sɔ̍ŋ lēkɔ̄ɔ̍ le̍. Ko̍ŋ to̍sā ni̍ mā wa̍ ā bɛ̄ndāā le̍ wa̍llo̍ tōsāa̍ o̍ chīɛ̄ī lēmāsāa̍ ni᷄ŋ. Ndu̍yɛ̍, sūɛ̍i̍ ma̍ŋgālɛ̄i̍ Ba̍bi̍lɔ̄ŋ pōōnyīāā ni̍, a̍ tōfāa̍ ndi̍ o̍ yāu̍wo̍ chōo̍, nu̍m A̍si̍pɛ̍na̍sī, nu̍m nɔ̍ ni̍ mā to̍sa̍ a̍ sa̍bū mā pɛ̄ɛ̄ku̍ ndi̍.”

⁵ O̍ ko̍ŋ kɔ̍ɔ̍lī, mi̍ māsā bɛ̍ndōo̍ kē ndu̍ vɛ̄lɛ̄ di̍o̍o̍ māā, ā wa̍ pu̍a̍ā ha̍ā nyɛ̄ dīāā lēmāsāa̍ kīo̍o̍. Nyɛ̄ dīāā māsā bɛ̍ndōo̍ ndu̍ o̍o̍ di̍ā wo̍, a̍ mūɛ̄īmā ndu̍ o̍o̍ ko᷅l la̍ŋ, māā ā wa̍ pu̍a̍ā ha̍ā nyɛ̄ dīāā pīlɛ̍ kōŋ, a̍ mūɛ̄īmā pīlɛ̍ mā māŋ kīo̍o̍. Ndu̍yɛ̍, māā ā lo̍ nda̍ nyɛ̍ dīāā lēmāsāa̍ ho̍ō kīo̍o̍ ha̍a̍a̍, mī wɔ̄sīlā yāa̍la̍ nda̍ chō wā o̍ pɛ̄ɛ̄kōo̍ bɛ̄ŋgu̍ la̍ŋ lā chūū. Ndu̍yɛ̍, tē wɔ̄sīlā yāa̍la̍ la̍ŋ lā chūū pɛ̍, ā hīŋ a̍ nda̍ ma̍sā bɛ̍ndōo̍ o̍ hɔ̄l.

⁶ Ndu̍yɛ̍, mɛ̄ɛ̍ wɔ̄sīlā yāa̍la̍ la̍ŋ lā chūū, ma̍ hūŋ a̍ nda̍ māsā bɛ̍ndōo̍ o̍ hɔ̄l. Ma̍ hu᷄ŋ hɛ̍lī pūa̍a̍ ā hi̍ɔ̍ɔ̍lu̍ nda̍ tɛ̍ɛ̄ŋ. Pūa̍a̍ nda̍ hɛ̄li̍ wa̍, dīōlā ndāla̍ŋ la̍ cho̍ la᷅ŋ ni̍. Da̍a̍ni̍ɛ̍ɛ̄, a̍ Hānāni̍yā, a̍ Mɛ̍si̍a̍kī, a̍ Āsi̍i̍lūā. Ndu̍yɛ̍, pūa̍a̍ ha̍ā kpo̍u̍, o̍ kāa̍le̍ Chu̍dāle̍ŋ chōo̍ nda̍ a̍a̍ fu̍la̍ ni̍.

⁷ Ndu̍yɛ̍, Āsi̍pi̍nā o̍ wa̍ wānāā wa̍lla̍ bōlle̍ŋ o̍ chīɛ̄ī lēmāsāa̍ ni᷄ŋ ndo̍, mbo̍ kē pūa̍a̍ ha̍ā dīōlā chēle̍ŋ. Mbo̍ kē Da̍a̍ni̍ɛ̍ɛ̄ dīōla̍ŋ āā, Bɛ̄tīsi̍a̍sā, mbo̍ kē Hānāni̍yā dīōla̍ŋ āā, Si̍a̍du̍lūā, mbo̍ kē Mɛ̍si̍a̍kī dīōla̍ŋ āā, Mɛ̍si̍a̍kī, mbo̍ kē Āsa̍a̍lūā dīōla̍ŋ āā, Ābɛ̄ni̍kō.

⁸ O̍ ko̍ŋ kɔ̍ɔ̍lī, mi̍ Da̍a̍ni̍ɛ̍ɛ̄ kɛ̍sīāā māā, ō yēēma̍ mbō sīīŋgu̍u̍ ndu̍ pi̍la̍ ō nɔ̄ɔ̄lɛ̍i̍ Mɛ̄lɛ̄ka̍ o̍ hɔ̄l a̍ nyɛ̄ dīāā lēmāsāa̍ dīo̍o̍ le̍. O̍ ko̍ŋ, mbo̍ kɛ̄ɛ̄ māā ō di᷅ nyɛ̍ dīa̍a̍ o̍ chīɛ̄ī lēmāsāa̍ ni᷄ŋ te̍, kɛ̄lɛ̄ŋgāā mbō ko᷄l mūɛ̄īmā wāā lo̍ŋ. Le̍la̍ŋ, mbo̍ nyūnā A̍si̍pɛ̍na̍sī māā ō māla̍ ndu̍ mbō ke̍ ndu̍ nyɛ̄ dīāā chēle̍ŋ.

⁹ Ndu̍yɛ̍, mī Mɛ̄lɛ̄ka̍ tōsā mi̍ A̍si̍pɛ̍na̍sī cha᷅ Da̍a̍ni̍ɛ̍ɛ̄ nyīnā ta̍u̍ ta̍u̍.

¹⁰ Kɛ̍, sīōōŋnde̍ wa̍ A̍si̍pɛ̍na̍sī. O̍ ko̍ŋ, mbo̍ dīmī āā, “Ya̍ I̍ ma̍lā nu̍m kɛ̍, māsā bɛ̍ndōo̍ pi̍la̍ chɔ᷄m nyɛ̄ dīāā nya̍ nɔ̄ le̍ dīo̍o̍, a̍ mūɛ̄īmā nya̍ nɔ̄ le̍ kōlɔ̄ɔ̍ wa̍ŋ ni̍. Ndu̍yɛ̍, tē ō chē nya̍ ā nyāūvɛ̍i̍ pɛ̍, mī lā ve̍ a̍ ku̍ndɛ̍i̍ māā pūa̍a̍ ā pīli̍a̍a̍ le̍, ō dīī ya̍.”

¹¹ O̍ ko̍ŋ, mi̍ Da̍a̍ni̍ɛ̍ɛ̄ ku̍ā nāa̍ lāŋu̍nɔ̄ A̍si̍pɛ̍na̍sī yu̍lū māā ō wa̍ Da̍a̍ni̍ɛ̍ɛ̄ nyɛ̄ dīa̍a̍ kīo̍o̍ nda̍ chāa̍ŋāā ndūāā ya̍a̍wa̍ wo̍ chūā.

¹² Mbo̍ kɔ̍ di̍mūl ndu̍ āā, “Fāllo̍, ŋ̄ yēēma̍ nu̍m mā wa̍ na̍a̍ lāmndā lā pēēlā yɔ̄ŋāāla̍ŋ kīo̍o̍ mī ŋ̄ dīā, a̍ mɛ̄ŋnda̍ŋ le̍ kōlɔ̄ɔ̍ le̍ pālɛ̍i̍ tɔ̍. Tē pālɛ̍i̍ tɔ̍ve̍ ī hīōū pɛ̍, a̍ to̍fa̍ dīāllūŋ nāa̍ŋ.

¹³ O̍ ko̍ŋ, a̍ mɛ̍ɛ̍ndi̍a̍ŋ na̍a̍ a̍ pūa̍a̍ cho̍ nyɛ̄ dīāā lēmāsāa̍ dīo̍o̍ wa̍ vēllāa̍ vēllē, ā kēlū yāmɛ̍i̍.”

¹⁴ Mi̍ fi̍nyāa̍ chɛ̄l māā ō chō nda̍ tōfā le̍ pālɛ̍i̍ tɔ̍.

¹⁵ O̍ ko̍ŋ, mɛ̄ɛ̍ pālɛ̍i̍ tɔ̍ve̍ ī hīōū, mi̍ Da̍a̍ni̍ɛ̍ɛ̄ nda̍ chāa̍ŋāā ndūāā ya̍a̍wa̍ ā chēlūl ta̍u̍. Ndu̍yɛ̍, ma̍ nīŋgīlā mbo̍ hīāū pūa̍a̍ chu̍a̍ā pīāāndūa̍a̍ wa̍ nyɛ̄ dīāā lēmāsāa̍ dīo̍o̍ wa̍ kpo̍u̍.

¹⁶ Mɛ̄ɛ̍, chɔ̍ŋ ni᷅ŋ a̍ te̍le̍ŋ ko̍ŋ mbo̍ kūā lāchī, lāmndā lā pēēla̍ŋ a̍ tɔ̄lɔ̄ɔ̄lā kūāmāālā chēle̍ŋ ndu̍ o̍o̍ ke᷅ nda̍ ni᷅ŋ ni̍. Ō ke̍ lɛ̍ nda̍ nyɛ̄ dīāā lēmāsāa̍ le̍.

¹⁷ Ndu̍yɛ̍, mi̍ Mɛ̄lɛ̄ka̍ kē pūa̍a̍ hi̍ɔ̍ɔ̍lu̍ ha̍ā kɔ̄l kālu̍ yāu̍wo̍ ta̍u̍, a̍ sīnā pɛ̄ŋgo̍o̍ o̍ sɔ̄ɔ̍ŋ dɛ̍nɛ̍ si̍nāŋ bɛ̄ndo᷄ŋ ni᷄ŋ. Ndu̍yɛ̍, mbo̍ kē vɛ̄lɛ̄ Da̍a̍ni̍ɛ̍ɛ̄ sīnā pɛ̄ŋgo̍o̍ le̍ yi̍lāŋnda̍ŋ a̍ lɔ̄mā sɔ̄la᷄ŋ tɛ̄ɛ̄sīa̍a̍.

¹⁸ O̍ ko̍ŋ kɔ̍ɔ̍lī, mɛ̄ɛ̍ wɔ̄sīlā ya̍a̍la̍ māsā bɛ̍ndōo̍ tūu̍ le̍ pɛ̄ɛ̄kōo̍ la̍ŋ lā chūū, mi̍ A̍si̍pɛ̍na̍sī ku̍ā ā pūa̍a̍ chu̍a̍ā pīāāndūa̍a̍ o̍ hɛ̍li̍ ka̍ŋ le̍ pɛ̄ɛ̄kōo̍ wa̍ kpo̍u̍ nāa̍ Māsā Bɛ̍ndōo̍ Nābi̍u̍kānɛ̍ɛ̍sā chūā.

¹⁹ O̍ ko̍ŋ, mi̍ māsā bɛ̍ndōo̍ sūūki̍āŋ a̍ nda̍ ā pi̍lɛ̍ŋ pi̍lɛ̍ŋ nda̍ kpo̍u̍. Mɛ̄ɛ̍ o̍ chi̍i̍ sūūki̍āŋndo̍ a̍ nda̍ kpo̍u̍, mbo̍ sāālu̍ŋ māā Da̍a̍ni̍ɛ̍ɛ̄, a̍ Hānāni̍yā, a̍ Mɛ̍si̍a̍kī, a̍ Āsa̍a̍lūā māā nda̍ hi̍o̍ū bɛ̄ndā a̍ pūa̍a̍ ā pīli̍a̍a̍. O̍ ko̍ŋ, mbo̍ chūā nda̍ le̍ wa̍llo̍ o̍ fo̍ndāŋ lēmāsāa̍.

²⁰ Ndu̍yɛ̍, īsɔ̄ɔ̍ o̍ īsɔ̄ɔ̍ māsā bɛ̍ndōo̍ ndu̍ o̍o̍ nyu̍na̍ pūa̍a̍ ha̍ā pɛ̍, kɛ̄lɛ̄ŋgāā mī sūɛ̍i̍ ka̍la̍ ka̍lā ndi̍i̍ hi᷅ŋ mbō nyūnā nda̍ a̍ ndi̍ o̍kɔ̄ɔ̄ pɛ̍, mūlīo̍o̍ pūa̍a̍ ha̍ā nda̍ a̍a̍ mu̍lī ni̍. Ndu̍yɛ̍, mā tɛ̄ɛ̄si̍a̍a̍ ndi̍, mbo̍ hīōū bɛ̍ɛ̍ mɛ̄ɛ̍ wānāā māŋgālāa̍, a̍ wānāā vīāmāā lāyāwāa̍ o̍ lɛ̄ŋndē lēŋ ni᷄ŋ kpo̍u̍ a̍ tɛ̍ɛ̍sīāā yɛ̍ po̍lo̍ŋ.

²¹ O̍ ko̍ŋ, mi̍ Da̍a̍ni̍ɛ̍ɛ̄ lo᷅ o̍ chīɛ̄ī lēmāsāa̍ ni᷄ŋ ha̍a̍a̍, mbo̍ fūūlūū a̍ te̍le̍ŋ māsā bɛ̍ndōo̍ Sa̍i̍lɔ̄ɔ̄ ho̍ō Pa̍a̍sīāā o̍ de̍l Ba̍bi̍lɔ̄ŋ chōo̍ a̍ sɔ̍ŋgɔ̄ɔ̍ wo̍.