Tɛ̄sālo̍nīāŋ Di̍i̍ŋ Ndɔ̄ɔ̍ 1 - Yāu̍ Mɛ̄lɛ̄ka̍a̍

¹ Yā Pɔ̍ɔ̄, ā Sa̍i̍lɔ̄ɔ̄, ā Ti̍mo̍tī, nāā ŋ̍ cho̍ yāu̍wo̍ ho̍ō pōōnyīāā ni̍. Ŋ̄ chō ndu̍ pōōnyīāā nāā nyā ku̍ndā wānāā lāāla᷄ŋndā chūā Tɛ̄sālōnāi̍kā chi̍e̍e̍, nyā yɔ̍nūŋ ni̍ māā Mɛ̄lɛ̄ka̍ Fi̍nyā nāā ā Māsānɔ̄ɔ̍ Chi̍i̍sū Ki̍li̍tī wānāā ndāā.

² I̍ cho̍ pīɛ̄īle̍ŋ māā Mɛ̄lɛ̄ka̍ Fi̍nyā nāā ndā Māsānɔ̄ɔ̍ Chi̍i̍sū Ki̍li̍tī, ā yīyāŋ nyā chōo̍, ndu̍yɛ̍ mā ke̍ nyā kɔ̄l nyūlōo̍ fɔ̍.

Tē Ki̍li̍tī hi᷅ŋ pɛ̍, Mɛ̄lɛ̄ka̍ kɔ̄ɔ̄sā ā wāŋndā

³ Chāāŋāā nāā, ŋ̄ nɔ̄ mī ŋ̄ me᷄l Mɛ̄lɛ̄ka̍ bāli̍ka̍ te̍le̍ŋ o̍ te̍le̍ŋ le̍ nyā. Ō bɛ̄ndā mī ŋ̄ tōsā le̍nde̍, kāni̍ fu̍u̍le̍, le̍ mɛ̄ɛ̍ tīīnda᷄ŋ nyā nɔ̄ o̍ Mɛ̍lɛ̄kā ni᷄ŋ ndo̍ chō hīōūwɔ̄ɔ̍ lāchī ā chɔ̄ɔ̄lɔ᷄ŋndo̍ ta̍u̍ ta̍u̍ yɛ̍. Ndu̍yɛ̍ o̍ ko̍ŋ kɔ̍ɔ̍lī, nyā pi̍lɛ̍ŋ pi̍lɛ̍ŋ ndā kpo̍u̍, kāāli̍āŋ nyā kāāli̍āŋ ve᷅llāā vēllē wo̍ chō hīōūwɔ̄ɔ̍ lāchī ā chɔ̄ɔ̄lɔ᷄ŋndo̍.

⁴ Le̍ he̍ī, nāā bɛ̍ɛ̍ mi̍ ŋ̄ kīālū yōŋgā ā nyā o̍kɔ̄ɔ̄ ku̍ndālā wānāā lāāla᷄ŋa̍a̍ Mɛ̄lɛ̄ka̍a̍ ā pīli̍āā tɛ̄ɛ̄ŋ. Mi̍ ŋ̄ kīālū yōŋgā ā nyā o̍kɔ̄ɔ̄, ā mɛ̄ɛ̍ nyā chō īsīsi̍ yi̍ yɛ̍, ā mɛ̄ɛ̍ nyā chō hīōūwɔ̄ɔ̍ lāchī ā Mɛ̄lɛ̄ka̍ tīīnda᷄ŋndo̍ yɛ̍, mi̍ chē bɛ̍ɛ̍ mi̍ wāŋndā wā nyā nyɛ̄ pālāā tūsīo̍o̍ chōo̍ tāu̍, ndu̍yɛ̍ mi̍ lā wā mɔ̍nɛ̍i̍ bīyɔ̄ɔ̍ tāu̍ ni̍.

⁵ Sɔ̄ɔ̍ŋ mu᷅ŋ ki̍nɛ̍i̍ ŋ̄ chō chɔ̄mndo̍ māā yāmɛ̍i̍ Mɛ̄lɛ̄kɛ̍i̍ ī nɔ̍ la̍ka̍fā le̍. Ndu̍yɛ̍ le̍ sābū Mɛ̄lɛ̄ka̍ chɛ᷄l māā mu᷅ŋ ki̍nɛ̍i̍ ŋ̄ yɔ̄nu̍ŋ ndo̍ cho̍ ni̍ māā le̍ mbō tōsā mī lā wā ā bɛ̄ndāā le̍ mbō wā nyā chōo̍ māsā. Le̍lāŋ, le̍ mɛ̄ɛ̍ Mɛ̄lɛ̄ka̍ chō nyā chōo̍ māsā yɛ̍ nyā chō mɔ̍nɛ̍i̍ bīyɔ̄ɔ̍ ni̍.

⁶ Mɛ̄lɛ̄ka̍ cho̍ wa᷅nā la̍ka̍fā le̍. Le̍ he̍ī, ō chō wānāā cho̍ nyā nyɛ̄ pālāā tūsīo̍o̍ chōo̍ wā māā ko̍ŋ mīŋgūl.

⁷ Nyā cho̍ mɔ̍nɛ̍i̍ bīyɔ̄ɔ̍ wā ā nāā bɛ̍ɛ̍ fa̍ū, ō chō nāā nyɛ̄ pālāā kōŋ fāŋā chōo̍. Bōōndi̍i̍ Māsānɔ̄ɔ̍ Chi̍i̍sū cho̍ chɔ̄nɔ᷄ŋ ɛ̄chɛ̍nɛ̄ lātūlu̍ ā ki̍i̍la̍a̍ ndūāā kpāāyāā mī Mɛ̄lɛ̄ka̍ chɔ᷄m ndu̍ o̍ ŋ̄wāŋndā chīe̍e̍ lo̍ ve̍, bōōndi̍i̍ ke̍ŋ o̍ cho̍ sūɛ̍i̍ he̍ī tōsā ni̍.

⁸ Ō chō hūnɔ̄ɔ̄ ā yīŋndē wūle̍ wu᷅le̍ bɛ̍ndū bɛ̄ndūle̍ŋ. O̍ ko̍ŋ, wānāā kɛ̍ɛ̍ Mɛ̄lɛ̄ka̍ wā ni̍ ā wānāā kɛ̍ɛ̍ le̍ nyɛ̄ yōōŋgū kɛ̄ndɔ̄ɔ̍ ho̍ō dīmi̍ wo̍ tōsāā wā, ndu̍ yɔ̍nūŋ ni̍ māā Māsānɔ̍ nāā Chi̍i̍sū yōōŋgōo̍ ā ndu̍ o̍kɔ̄ɔ̄, wānāā kāŋ ō chō ndā hūnɔ̄ɔ̄ nyɛ̄ pālāā tūsi̍ chōo̍.

⁹ Mɛ̄lɛ̄ka̍ chō tōsā mā sɔ̄lā nyɛ̄ pālāā, ndu̍yɛ̍ mā wā ā tɛ̄ɛ̄mbāā le̍ fɛ̍ɛ̍ŋ ā fɛ̍ɛ̍ŋ. Ndu̍yɛ̍ pīɔ̄ūwa᷅ŋndo̍ chō ndā dēlɔ̄ɔ̄ tɛ̍ɛ̄ŋ ndā Māsānɔ̄ɔ̍ Mɛ̄lɛ̄ka̍ wāā, ā chi᷅ lɛ̍ ndu̍ hɔ̄lla̍ le̍. Ndu̍yɛ̍ le̍ fɛ̍ɛ̍ŋ ā fɛ̍ɛ̍ŋ ā chi᷅ ni̍ŋ mɛ̄ɛ̍ Mɛ̄lɛ̄ka̍ chō wānā kɔ̄ndɔ̄fi̍li̍ yɛ̍ le̍.

¹⁰ Tē Chi̍i̍sū hi᷅ŋ pɛ̍, sɔ̄ɔ̍ŋ mu̍ŋ kpo̍u̍ ŋ̄ chō yɔ̄nɔ᷄ŋ. O̍ pāāle̍ le̍ŋ chōo̍ wānāā ndūāā kpo̍u̍ ā līsā ndu̍ ni̍ŋ ā dīōmndā lēbɛ̄ɛ̄lā bɛ̄ndūla̍ŋ, ndu̍yɛ̍ mā dɔ̄ūnu᷄ŋ kɔ̄ndɔ̄fi̍li̍ ā ndu̍. Ndā yɔ̍nūŋ ni̍ māā wāŋndā kpo̍u̍, ā lāāla̍ŋ ā ndu̍ wā. Nyā bɛ̍ɛ̍ lā wā ni̍ŋ ndā tɛ̄ɛ̄ŋ, kāni̍ fu̍u̍le̍, le̍ mɛ̄ɛ̍ nyā lāāla̍ŋ ā yōōŋgū nāā ŋ̄ dīmu̍l nyā wo̍ yɛ̍.

¹¹ Le̍ sābōo̍ ho̍ō nāā ŋ̄ chō Mɛ̄lɛ̄ka̍ pīɛ̄īyo̍ le̍ nyā te̍le̍ŋ o̍ te̍le̍ŋ ni̍. Ŋ̄ chō Mɛ̄lɛ̄ka̍ nāā pīɛ̄īyo̍ le̍ nyā māā ō sīīŋgu̍u̍ nyā wānāā bɛ̍ndā le̍ mī lā wā o̍ yōōmū o̍ ve̍e̍lu̍ nyā le̍ wāā lēni᷄ŋ ndo̍ ni᷄ŋ. Ŋ̄ chō pīɛ̄īle̍ŋ māā mī Mɛ̄lɛ̄ka̍ tōsā o̍ kpāāyā ndɔ̄ɔ̍ ni᷄ŋ mbō pēēlu̍ yēēmāŋ kɛ̍ndɛ᷄ŋ wā nyā o̍ lākɔ̄l lo̍ŋ. Ndu̍yɛ̍ mi̍ ŋ̄ wā pīɛ̄īle̍ŋ māā, nyɛ̄ o̍ nyɛ̄ nyā tōsā le̍ tīīnda᷄ŋ nyā nɔ̄ o̍ ndu̍ Mɛ̍lɛ̄kā ni᷄ŋ ndo̍, māā mbō sīo̍u̍ wāli̍ ko̍ŋ.

¹² Tē he̍ī ī yɔ̄nu̍ŋ pɛ̍, mɛ̄ɛ̍ lā tōsā mi̍ dīōlā Māsānɔ̍ nāā Chi̍i̍sūla̍ŋ lā sɔ̄lā līsāa̍. Ndu̍yɛ̍ ndu̍ bɛ̍ɛ̍ ō chō tōsā mī lā sɔ̄lā līsāa̍. He̍ī chō yɔ̄nɔ᷄ŋ sānāā ā kɛ̄ndɛ̄i̍ Mɛ̄lɛ̄ka̍ ndā Māsānɔ̄ɔ̍ Chi̍i̍sū Ki̍li̍tī ā to̍sāl nyā ve̍.