Cho̍wɛ̄ɛ̄ 1 - Yāu̍ Mɛ̄lɛ̄ka̍a̍

¹ Yōōŋgū Mɛ̄lɛ̄ka̍ Ya̍a̍wɛ̄ɛ̄ o̍ ke̍ ya̍ Cho̍wɛ̄ɛ̄, po̍ Pɛ̍tu̍ɛ̍ɛ̄ wo̍ le̍ wāŋnda̍ Chu̍dā wo̍, ndu̍ cho̍ ho̍ō ni̍.

Wāŋnda̍ Chu̍dā a̍ cha̍ŋ le̍ tɔ̄lɔ̄ɔ̄lā ndāla̍ ta̍mbu̍ la̍ŋ

² Lā tūe̍i̍ nyɛ᷅ ya̍ I̍ cho̍ dīmīo̍o̍ wo̍, nya̍ bɛ̄ndūāā kālla̍. Nya̍ wānā o̍ wānā cho̍ o̍ lɛ̄ŋndē Chu̍dāle̍ŋ ni᷄ŋ, lā ya᷄ŋ ni᷅la̍ŋ. Nyɛ̍ yɔ̍nu̍ŋ nya̍ ho̍ō wo̍, kāni̍ bɛ̍ɛ̍ a̍ te̍le̍ŋ nyāa̍ ho̍ō, ɔ̄ɔ̄ a̍ te̍le̍ŋ fi̍nyāā nyāa̍, ī wāā nu̍a̍ā ī yɔ̄nu̍ŋ ni᷅ŋ?

³ Le̍la̍ŋ, lā dīmu̍l chu̍a̍u̍wāā nyāa̍ a̍ ndi̍ o̍kɔ̄ɔ̄, mī chūāūwāā nyāa̍ nda̍ hu᷄ŋ di̍mūl chūāūwāā ndāa̍ a̍ ndi̍ o̍kɔ̄ɔ̄. Ndu̍yɛ̍, mī chūāūwāā ndāā kāŋ nda̍ hu᷄ŋ di̍mūl chūāūwāā ndāa̍ mbō kūɛ̄ a̍ lāchī kɛ᷅.

⁴ Lā dīmu̍l nda̍ māā mi̍ so̍o̍nu̍a̍a̍ hūŋ ku̍ndālā bɛ̄ndūla̍ŋ ta̍u̍ ta̍u̍ ma̍ dīā tɔ̄lɔ̄ɔ̄la̍ŋ. Mɛ̄ɛ̍ so̍o̍nu̍a̍a̍ ā hīŋ ku̍ndā bɛ̄ndōo̍, ma̍ hu᷄ŋ di̍ō. Ō nda̍ mɛ̄i̍ yo̍, mi̍ so̍o̍nu̍a̍a̍ ku̍ndā chēle̍ŋ nda̍ hu᷄ŋ di̍ō. Ō nda̍ mɛ̄i̍ vɛ̄lɛ̄ wo̍, mi̍ so̍o̍nu̍a̍a̍ ku̍ndā bɛ̄ndū chēle̍ŋ nda̍ hu᷄ŋ di̍ō. Ō nda̍ mɛ̄i̍ kɔ̄ɔ̄lī wo̍, mi̍ so̍o̍nu̍a̍a̍ tɛ̍ɛ̍mbāa̍ nda̍ hu᷄ŋ si̍o̍ū dīo̍.

⁵ Nya̍ wānāā kōlāā māmūɛ̄ī ya̍, lā tīōndu̍ o̍ lūa̍a̍ŋ. Lā cha᷄ŋ cha̍ŋndo̍ pi̍la̍ nya̍ wānāā kōlāa̍ ha̍ā. Kāni̍ fo̍ndōle̍, kīle̍pīi̍ma̍ nyāa̍ŋ mā chūū tāmbu̍, ndu̍yɛ̍ fo̍ndāŋndā nya̍ sɔ̄lā mu̍ɛ̍īmā nyā mākīle̍pīi̍ya̍ŋ nda̍ŋ lā cho̍ lɛ̍ le̍.

⁶ So̍o̍nu̍a̍a̍ ku̍ndā bɛ̄ndūa̍a̍ ā de᷄l lɛ̄ŋndē nāāle̍ŋ chōo̍. So̍o̍nu̍a̍a̍ kpāāyā bɛ̍ndūa̍a̍ ā dēl na̍a̍ chōo̍. Ndu̍yɛ̍, ā chō bɔ̄ɔ̍ wānā chi̍ī nda̍ chɔ̄m te̍. Chīŋūŋ ndāa̍ŋ māā chīŋūŋ kpɔ̍kūŋ. Ŋ̄ lūɛ̄īyāā māā chīŋūŋ kpɔ̍kūŋ lāāndū.

⁷ Yɔ̄mīī nɛ̄i̍ mākīle̍pīi̍ye̍ kpe̍nde̍ ā chīi̍ tɛ̄ɛ̄mbūū. Ā chīi̍ pēi̍ yɔ̄mīī māfi̍kīi̍ye̍ sɔ᷄m ma̍ dīndī ndi̍ tɛ̍ɛ̍. Ndu̍yɛ̍ yɔ̄mīī kēŋ, ā chīi̍ bo̍o̍la̍ŋ sɛ̄ɛ̄lūū o̍ kɔ̄ɔ̍ mi̍ ī wā īsīsi̍ le̍nde̍ a̍ lɛ̄ūwo̍ŋ ŋ̄ vēsɛ̍i̍.

⁸ Lā cha᷄ŋ nya̍ wāŋnda̍ Chu̍dā. Lā bīi̍ mɔ̍nɛ̍i̍ mɛ̄ɛ̍ yūfu̍a̍a̍nɔ̍ɔ̍ vīīkūū nu̍a̍ā wānā pɔ̍nɔ̍ nɔ̍ le̍ ndu̍ kɛ̄sīo̍o̍ nɔ̄ɔ̍ ni᷄ŋ yɛ̍.

⁹ Sa̍lālā tɔ̄lɔ̄ɔ̄lā ku̍lta̍ wāŋnda̍ nda̍ a̍a̍ hu᷅ŋ o̍ chīɛ̍i̍ Mɛ̄lɛ̄ka̍a̍ la̍ŋ, a̍ sālālā māmūɛ̄ī mākīle̍pīi̍ya̍ŋ, wāŋnda̍ cho̍ lɛ̍ hūnɔ̄ɔ̄ a̍ la̍ŋ te̍. Le̍ he̍ī, wānāā sōlīāā lāsa̍lāa̍ cho̍ wa̍llo̍ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍ wa̍ ā chō mɔ̍nɛ̍i̍ bīyɔ̄ɔ̍.

¹⁰ Chīɔ̍ɔ̍ŋ nāa̍ŋ lo̍ fo̍ndō. Lɛ̄ŋnde̍ŋ lē chō mɔ̍nɛ̍i̍ bīyɔ̄ɔ̍, kāni̍ fo̍ndōle̍, tɔ̄lɔ̄ɔ̄la̍ŋ lā tāmbū. Yɔ̄mīī mākīle̍pīi̍ nya̍ tōōsīāā mu̍ɛ̍īya̍ŋnde̍, ī vēsa̍ŋ, yɔ̄mīī ɔ̄li̍fīi̍ye̍ bɛ̍ɛ̍ ī vēsa̍, chūɛ̄īmā ɔ̄li̍fīi̍mā cho̍ lɛ̍ le̍.

¹¹ Nya̍ to̍sā wa̍lta̍ īchīɛ̄ɛ̄la̍ŋ nda̍, lā bīi̍ mɔ̍nɛ̍i̍. Nya̍ tu̍āl yɔ̍mīī mākīle̍pīi̍ye̍ wa̍, lā cha̍ŋ cha᷄ŋ īmɔ̍nɔ̍ɔ̍. Kāni̍ fo̍ndōle̍, wi̍tīi̍ŋ nyāa̍ŋ a̍ ba̍a̍līi̍ŋ nyāa̍ŋ, a̍ nyɛ̄ o̍ nyɛ̄ nya̍ tɔ̄l ō chūū tāmbu̍.

¹² Yɔ̄mīī mākīle̍pīi̍ye̍, a̍ yɔ̄mīī māfi̍kīi̍ye̍ ī chūū vēsa̍. Yɔ̄mīī pɔ̄mɛ̄ki̍la̍ne̍tīi̍ye̍, a̍ wāūwa̍ŋ, a̍ yɔ̄mīī a̍pūū ve̍, ndu̍yɛ̍ a̍ yɔ̄mīī kūāmɛ̄ī chēle̍ŋnde̍ kpo̍u̍, ī chūū vēsā o̍ kpe̍le̍la̍ŋ ni᷄ŋ. Wāŋnda̍ nɔ̍ lɛ̍ kɔ̄l nyūlū o̍ kɔ̄l nyūlū le̍.

¹³ Nya̍ wānāā sōlīāā lāsa̍lāa̍, nya̍ to̍sā ha̍ā wa̍llo̍ o̍ ma̍āŋndo̍ chōo̍ o̍ chīɛ̍i̍ Mɛ̄lɛ̄ka̍a̍ wa̍, lā wōōnu̍ŋ nyɛ̍lā lābɛ̍kīla̍ŋ mī lā cha᷄ŋ cho̍o̍ cho̍o̍ kpe̍le̍ŋ. Lā kɔ̍ o̍ chīɛ̍i̍ Mɛ̄lɛ̄ka̍a̍ ni᷄ŋ a̍ nyɛ̄lā lābɛ̍kīlā lāŋ lēkɔ̄ɔ̍, mī lā kɔ̍ lɔ̍ɔ̍lū cha᷄ŋndo̍ pi̍i̍ pi̍i̍. Kāni̍ fo̍ndōle̍, sa̍lālā tɔ̄lɔ̄ɔ̄lā ku̍lta̍ wāŋnda̍ nda̍ a̍a̍ hu᷅ŋ o̍ chīɛ̍i̍ Mɛ̄lɛ̄ka̍a̍ ni᷄ŋ nda̍ŋ, a̍ sa̍lālā māmūɛ̄ī mākīle̍pīi̍la̍ŋ, lā kīōlu̍, wāŋnda̍ cho̍ lɛ̍ hūnɔ̄ɔ̄ a̍ la̍ŋ te̍.

¹⁴ Lā vēēlu̍ wa᷅ŋnda̍ nāa̍ pi᷅lɛ̍, mī lā bīī su᷅mndo̍. Lā vēēlu̍ wa᷅ŋ bɛ̄ndūāā lēlɛ̄ŋnda̍, a̍ wānā o̍ wāna̍ cho̍ o̍ lɛ̄ŋnde̍ Chu̍dāle̍ŋ ni᷄ŋ, mā chūūŋgi̍āŋ o̍ chīɛ̍i̍ Mɛ̄lɛ̄ka̍ Ya̍a̍wɛ̄ɛ̄ wo̍, Mɛ̄lɛ̄ka̍ nyāa̍, mī lā kōŋu̍l nāa̍ Mɛ̄lɛ̄ka̍ chūā le̍ mbō māla̍ nya̍.

¹⁵ Pāa̍le̍ kpūndɛ̍lē bɛ̄ndūle̍ŋ lē chō o̍ nɛ̄ī, pāa̍le̍ Mɛ̄lɛ̄ka̍ nɔ̍ kpāāyāa̍ kpo̍u̍ wo̍ ō hūŋ ni̍ŋ a̍ nyɛ̄ pālāā bɛ̄ndōo̍ le̍ŋ, lē chō ni᷅ŋ kpɛ̍ɛ̍lūŋ. Pāa̍le̍ŋ nde᷅ŋ lē wā ni̍ŋ pa̍a̍le̍ kpūndɛ̍ lē bɛ̄ndū.

¹⁶ Nyɛ̄ dīa̍a̍ o̍ nyɛ̄ dīāā ō chi̍nūŋ ndɛ̍ le̍. Ndu̍yɛ̍ kɔ̄l nyūlū na̍a̍ ŋ̍ nɔ̍ o̍ chīɛ̍i̍ Mɛ̄lɛ̄ka̍ nāa̍ wo̍, a̍ kɔ̄l kɛ̄ndɛ̄ na̍a̍ ŋ̍ to̍sā lo̍ŋ ndo̍, lā cho̍ lɛ̍ le̍.

¹⁷ Ku̍lu̍la̍ tɔ̄lɔ̄ɔ̄la̍ŋ lā sɛ̄ŋnu᷄ŋ o̍ pūūlōo̍ bɛ̄ŋgu̍. Chīɛ̄īlā nda̍ kɛ̄sī nyɔ̍ɔ̍ŋ nda̍ŋ lā lo̍ fo̍ndō, nyɛ̄ o̍ nyɛ̄ cho̍ lɛ̍ lēni᷄ŋ te̍. Fo̍ndāŋndā nda̍ dūāū nyɛ̄ dīa̍a̍ la̍ŋ bɛ̍ɛ̍, lā pe̍si̍ pe̍si̍ wɔ̍ wɔ̍. Nyɛ̄ dīa̍a̍ o̍ nyɛ̄ dīāā cho̍ lēni᷄ŋ te̍.

¹⁸ Chɔ̄lūa̍a̍ chō cha᷄ŋnda̍ īmɔ̍nɛ̍la̍ŋ kpe̍e̍kpe̍i̍, kāni̍ bīl o̍ bīl pūīyāā cho̍ mā dē le̍. Sāā ku̍ndāa̍ bɛ̍ɛ̍ ā chō sāŋgāa̍ le̍ nyɛ̄ nda̍ dīā wo̍.

¹⁹ O̍o̍ Mɛ̄lɛ̄ka̍ Ya̍a̍wɛ̄ɛ̄, I̍ cho̍ cha᷄ŋndo̍ nāa̍ nūm chu̍a̍ le̍ mālāa̍. Kāni̍ fo̍ndōle̍, bīllo̍ kpo̍u̍ yo̍ndōla̍ŋ ni᷄ŋ, a̍ kpe̍le̍la̍ īyɔ̄mnda̍ŋ lā vēsa̍ sɛ̍ɛ̍ŋ sɛ̍ɛ̍ŋ mɛ̄ɛ̍ yīŋnde̍ŋ lē lūām nu̍a̍ā yo̍ndōo̍ mī nyɛ̄ o̍ nyɛ̄ ō chūū ŋɔ̄ yɛ̍.

²⁰ Vīsīāā yōndūa̍a̍ bɛ̍ɛ̍ ā chō kōŋu̍llo̍ nāa̍ nūm chu̍a̍. Kāni̍ fo̍ndōle̍, pēēla̍ ko̍lāā la̍ŋ kpo̍u̍ lā vēsa̍, ndu̍yɛ̍ bīl o̍ bīl pūīyāa̍ cho̍ yōndōla̍ŋ ni᷄ŋ yīŋnde̍ŋ lē lōm ndu̍ kpo̍u̍.