Chēmi̍si̍ 1 - Yāu̍ Mɛ̄lɛ̄ka̍a̍

¹ Ya̍ Che̍mi̍si̍ ya̍ cho̍ yāu̍wo̍ ho̍ō pōōnyīa̍a̍ ni̍, ya̍ bu̍ɛ̍īyo̍ le̍ Mɛ̄lɛ̄ka̍ a̍ Māsānɔ̄ɔ̍ Chi̍i̍sū Ki̍li̍tī. I̍ cho̍ ndu̍ pōōnyīa̍a̍ nāa̍ nya̍ wānāa̍ Mɛ̄lɛ̄ka̍a̍ chūā nya̍ cho̍ o̍ kāa̍la̍ŋ ni᷄ŋ bā o̍ bā fe̍e̍ o̍ chi̍e̍ēŋndo̍ chōo̍ wa̍. I̍ yi̍l nya̍, I̍ yi̍l nya̍ lāpi̍.

Lā dɔ̄u̍ ti̍i̍nda᷄ŋndo̍ o̍ Mɛ̄lɛ̄ka̍ ni᷄ŋ

² Chāa̍ŋāā nīāā wa̍nāā lāāla᷄ŋnda̍. Tē dɛ̍nɛ̍la̍ pa̍lāālā yɛ̍ yɛ̍la̍ŋ lā hīŋ nya̍ chōo̍ pɛ̍, lā wa̍ a̍ kɔ̄ltā kɛ̄ndɛ̄ bu̍tē.

³ Kāni̍ fu̍u̍le̍, nya̍ pi̍la̍ lā sīnā māā tē mu᷅ŋ ŋ̄ yɔ̄nu̍ŋ nya̍ pɛ̍, mɛ̄ɛ̍ tɔ̄ɔ̄nda᷄ŋndo̍ nya̍ cho̍ ko̍ŋ ni̍ le̍ sīnāa̍ mɛ̄ɛ̍ kpɛ̍ nya̍ tīīnda̍ŋ o̍ Mɛ̄lɛ̄ka̍ ni᷄ŋ yɛ̍ ni̍. Tē mu᷅ŋ ŋ̄ kēēku̍ nya̍ chōo̍ pɛ̍, lā nɔ̄lā mī lā hīōū lāchī a̍ sīsi̍la̍ŋ nyɛ̄ kɛ̄ndɛ̄ yi̍.

⁴ Lā hīo̍u̍ la̍chi̍ a̍ sīsi̍la̍ŋ nyɛ̄ kɛ̄ndɛ̄ yi̍, mbō lo̍ o̍ ko̍ŋ ha̍a̍a̍ mī lā fūūlu̍u̍ o̍ mɛ̄ɛ̄lu̍la̍ŋ le̍ mī lā sīmnu᷄ŋ mɛ̄ɛ̍ Mɛ̄lɛ̄ka̍ hɛ̄na̍ŋ nya̍ mī lā wa̍ o̍ nyɛ̄ o̍ nyɛ̄ fe̍e̍ ni̍ŋ yɛ̍. Ka̍ā o̍ ka̍ā kɛ̄ndɛ̄ wa᷅ mī lā kɛ̄ɛ̍ ndu̍ nɔ̄ le̍.

⁵ Le̍la̍ŋ, tē wānā o̍ wānā wa̍ nya̍ tɛ̄ɛ̄ŋ pɛ̍ mbō nɔ̍ ta̍āsi̍ le̍, mɛ̄ɛ̍ wānā ko̍ŋ ō nyūna̍ Mɛ̍lɛ̄ka̍ dīōm le̍ mbō ke̍ ndu̍ tāāsi̍o̍o̍. Wāna̍ īkɛ̄ndɔ̄ɔ̍ Mɛ̄lɛ̄ka̍ chō nāa̍ wānā o̍ wānā chu̍a̍ ni̍. Ō ke᷅ wa̍nā nyɛ̍ a̍ ŋɔ̄ɔ̄chīa̍ŋ te̍. Wānā o̍ wāna̍ nyu̍na̍ ndu̍ le̍ tāāsi̍o̍o̍ pɛ̍, kīo̍o̍ o̍ ke᷅ ndu̍ ni̍.

⁶ Kɛ̍ ndu̍yɛ̍ wānā o̍ wānā tē a̍ nyu̍na̍ Mɛ̄lɛ̄ka̍ dīōm pɛ̍, mɛ̄ɛ̍ nɔ̍ la̍a̍la᷄ŋndo̍ māā ō chō nu̍m kē. Tē a̍ nyu̍na̍ ndu̍ pɛ̍, nɔ᷅ kīīsa᷄ŋ o̍ kɔ̄l nūmndo̍ ni᷄ŋ te̍. Kāni̍ fu̍u̍le̍, wāna̍ nyu̍nā ho̍ō Mɛ̄lɛ̄ka̍ a̍ kīīsa᷄ŋndo̍ wo̍ ō cho̍ wa᷅na̍ si̍m o̍ nɛ̄īyo̍ ō pīlɛ̍ chōo̍ sa̍kpō le̍. Wānā wa̍ā le̍nde̍ ō chō māchūāā mɛ̄ɛ̍ pēē mɛ̄ŋmā īhɛ᷄llo̍ chō yɛ̍, hūēīye̍ ī hɔ᷄ŋ lēchōo̍ pɛ̍ mā si᷅m yi̍ le̍. Yɔ̄nɔ᷄ŋndo̍ yo̍kpa᷄ŋ yo̍kpa᷄ŋ, mā hēl mā tūāl.

^7-8 Wānā mu̍lū mūlūa̍ŋndo̍ wānā wa̍ā le̍ndōo̍ chō ni̍. Ō si᷅m o̍ nɛ̄ī pi᷅lɛ̍ chōo̍ le̍. Wānā wa̍ā le̍nde̍ ō nɔ᷅ o̍ kɔ̄l kpo̍so̍ŋ māā ō chō nyɛ̄ o̍ nyɛ̄ sɔ̄lā Māsānɔ̄ɔ̍ Mɛ̄lɛ̄ka̍ o̍ bā le̍.

Sīlāa̍ le̍ wānāā tāmbɛ̍i̍ya̍ a̍ wānāā sūlāa̍

⁹ Wānā la̍a̍la᷄ŋ cho̍ ho̍ō ō tāmbɛ̍i̍ yo̍ ō na᷄ŋ kɔ̍l le̍ mɛ̄ɛ̍ Mɛ̄lɛ̄ka̍ ke̍ ndu̍ nāa̍ si̍māā bɛ̄ndūa̍a̍ yɛ̍.

¹⁰ Ndu̍yɛ̍ wānā la̍a̍la᷄ŋ cho̍ ō sūlāā wo̍ ō na᷄ŋ kɔ̍l le̍ mɛ̄ɛ̍ Mɛ̄lɛ̄ka̍ tūsi̍ ndu̍ tōōlō yɛ̍. Kāni̍ fu̍u̍le̍, wānā su̍lāa̍ chō māchūāā mɛ̄ɛ̍ bīl lāpe̍e̍ŋgo̍o̍ chō yɛ̍, ō vi̍ū yo̍o̍mū le̍.

¹¹ Tē pāa̍le̍ŋ lē fūla̍ mī lē lɔ̄ɔ̄ bīl lāpe̍e̍ŋgo̍o̍ pɛ̍, pe̍e̍ŋge̍la̍ kɛ̍ndɛ̄lā lāŋ lā kēēndu̍ŋ, nāŋɔ̄ɔ̄ kōŋ mɛ̄ɛ̄lu̍. Le̍nde̍ i̍ yɔ̍nūŋ a̍ wānā su̍lāa̍ ni̍. Ō chō wu̍ mbō mɛ̄i̍ ka̍wa᷅ltā ndɔ̄la̍ŋ a̍ mākɔ̄ɔ̄.

Nyɛ̍ dɛ̄ɛ̄ni̍a̍a̍ wa᷅ŋndo̍ le̍ mbō tōsa̍ yɔ̄ŋ wɔ̄ɔ̍ŋndo̍ wo̍

¹² Wāna̍ dɛ̍nɛ̍la̍ pa̍lāāla̍ŋ lā kōmāl ho̍ō kɛ̍ ndu̍yɛ̍ mbō bi̍u̍ŋ ndo̍, ō pɛ̄l tɔ̄nɔ̄ɔ̍. Kāni̍ fo̍ndōle̍, tē ō hīōū lāchī a̍ sīsi̍la̍ŋ a̍ dīālūŋ kālā a̍ tīīnda᷄ŋndo̍ o̍ Mɛ̄lɛ̄ka̍ ni᷄ŋ pɛ̍ mbō lo̍ o̍ ko̍ŋ mī sɔ̄ɔ̍ŋ pa̍lāŋ mu᷅ŋ ŋ̄ kēēku̍ ndu̍ chōo̍, ō hu᷄ŋ sɔ̍lā fāndāa̍, ndu̍ yɔ̍nūŋ ni̍ māā yōōmū Mɛ̄lɛ̄ka̍ chūe̍l wānāa̍ ka̍a̍la̍ ndu̍ wa̍ būŋgɛ̄i̍ yo̍.

¹³ Tē wāŋndo̍ sɔ̄la̍ dɛ̄ɛ̄nīa̍a̍ le̍ mbō tōsa̍ yɔ̄ŋ wɔ̄ɔ̍ŋndo̍ pɛ̍, ō di̍mī nu̍a̍ā māā Mɛ̄lɛ̄ka̍ le̍ cho̍ ndu̍ dɛ̄ɛ̄nīa̍a̍ le̍ mbo̍ tōsa̍ yɔ̄ŋ wɔ̄ɔ̍ŋndo̍ le̍. Mɛ̄lɛ̄ka̍ ndu̍ wānā dɛ̄ɛ̄ni̍a̍a̍ ndu̍ le̍ ī wɔ̄ɔ̍ŋ to̍sā le̍. Ndu̍yɛ̍, ndu̍ Mɛ̍lɛ̄ka̍ ō dɛ̄ɛ̄ni̍a̍a̍ wa̍nā le̍ mā to̍sā yɔ̄ŋ wɔ̄ɔ̍ŋ te̍.

¹⁴ Nyɛ̍ dɛ̄ɛ̄ni̍a̍a̍ wa᷅ŋndo̍ le̍ yɔ̄ŋ wɔ̄ɔ̍ŋndo̍ tōsāa̍ wo̍ ndu̍ cho̍ yēēma̍ŋ wɔ̍ɔ̍ŋ wa᷅ ndu̍ o̍ kɔ̄l lo̍ŋ ni̍. Mu̍ŋ lo᷅ ndu̍ vɛ̄ɛ̄lōo̍ ha̍a̍a̍ ni̍ mbō wōu̍ bāa̍ o̍ yɔ̄ŋ wɔ̄ɔ̍ŋndo̍ ni᷄ŋ.

¹⁵ Tē yēēmɛ̍i̍ wɔ̍ɔ̍ŋnde̍ ī lūɛ̄ī o̍ kɔ̄l wāŋndo̍ ni᷄ŋ pɛ̍, o̍ ko̍ŋ kɔ̍ɔ̍lī, mī ndu̍ pi̍la̍ yɔ̍ŋgu̍ŋ o̍ yēēmɛ̍i̍ ke̍ŋ ni᷄ŋ pɛ̍, o̍ ko̍ŋ kɔ̍ɔ̍lī, ō wōu̍ bāa̍ o̍ yɔ̄ŋ wɔ̄ɔ̍ŋndo̍ ni᷄ŋ. Tē wāŋndo̍ tōsa̍ yɛ̄ yɔ̄ŋ wɔ̄ɔ̍ŋndo̍ pɛ̍, o̍ mɛ̄ɛ̄lu̍la̍ŋ ō sɔ̄la̍ pīɔ̍mndo̍.

¹⁶ Chāāŋāā nīāā ka̍a̍lāa̍, lā chɛ᷅l mī wānā o̍ wānā hu̍i̍ nya̍ le̍.

¹⁷ Nyɛ̄m kɛ̄ndɛ̄ kɛ̍ndɛ̄ŋ na̍a̍ ŋ̄ sɔ̄lā wo̍ŋ ki̍nɛ̍i̍, Mɛ̄lɛ̄ka̍ ke᷅ na̍a̍ mu̍ŋ ni̍. Mɛ̄lɛ̄ka̍ o̍ to̍o̍si̍a̍a̍ nyɛ᷄m ke᷅ na̍a̍ nyɛ̄ wa̍wo̍ŋndo̍ o̍ ha̍la̍a̍ ni᷄ŋ ndo̍ŋ ndo̍, ndu̍ ke᷅ na̍a̍ nyɛ̄m kɛ̄ndɔ᷄ŋ ni̍. Mɛ̄lɛ̄ka̍ ndu̍ ndu̍ lɔ̍ɔ̍ lɔ̍ɔ̍ ō chō lēchōo̍, ndu̍yɛ̍ ō mu̍lūl na̍a̍ kɔ̄ɔ̍, o̍ ko̍ŋ mbō mɛ̄i̍ na̍a̍ o̍ mānyūm ni᷄ŋ te̍.

¹⁸ Mɛ̄lɛ̄ka̍ ndu̍ pi̍la̍ kɛ̍ɛ̍si̍a̍a̍ ni̍ le̍ mbō sīīŋgu̍u̍ na̍a̍ chūāūwāā ndɔ̄ sa̍na̍a̍ a̍ yōōŋgū tōnya̍a̍ ho̍ō. Ō tōsa̍ he̍ī le̍ mī ŋ̄ sīmnu᷄ŋ wa̍nāā tāse̍ nyɛ᷅m o̍ to̍o̍si̍a̍a̍ wo̍ŋ ki̍nɛ̍i̍ tɛ̍ɛ̄ŋ.

Yōōŋgu̍ Mɛ̄lɛ̄ka̍a̍ ō mɛ̍ɛ̍lū o̍ tūēīyɔ̄ɔ̍ le̍, kɛ̍ tōsāa̍

¹⁹ Lā sīna̍ he̍ī pɛ̄ŋgu̍ chāāŋāā nīāā ka̍a̍lāa̍, māā wānā o̍ wānā wa̍ wa᷅na̍ ke̍le̍ŋa̍ īsɔ̄ɔ̍ la̍ni̍ yāŋɔ̄ɔ̄. Kɛ̍ wa᷅ wāna̍ so̍ō chɔ̍ chɔ̍ le̍. Ndu̍yɛ̍ wa᷅ wāna̍ dɔ̍u̍nu᷄ŋ tu̍mbe̍ chɔ̍ chɔ̍ le̍.

²⁰ Kāni̍ fo̍ndōle̍, tu̍mbo̍o̍ ō to̍sā mī wāŋndo̍ wa̍ yōōmū o̍ nɛ̄ī sa̍kpō mɛ̄ɛ̍ Mɛ̄lɛ̄ka̍ hɛ̄na̍ŋ ndu̍ le̍ wāa̍ yɛ̍ le̍.

²¹ Le̍la̍ŋ, lā ma᷄l dɛ̍nɛ̍ o̍ dɛ̍nɛ̍ wɔ̍ɔ̍ŋ a̍ yɔ̄ŋndā wɔ̄ɔ̍ŋndā fāŋgālā wāŋnda̍ chō tōsāa̍ la̍ŋ wa̍ŋ wa̍ŋ. Ndu̍yɛ̍ yōōŋgū Mɛ̄lɛ̄ka̍ dɔ̄ū ho̍ō nya̍ o̍ lākɔ̄l lo̍, lā bīi̍ nyɛ᷅ o̍ di̍mi̍ wo̍ ndu̍yɛ̍ mī lā yɔ̄ŋgu̍ŋ o̍ ndu̍ bɛ̍ŋgu̍. Kāni̍ fu̍u̍le̍, yōōŋgū kōŋ nɔ̄ kpāāyāa̍ mbō pīŋi̍ nya̍.

²² Lā mɛ̍ɛ̍lū o̍ yōōŋgōo̍ ho̍ō tūēīyɔ̄ɔ̍ su̍e̍e̍ le̍. Lā tōsa̍ nyɛ᷅ o̍ di̍mi̍ wo̍. Kāni̍ fu̍u̍le̍, wānā o̍ wāna̍ mɛ̍ɛ̍lu̍ o̍ tūēīyɔ̄ɔ̍ su̍e̍e̍ pɛ̍, mbō tōsa̍ nyɛ᷅ o̍ di̍mi̍ wo̍ le̍, mɛ̄ɛ̍ ndu̍ pi̍la̍ ko̍ cho̍ hūīnɔ᷄ŋndo̍ ni̍.

²³ Wānā o̍ wāna̍ ya̍ŋ yōōŋgu̍ Mɛ̄lɛ̄ka̍a̍ nīla̍ŋ pɛ̍, kɛ̍ mbō ve̍ nyɛ᷅ o̍ di̍mi̍ wo̍ tōsā le̍, mɛ̄ɛ̍ ō chō māchūāā mɛ̄ɛ̍ wāŋndo̍ tōfāŋ nu̍a̍ā o̍ tōfa᷅ŋndo̍ ni᷄ŋ yɛ̍.

²⁴ Tē wāŋndo̍ tōfa̍ŋ o̍ tōfa᷅ŋndo̍ ni᷄ŋ pɛ̍, dīmīo̍o̍ nu̍a̍ā āā ō kɛ̄si̍ tōfa᷅ŋndo̍ mbō pu̍ɛ̍ɛ̍ŋ bɛ̍ɛ̍ mɛ̄ɛ̍ o̍ che᷅ ndu̍ pi̍la̍ yɛ̍.

²⁵ Kɛ̍ wāna̍ pɛ̍ɛ̍kū yo̍o̍ŋgōo̍ ho̍ō nyɛ̄ kɛ̄ndɛ̍ī yo̍, ndu̍yɛ̍ mbō hīōū lāchī a̍ nyɛ̄ o̍ di̍mī wo̍ tōsāa̍ wo̍, wānā wa̍ā le̍nde̍ sa̍lāa̍ Mɛ̄lɛ̄ka̍ dūāū ndu̍ ni̍. Yōōŋgū ko᷄ŋ yɔ̍nūŋ ni̍ māā, sāwā sa̍kpo̍ ba̍ŋā ho̍ō wāŋnda̍ wo̍. Wāna̍ mɛ̍ɛ̍lū o̍ ndu̍ tūēīyɔ̄ɔ̍ su̍e̍e̍ kɛ̍ mbō pu̍ɛ̍ɛ̍ŋ te̍ wo̍, o̍ ko̍ŋ, mbō tōsa̍ nyɛ̄ o̍ di̍mi̍ māā wāŋnda̍ nɔ̄ mā tōsa̍ wo̍, sa̍lāa̍ Mɛ̄lɛ̄ka̍ dūāū ndu̍ le̍ ndu̍ tōsāa̍ ni̍.

²⁶ Wāna̍ chu̍ā ho̍ō ndu̍ pi̍la̍ māā wānā pi̍ɛ̍i̍yāā Mɛ̄lɛ̄ka̍a̍ o̍ cho̍ ni̍, kɛ̍ mbō būmba̍ sōndō ndɔ̄ɔ̍ māndāa̍ wo̍, mɛ̄ɛ̍ ndu̍ pi̍la̍ cho̍ hūīnɔ᷄ŋndo̍ ni̍. Mɛ̄ɛ̍ Mɛ̄lɛ̄ka̍ ndɔ̄ pi̍ɛ̍i̍yāa̍ sīmnu᷄ŋ su̍ɛ̍i̍ fo̍ndō fu̍u̍.

²⁷ Mɛ̄lɛ̄ka̍ o̍ cho̍ Fi̍nyā nāa̍ wo̍, ndu̍ ndu̍ wāna̍ o̍ chu̍ā māā ō chō wānā pi̍ɛ̍i̍yāā Mɛ̄lɛ̄ka̍ o̍ nɛ̄ī sa̍kpō ō nɔ᷅ sɔ᷅ŋ o̍ sɔ̄ŋ te̍ wo̍, sɔ̄ɔ̍ŋ o̍ to̍sā wo̍ŋ mu̍ŋ cho̍ mu᷅ŋ ni̍. Wānāa̍ nɔ̍ ka̍lā le̍ wa̍, a̍ wānāa̍ nɔ̍ fi̍nyā le̍ wa̍, a̍ wānāā pīāāndāā ndāa̍ wū wa̍, vīi̍ya̍a̍ bā hāvɛ̍i̍ a̍ wa̍ā le̍nde̍, nda̍ o̍ ma̍lā ni̍. Ndu̍yɛ̍ māndāa̍ ndu̍ pi̍la̍ ō wo̍ū ba̍ o̍ sɔ̄ɔ̍ŋ wɔ̍ɔ̍ŋ wāŋnda̍ chō tōsāa̍ o̍ chi̍e̍ēŋndo̍ ni᷄ŋ ndo̍ŋ ni᷄ŋ te̍.