Chu̍dī 1 - Yāu̍ Mɛ̄lɛ̄ka̍a̍

¹ Ya̍ bu̍ɛ̍i̍ Chi̍i̍sū Ki̍li̍tīo̍o̍ Chu̍dī, pɔ̄mbɔ̄ɔ̍ Chēmi̍si̍, ya̍ cho̍ yāu̍wo̍ ho̍ō pōōnyīa̍a̍ ni̍. I̍ cho̍ ndu̍ pōōnyīa̍a̍ nāa̍ nya̍ wānāā Mɛ̄lɛ̄ka̍ vēēlu̍ le̍ wāa̍ wānāā ndɔ̄ wa̍ chūā. Nya̍ yɔ̍nūŋ ni̍ māā, nya̍ Mɛ̄lɛ̄ka̍ Fi̍nyā nāa̍ ō kāāla̍, ndu̍yɛ̍ mi̍ Chi̍i̍sū Ki̍li̍tī wa᷅ nya̍ māndāa̍ wa̍.

² I̍ cho̍ pīɛ̄īle̍ŋ māā Mɛ̄lɛ̄ka̍ tūīīnu̍ŋ nya̍ īnyīɛ̍ɛ̍ ta̍u̍, mbō ke̍ nya̍ kɔ̄l nyūlōo̍ fɔ̍, ndu̍yɛ̍ mbō chɔ᷄m nya̍ kāālā ndɔ̄ɔ̍ ta̍u̍.

Sīlāa̍ a̍ wānāā pɛ̄ɛ̄kū lāchōōwāa̍ o̍kɔ̄ɔ̄

³ Chāāŋāā nīāā ka̍a̍lāa̍, ya̍ i̍i̍ nɔ̍ o̍ kɔ̄l le̍ nya̍ yāu̍wo̍ pōōnyīāllo̍ a̍ pīŋī Mɛ̄lɛ̄ka̍ pīŋi̍ ho̍ō na̍a̍ na̍a̍ nya̍ā wo̍ o̍kɔ̄ɔ̄. Kɛ̍ ndu̍yɛ̍, I̍ sa̍a̍lu̍ŋ māā ō bɛ̄nda̍ mī I̍ po̍o̍nyi̍a̍l nya̍, ndu̍yɛ̍ mī I̍ nyɔ̍ɔ̍lu̍ nya̍ le̍ mī lā chɛ᷄ŋ mī lā si᷄m kpe̍e̍kpe̍i̍, mī lā mānda̍ sūɛ̍i̍ Mɛ̄lɛ̄kɛ̍i̍. Ndi̍ yɔ̍nūŋ ni̍ māā, sūɛ̍i̍ Mɛ̄lɛ̄ka̍ chīi̍ he̍ī wānāā ndūa̍a̍ yɔ̄ŋgū le̍ fɛ̍ɛ̍ŋ a̍ fɛ̍ɛ̍ŋ nde̍.

⁴ Le̍ sa̍bū ya̍ I̍ cho̍ he̍ī dīmīo̍o̍ wo̍ cho̍ ni̍, māā wānāā pūm a̍ si̍mu̍l Mɛ̄lɛ̄ka̍ wa̍, ā bīī ma̍ lūɛ̄ī nya̍ tɛ̄ɛ̄ŋ sɔ̍ɔ̍ sɔ̍ɔ̍. Ā bīī ma̍ mūlī yōōŋgu̍ cho̍ ho̍ō a̍ Mɛ̄lɛ̄ka̍ o̍kɔ̄ɔ̄ wo̍ bāla̍ŋ a̍ mākɔ̄ɔ̄, le̍ nda̍ di̍o̍o̍ kīo̍o̍ le̍ mā hīōū lāchī a̍ ka̍ālā ndāla̍ wɔ̍ɔ̍ŋnda̍ŋ tōsāa̍. Ndu̍yɛ̍, dīo̍m di̍mi̍ŋ māā Chi̍i̍sū Ki̍li̍tī ndu̍ pīlɛ̍ kpe̍ cho̍ wānā na̍a̍ bānāa̍ ni̍, ndu̍yɛ̍ mbo̍ wā Māsānɔ̄ɔ̍ Mɛ̄lɛ̄ka̍ nāa̍ wo̍, ā bīī ma̍ sɛ̄ɛ̄ŋgīāā ndu̍ pɛ̍ɛ̍ pɛ̍ɛ̍. Kɛ̍ ndu̍yɛ̍, sīndɛ̄ pa̍ dīo̍m Mɛ̄lɛ̄ka̍a̍ dīmi̍ a̍ mɛ̄ɛ̍ wānāā wāā nu̍a̍ā, a̍ si̍mu̍l Mɛ̄lɛ̄ka̍ wa̍, ā sɔ̄lā ni̍ŋ nyɛ̍ pālāa̍ yɛ̍ ni̍.

⁵ Nya̍ kpe̍de̍ lā sīnā ni᷅ŋ a̍ nyɛ̍ yɔ̍nu̍ŋ si̍ndɛ̄ wāŋnda̍ I̍sɔ̄lūɛ̄ī yo̍. Kɛ̍ ndu̍yɛ̍ I̍ cho̍ nya̍ chɔ̄ɔ̄lū yīyāla᷄ŋ a̍ ndi̍ o̍kɔ̄ɔ̄, mɛ̄ɛ̍ Māsānɔ̄ɔ̍ Mɛ̄lɛ̄ka̍ sōli̍ nda̍ o̍ chɛ̄le̍ŋ ni᷄ŋ o̍ lɛ̄ŋndē I̍chi̍pīle̍ŋ ni᷄ŋ yɛ̍. Kɛ̍ o̍ ko̍ŋ kɔ̍ɔ̍lī, wānāa̍ la̍a̍la̍ŋ a̍ ndu̍ le̍ wa̍, mbo̍ dīū nda̍.

⁶ Lā lōōnu̍ŋ ndɔ̍ vɛ̍lɛ̄ a̍ nyɛ̍ yɔ̍nu̍ŋ a̍ Ki̍i̍la̍a̍ Mɛ̄lɛ̄ka̍a̍ ā pūm o̍kɔ̄ɔ̄ wo̍. Ki̍i̍la̍a̍ Mɛ̄lɛ̄ka̍a̍ ā pūm, nāa̍ si̍māā Mɛ̄lɛ̄ka̍ ke̍ nda̍ wa̍ ā hīni̍ kɔ̍l a̍ ka̍ŋ te̍. Ma̍ māl fo̍ndāŋ nda̍ wa̍ wo̍. Le̍ he̍ī, mi̍ Mɛ̄lɛ̄ka̍ dūāū nda̍ o̍ yɔ̄lɔ᷄ŋ le̍ fɛ̍ɛ̍ŋ a̍ fɛ̍ɛ̍ŋ. O̍ ko̍ŋ kɔ̍ɔ̍lī, mbo̍ dūāū nda̍ o̍ so̍o̍ŋ nyūmmā kpīŋgbi̍ bɛ̍ndōo̍ ni᷄ŋ, le̍ mbō lo̍ o̍ ko̍ŋ ha̍a̍a̍, mī pāa̍le̍ bɛ̍ndūlē o̍ ki̍lūl ni̍ŋ nda̍ ya᷅mɛ̍i̍ le̍ŋ lē fūūlu̍u̍.

⁷ Lā lōōnu̍ŋ ndɔ̍ vɛ̍lɛ̄ a̍ So̍dɔ̄m a̍ Kōmo̍o̍lūā, a̍ chi̍o̍o̍ŋ ŋ̄ pīlɔ᷅ŋ ŋ̍ ba̍lu̍ mu̍ŋ ndo̍ŋ o̍kɔ̄ɔ̄. Nda̍ bɛ̍ɛ̍, ma̍ tōsā mɛ̄ɛ̍ ki̍i̍la̍a̍ Mɛ̄lɛ̄ka̍a̍ ha̍ā ā tōsa̍ yɛ̍. Ma̍ wōū bāa̍ o̍ nīīlū sūūndɛ̍i̍yo̍ ni᷄ŋ, a̍ ka̍ālā sūūndɛ̍i̍la̍ wɔ̍ɔ̍ŋ wɔ̄ɔ̍ŋ ndā chēle̍ŋ. Chi̍e̍e̍ŋ mu̍ŋ ki̍nɛ̍i̍, a̍ wānāā kāŋ, mi̍ Mɛ̄lɛ̄ka̍ tɛ̄ɛ̄mbūū nda̍ o̍ yīŋndē fɛ̍ɛ̍ŋ a̍ fɛ̍ɛ̍ŋnde̍ŋ ni᷄ŋ, le̍ wāa̍ māā sīlā le̍ wānā o̍ wānā.

⁸ Le̍nde̍ ko̍ni̍, wānāa̍ si̍mu̍l ha̍ā Mɛ̄lɛ̄ka̍ wa̍, yi̍lāŋndā ndāla̍ nda̍ chā la̍ŋ, la̍ŋ la̍ ke᷅ nda̍ di̍o̍o̍ le̍ hīōūwɔ̄ɔ̍ lāchī a̍ nīīlū ndā su̍u̍ndɛ̍i̍ wɔ̍ɔ̍ŋndo̍ ni̍. O̍ ko̍ŋ, ā bīī ma̍ tōsāl dīāllūŋ nda᷄ŋ nda̍ pi̍la̍ŋ dɛ̍nɛ̍ wɔ̍ɔ̍ŋndo̍. Ndu̍yɛ̍ o̍ ko̍ŋ kɔ̍ɔ̍lī, ma̍ kɛ̄ɛ̄ le̍ lūɛ̄īyɔ̄ɔ̍ Mɛ̄lɛ̄ka̍ o̍ bā bɛ̄ŋgu̍. Ma̍ yīōū ki̍i̍la̍a̍ Mɛ̄lɛ̄ka̍ā kɛ̄ndīa̍a̍.

⁹ Ma̍i̍kɛ̄l o̍ cho̍ ki̍i̍la̍a̍ Mɛ̄lɛ̄ka̍a̍ bōlle̍ŋ ndo̍ kpe̍e̍kpe̍i̍, ō tōsa̍ le̍nde̍ le̍. Bōōndi̍i̍ sɛ̄ɛ̄ŋgi̍āŋndo̍ lūɛ̄ī bɛ̍ɛ̍ Māsa̍ Nyi̍nāā Wɔ̄ɔ̍ŋnda̍ tɛ̄ɛ̄ŋ nda̍ Ma̍i̍kɛ̄l o̍ dīāllu᷄ŋ Mūu̍sē wo̍ŋ chōo̍ le̍ wāna̍ ku̍ā a̍ mu̍ŋ ndo̍, Ma̍i̍kɛ̄l so̍li̍ di̍ōm yēīyāā mbō ke̍ ndu̍ le̍. Dīmīo̍o̍ ko̍ni̍ Ma̍i̍kɛ̄l di̍mi̍ ni̍ āā, “Nu̍a̍ā Māsānɔ̄ɔ̍ Mɛ̄lɛ̄ka̍ tūsī nu̍m nyɛ̄ pālāa̍ chōo̍ fɔ̍.”

¹⁰ Kɛ̍, wāŋnda̍ ha̍ā nda̍ nda̍, nyɛ̄ nda̍ si̍nā pɛ̍ŋgu̍ le̍ wo̍, a̍ ndu̍ nda̍ su̍a̍ā di̍ōmndā wɔ̄ɔ̍ŋnda̍ŋ ni̍. Sɔ̄ɔ̍ŋ nda̍ sīnā yɛ̍ pɛ̄ŋgu̍ wo̍ŋ, sīnā vīsīāā yōndūa̍a̍ sīnā su̍ɛ̍i̍ yo̍ ko̍ni̍ nda̍ sīnā mu̍ŋ ni̍. Mɛ̄ɛ̍ ŋ̍ hu᷅ŋ nda̍ o̍ lēbōl lɛ̍ ko̍ni̍ nda̍ tōsā ni̍. Ndu̍yɛ̍ sɔ̄ɔ̍ŋ nda̍ sīnā yɛ̍ mu̍ŋ le̍ tōsāa̍ wo̍ŋ, mu̍ŋ ko̍ni̍ ŋ̍ tɛ̍ɛ̍mbūū nda̍ ni̍.

¹¹ Nyɛ̄ pa̍lāā bɛ̄ndōo̍ chō le̍ nda̍. Ā tōl ka̍a̍ Ke᷅ŋndo̍ kɔ̄ɔ̄lī. Mɛ̄ɛ̍ Be̍lām to̍sa̍ pūɛ̍ɛ̍ŋnda̍ŋ mbo̍ yɔ̄ŋgu᷄ŋ ndu̍ pi̍la̍ le̍ hɔ̄ltē īka̍ni̍le̍ŋ yɛ̍, le̍nde̍ nda̍ bɛ̍ɛ̍ nda̍ yɔ̄ŋgu̍ŋ nda̍ pi̍la̍ le̍ hɔ̄ltē īka̍ni̍le̍ŋ ni̍. Ā tōsa̍ nīlā kālu̍la̍ŋ mɛ̄ɛ̍ Ko̍lūā, o̍ to̍sa̍ nīlā kālu̍la̍ŋ yɛ̍. Ndu̍yɛ̍ mɛ̄ɛ̍ Mɛ̄lɛ̄ka̍ dīī Ko̍lūā yɛ̍, le̍nde̍ Mɛ̄lɛ̄ka̍ chō wāŋnda̍ ha̍ā dīū ni̍.

¹² Tē lā chūūŋgi̍āŋ le̍ nyɛ̄ dīāā dīōm pīlɔ̍ɔ̍ dīo̍o̍ pɛ̍, wāŋnda̍ ha̍ā nyɛ̄ dīa̍a̍ dīo̍o̍ o̍ pūlu̍le̍ bɛ̍ndūle̍ŋ ni᷄ŋ, si̍ɔ̍mbu̍la̍ bi̍ī nda̍ le̍. Le̍ nda̍ pi̍la̍ ko̍ni̍ nda̍ būūla̍ŋ ni̍. Mɛ̄ɛ̍ sɔ̄ŋndo̍ dēl nu̍a̍ā o̍ kōlāa̍ yɛ̍, le̍nde̍ nda̍ wā nya̍ tɛ̄ɛ̄ŋ o̍ chūūŋgi̍āŋ nya̍ nyɛ̄ dīāā dīōm pīlɔ̍ɔ̍ ni᷄ŋ ni̍. Mɛ̄ɛ̍ pīɔ̍ɔ̍ hēl nu̍a̍ā, kɛ̍ mī hūēīye̍ hɔ᷄ŋ mī ī kūɛ̄nu᷄ŋ a̍ ndu̍, ō se᷅ le̍ yɛ̍, le̍nde̍ nda̍ chōnu᷄ŋ fo̍ndō fu̍u̍ ni̍. Ndu̍yɛ̍, mɛ̄ɛ̍ yɔ̄mndo̍ kɛ̄ɛ̄ nu̍a̍ā le̍ kōmɔ̄ɔ̍, te̍le̍ŋ o̍ ku̍ām ndo̍ fūūlu̍u̍ bɛ̍ɛ̍ ō ku᷅m te̍ yɛ̍, le̍nde̍ nda̍ chō ni̍. Mɛ̄ɛ̍ nda̍ sūŋgū yɔ᷅mndo̍ nu̍a̍ā chu̍ā mbō vī yɛ̍, le̍nde̍ wāŋnda̍ ha̍ā chō ā vīlɛ̍i̍ pɛ̍ pɛ̍ ni̍.

¹³ Mɛ̄ɛ̍ mɛ̄ŋnda̍ŋ mā hūŋ nu̍a̍ā mī mā lūāānūŋ o̍ kɔ̄ŋgɔ̍ɔ̍, mī mā wa̍ mā līndɛ̍i̍ li̍u̍ li̍u̍ yɛ̍, le̍nde̍ sɔ̄ɔ̍ŋ lāsi̍ɔ̍mbu̍ŋ wāŋnda̍ ha̍ā tōsā wo̍ŋ chō ni̍. Mɛ̄ɛ̍ lōo̍ŋ tɛ̍ndā cho̍o̍ cho̍o̍ wo̍ŋ ŋ̄ fāŋāŋ nu̍a̍ā o̍ fo̍ndāŋndā ndāla̍ŋ yɛ̍, le̍nde̍ wāŋnda̍ ha̍ā chō ni̍. Kɛ̍ ndu̍yɛ̍, Mɛ̄lɛ̄ka̍ bɛ̄ɛ̄ndi̍a̍a̍ fo̍ndāa̍ le̍ nda̍, o̍ so̍o̍ŋ nyūmmā kpīŋgbi̍ bɛ̍ndōo̍ ni᷄ŋ le̍ fɛ̍ɛ̍ŋ a̍ fɛ̍ɛ̍ŋ.

¹⁴ Mi̍ I̍nɔ̍kī o̍ wa̍ fi̍nyā māmā ŋɔ᷄mmɛ̍ūwo̍ chɔ̍ŋ a̍ bōōndi̍i̍ A̍da᷅mnde̍ wo̍, mbo̍ dīmī yōōŋgu̍ chɛ̍ŋ o̍ Mɛ̄lɛ̄ka̍ lo̍ wo̍ a̍ nda̍ o̍kɔ̄ɔ̄ āā, “Mi̍ lā che᷄ŋ Ma̍sānɔ̄ɔ̍ Mɛ̄lɛ̄ka̍ hūnɔ̄ɔ̍ nda̍ ki̍i̍la̍a̍ ndūa̍a̍ cho̍ le̍ Mɛ̄lɛ̄ka̍ wa̍, wāa̍la̍ŋ a̍ wāa̍la̍ŋ.

¹⁵ Ō hīŋ le̍ mbō kīlu̍l wānā o̍ wānā ya᷅mɛ̍i̍, ndu̍yɛ̍ wānā o̍ wāna̍ si̍mu̍l Mɛ̄lɛ̄ka̍, mbō tūsī nda̍ nyɛ̄ pālāa̍ chōo̍, le̍ yɔ̄ŋndā wɔ̄ɔ̍ŋndā nda̍ tōsa̍ la̍ŋ, a̍ dīōmndā wɔ̄ɔ̍ŋndā wānāā yɔ̄ŋ wɔ̄ɔ̍ŋnda̍ ha̍ā ā sōō a̍ Mɛ̄lɛ̄ka̍ la̍ŋ kpo̍u̍.”

¹⁶ Te̍le̍ŋ o̍ te̍le̍ŋ wāŋnda̍ ha̍ā chō ŋɔ̄ɔ̄chīa̍ŋnda̍ŋ, ndu̍yɛ̍ mā bīī chāāŋnda̍ tɔ̍ɔ̍ya̍ŋnda̍ŋ. Sɔ̄ɔ̍ŋ yēēma̍ŋ ndāa̍ŋ wɔ̍ɔ̍ŋndo̍ŋ ŋ̄ dīmūl nda̍ le̍ tōsāa̍ wo̍ŋ, mu̍ŋ nda̍ tōsā ni̍. Yōŋgāa̍ kīōlɔ̄ɔ̍ a̍ nda̍ pi̍la̍ o̍kɔ̄ɔ̄, ndu̍yɛ̍ ā bīī pɛ̍ ā sōō sɔ̄ɔ̍ŋ kɛ̍ndɔ᷄ŋ a̍ wāŋnda̍ o̍kɔ̄ɔ̄ le̍ hāli̍ kpe̍ŋ mā sɔ̄la̍ nyɛ̄ nda̍ yēēma̍ wo̍.

Sīlāa̍ a̍ bīūwɔ᷄ŋndo̍ o̍kɔ̄ɔ̄

¹⁷ Kɛ̍ ndu̍yɛ̍, chāāŋāā nīāā ka̍a̍lāa̍, lā lōōnu̍ŋ ndɔ̍ a̍ dīōmndā wānāā Māsānɔ̍ nāa̍ Chi̍i̍sū Ki̍li̍tī ve᷅m hɔ̄ltē ndɔ̄ wa̍, ā dīmi̍ sīndɛ̄ la̍ŋ.

¹⁸ Ma̍ dīmūl nya̍ āā, “Tē mɛ̄ɛ̄lu̍la̍ chi̍e̍ēŋndo̍ lā wa̍ fūūlūūwo̍ pɛ̍, wāŋnda̍ wā ni̍ŋ mā ma᷄m sūɛ̍i̍ Mɛ̄lɛ̄kɛ̍i̍. Sɔ̄ɔ̍ŋ yēēma̍ŋ ndāa̍ŋ wɔ̄ɔ̍ŋndo̍ŋ ŋ̄ dīmūl nda̍ le̍ tōsāa̍ wo̍ŋ, mu̍ŋ nda̍ tōsā ni̍ŋ ni̍.”

¹⁹ Wāŋnda̍ ha̍ā, nda̍ hu᷅ŋ a̍ pīɔ̄ūvi̍āŋnda̍ŋ nya̍ tɛ̄ɛ̄ŋ ni̍. Nyɛ̍ hu᷅ŋ o̍ bōllē ndāle̍ŋ ni᷄ŋ ndo̍, ndu̍ to̍sā wa̍llo̍ a̍ nda̍ ni̍. Ā nɔ̍ Nyi̍na̍ Mɛ̄lɛ̄ka̍ kɔ̄ɔ̄lī le̍.

²⁰ Kɛ̍ nya̍ nya̍ chāāŋāā nīāā ka̍a̍lāa̍, lā māāli̍āŋ ve̍llāa̍ vēllē le̍ hīōūwɔ̄ɔ̍ lāchī a̍ dīāllūŋ kāla᷄ŋ sɔ̄lāa̍, o̍ tīīnda᷄ŋ nya̍ nɔ̄ ho̍ō o̍ Mɛ̄lɛ̄ka̍ ni᷄ŋ ndo̍. Ndu̍yɛ̍, lā pīɛ̍i̍ Mɛ̍lɛ̄ka̍, mɛ̄ɛ̍ Nyi̍na̍ Kāsīo̍o̍ chɔ̄m nya̍ yɛ̍.

²¹ Lā mānda̍ nya̍ pi̍la̍, le̍ mī lā hīōū lāchī a̍ wāa̍ o̍ kāāla̍ Mɛ̄lɛ̄ka̍a̍ bɛ̄ŋgu̍. Ndu̍yɛ̍, lā chu᷄m le̍ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍, ō Māsānɔ̄ɔ̍ Chi̍i̍sū Ki̍li̍tī cho̍ hūnɔ̄ɔ̄ nya̍ kē le̍ chō o̍ cho̍ wāna̍ īnyīɛ̍ɛ̍ wo̍.

²² Lā nɔ̍ nyi̍ɛ̍ɛ̍ye̍ le̍ wānāa̍ nɔ̍ kīīsa᷄ŋndo̍ o̍ tīīnda᷄ŋ nda̍ nɔ̄ o̍ Mɛ̄lɛ̄ka̍ ni᷄ŋ ndo̍ wa̍.

²³ A̍ cho̍ kɔ̄la̍ŋ o̍ yīŋnde̍ŋ ni᷄ŋ nda̍, lā mīŋgi̍ nda̍ o̍ nɛ̄ī mī lā pīŋi̍ nda̍. Lā tūīīnu̍ŋ a̍ pi᷅li̍a̍a̍ īnyīɛ̍ɛ̍, kɛ̍ ndu̍yɛ̍ kpɔ̄ndāa̍ a̍ mānda᷄ŋndo̍. Lā tūīīnu̍ŋ nda̍ īnyīɛ̍ɛ̍, kɛ̍, nīīlū o̍ nīīlū yɔ̄ŋ wɔ̄ɔ̍ŋ nda̍ chō lēni᷄ŋ mī lā tu᷄l la̍ŋ lēyɛ̄.

Pīɛ̄īlē mɛ̄ɛ̄lāāle̍ŋ

^24-25 Lā ŋ̄ līsa᷅ŋ ni̍ko̍ Mɛ̍lɛ̄ka̍ o̍ cho̍ Mɛ̄lɛ̄ka̍ ndu̍ pīlɛ̍ kpe̍ wo̍. Ndu̍ pi̍ŋī na̍a̍ ni̍. Ndu̍yɛ̍, ō nɔ̄lā mbō tōsa̍ lā me᷅l ti̍i̍nda᷄ŋ nya̍ nɔ̄ o̍ ndu̍ ni̍ŋ ndo̍ le̍. Ndu̍yɛ̍, ndu̍ nɔ̍lā ni̍ mbō fūūlu̍u̍ a̍ nya̍ a̍ kɔ̄l kɛ̄ndɛ̄, mī lā si᷄m ndu̍ o̍ hɔ̄l o̍ nāŋɔ̄ɔ̄ ndɔ̄ bɛ̍ndōo̍ ni᷄ŋ, lā nɔ᷅ sɔ᷅ŋ o̍ sɔ̄ŋ te̍. Lā ŋ̄ līsa᷅ŋ Mɛ̄lɛ̄ka̍ sa̍na̍a̍ o̍ Māsānɔ̍ nāa̍ Chi̍i̍sū Ki̍li̍tī ni̍ŋ. Lā ŋ̄ līsa᷅ŋ ndu̍ le̍ nāŋɔ̄ɔ̄ ndɔ̄ɔ̍, a̍ le̍ chō o̍ cho̍ ō bɛ̄ndū wo̍, a̍ le̍ kpāāya̍ ndɔ̄ɔ̍, a̍ le̍ chō o̍ cho̍ nyɛ̄ o̍ nyɛ̄ fe̍e̍ bo᷅lle̍ŋ ndo̍. Kāni̍ bɛ̍ɛ̍ mi̍ chi̍e̍ēŋndo̍ kāndu᷄ŋ, le̍nde̍ o̍ cho̍ ni̍. Pɛ̄ŋgo̍o̍ ho̍ō bɛ̍ɛ̍ ō chō le̍nde̍. Le̍ fɛ̍ɛ̍ŋ a̍ fɛ̍ɛ̍ŋ ō chō wā le̍nde̍. Ī yɔ̄nu̍ŋ le̍nde̍ fɔ̍.