Ti̍mo̍tī Di̍i̍ŋ Ndɔ̄ɔ̍ 1 - Yāu̍ Mɛ̄lɛ̄ka̍a̍

¹ Ya̍ Pɔ̍ɔ̍l cho̍ ho̍ō māā wāna̍ Chi̍i̍sū Ki̍li̍tī ve᷅m hɔ̄ltē ndɔ̄ o̍ hɛ̄na᷄ŋ Mɛ̄lɛ̄ka̍a̍ ni᷄ŋ ndo̍ ya̍ cho̍ yāu̍wo̍ ho̍ō pōōnyīa̍a̍ ni̍. Ō vēm ya̍ le̍ mī chɔ̍m wāŋnda̍ a̍ būŋgɛ̄ī Mɛ̄lɛ̄ka̍ chūe̍l nda̍ le̍ mbō ke̍ nda̍ yōōmū kpe̍e̍kpe̍i̍yo̍ ve̍. Ndu̍ yɔ̍nūŋ ni̍ māā yōōmū nda̍ sɔ̄lā sa̍na̍a̍ o̍ wāa̍ o̍ dīōm pīlɔ̍ɔ̍ ni᷄ŋ a̍ Chi̍i̍sū Ki̍li̍tī wo̍.

² I̍ cho̍ ndu̍ pōōnyīa̍a̍ nāa̍ nūm Ti̍mo̍tīī chu̍a̍, nūm ya̍ I̍ ka̍a̍la̍ ho̍ō māā po̍ nī wo̍. I̍ cho̍ Mɛ̄lɛ̄ka̍ fi̍nyā nāa̍ pīɛ̄īyo̍ a̍ Māsānɔ̍ nāa̍ Chi̍i̍sū Ki̍li̍ti̍ māā ā yīya̍ŋ nu̍m chōo̍ mā tūīīnu̍ŋ nu̍m īnyīɛ̍ɛ̍, ndu̍yɛ̍, mā ke̍ nu̍m kɔ̄l nyūlōo̍ fɔ̍.

Sīlāa̍ le̍ hīōūwɔ̄ɔ̍ lāchī sa̍kpō a̍ wa̍li̍ Mɛ̄lɛ̄ka̍a̍

³ Mɛ̄lɛ̄ka̍ ya̍ I̍ cho̍ sāāŋgīāllo̍ a̍ kɔ̄l dīāndāa̍ kpo̍u̍, mɛ̄ɛ̍ fi̍nyāā nīāā ma̍māa̍ ā wa̍ ndu̍ sāāŋgīāllo̍ yɛ̍ wo̍, I̍ me̍l ndu̍ ba̍li̍ka̍ ta̍u̍. Le̍ pāa̍le̍ŋ a̍ nyūmnda̍ŋ tē I̍ wa̍ Mɛ̄lɛ̄ka̍ pīɛ̄īyo̍ le̍ nūm pɛ̍, ba̍li̍ka̍a̍ ya̍ i̍ me᷅l ndu̍ le̍ nūm ni̍.

⁴ Ndu̍yɛ̍, I̍ lo̍o̍nūŋ a̍ te̍le̍ŋ na̍a̍ ŋ̄ wa̍ chōŋga᷅ŋndo̍ na̍a̍ nūm ndo̍, mɛ̄ɛ̍ ŋ̄ cha᷄ŋ yɛ̍. Ndu̍yɛ̍, yēēmɛ̍i̍ chō ya̍ ta̍u̍ le̍ mī che᷅ nu̍m. He̍ī tōsā mī I̍ na̍ŋ kɔ̄l ta̍u̍.

⁵ Ndu̍yɛ̍, I̍ lo̍o̍nūŋ a̍ mɛ̄ɛ̍ ŋ̄ dɔ̄ū tīīnda᷄ŋ nu̍mndo̍ o̍ Mɛ̄lɛ̄ka̍ ni᷄ŋ nyɛ̍ kɛ̄ndɛ̄ kpe̍e̍kpe̍i̍ yɛ̍. Lɔ̍ɔ̍sī ma̍mā nu̍m ndu̍ fɛ̍ɛ̍ŋ ndu̍ o̍o̍ nɔ̍ tīīnda᷄ŋ wa̍ā le̍ndo̍o̍ o̍ Mɛ̄lɛ̄ka̍ ni᷄ŋ. Yu̍ni̍sī ka̍lā nu̍m bɛ̍ɛ̍ le̍nde̍ ko̍ni̍. Ndu̍yɛ̍, I̍ si̍nā māā nūm bɛ̍ɛ̍ tīīnda᷄ŋ wa̍ā le̍ndo̍o̍ ko̍ ŋ̄ nɔ̄ ni̍.

⁶ Le̍ sa̍bōo̍ ho̍ō I̍ cho̍ nu̍m yīyāla᷄ŋndo̍ māā nyɛ̄ Mɛ̄lɛ̄ka̍ ke̍ nu̍m bōōndi̍i̍ ya̍ I̍ ha̍ndu̍ nu̍m bāla̍ŋ chōo̍ ve̍, to̍sa̍ wa̍llo̍ a̍ ndu̍ nyɛ̍ kɛ̄ndɛ̄ kpe̍e̍kpe̍i̍.

⁷ Kāni̍ fu̍u̍le̍ Nyi̍na̍ Mɛ̄lɛ̄ka̍a̍ ō Mɛ̍lɛ̄ka̍ tōsa̍ mbo̍ tūāl na̍a̍ kɔ̄ɔ̄lī wo̍ ō cho̍ Nyi̍na̍ to̍sa̍ mī ŋ̄ nɔ̄ īsīōōŋ te̍ o̍ cho̍ le̍. Kpāāyāa̍ Nyi̍na̍ Mɛ̄lɛ̄ka̍a̍ ō kē na̍a̍ ta̍u̍ ni̍. Ndu̍yɛ̍, ō tōsā mī ŋ̄ nɔ̄ kāālāa̍ le̍ wāŋndā chīe̍e̍ya̍. Ō tōsā vɛ̍lɛ̄ mī ŋ̄ mānda̍ na̍a̍ pi̍la̍ nyɛ̄ kɛ̄ndɛ̄ kɛ̍ndɛ̄.

⁸ Le̍la̍ŋ, si̍ɔ̍mbu̍la̍ wa᷅ nu̍m le̍ wāŋnda̍ īsɔ̄ɔ̍ di̍mūl a̍ ndu̍ Māsānɔ̄ɔ̍ Mɛ̄lɛ̄ka̍ o̍kɔ̄ɔ̄ le̍. Ndu̍yɛ̍, si̍ɔ̍mbu̍la̍ wa᷅ nu̍m wāŋnda̍ o̍ hɔ̄l le̍ ya̍ cho̍ ho̍ō o̍ chīɛ̄ī mānyūmndo̍ ni᷄ŋ le̍ ndu̍ Ma̍sānɔ̄ɔ̍ wo̍ le̍. Ndu̍yɛ̍, nūm bɛ̍ɛ̍ wa̍ o̍ bɛ̍ɛ̍ndīa̍ŋ le̍ mā sɔ̍la̍ nyɛ̄ pālāa̍ le̍nde̍ le̍ Yōōŋgū Kɛ̄ndɛ̍ Mɛ̄lɛ̄ka̍a̍. Mɛ̄lɛ̄ka̍ chō nu̍m kpāāyāa̍ kē le̍ mā bi̍u̍ŋ.

⁹ Ndu̍ pi̍ŋi̍ na̍a̍, mbo̍ vēēlū na̍a̍ le̍ mī ŋ̄ wa̍ wānāa̍ cho̍ ā yɔ̄ŋga᷄ŋ o̍ ndu̍ lo̍ wa̍ ni̍. Ndu̍yɛ̍, ō cho̍ le̍ wa̍li̍ nāā kɛ̍ndɛ̄ le̍ Mɛ̄lɛ̄ka̍ tōsa̍ ke̍ŋ te̍. Ō tōsa̍ mātōsāā ndi̍, kāni̍ fu̍u̍le̍, le̍nde̍ o̍ kɛ̍ɛ̍si̍a̍a̍ ni̍. Ndu̍yɛ̍, ō tōsa̍ ndi̍ le̍ kɛ̄ndɛ̄i̍ o̍ to̍sa̍l na̍a̍ ve̍. Mɛ̄lɛ̄ka̍ ndu̍ o̍o̍ to̍o̍si̍a̍a̍ wɔ̍ chi̍e̍ēŋndo̍ le̍ mbo̍ tōsāl na̍a̍ kɛ̄ndɛ̄i̍ ndūɛ̍i̍ mbo̍ kē na̍a̍ Chi̍i̍sū Ki̍li̍tī.

¹⁰ Ndu̍yɛ̍, kɛ̄ndɛ̄i̍ Mɛ̄lɛ̄ka̍ tōsa̍l na̍a̍ he̍ī ye̍ ī chɔ̄mnu̍ŋ ni᷅ŋ na̍a̍ sa̍na̍a̍ o̍ hūnɔ̄ɔ̄ wānā na̍a̍ pīŋīa̍a̍ Chi̍i̍sū Ki̍li̍tī hi᷅ŋ mbo̍ hu᷄ŋ po̍o̍ndā kpāāya̍ pīɔ̍mndo̍ ndu̍ o̍o̍ nɔ̍ ŋ̄wāŋndā chīe̍e̍ cho̍o̍ wo̍. O̍ ko̍ŋ kɔ̍ɔ̍lī, mbo̍ chūū na̍a̍ yōōmū wānā nɔ᷅ a̍ vi᷅ lɛ̍ le̍ wo̍.

¹¹ Mɛ̄lɛ̄ka̍ hɛ̄li̍ māhɛ̄līāā ya̍ Pɔ̍ɔ̄l le̍ wāa̍ wāna̍ Chi̍i̍sū ve᷅m māā hɔ̄ltē ndɔ̄ le̍ mī di̍mu̍l wāŋnda̍ yōōŋgū ndɔ̄ kɛ̍ndɔ̄ɔ̍ ndu̍yɛ̍, mī I̍ lo̍ o̍ ko̍ŋ mī I̍ pɛ̍ɛ̍ku̍ nda̍ ndu̍.

¹² Mɛ̄ɛ̍ le̍ sa̍bōo̍ ho̍ō ya̍ I̍ cho̍ mɔ̍nɛ̍i̍ he̍ī bīyɔ̄ɔ̍ ni̍. Kɛ̍ ndu̍yɛ̍, kɔ̄l tāmbɛ̍i̍ bɛ̍ɛ̍ cho̍ ya̍ le̍, kāni̍ fu̍u̍le̍, I̍ si̍nā wa᷅na̍ su̍u̍ ya̍ I̍ dɔ̍ū tīīnda᷄ŋ nūu̍ o̍ ndu̍ ni̍ŋ ndo̍. Ndu̍yɛ̍, I̍ si̍nā wa̍la̍ŋ māā yōōŋgū ndɔ̄ kɛ̍ndɛ̄ o̍ yɔ̍ŋgu̍ ya̍ le̍ kɔ̄la̍ŋ wāŋnda̍ dīmūllo̍ wo̍, ndu̍ pi̍la̍ nɔ̍ kpāāyāa̍ mbō lo̍ ndu̍ māndā ha̍a̍a̍ mbō lo̍ o̍ ko̍ŋ mī pāa̍le̍ mɛ̍ɛ̍lāāle̍ŋ lē fūūlu̍u̍.

¹³ Dīōmndā tōnya̍lā ya̍ I̍ pɛ̍ɛ̍ku̍ nu̍m nda̍ŋ bi̍i̍ la̍ŋ nyɛ̄ kɛ̄ndɛ̄ kpi̍ŋ. La̍ŋ la̍ cho̍ tāāmāsi̍ ŋ̄ nɔ̄ mā tōl kɔ̄ɔ̄lī wo̍ ni̍. Hi̍o̍u̍ la̍chi̍ a̍ tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ ni᷄ŋ a̍ kāālāa̍ nɔ̄ɔ̍, ō na̍a̍ ŋ̄ sɔ̄la̍ o̍ wāa̍ o̍ dīōm pīlɔ̍ɔ̍ ni᷄ŋ a̍ Chi̍i̍sū Ki̍li̍tī wo̍.

¹⁴ Nyɛ̄m kɛ̄ndɛ̄ŋ Mɛ̄lɛ̄ka̍ ke̍ nu̍m le̍ māndāa̍ wo̍ŋ, ma̍nda̍ mu̍ŋ nyɛ̄ kɛ̄ndɛ̍ī a̍ kpāāya̍ Nyi̍na̍ Mɛ̄lɛ̄ka̍a̍ ō kē nu̍m ndo̍. Ndu̍ yɔ̍nūŋ ni̍ māā Nyi̍na̍ Mɛ̄lɛ̄ka̍ cho̍ na̍a̍ kɔ̄ɔ̄lī wo̍.

¹⁵ Nūm pi̍la̍ ā sīnā māā wānā o̍ wāna̍ cho̍ o̍ būŋgɛ̄ī E̍e̍sīāāve̍ ni᷄ŋ ma̍ māl la̍. Fi̍kɛ̍lɔ̍ɔ̍sī ni̍ a̍ Hāmɔ̍cha̍nīī nda̍ bɛ̍ɛ̍ ma̍ māl la̍.

¹⁶ Ndu̍yɛ̍, I̍ cho̍ Māsānɔ̄ɔ̍ Mɛ̄lɛ̄ka̍ pīɛ̄īyo̍ māā ō tūīīnu̍ŋ yu̍ŋgu̍ Ɔ̄nāsi̍fa̍lɔ̄ɔ̄ wo̍ īnyīɛ̍ɛ̍ fɔ̍. Kāni̍ fu̍u̍le̍, ō dɛ̄ɛ̄ni̍a̍a̍ ya̍ kɔ̄llo̍ ni᷄ŋ le̍ te̍le̍ŋnda̍ fa̍ŋgā. Si̍ɔ̍mbu̍la̍ bi̍i̍ ndu̍ wāŋnda̍ o̍ hɔ̄l le̍ chīɛ̄ɛ̄li̍āŋndo̍ a̍ ya̍ le̍ mɛ̄ɛ̍ ya̍ wa̍ o̍ chīɛ̄ī mānyūmndo̍ ni᷄ŋ yɛ̍ le̍.

¹⁷ Mɛ̄ɛ̍ o̍ fu̍u̍lu̍u̍ dɔ̍ɔ̍ Lu̍o̍m chi̍e̍e̍, mbo̍ kāndū bɛ̍ɛ̍ ya̍ nūūvīa̍a̍. Ō lo̍ ya̍ nūūvīa̍a̍ mɛ̄ɛ̍ mbo̍ sāālu᷄ŋ ya̍.

¹⁸ I̍ cho̍ Māsānɔ̄ɔ̍ Mɛ̄lɛ̄ka̍ pīɛ̄īyo̍ māā ō tūīīnu̍ŋ ndu̍ īnyīɛ̍ɛ̍ o̍ pāa̍le̍ mɛ̍ɛ̍lāāle̍ŋ chōo̍ fɔ̍. Nūm pi̍la̍ bɛ̍ɛ̍ ā sīnā wa̍la̍ŋ a̍ mɛ̄ɛ̍ kpɛ̍ o̍ ma̍la̍ ya̍ bōōndi̍i̍ ya̍ I̍ wa̍ Ɛ̍fi̍sɔ̄ɔ̄ chi̍e̍e̍ ve̍ yɛ̍.