Āīsa̍yā 1 - Yāu̍ Mɛ̄lɛ̄ka̍a̍

¹ Yāu̍wo̍ ho̍ō ō chō māchūāā a̍ yōōŋgūlā Mɛ̄lɛ̄ka̍ ke᷄ Āīsa̍yā, po̍ E̍mɔ̍ɔ̍sī wo̍, a̍ Chu̍dā ndu̍yɛ̍ a̍ Chūlu̍sɛ̄lɛ̄m o̍kɔ̄ɔ̄ la̍ŋ. Ndu̍yɛ̍ a̍ bōōndi̍i̍ Mɛ̄lɛ̄ka̍ ke̍ Āīsa̍yā yōōŋgūla̍ŋ nda᷅ŋ nde̍, Yūsa̍yā, a̍ Cho̍tām, a̍ E̍ha̍a̍sī, a̍ Hɛ̄sɛ̄ki̍yā nda̍ ke̍e̍ku̍ māsāa̍ o̍ lɛ̄ŋndē Chu̍dāle̍ŋ ni᷄ŋ a̍ te̍le̍ŋnda̍ yɛ̍ yɛ̍la̍ŋ ni̍.

Mɛ̄lɛ̄ka̍ sōō ō kālā ka̍lā a̍ nyɛ̄ wānāā ndūa̍a̍ tōsa̍ wo̍ o̍kɔ̄ɔ̄

² Mi̍ Āīsa̍yā lo᷅ o̍ ko̍ŋ mbo̍ dīmī māā, Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Nya̍ wānā o̍ wāna̍ cho̍ o̍ ha̍la̍a̍ ni᷄ŋ chōo̍ cho̍o̍, lā tūe̍i̍ nyɛ᷅ ya̍ I̍ cho̍ dīmīo̍o̍ wo̍. Lā ya᷄ŋ ya̍ nīla̍ŋ nya̍ chi̍e̍ēŋndo̍ kpo̍u̍. Chūāūwāā nīa̍a̍ ya̍ Mɛ̍lɛ̄ka̍ mānda̍ mi̍ so̍lī nda̍ lēni᷄ŋ nda̍, ā lo̍ o̍ ko̍ŋ ma̍ kɛ̄ɛ̄ ya̍.

³ Nāūwo̍ bɛ̍ɛ̍ cho̍ nu̍a̍ā ni̍, ō sīnā wa᷅na̍ nɔ̍ ndu̍ wo̍. Sōfɛ̍lɔ̍ɔ̍ mbō sīna̍ nāa̍ wāna̍ cho̍ ndu̍ māndāa̍ wo̍ ō dōū ndu̍ bīllo̍ le̍ dīo̍o̍ wa̍. Kɛ̍ wāŋnda̍ I̍sɔ̄lūɛ̄ī a̍ nɔ̍la̍ mā sīna̍ ya̍ le̍. Ā nɔ̍ si̍nā pɛ̄ŋgu̍ kpo̍so̍ŋ te̍.”

⁴ Dɛ̍nɛ̍ pa̍lāā bɛ̄ndōo̍ chō le̍ nya̍ wāŋnda̍ lɛ̄ŋnde̍ŋ nde᷅ŋ, nya̍ wānāā yɔ̄ŋ wɔ̄ɔ̍ŋnda̍ ha̍ā, nya̍ fu̍la̍ ha̍ā o̍ pūlāle̍ wānāā dɛ̍nɛ̍ wɔ̍ɔ̍ŋnda̍ chōo̍ wa̍, nya̍ chūāūwāā wānāā lāka̍fāa̍ bɛ̄ndūa̍a̍ ha̍ā, nya̍ cho̍ ha̍ā yɔ̄kpāa̍ o̍ wōlɔ̄ɔ̄ lūsu̍lɛ̍i̍ yɔ̄ŋ wɔ̄ɔ̍ŋnda̍ŋ bɛ̄ŋgu̍ wa̍. Lā lo̍ o̍ ko̍ŋ mi̍ lā kɛ̄ɛ̄ Mɛ̄lɛ̄ka̍ Ya̍a̍wɛ̄ɛ̄, I̍sɔ̄lūɛ̍i̍ya̍ Mɛ̄lɛ̄ka̍ nda̍ kāsīo̍o̍, mi̍ lā pɛ̄ɛ̄sā ndu̍ ndu̍yɛ̍, mi̍ lā mūlūl ndu̍ kɔ̄ɔ̍.

⁵ Wāŋnda̍ I̍sɔ̄lūɛ̄ī, vɛ᷅ mi̍ lā wā wɔ̄ hīōūwɔ̄ɔ̍ lāchī kɛ᷅ a̍ Mɛ̄lɛ̄ka̍ sīmūllo̍, mī lā chɔ̄ɔ̄lū nya̍ pi̍la̍ dɛ̍nɛ̍ pa̍lāa̍ tūsī chōo̍? Lā yɔ̄nu̍ŋ ni᷅ŋ mɛ̄ɛ̍ wāŋndo̍ ō nɔ̄ nu̍a̍ā pāūve̍ ndu̍ ī tīūwāā a̍ bōlle̍ŋ kpo̍u̍ yɛ̍, a̍ yɔ̄ŋ wɔ̄ɔ̍ŋndo̍. Mɛ̄ɛ̍ wāŋndo̍ ō nɔ̄ nu̍a̍ā nāā kɔ̄llo̍ ō si̍ŋgu̍ le̍ yɛ̍, le̍nde̍ nya̍ yɔ̄nu̍ŋ ni᷅ŋ ni̍.

⁶ Mɛ̄ɛ̍ wāŋndo̍ ō wā nu̍a̍ā chɔ̍ŋ o̍ bōlle̍ŋ mbō tōl a̍ pēlo᷄ŋ di̍, bā o̍ bā ve᷅ mi̍ wānā di̍mi̍ māā mɛ̄ɛ̍ na̍nu᷄ŋ mbo̍ wā kɛ̍ndi̍a̍a̍ le̍ yɛ̍, le̍nde̍ nya̍ chō ni᷅ŋ ni̍. Bōōlɔ᷄ŋnda̍ŋ nya̍ lā tīūwāā kɔ̄ɔ̍le̍ŋ kpo̍u̍. Pāūvīī yɔ̄ŋɛ̄i̍ a̍ pāūvīī lāko̍lo̍ŋi̍i̍ bɛ̍ndūe̍i̍ ī chō nya̍ ī tīūwāā lēkɔ̄ɔ̍ kpo̍u̍. Ndu̍yɛ̍ ī chō le̍nde̍ i̍ wɔ̍ɔ̍ŋ wɔ̄ɔ̍ŋ, ī cho̍ i̍ pu̍lāā le̍, kɛ̄lɛ̄ŋgāā ni̍ŋ te̍ mī ī nɔ̄ kōo̍wa̍ŋ mā dūāūwāā lo̍ŋ, mī ī wa̍ ī yīūwā yīūwāā.

⁷ Lɛ̄ŋndē nyāle̍ŋ kpo̍u̍ lē chūū tāmbu̍. Chi̍e̍e̍ŋ nyāāŋ bɛ̍ndo᷄ŋ ŋ̄ chūū ŋɔ̄. Wānāā lēkāa̍ wa̍ hīŋ ma̍ hu᷄ŋ chu̍ā lɛ̄ŋndē nyāle̍ŋ, ndu̍yɛ̍ ma̍ tɛ̄ɛ̄mbūū le̍ŋ kpo̍u̍ nya̍ o̍ hɔ̄l. Ā tɛ̄ɛ̄mbu̍u̍ le̍ŋ ma̍ mɛ̄ī le̍ŋ fo̍ndō mɛ̄ɛ̍ So̍dɔ̄m o̍ ta̍mbu̍ yɛ̍.

⁸ Chi̍e̍e̍ŋ nyāa̍ŋ kpo̍u̍, mɛ̄ɛ̍ Chūlu̍sɛ̄lɛ̄m ndu̍ pīlɛ̍ kpe̍ mbo̍ wā hāū i̍si̍si̍. Mɛ̄ɛ̍ wānā ma̍ndāā kpe̍lo̍o̍ ō tāŋgu̍l nu̍a̍ā yɛ̄kpɔ̍ɔ̍ o̍ kpe̍le̍ īyɔ̄mndo̍ ni᷄ŋ yɛ̍, le̍nde̍ Chūlu̍sɛ̄lɛ̄m o̍ lo̍ īsīsi̍ I̍sɔ̄lūɛ̄ī ni̍. Mɛ̄ɛ̍ wāŋndo̍ ō tāŋgūl nu̍a̍ā chīɛ̄ī pūūlōo̍ o̍ kpe̍le̍ kɔ̄ku̍mbɛ̄i̍yo̍ tɛ̄ɛ̄ŋ yɛ̍, le̍nde̍ o̍ lo̍ īsīsi̍ ni̍. Mɛ̄ɛ̍ ya̍a̍mɔ̍ɔ̍wa̍ ā dūāū nu̍a̍ā chi̍o̍o̍ o̍ pi̍ŋndo̍ ni᷄ŋ yɛ̍, le̍nde̍ o̍ cho̍ ni̍.

⁹ Tē Mɛ̄lɛ̄ka̍ Ya̍a̍wɛ̄ɛ̄ nɔ̍ kpāāyāa̍ kpo̍u̍ wo̍, ndu̍ o̍o̍ mɛ̍i̍ bɛ̍ɛ̍ na̍a̍ ā ti᷄ŋ yōōmū Chūlu̍sɛ̄lɛ̄m te̍, mɛ̄ɛ̍ i̍ yɔ̍nu̍ŋ nu̍a̍ā a̍ So̍dɔ̄m yɛ̍, le̍nde̍ i̍ wa̍ yɔ̄nɔ᷄ŋ a̍ Chūlu̍sɛ̄lɛ̄m ni̍, Chūlu̍sɛ̄lɛ̄m bɛ̍ɛ̍ o̍ wa̍ sīmnɔ᷄ŋ māā Kōmo̍o̍lūā.

¹⁰ Nya̍ cho̍ ha̍ā māā wāŋ bɛ̄ndūa̍a̍ So̍dɔ̄m nda̍, lā tūe̍i̍ nyɛ᷅ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍. Lā ya᷄ŋ ni᷅la̍ŋ mī lā tūēī nyɛ̄ Mɛ̄lɛ̄ka̍ nāa̍ dīmi̍ wo̍, nya̍ cho̍ ha̍ā māā wāŋ bɛ̄ndūa̍a̍ Kōmo̍o̍lūā wa̍.

¹¹ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “Sa̍lālā nyāla̍ bɛ̍ndūlā nya̍ chō la᷅ŋ hūnɔ̄ɔ̍ sōlīo̍o̍ o̍ ya̍ Mɛ̍lɛ̄ka̍ lo̍ la̍ŋ, ya̍ Mɛ̍lɛ̄ka̍ chi᷄ la̍ŋ bɛ̍ɛ̍ nyɛ᷅ o̍ nyɛ̄ le̍. I̍ sa̍ŋga̍ ni᷅ŋ a̍ sa̍lālā lūāmāālā nya̍ chō la᷅ŋ sōlīo̍o̍ o̍ ya̍ lo̍, a̍ sāā fɔ̍ŋndu̍a̍a̍, ndu̍yɛ̍ a̍ chūɛ̄īmā chɔ̄lūāā kɛ̄ndɛ̄ kɛ̍ndīa̍a̍ la̍ŋ. I̍ nɔ̍ lɛ̄ yēēmɛ̍i̍ kōo̍ma̍ nāū, kɛ̄lɛ̄ŋgāā kōo̍ma̍ sāā fɔ̍ŋndɔ̍, ɔ̄ɔ̄ kōo̍ma̍ chūīŋ te̍.

¹² Tē lā wa̍ hūnɔ̄ɔ̍ ya̍ Mɛ̍lɛ̄ka̍ sōōlūūwo̍ pɛ̍, bāā dīmūllo̍ ya̍ I̍ di̍mu̍l nya̍ ni̍ māā lā chūu̍ ya̍ sa̍lālā nyāla̍ la̍ŋ? Nīɔ̄ū nīɔ̄ū nya̍ hūŋ ko̍ŋ o̍ la̍ū nūu̍ wo̍, ō cho̍ le̍ ya̍ le̍ nya̍ hūŋ ni̍ɔ̍ū nīɔ̄ū kōŋ te̍.

¹³ Lā pɛ̄ŋgi̍ ni᷅ŋ hūnɔ̄ɔ̍ a̍ sālālā nyāla̍ fo̍ndōlā lāŋ nāa̍ ya̍ chu̍a̍. Nyɛ̄m chūŋ kɛ̄ndɛ̄ŋ nya̍ hūŋ mu̍ŋ lo̍mɔ̄ɔ̍ o̍ ya̍ lo̍ wo̍ŋ, I̍ ye̍e̍ma̍ bɛ̍ɛ̍ mī tu̍e̍ī mu̍ŋ chūŋ te̍. Bɔ̄ŋa᷅ŋndā nyāla̍ŋ ki̍nɛ̍i̍, bɔ̄ŋa᷅ŋ pāŋgi̍i̍ sɛ̍nɛ̄ī ni̍, bɔ̄ŋa᷅ŋ pāa̍le̍ pɛ̍ŋgīāā ni̍, chūūŋgi̍āŋndā nyāla̍ nya̍ chūūŋgi̍āŋ le̍ ya̍ sōōlūūwo̍ la̍ŋ ni̍, I̍ ye̍e̍ma̍ bɛ̍ɛ̍ mi̍ tu̍e̍ī a̍ la̍ŋ o̍kɔ̄ɔ̄ le̍. Kāni̍ fo̍ndōle̍, bɔ̄ŋa᷅ŋndā nyāla̍ la̍ŋ ki̍nɛ̍i̍, bɔ̄ŋa᷅ŋndā yɔ̄ŋ wɔ̄ɔ̍ŋnda̍ŋ la̍ cho̍ ni̍.

¹⁴ Bɔ̄ŋa᷅ŋndā nyāla̍ pāŋgi̍i̍ sɛ̍nɛ̄ī la̍ŋ ni̍, a̍ bɔ̄ŋa᷅ŋndā nyāla̍ nyɛ̄ dīāā nya̍ hɛ̄li̍ la̍ŋ, I̍ tu̍l la̍ŋ lēyɛ̄ bɔ̄ɔ̍. Mɛ̄ɛ̍ wōlɔ̄ɔ̄lā lūsu̍lɛ̍i̍la̍ŋ lā wā nu̍a̍ā wāŋndo̍ kīīndāa̍ yɛ̍, le̍nde̍ la̍ cho̍ ya̍ o̍ kɔ̄l ni̍, I̍ nɔ̍lā mī bi̍u̍nu̍ŋ la̍ŋ ya̍ o̍ kɔ̄l te̍, fo̍ndōle̍, lā lūsu̍l lā bɔ̄ɔ̍.

¹⁵ “Tē lā hēēlu̍ bāla̍ŋ chōo̍ cho̍o̍ le̍ ya̍ pīɛ̄īyo̍ pɛ̍, I̍ to̍fā nya̍ bɛ̍ɛ̍ le̍. Mɛ̄ɛ̍ mɛ̄ɛ̍ nya̍ pīɛ̍i̍ ya̍, I̍ mu̍lī nya̍ dīōm te̍, kāni̍ fo̍ndōle̍, bālā nyāla̍ŋ lā chō lā līndɛ̍i̍ kpo̍u̍ a̍ kōo̍ma̍ wāŋnda̍ chīe̍e̍ya̍.

¹⁶ Lā dīndi̍ nya̍ pi̍la̍ mī lā sīmnu᷄ŋ a̍ di̍a̍ndāā. Dɛ̍nɛ̍ wɔ̍ɔ̍ŋ o̍ dɛ̍nɛ̍ wɔ̍ɔ̍ŋ ya̍ I̍ cho̍ nya̍ chɔ̄ɔ̍ tōsāa̍, lā ma᷄l ndu̍ wa̍ŋ wa̍ŋ. Lā pɛ̄ŋgi̍ dɛ̍nɛ̍ wɔ̍ɔ̍ŋndo̍ tōsāa̍,

¹⁷ mī lā pɛ̄ɛ̄ku̍ le̍ sūɛ̍i̍ cho̍ sūɛ̍i̍ kɛ̍ndɛ̄i̍ ye̍ tōsāa̍. Lā kīndi̍ŋ mī lā wa̍ sa̍kpō. Lā māla̍ wa̍nāā nda̍ chō nyɛ̄ pālāa̍ tūsīo̍o̍ chōo̍ wa̍. Wānāa̍ nɔ̍ ŋ̍fi̍nyā le̍ wa̍, lā sūŋgu̍ le̍ nda̍ mī lā sōō le̍ nda̍, ndu̍yɛ̍ mī lā tōsa̍ mī wāŋ lāāndūāā pīāāndūāā ndāa̍ ā vī wa̍ ā sɔ̄la̍ di̍la̍ ndāla̍ŋ.”

¹⁸ Mɛ̄lɛ̄ka̍ Ya̍a̍wɛ̄ɛ̄ di̍mi̍ āā, “Lā hu᷄ŋ, mī ŋ̄ hu᷄ŋ di̍mīŋ dīōm pīlɔ̍ɔ̍. Mi̍ chē bɛ̍ɛ̍ mi̍ yɔ̄ŋndā nyāla̍ wɔ̍ɔ̍ŋnda̍ŋ lā dīū māā mu̍u̍fu̍, kɛ̍ I̍ cho̍ la̍ŋ tɔ̄ɔ̄, mī lā dēndū māā fe̍ŋgbɛ̍.

¹⁹ Tē lā chɛ᷄l pɛ̍, a̍ kɔ̄ltā nyāla̍ŋ kpo̍u̍, mī lā tūsi̍ŋ o̍ dīōm nūu̍ bɛ̄ŋgu̍, I̍ cho̍ tōsā mī lā dē lɛ̄ŋnde̍ŋ nde᷅ŋ tɔ̄nɔ̄.

²⁰ Kɛ̍ tē lā kɛ̄ɛ̍ le̍ ya̍ dīōm pɛ̍, mī lā sīmu̍l la̍, I̍ cho̍ tōsā mā dīu̍ nya̍ a̍ mɔ̄ɔ̄ŋ fāŋndo̍ŋ. Ya̍ Mɛ̍lɛ̄ka̍ Ya̍a̍wɛ̄ɛ̄, ya̍ so̍ō ni̍.”

Wāna̍ su̍a̍ā le̍ Mɛ̄lɛ̄ka̍ wo̍ ō sōō a̍ chi̍e̍e̍ yɔ̄ŋ wɔ̄ɔ̍ŋndo̍ o̍kɔ̄ɔ̄.

²¹ Chi̍e̍e̍ wa̍ pāāndū chi̍e̍e̍ sa̍kpōo̍ wo̍, ō sīmnu᷄ŋ māā wānā la̍nɔ̍ ti̍a̍māā bɛ̄ndōo̍. Chi̍e̍e̍ wa̍ pāāndū nāa̍ tōnya̍a̍ ō dīmīŋ nda̍, mi̍ wānāā kɛ̄ndīa̍a̍ ā wā lo̍ŋ ndo̍, ō sīmnu᷄ŋ chi̍e̍e̍ wānāā dīyāā ŋ̄wāŋndā chīe̍e̍.

²² Chūlu̍sɛ̄lɛ̄m, a̍ wa̍ māwāā mɛ̄ɛ̍ ka̍ni̍i̍ hu̍mbūīī kɛ̄ndɛ̄ kɛ̄ndɛ̄i̍ ī wā nu̍a̍ā yɛ̍. Kɛ̍ a̍ fu̍la̍ o̍ ba̍a̍ ni᷄ŋ ma̍ sīmnu᷄ŋ nyɛ᷅ fo̍ndō. A̍ wa̍ māwāā mɛ̄ɛ̍ mūɛ̄īmā kɛ̄ndɛ̄ kɛ̍ndīa̍ŋ mā wā nu̍a̍ā yɛ̍. Kɛ̍ sīmnu᷄ŋ mɛ᷅ŋnda̍ŋ.

²³ Wānāa̍ cho̍ nya̍ chīla̍ŋ nda̍, ā lo̍ o̍ ko̍ŋ ma̍ sīmūl la̍, ndu̍yɛ̍ ma̍ sīmnu᷄ŋ ndi̍a̍a̍mɔ̍ɔ̍wa̍a̍ vīīya̍. Ā chō kēīyo̍ wāŋnda̍ lūɛ̄īyɔ̄ɔ̄lā ni᷄ŋ nda̍ŋ bīyɔ̄ɔ̍ o̍ lābā, ndu̍yɛ̍, mā kēī wa᷅ŋnda̍ nyɔ̄ɔ̍ŋ bīū bīūwo̍ o̍ lābā. Wānāa̍ nɔ̍ ŋ̍fi̍nyā le̍ wa̍, ā nɔ̍ bɛ̍ɛ̍ di̍la̍ŋ ndāla̍ŋ o̍ sɔ̄ɔ̍ŋ ni᷄ŋ, ā su̍ŋgū le̍ nda̍ mā sōō le̍ nda̍ le̍. Wānāā pīāāndāā ndāa̍ ā vī wa̍ ā hu᷄ŋ bɛ̍ɛ̍ a̍ sɔ̄ɔ̍ŋ ndāa̍ŋ, ā ye᷅ŋ nda̍ bɛ̍ɛ̍ la̍ni̍ le̍.

²⁴ Le̍la̍ŋ nyɛ̄ Mɛ̄lɛ̄ka̍ Ya̍a̍wɛ̄ɛ̄ nɔ̍ kpāāyāa̍ kpo̍u̍ wo̍ dīmi̍ wo̍ cho̍ ho̍ō ni̍, I̍sɔ̄lūɛ̍i̍ya̍ Mɛ̄lɛ̄ka̍ nda̍ kpāāyā bɛ̍ndōo̍. Ō dīmi̍ āā, “Wāŋnda̍ Chūlu̍sɛ̄lɛ̄m, lā tōsa̍ mi̍ lā sīmnu᷄ŋ ya̍a̍mɔ̍ɔ̍wa̍a̍ nī. I̍ cho̍ tu̍mbe̍ dɔ̍ɔ̍nɔ᷄ŋ a̍ nya̍ o̍ ka̍lā ka̍lā mī mi̍ŋgu̍l nya̍ māa̍.

²⁵ I̍ cho̍ nya̍ hūnɔ̄ɔ̄ nyɛ̄ pālāa̍ tūsī chōo̍. I̍ cho̍ nya̍ dīndī fo̍fo̍ mɛ̄ɛ̍ nda̍ dīndī nu̍a̍ā ko̍o̍līi̍ye̍ o̍ yīŋ yɛ̍, nyɛ̄ o̍ nyɛ̍ to̍sa̍ mi̍ lā sīmnu᷄ŋ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l, mī fa̍ŋa̍ ndu̍ kpo̍u̍, mī to̍sa̍ mī lā sīmnu᷄ŋ a̍ di̍a̍ndāā.

²⁶ Ndu̍yɛ̍, I̍ cho̍ tōsā mī Chūlu̍sɛ̄lɛ̄m o̍ sɔ̍la̍ vɛ̄lɛ̄ chɔ̍ɔ̍chi̍a̍a̍, mɛ̄ɛ̍ i̍ wa̍ o̍ pālɛ̍i̍ pa̍a̍ndūe̍i̍ ni᷄ŋ yɛ̍. Ndu̍yɛ̍ mī to̍sa̍ mī wānāā si̍lāā ā sɔ̄la̍ŋ vɛ̍lɛ̄ Chūlu̍sɛ̄lɛ̄m māā pāāndū. O̍ ko̍ŋ, wāŋnda̍ vēēlū ni̍ŋ vɛ̍lɛ̄ Chūlu̍sɛ̄lɛ̄m āā chi̍e̍e̍ wānāā tōnya̍a̍, chi̍e̍e̍ sa̍kpōo̍.”

²⁷ Le̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ wānā sa̍kpō ndu̍yɛ̍, mbo̍ wā wāna̍ tōnya̍ yɛ̍, ō chō hūnɔ̄ɔ̄ Sa̍a̍yɔ̄ŋ pīŋī, ndu̍ yɔ̍nūŋ ni̍ māā Chūlu̍sɛ̄lɛ̄m, ndu̍yɛ̍ mbō pīŋi̍ wānāa̍ cho̍ Chūlu̍sɛ̄lɛ̄m nda̍, a̍ cho̍ yɔ̄ŋndā ndāla̍ wɔ̍ɔ̍ŋnda̍ŋ mālɔ̄ɔ̄ wa̍.

²⁸ Kɛ̍ wānāa̍ si̍mu̍l ndu̍ wa̍ ki̍nɛ̍i̍, a̍ wānāā yɔ̄ŋ wɔ̄ɔ̍ŋnda̍, o̍ chō nda̍ hūnɔ̄ɔ̄ tɛ̄ɛ̄mbūū. Wānāa̍ kɛ̍ɛ̍ Mɛ̄lɛ̄ka̍ Ya̍a̍wɛ̄ɛ̄ wa̍ ki̍nɛ̍i̍, ō chō nda̍ hūnɔ̄ɔ̄ chīī.

²⁹ Te̍le̍ŋ cho̍ fūūlūū, tē lā hu᷄ŋ yi̍ya᷄ŋ a̍ Mɛ̄lɛ̄ka̍ nya̍ chō sōōlūūwo̍ o̍ yɔ̄mīī ɔ̍kūve̍ bɛ̄ŋgu̍ wo̍ pɛ̍, si̍ɔ̍mbu̍la̍ŋ lā chō nya̍ bīyɔ̄ɔ̄. Lā chō hūnɔ̄ɔ̄ yīya᷄ŋ a̍ kpe̍le̍la̍ nyāla̍ nya̍ sīīŋgu̍u̍ māā fo̍ndāŋndā lāsōōlu̍u̍ la̍ŋ, mī lā chēnu᷄ŋ nya̍ pi̍la̍ wānāā fo̍ndō fu̍u̍.

³⁰ Mɛ̄ɛ̍ yɔ̄m ɔ̍kū wo̍ ō wa̍ nu̍a̍ā wūo̍o̍, pēi̍ ndūɛ̍i̍ kpo̍u̍ mī ī nyāma̍li̍a̍a̍ yɛ̍, le̍nde̍ i̍ yɔ̍nūŋ ni̍ŋ a̍ nya̍ ni̍. Mɛ̄ɛ̍ kpe̍lo̍o̍ ō wā nu̍a̍ā ō sɔ̍lā ma̍mɛ̍ŋ o̍ māmɛ̄ŋ te̍ yɛ̍, le̍nde̍ i̍ wa᷅ ni̍ŋ a̍ nya̍ ni̍.

³¹ Mɛ̄ɛ̍ bīl vēsɛ̍i̍yo̍ ō kēlēŋā nu̍a̍ā ŋɔ̄ɔ̍ yɛ̍, le̍nde̍ wānāā kpāāyāā bɛ̄ndūa̍a̍ ā ŋūā ni̍ŋ a̍ wa̍lta̍ ndāla̍ŋ lātūlu̍ ni̍. Ndu̍yɛ̍, wānā o̍ wānā ve᷅ ni̍ŋ mbō nyūmi̍ yīŋndē lēŋ te̍.