E̍mɔ̍ɔ̍sī 1 - Yāu̍ Mɛ̄lɛ̄ka̍a̍

Yāū E̍mɔ̍ɔ̄ wo̍

¹ Po̍ pi᷅lɛ̍ wa̍ Tɛ̄ko̍wā chi̍e̍e̍ dīōla̍ŋ āā E̍mɔ̍ɔ̄, wānā ma̍ndāā lāsāa̍ o̍ wa̍ ni̍. Ō wa̍ a̍ te̍le̍ŋ pi᷅lɛ̍, mi̍ Mɛ̄lɛ̄ka̍ sūāā nāa̍ ndu̍ chu̍a̍, mbo̍ kē ndu̍ yōōŋgōo̍. Yōōŋgū kōŋ sɔ̄lāa̍, wɔ̄sīla̍ŋ lā tīɔ̍ɔ̍ŋ la̍ hi̍o̍ū ni̍, mi̍ lɛ̄ŋnde̍ŋ lē nyīīyā I̍sɔ̄lūɛ̄ī. Ndu̍yɛ̍ a̍ te̍le̍ŋ ko̍ŋ, Yūsi̍a̍ā wa̍ māsāa̍ Chu̍dā ni̍, mi̍ Chɛ̄lōbo̍wām, po̍ Chɛ̄hōwa̍sī wo̍ ndu̍ wa᷅ māsāa̍ I̍sɔ̄lūɛ̄ī. Sɔ̄ɔ̍ŋ Mɛ̄lɛ̄ka̍ dīmu̍l E̍mɔ̍ɔ̄ o̍ yōōŋgū kōŋ ni᷄ŋ ndo̍ŋ, mu̍ŋ cho̍ o̍ yāu̍wo̍ ho̍ō ni᷄ŋ ni̍.

² Mi̍ E̍mɔ̍ɔ̄ di̍mī āā, “Mɛ̄lɛ̄ka̍ Ya̍a̍wɛ̄ɛ̄ o̍ cho̍ wā dēŋīo̍o̍ Sa̍a̍yɔ̄ŋ chi̍e̍e̍ pa̍ndāŋ bɛ̄ndū. Dīōm ndɔ̄ɔ̍ chō wā fūlāa̍ Chūlu̍sɛ̄lɛ̄m chi̍e̍e̍, mɛ̄ɛ̍ ta᷅ŋnda̍ŋ mā dēŋī nu̍a̍ā yɛ̍. O̍ ko̍ŋ, fo̍ndāŋndā sāa̍ ā kūā di̍o̍la̍ŋ nda̍ŋ kpo̍u̍ lā chō vēēsīāā. Bīl pūīyāa̍ cho̍ o̍ Pēmbīī Ka̍mɛ̄lve̍ chōo̍ wo̍ kpo̍u̍ ō chō nyāmālīa̍a̍.”

Mɛ̄lɛ̄ka̍ chō lɛ̄ŋīi̍ chi̍ɛ̍ɛ̍li̍āŋ a̍ I̍sɔ̄lūɛ̄ī ye̍ nyɛ̄ pālāa̍ tūsī chōo̍ A̍ lɛ̄ŋndē Si̍i̍lūīāle̍ŋ o̍kɔ̄ɔ̄

³ Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “Wāŋnda̍ Dāma̍si̍kɔ̄ɔ̄, o̍ cho̍ chi̍e̍e̍ le̍bo᷅llo̍ le̍ lɛ̄ŋndē Si̍i̍lūīāle̍ŋ ndo̍, ā tōsa̍ yɔ̄ŋndā wɔ̄ɔ̍ŋnda̍ŋ bɛ̄mbɔ̄ɔ̍ lē dīi̍ŋ di̍i̍ŋ. Kɛ̍ I̍ cho̍ nda̍ mālɔ̄ɔ̄ le̍ yɔ̄ŋndā ndāla̍ wɔ̍ɔ̍ŋndā lāŋ te̍. Wāŋnda̍ ha̍ā ā lo̍ ko̍ŋ ma̍ tūsī wāŋnda̍ Ki̍i̍li̍a̍dī nyɛ̄ pālāa̍ chōo̍, ma̍ fūlī nda̍ mɛ̄ɛ̍ nda̍ lūāā nu̍a̍ā tɔ̄lɔ̄ɔ̄ ŋ̄wi̍tīi̍yo̍ a̍ chīli̍ŋndo̍ŋ yɛ̍.

⁴ Le̍la̍ŋ, I̍ cho̍ tōsā mī chīɛ̄ī lēmāsā Māsāa̍ Ha̍sa̍yɛ̄l o̍ ta̍ŋgu̍llo̍ ō sāa̍ o̍ yīŋ, ndu̍yɛ̍ mī to̍sa̍ mī fo̍ndāŋndā kālā ka̍lālā Māsāa̍ Bɛ̄nīha̍da̍dī o̍ bɛ̍ɛ̍ndi̍a̍a̍ le̍ māndāa̍ la̍ŋ lā ŋūɛ̄.

⁵ I̍ cho̍ sāāsa̍ ba̍lu̍ Dāma̍si̍kɔ̄ɔ̄ wo̍ pēsī pēsī, ndu̍yɛ̍, wānāa̍ cho̍ īchāli̍ o̍ lɛ̄ŋndē dɛ̍ŋgbɛ̍le̍ŋ o̍ pēmbo᷄ŋ tɛ̄ɛ̄ŋ A̍ vi᷅ŋ nda̍, a̍ wāna̍ cho̍ Māsāa̍ Bɛ̄tɛ̍dīŋ chi̍e̍e̍ wo̍, mī chi̍i̍ a̍ nda̍. I̍ cho̍ tōsā mā hu᷄ŋ kɔ᷅ a̍ wāŋnda̍ Si̍i̍līāā o̍ bīyɔ̄ɔ̍ ni᷄ŋ, o̍ lɛ̄ŋndē Ki̍ɛ̍ɛ̄le̍ŋ ni᷄ŋ.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

A̍ lɛ̄ŋndē Fīli̍i̍tīāāle̍ŋ o̍kɔ̄ɔ̄

⁶ Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “Wāŋnda̍ Ka̍a̍sā, o̍ cho̍ chi̍e̍e̍ le̍bo᷅llo̍ le̍ lɛ̄ŋndē Fīli̍i̍tīāāle̍ŋ ndo̍, ā tōsa̍ yɔ̄ŋndā wɔ̄ɔ̍ŋnda̍ŋ bɛ̄mbɔ̄ɔ̍ lēdīi̍ŋ di̍i̍ŋ. Kɛ̍ I̍ cho̍ mālɔ̄ɔ̄ le̍ yɔ̄ŋndā ndāla̍ wɔ̍ɔ̍ŋndā lāŋ te̍, kāni̍ fo̍ndōle̍, le̍ mɛ̄ɛ̍ nda̍ kūɛ̄ a̍ wāŋnda̍ lɛ̄ŋnde̍ŋ kpu̍lu̍ku̍u̍ ma̍ kɔ̍ pi᷅sī pīsī nda̍ o̍ chɛ̄le̍ŋ ni᷄ŋ wa᷅ŋnda̍ I̍dɔ̄m o̍ bā yɛ̍.

⁷ Le̍la̍ŋ, I̍ cho̍ sāāsa̍ ba̍lu̍ Ka̍a̍sā wo̍ pēsī pēsī, ndu̍yɛ̍, fo̍ndāŋndā kālā ka̍lālā nda̍ tāŋgu̍l le̍ nda̍ māndāa̍ la̍ŋ, mī to̍sa̍ mī lā ŋūɛ̄ kpo̍u̍.

⁸ Wānāa̍ cho̍ īchāli̍ A̍si̍dɔ̍dī chi̍e̍e̍ wa̍ ni̍, a̍ wāna̍ cho̍ māsāa̍ A̍si̍kɛ̍lɔ̄ŋ ndo̍ ni̍, I̍ cho̍ nda̍ tɛ̄ɛ̄mbūū, ndu̍yɛ̍ mī chi̍i̍ a̍ nda̍. Wāŋnda̍ Ɛ̍ki̍lɔ̄ŋ chi̍e̍e̍ bɛ̍ɛ̍, I̍ cho̍ nda̍ nyɛ̄ pālāā bɛ̄ndōo̍ tūsī chōo̍, ndu̍yɛ̍ wānāā tūa̍a̍ lo᷅ ni̍ŋ yo̍o̍mū o̍ lɛ̄ŋndē Fīli̍i̍tīāāle̍ŋ ni᷄ŋ nda̍, mī to̍sa̍ nda̍ kpo̍u̍ mā sɔ̄la̍ pīɔ̍mndo̍.” Nyɛ̄ Māsānɔ̄ɔ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.

A̍ lɛ̄ŋndē Ta̍a̍yāle̍ŋ o̍kɔ̄ɔ̄

⁹ Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “Wāŋnda̍ Ta̍a̍yā a̍ to̍sa̍ yɔ̄ŋndā wɔ̄ɔ̍ŋnda̍ŋ bɛ̄mbɔ̄ɔ̍ lēdīi̍ŋ di̍i̍ŋ. Kɛ̍ I̍ cho̍ nda̍ mālɔ̄ɔ̄ le̍ yɔ̄ŋndā ndāla̍ wɔ̍ɔ̍ŋndā lāŋ te̍, kāni̍ fo̍ndōle̍, le̍ mɛ̄ɛ̍ nda̍ kūɛ̄ a̍ wāŋnda̍ lɛ̄ŋnde̍ŋ kpu̍lu̍ku̍u̍ ma̍ kɔ̍ yɔ̍ŋgū nda̍ o̍ lɛ̄ŋndē I̍dɔ̄mnde̍ŋ ni᷄ŋ yɛ̍. Chɛ̄la᷅ŋ īchāŋnja̍ wa̍ nda̍ tɛ̄ɛ̄ŋ nda̍ wāŋnda̍ ha̍ā wo̍, ma̍ pūɛ̄ɛ̄nu᷄ŋ a̍ ndu̍ o̍kɔ̄ɔ̄.

¹⁰ Le̍la̍ŋ, I̍ cho̍ sāāsa̍ ba̍lu̍ Ta̍a̍yā wo̍ pēsī pēsī, ndu̍yɛ̍ mī to̍sa̍ mī fo̍ndāŋndā kālā ka̍lālā nda̍ tāŋgu̍l le̍ nda̍ māndāa̍ la̍ŋ lā ŋūɛ̄ kpo̍u̍.”

A̍ lɛ̄ŋndē I̍dɔ̄mnde̍ŋ o̍kɔ̄ɔ̄

¹¹ Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “Wāŋnda̍ I̍dɔ̄m a̍ to̍sa̍ yɔ̄ŋndā wɔ̄ɔ̍ŋnda̍ŋ bɛ̄mbɔ̄ɔ̍ lēdīi̍ŋ di̍i̍ŋ. Kɛ̍ I̍ cho̍ nda̍ mālɔ̄ɔ̄ le̍ yɔ̄ŋndā ndāla̍ wɔ̍ɔ̍ŋndā lāŋ te̍, kāni̍ fo̍ndōle̍, le̍ nyɛ̄ nda̍ tōsa̍ a̍ I̍sɔ̄lūɛ̍i̍ya̍ wo̍. Nda̍ nda̍ wāŋnda̍ ha̍ā, wānāyɛ̍i̍ nda̍ chō ni̍, kɛ̍ ma̍ lō o̍ ko̍ŋ, ma̍ chūēl nda̍ mɔ̄ɔ̄ŋ fāŋndo̍ŋ ma̍ tīsā nda̍ kɔ̄ɔ̄lī le̍ nda̍ dīūwo̍. Īnyīɛ̍ɛ̍ bɛ̍ɛ̍ i̍ bi̍i̍ nda̍ le̍ wāŋnda̍ ha̍ā le̍. Ma̍ lō o̍ ko̍ŋ ma̍ dūāūnu᷄ŋ tu̍mbe̍ a̍ nda̍ o̍ ka̍lā ka̍lā. Ndu̍yɛ̍ tu̍mbe̍ ndāa̍ ndu̍ o̍o̍ pɔ̍lūl te̍, hīōūwɔ̄ɔ̍ lāchī tu̍ŋ.

¹² Le̍la̍ŋ, I̍ cho̍ Tɛ̍māŋ chi̍e̍e̍ tɛ̍ɛ̍mbūū, ndu̍yɛ̍, mī to̍sa̍ mī fo̍ndāŋndā kālā ka̍lālā nda̍ tāŋgu̍l Bɔ̍si̍lūā chi̍e̍e̍ le̍ nda̍ māndāa̍ la̍ŋ lā ŋūɛ̄ kpo̍u̍.”

A̍ lɛ̄ŋndē A̍mɔ̄ŋnde̍ŋ o̍kɔ̄ɔ̄

¹³ Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā, “Wāŋnda̍ A̍mɔ̄ŋ a̍ to̍sa̍ yɔ̄ŋndā wɔ̄ɔ̍ŋnda̍ŋ bɛ̄mbɔ̄ɔ̍ lēdīi̍ŋ di̍i̍ŋ. Kɛ̍ I̍ cho̍ nda̍ mālɔ̄ɔ̄ le̍ yɔ̄ŋndā ndāla̍ wɔ̍ɔ̍ŋndā lāŋ te̍, kāni̍ fo̍ndōle̍, le̍ nyɛ̄ nda̍ tōsa̍ o̍ lɛ̄ŋndē Ki̍i̍li̍a̍dīle̍ŋ ni᷄ŋ ndo̍. Bōōndi̍i̍ nda̍ wa̍ sɔ̍ŋgɔ̄ɔ̍ le̍ lɛ̄ŋndē ndāle̍ŋ chɔ̄ɔ̄lōo̍ ve̍, wānāā lāyo᷄lla̍a̍ wa̍ o̍ lɛ̄ŋndē Ki̍i̍li̍a̍dīle̍ŋ ni᷄ŋ nda̍, dēmbēla̍ŋ nda̍ a̍a̍ būūlu̍u̍ nda̍ a̍ mɔ̄ɔ̍ŋ ni̍.

¹⁴ Le̍la̍ŋ, I̍ cho̍ sāāsa̍ ba̍lu̍ Lu̍a̍bā chi̍e̍e̍ wo̍ pēsī pēsī, ndu̍yɛ̍ mī to̍sa̍ mī fo̍ndāŋndā kālā ka̍lālā nda̍ tāŋgu̍l le̍ nda̍ māndāa̍ la̍ŋ lā ŋūɛ̄ kpo̍u̍. Pāa̍le̍ ya̍a̍mɔ̍ɔ̍wa̍ dēl ni̍ŋ nda̍ chōo̍ le̍ŋ, bɔ̄ɔ̄lūū chɔ̄ū bɛ̄ndōo̍ ō wā ni̍ŋ su̍ɛ̍i̍ bā o̍ bā fe̍e̍. Mɛ̄ɛ̍ hūēīyīī tɔ̍ɔ̍mɛ̍i̍ bɛ̄ndūe̍i̍ ī hɔ̄ŋ nu̍a̍ā a̍ kpāāyā bɛ̍ndōo̍, mī ī tɛ̄ɛ̄mbu̍u̍ nyɔ̄ɔ̍ŋ yɛ̍, le̍nde̍ ya̍a̍mɔ̍ɔ̍wa̍ ā hūŋ ni̍ŋ a̍ kpāāyā bɛ̍ndōo̍ ni̍, mā de᷄l nda̍ chōo̍.

¹⁵ Māsa̍ ndā bɛ̍ndōo̍ ni̍, wānāā bɛ̄ndūa̍a̍ cho̍ ndu̍ wa̍llo̍ o̍ bā bɛ̄ŋgu̍ wa̍ ni̍, nda̍ kpo̍u̍ ā chō lākɔ̄ a̍ nda̍ o̍ bīyɔ̄ɔ̍ ni᷄ŋ.” Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ko̍ŋ ni̍.