Chɛ̄lūīma̍yā 1 - Yāu̍ Mɛ̄lɛ̄ka̍a̍

Chɛ̄lūīma̍yā

¹ Yāu̍ wo̍ ho̍ō ō chō māchūāā ko̍na̍a̍ a̍ yōōŋgūlā Chɛ̄lūīma̍yā, wāna̍ su̍a̍ā le̍ Mɛ̄lɛ̄ka̍ wo̍ ō dīmi̍ la̍ŋ o̍kɔ̄ɔ̄. Chɛ̄lūīma̍yā ko̍ŋ, fi̍nyā ndɔ̍ wa̍ Hīlīka̍yā ni̍ wānā wa̍ā o̍ yu̍ŋgu̍ wānāā sōlīāā lāsa̍lāa̍ chōo̍ A̍na̍tɔ̍tī chi̍e̍e̍, o̍ būŋgɛ̄ī Bɛ̍ŋnja̍mīŋ nde̍ ni᷄ŋ.

² Wɔ̄sī Chōōsa̍yā, po̍ A̍mɔ̄ŋ ndo̍, ō chīŋa̍ wɔ̄sīla̍ŋ tɔ̍ a̍ lā yāa̍ o̍ lēmāsā wo̍, wɔ̄sī kōŋ Mɛ̄lɛ̄ka̍ Ya̍a̍wɛ̄ɛ̄ o̍ ka̍ndu̍ sūɛ̍i̍ nāa̍ Chɛ̄lūīma̍yā chu̍a̍ ni̍, mbo̍ kē ndu̍ yōōŋgūla̍ŋ le̍ wāŋnda̍ I̍sɔ̄lūɛ̄ī.

³ Chɔ̍ŋ ni᷅ŋ a̍ te̍le̍ŋ ko̍ŋ, mi̍ Mɛ̄lɛ̄ka̍ hīāū lāchī a̍ ndu̍ yōōŋgūla̍ŋ kīo̍o̍ le̍ wāŋnda̍ I̍sɔ̄lūɛ̄ī ha̍a̍a̍ mbo̍ lō o̍ ko̍ŋ, mi̍ Chōōsa̍yā o̍ wa̍ māsāa̍ Chu̍dā wo̍ o̍ fa̍ŋa᷄ŋ, mi̍ Chɛ̄hōwa̍kīm po̍ Chōōsa̍yā wo̍ ō mīīŋgū Māsā Bɛ̍ndōo̍ o̍ fōōfo̍ ndɔ̄ɔ̍. Ndu̍yɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ hīāū lāchī a̍ ndu̍ yōōŋgūla̍ŋ kīo̍o̍ ha̍a̍a̍ mbo̍ lō o̍ ko̍ŋ mi̍ Chɛ̄hōwa̍kīm bɛ̍ɛ̍ ndu̍ fa̍ŋa᷄ŋ, o̍ lēmāsā mi̍ Sɛ̄dīka̍yā, po̍ Chōōsa̍yā wo̍ ō pīlɛ̍ ō mīīŋgū māsāa̍ o̍ fōōfo̍ ndɔ̄ɔ̍. Wɔ̄sī Sɛ̄dīka̍yā o̍ chi̍ŋa̍ wɔ̄sīla̍ŋ tɔ̍ a̍ ō pīlɛ̍ o̍ lēmāsā wo̍, wɔ̄sī kōŋ Mɛ̄lɛ̄ka̍ Ya̍a̍wɛ̄ɛ̄ o̍ mɛ̍ɛ̍lu̍ Chɛ̄lūīma̍yā yōōŋgūla̍ŋ kīo̍o̍ le̍ wāŋnda̍ I̍sɔ̄lūɛ̄ī ni̍, fo̍ndōle̍, pāŋgi̍i̍ ŋu̍ɛ̍ɛ̍nu̍e̍i̍ o̍ wɔ̄sī kōŋ ni᷄ŋ, o̍ pāŋgi̍i̍ ke̍ ni᷄ŋ ya̍a̍mɔ̍ɔ̍wa̍ ā bīī Chūlu̍sɛ̄lɛ̄m ni̍, ma̍ kūā a̍ wāŋnda̍ I̍sɔ̄lūɛ̄ī a̍ bīyɔ̄ɔ̍ ni᷄ŋ.

A̍ mɛ̄ɛ̍ Mɛ̄lɛ̄ka̍ hɛ̄li̍ Chɛ̄lūīma̍yā yɛ̍ o̍kɔ̄ɔ̄

⁴ A̍ te̍le̍ŋ ko̍ŋ, mi̍ Chɛ̄lūīma̍yā o̍ di̍mī māā, ō wa̍ a̍ te̍le̍ŋ pi᷅lɛ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ ya̍ chu̍a̍ o̍ yi̍lāŋndo̍ ni᷄ŋ. Mbo̍ dīmūl la̍ āā,

⁵ “Chɛ̄lūīma̍yā, lɔ̍ɔ̍ pa̍ bɛ̍ɛ̍ mi̍ to̍sā ma̍ chūā yo᷄l nu̍mndo̍, ya̍ i̍i̍ chi̍i̍ ni᷅ŋ kɛ̄ɛ̄sīāā wāna̍ ŋ̄ nɔ̄ le̍ wāa̍ wo̍. Lɔ̍ɔ̍ pa̍ bɛ̍ɛ̍ ma̍ vīālu᷄ŋ o̍ chi̍e̍ēŋndo̍ chōo̍, ya̍ i̍i̍ chi̍i̍ nu̍m ni᷅ŋ hɛ̄lī le̍ wa̍li̍ nūu̍. Ya̍ i̍i̍ chi̍i̍ nu̍m ni᷅ŋ sīīŋgūū wāna̍ su̍a̍ā le̍ ya̍ wo̍, le̍ mā di̍mu̍l wāŋnda̍ o̍ lɛ̄ŋnde̍ ni᷄ŋ yo̍o̍ŋgūlā nīla̍ŋ.”

⁶ Kɛ̍ mi̍ di̍mūl ndu̍ a̍a̍, “O̍o̍ Mɛ̄lɛ̄ka̍ Ya̍a̍wɛ̄ɛ̍ Kpu̍lu̍ŋgūma̍ bɛ̄ndōo̍, I̍ cho̍ wa̍nā cha̍ā īsɔ̄ɔ̍ fa̍ŋgā tɛ̍ɛ̄ŋ le̍ kpe̍ku̍ wa̍ā le̍nde̍ le̍. Ndu̍yɛ̍ ō fūla̍ o̍ ko̍ŋ kɔ̍ɔ̍lī, I̍ cho̍ wɔ̄ bɔ̄ɔ̍ chu̍a̍a̍mbɔ̄.”

⁷ Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ dīmūl la̍ āā, “Sāko̍, di̍mī māā ā chō wɔ̄ bɔ̄ɔ̍ chu̍a̍a̍mbɔ̄ le̍. Ya̍ hɛ̍li̍ nu̍m ni̍. Bā o̍ bā ya̍ I̍ ve᷅m nu̍m pɛ̍, kɔ̍. Ndu̍yɛ̍ nyɛ̄ o̍ nyɛ̄ ya̍ I̍ di̍mu̍l nu̍m pɛ̍, le̍ mā di̍mu̍l wāŋnda̍ di̍mi̍.

⁸ Sīōōŋīī bi̍ī nu̍m le̍ wānā o̍ wānā le̍. I̍ cho̍ wā a̍ nūm la̍tu̍lu̍ ndu̍yɛ̍ mī ma̍nda̍ nu̍m. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍.”

⁹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ si̍ɛ̍ndī bāa̍ mbo̍ pīla̍ŋ ya̍ sōndōo̍. Mbo̍ dīmī āā, “Dīōmndā nīla̍ŋ ya̍ I̍ du̍a̍ū nu̍m o̍ sōndō nu̍a̍ā ni̍.

¹⁰ I̍ ke̍ nu̍m pāa̍le̍ hāūle̍ŋ nde᷅ŋ kpāāyāa̍ le̍ mā si̍mu̍l lɛ̄ŋnde̍ a̍ māsɛ̄ī bɛ̍ndūe̍i̍ o̍ chi̍e̍ēŋndo̍ ni᷄ŋ. Yōōŋgūlā ŋ̄ dīmūl ni̍ŋ wa᷅ŋnda̍ la̍ŋ, lā wā ni̍ŋ yo̍ōŋgūla̍ chu̍a̍ lɛ̄ŋīī bɔ̄ɔ̍ bɔ̍ɔ̍ a̍ māsɛ̄ī bɔ̍ɔ̍ bɔ̍ɔ̍ i̍si̍si̍, ndu̍yɛ̍ mī lā tōsa̍ mī lɛ̄ŋīī kēŋ a̍ māsɛ̄ī ke̍ŋ ī pīɔ̍l. Lā wā ni̍ŋ yo̍o̍ŋgūla̍ tɛ̍ɛ̍mbu̍u̍ lɛ̄ŋīī bɔ̄ɔ̍ bɔ̍ɔ̍, ndu̍yɛ̍ mī lā fāŋa̍ māsāā bɔ̄ɔ̍ bɔ̍ɔ̍ o̍ lēmāsā. Lā wā ni̍ŋ vɛ̍lɛ̄ yu̍ŋgu̍la̍ ta̍ŋgu̍l īlɛ̄ŋ ndu̍yɛ̍ mī lā sīmi̍ lɛ̄ŋnde̍ yi̍ a̍ māsɛ̄ī bɔ̍ɔ̍ bɔ̍ɔ̍.”

A̍ yi̍lāŋndā tīɔ̍ɔ̍ŋndā Chɛ̄lūīma̍yā o̍ che᷅ la̍ŋ o̍kɔ̄ɔ̄

¹¹ “O̍ ko̍ŋ kɔ̍ɔ̍lī, mi̍ cha᷅ yi̍lāŋndo̍. O̍ yi̍lāŋ kōŋ ni᷄ŋ mi̍ Mɛ̄lɛ̄ka̍ Ya̍a̍wɛ̄ɛ̄ o̍ nyu̍nā ya̍ āā, Chɛ̄lūīma̍yā, ō yɛ̄ɛ̍nɛ̍ ŋ̄ chō yɛ̄ chɔ̄ɔ̍” Mi̍ di̍mūl ndu̍ āā, “Lɛ̄vīī yɔ̄m A̍mɔ̄ŋ ndo̍ ya̍ I̍ cho̍ chɔ̄ɔ̍ ni̍.”

¹² Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Tōnya̍ ŋ̄ dīmi̍ ni̍, ndi̍ kpe̍e̍kpe̍i̍. Ndu̍yɛ̍ nyɛ̄ lɛ̄vīī kēŋ ī si᷄m le̍ ndu̍ wo̍ cho̍ ni̍, māā le̍ chɔ̄mndo̍ māā ya̍ Mɛ̍lɛ̄ka̍ Ya̍a̍wɛ̄ɛ̄ I̍ cho̍ mɛ̄ɛ̄nda᷄ŋndo̍ nyɛ̄ kɛ̄ndɛ̄ kɛ̍ndɛ̄ le̍ mī che᷅ māā nyɛ̄ ya̍ I̍ di̍mi̍ wo̍ ō yɔ̄nu̍ŋ.”

¹³ O̍ ko̍ŋ kɔ̍ɔ̍lī, mi̍ cha᷅ vɛ̄lɛ̄ yi̍lāŋ chēle̍ŋ. Mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍a̍ vɛ̄lɛ̄ nāa̍ ya̍ chu̍a̍ o̍ yi̍lāŋ kōŋ ni᷄ŋ, mbo̍ nyūnā ya̍ āā, “Ō yɛ̄ɛ̍nɛ̍ ŋ̄ chō yɛ̄ chɔ̄ɔ̍.” Mi̍ mu̍lūl ndu̍ a̍a̍, “I̍ cho̍ kpɛ̍ɛ̍nɛ̍i̍ chɔ̄ɔ̍ bā lūāŋndo̍, mī mɛ̄ŋnda̍ŋ mā ŋōl le̍ni̍ŋ kpu̍chā kpūchā. Kɛ̍ kpɛ̍ɛ̍nɛ̍i̍ ka̍lɛ̄i̍ mi̍ ī nāŋgu᷄ŋ ku̍mbū ya̍ I̍ cho̍ ho̍ō wo̍ le̍ chōŋndo̍.”

¹⁴ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl la̍ āā, “Kpɛ̍ɛ̍nɛ̍i̍ ŋo̍lɛ̄ī ŋ̄ chē ke̍ŋ nde̍, ī si᷄m le̍ kpūndɛ̍ bɛ̄ndu̍ cha᷅ŋ ni̍ŋ ba᷅ lūāŋndo̍ mbō hīŋ wānā o̍ wāna̍ cho̍ o̍ lɛ̄ŋnde̍ŋ nde᷅ŋ ni᷄ŋ cho̍o̍ wo̍.

¹⁵ I̍ cho̍ lɛ̄ŋīi̍ cho̍ bā lūāŋndo̍ ve̍ kpo̍u̍ chu̍u̍ŋgīāā nāa̍ pi᷅lɛ̍, le̍ mā hu᷄ŋ de᷅l lɛ̄ŋndē I̍sɔ̄lūɛ̍i̍ le̍ŋ chōo̍ a̍ sɔ̍ŋgɔ̍ɔ̍. Māsāā bɛ̍ndūa̍a̍ cho̍ o̍ lɛ̄ŋnde̍ he̍ī ni᷄ŋ nda̍ ā hūŋ ni̍ŋ mā hu᷄ŋ kɛ̍sī kpe̍e̍kpe̍i̍la̍ ndāla̍ lēmāsā la̍ŋ o̍ dīōlā sāāsa̍ ba̍lu̍ Chūlu̍sɛ̄lɛ̄m ndo̍ sōndōla̍ŋ mā cha᷄l lo̍ŋ. Māsāā bɛ̍ndūa̍a̍ ha̍ā ā chō hūnɔ̄ɔ̄ a̍ so̍vɛ̄i̍ya̍a̍ ndāa̍, mā hu᷄ŋ ba̍lū sāāsāa̍ Chūlu̍sɛ̄lɛ̄m mā dɔ̄ū ndu̍ o̍ pi̍ŋndo̍ ni᷄ŋ kpɔ̍kɔ̍su̍, le̍ Chūlu̍sɛ̄lɛ̄m chīŋa̍la᷅ŋndo̍. Ndu̍yɛ̍, chi̍o̍o̍ŋ ŋ̄ pīlɔ̍ŋ kpo̍u̍ o̍ lɛ̄ŋndē Chu̍dāle̍ŋ ni᷄ŋ mā hu᷄ŋ de᷅l mu̍ŋ chōo̍ a̍ sɔ̍ŋgɔ̍ɔ̍.

¹⁶ I̍ cho̍ hūnɔ̄ɔ̄ wānāā nīa̍a̍ I̍sɔ̄lūɛ̍i̍ yāmɛ̍i̍ kīlūl le̍ yɔ̄ŋ wɔ̄ɔ̍ŋ o̍ yɔ̄ŋ wɔ̄ɔ̍ŋ nda̍ tōsa̍ ndu̍yɛ̍ mī tu̍si̍ nda̍ nyɛ̄ pālāā bɛ̄ndōo̍ chōo̍. Ā bīī ma̍ kɛ̄ɛ̄ ya̍, ma̍ mūli᷄ŋ nyɛ᷅m chūŋ kɛ̄ndɔ᷄ŋ lōmɔ̄ɔ̍ o̍ nyɛ̄m chēle̍ŋndo̍ ndo̍, māā mɛ̄lɛ̄ka̍a̍ nda̍. Nyɛ̄m nda̍ pi̍la̍ ā tōōsi̍a̍a̍ a̍ bālā ndāla̍ŋ kɛ̍sɛ̍ kɛ̍sɛ̍ wo̍ŋ, mu̍ŋ nda̍ mūli̍ŋ so̍o̍lūūwo̍ ni̍, māā mɛ̄lɛ̄ka̍a̍ ndā.

¹⁷ Le̍la̍ŋ bɛ̍ɛ̍ndi̍a̍ŋ nyɛ᷅ kɛ̄ndɛ̄ kɛ̍ndɛ̄, Chɛ̄lūīma̍yā mā si̍mu̍l kɔ̄llo̍ yi̍. Nyɛ̄ o̍ nyɛ̄ ya̍ I̍ di̍mu̍l nu̍m pɛ̍ le̍ mā kɔ̍ di̍mu̍l wāŋnda̍ I̍sɔ̄lūɛ̄ī, kɔ̍ mā kɔ̍ di̍mu̍l nda̍ ndu̍. Sīōōŋīī bi̍ī nu̍m le̍ nda̍ le̍. Fo̍ndōle̍, tē a̍ ka̍ndu̍ sīōōŋnde̍ yɔ̄ŋndo̍ le̍ nda̍ pɛ̍, bōōndi̍i̍ ŋ̄ sīm ni̍ŋ nda̍ o̍ hɔ̄l le̍ sūɛ̍i̍ nāa̍ nda̍ chūā ve̍, yōōŋgūlā ya̍ I̍ wa᷅ ni̍ŋ nu̍m dɔ̄wɔ̄ɔ̍ o̍ sōndō le̍ nda̍ la̍ŋ I̍ cho̍ tōsā mī sīōōŋīī bɛ̄ndūe̍i̍ ī bīī nu̍m le̍ nda̍ la̍ŋ dīmūllo̍.

¹⁸ Mī di̍mu̍l nu̍m pɔ̍ɔ̍ Chɛ̄lūīma̍yā, wānā o̍ wānā cho̍ lɛ̄ŋnde̍ŋ nde᷅ŋ, māsāā bɛ̍ndūa̍a̍ Chu̍dā ni̍, wāŋ bɛ̄ndūa̍a̍ Chu̍dā ni̍, wānāā sōlīāā lāsa̍lāa̍ ni̍, o̍ ko̍ŋ kɔ̍ɔ̍lī, a̍ wānāā tūa̍a̍ kpo̍u̍, nda̍ kpo̍u̍ ā chō nu̍m hūnɔ̄ɔ̄ yɛ̄le̍ŋ tūl. Kɛ̍ ndu̍yɛ̍ I̍ ke̍ nu̍m kpāāyāa̍ pāa̍le̍ hāūle̍ŋ nde᷅ŋ, le̍ mā si̍mu̍l nda̍. Mɛ̄ɛ̍ chi̍o̍o̍ ō wā nu̍a̍ā ō bālāā a̍ sāāsāla̍ ka̍lā ka̍lā lā bɛ̄ŋnda̍ŋ le̍ ya̍a̍mɔ̍ɔ̍wa̍ yɛ̍, le̍nde̍ ŋ̄ wā ni̍ŋ ni̍. Mɛ̄ɛ̍ sūŋgbu̍le̍ ŋ̄chīli̍ŋnde̍ŋ lē wā nu̍a̍ā nyɛ̄ o̍ nyɛ̄ ō nɔ̍lā le̍ŋ hīīlūū le̍ yɛ̍, le̍nde̍ ŋ̄ wā ni̍ŋ nda̍ tɛ̄ɛ̄ŋ ni̍, ā wā ni̍ŋ vɛ̍lɛ̄ nda̍ tɛ̄ɛ̄ŋ mɛ̄ɛ̍ sāāsa̍ ŋ̄būlɔ̍ŋsīi̍ yo̍ ō wā nu̍a̍ā chi̍o̍o̍ ō bālāā kpɔ̍kɔ̍su̍ ya̍a̍mɔ̍ɔ̍wa̍ nɔ̍lā mā pɛ̄l ndu̍ le̍ yɛ̍.

¹⁹ Nda̍ kpo̍u̍ ā chō nu̍m hūnɔ̄ɔ̄ sīmūl, kɛ̍ ā nɔ̍lā ni̍ŋ mā yēm nu̍m te̍, fo̍ndōle̍, I̍ wa᷅ ni̍ŋ a̍ nūm la̍tu̍lu̍ ndu̍yɛ̍ mī ba̍ŋa̍ nu̍m nda̍ o̍ bā. Ya̍ Mɛ̄lɛ̄ka̍ Ya̍a̍wɛ̄ɛ̄ ya̍ so̍ō ni̍.”