Sa̍a̍mi̍ɛ̍ɛ̄ Di̍i̍ŋ Ndɔ̄ɔ̍ 1 - Yāu̍ Mɛ̄lɛ̄ka̍a̍

Dēēve̍ tu̍e̍ī a̍ pīɔ̍m Sɔ̍ɔ̄ wo̍ o̍kɔ̄ɔ̄

¹ Bo̍o̍ndi̍i̍ Sɔ̍ɔ̄ sɔ̍lā pīɔ̍mndo̍ ve̍, Dēēve̍ nda̍ pūāā ndūa̍a̍ ā wa̍ sɔ̍ŋgɔ̄ɔ̍ a̍ Āma̍la̍kāi̍tīi̍ya̍. Mɛ̄ɛ̍ Dēēve̍ nda̍ pūa̍a̍ ndūa̍a̍ ā yēm Āma̍la̍kāi̍tīi̍ya̍ ma̍ mīīŋgū Si̍ki̍lāā chi̍e̍e̍, ā chīi̍ pālɛ̍i̍ ī ŋīi̍ŋ

² o̍ yāa̍ ndɔ̄ɔ̍, mi̍ po̍ pi᷅lɛ̍ cha᷄ŋ o̍ dɔ̍ɔ̍ŋgɔ̍ pūa̍a̍ Sɔ̍ɔ̄ wa̍ mbō hūŋ. Mɛ̄ɛ̍ o̍ wa̍ hūnɔ̄ɔ̍, mbo̍ sɛ̄ɛ̄sīa̍ŋ nyɛ᷅la̍ŋ lēkɔ̄ɔ̍, o̍ ko̍ŋ kɔ̍ɔ̍lī mbo̍ dūāūnu᷄ŋ chu̍ndo̍o̍ o̍ lēbōl le̍ kɔ̄l ndɔ̄ ta̍mbɛ̍i̍yo̍ chɔ̄mndo̍. Mɛ̄ɛ̍ o̍ fu̍u̍lu̍u̍ chi̍e̍e̍ mbo̍ kɔ̍ ba᷅ŋ wūla̍ŋ Dēēve̍ o̍ lābɛ̄ŋgu̍ ni̍ŋ le̍ Dēēve̍ bɛ̄ɛ̄le̍ŋ kīo̍o̍.

³ Mi̍ Dēēve̍ lō o̍ ko̍ŋ mbo̍ nyūnā ndu̍ āā, “Kūɛ̍ɛ̍nɛ̍ ŋ̄ chɛ᷄ŋ yɛ̍ pōo̍?” Mi̍ pōo̍ dīmī āā, “I̍ chɛ̍ŋ o̍ dɔ̍ɔ̍ŋgɔ̍ I̍sɔ̄lūɛ̍i̍ya̍, kɛ̍ hīɔ̄lɔ᷄ŋndo̍ ya̍ I̍ hɛ̍lu᷄ŋ ni̍.”

⁴ Mi̍ Dēēve̍ nyu̍nā ndu̍ āā, “Vɛ̄ɛ̄ la̍wa̍ā lo̍ŋ a̍ chɔ̄ūwo̍ o̍kɔ̄ɔ̄?” Mi̍ pōo̍ dīmūl ndu̍ āā, “Ā yēm pūa̍a̍ nāa̍, ma̍ nyāānu᷄ŋ. Ndu̍yɛ̍ ma̍ dīū nda̍ dīūwo̍ pīla̍. Sɔ̍ɔ̄ nda̍ Chōna̍ta᷅ŋ po̍ ndɔ̄ bɛ̍ɛ̍ ā dīī nda̍.”

⁵ Mi̍ Dēēve̍ nyu̍nā po̍ chu̍a̍ pīāāndōo̍ ho̍ō āā, “Vɛ̄ɛ̍nɛ̍ ŋ̄ lōōku̍ yɛ̄ sīnā māā ā dīī Sɔ̍ɔ̄ nda̍ Chōna̍ta᷅ŋ po̍ ndɔ̄?”

⁶ Mi̍ pōo̍ dīmūl ndu̍ āā, “I̍ wa̍ bālɔ̄ɔ̍ o̍ Pēmbīī Ki̍būāāve̍ chōo̍, mi̍ ko̍māl Sɔ̍ɔ̄ ō sāa̍ ba̍l ndɔ̄ɔ̍ mbo̍ tūndu᷄ŋ. Pūa̍a̍ Fīli̍i̍tīāŋnda̍ ā wa̍ ndu̍ ni᷅ŋ fi̍ɔ̍ɔ̍ fi̍ɔ̍ɔ̍. Ha̍ā wa̍ hūnɔ̄ɔ̍ o̍ nyɛ̄lā nyāāna᷄ŋnda̍ su̍a̍a̍ ā nāŋ nda̍ŋ chōo̍, ha̍ā wa̍ o̍ su̍a̍a̍ chōo̍.

⁷ Mɛ̄ɛ̍ Sɔ̍ɔ̄ mu̍li̍ŋ mbo̍ chā ya̍, mbo̍ vēēlū ya̍ mi̍ ku̍ā.

⁸ Mbo̍ nyūnā ya̍ āā, ‘Wāna̍ māāvɛ̄ɛ̍ ŋ̄ chō yɛ̄?’ Mi̍ di̍mūl ndu̍ āā, ‘A̍ma̍lɛ̍ka̍i̍tīi̍nɔ̍ɔ̍ ya̍ i̍ cho̍ ni̍.’

⁹ Mbo̍ dīmūl la̍ āā, ‘Mɛ̄ɛ̍ hu̍ŋ fɔ̍, mā hu̍ŋ si̍o̍ū ya̍ dīyɔ̄ɔ̄ mī fu̍la̍ o̍ mɔ̍nɛ̍i̍ he̍ī ni᷄ŋ. Ā yɔ̄ŋu̍l la̍ ō bɔ̄ɔ̍, I̍ si̍nā ni᷅ŋ māā I̍ nɔ̍ le̍ chīndā le̍.’

¹⁰ O̍ ko̍ŋ, mi̍ Sɔ̍ɔ̍ŋgūū ndu̍ īkɛ̄i̍. Mɛ̄ɛ̍ ya̍ I̍ che᷅ māā yɔ̄ŋūl nda̍ yɔ̄ŋu̍l ndu̍ wo̍, ō cho̍ yɔ̍ŋūl o̍ chi̍nda̍ le̍, mi̍ si̍o̍ū ndu̍ dīyɔ̄ɔ̄. O̍ ko̍ŋ kɔ̍ɔ̍lī, mi̍ so̍lī ndu̍ mɔ̍si̍l lēmāsāa̍ o̍ lēbōl a̍ kēlɛ̄i̍ wa̍ ndu̍ o̍ bā ve̍ mi̍ hu᷅ŋ a̍ la̍ŋ nāa̍ nūm chu̍a̍ fāllo̍.”

¹¹ Mɛ̄ɛ̍ Dēēve̍ nda̍ pūa̍a̍ ndūa̍a̍ ā tūēī sūɛ̍i̍ he̍ī, ma̍ sɛ̄ɛ̄sīa̍ŋ nyɛ᷅la̍ŋ lēkɔ̄ɔ̍ a̍ kɔ̄ltā tāmbɛ̍i̍la̍ŋ.

¹² Mi̍ mɔ̍nɛ̍i̍ bīī nda̍ le̍ Sɔ̍ɔ̄ nda̍ Chōna̍ta᷅ŋ a̍ wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍, nda̍ yɔ̍nūŋ māā I̍sɔ̄lūɛ̍i̍ya̍ ni̍, ā nda̍ dīu̍ dīū bɛ̄ndōo̍ wa̍. Nda̍ kpo̍u̍, ma̍ chāŋ cha᷄ŋndo̍ pīla̍ le̍ nda̍. O̍ ko̍ŋ kɔ̍ɔ̍lī, ma̍ bīī su᷅mndo̍ le̍ pāa̍le̍ŋ kpɛ᷅ŋ, chɔ̍ŋ i̍di̍i̍yo̍ ha̍a̍a̍ mi̍ pāa̍le̍ŋ lē dēl.

¹³ O̍ ko̍ŋ kɔ̍ɔ̍lī, mi̍ Dēēve̍ nyu̍nā po̍ chu̍ā pīāāndu̍ hi᷅ŋ a̍ yōōŋgōo̍ ho̍ō wo̍ āā, “Pōo̍, ɔ̍ɔ̄ lɛ̄ŋndē ŋ̄ fūla̍ le̍ŋ?” Mi̍ pōo̍ dīmūl ndu̍ āā, “Fi̍nyā nūu̍ A̍ma̍lɛ̍ka̍i̍tīi̍nɔ̍ɔ̍ o̍ cho̍ ni̍, kɛ̍ mbo̍ hu᷄ŋ cha᷅l o̍ lɛ̄ŋnde̍ŋ nde᷅ŋ ni᷄ŋ.”

¹⁴ Mi̍ Dēēve̍ nyu̍nā ndu̍ āā, “Vɛ᷅ pōo̍ sīōōŋīī bīi̍ nu̍m le̍ he̍ī tōsāa̍ le̍? Māsa̍ Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ hɛ̍li̍ wo̍, ndu̍ ŋ̄ bīī kɔ᷅llo̍ ni̍ mā dīi̍?”

¹⁵ Mi̍ Dēēve̍ ve̍e̍lū pūa̍a̍ ndūa̍a̍ chu̍a̍a̍ pīāāndūa̍a̍ ō pīlɛ̍ mbo̍ dīmūl ndu̍ āā, “Kɔ̍ mā kɔ̍ di̍ī pōo̍ ho̍ō.” O̍ ko̍ŋ, mbo̍ kɔ̍ di̍ī ndu̍.

¹⁶ Mi̍ Dēēve̍ di̍mūl pōo̍ ho̍ō āā, “Pōo̍ nūm pi̍la̍ nu̍u̍wa̍ pīɔ̍mndo̍ ho̍ō ni̍, fo̍ndōle̍ nūm pi̍la̍ ma̍lnu̍ŋ ni̍ ma̍ hu᷄ŋ sɔ̍lɔ̄la᷄ŋ ya̍ o̍ hɔ̄l kpe̍nde̍ke̍le̍ māā ā dīī māsa̍ Mɛ̄lɛ̄ka̍ Ya̍a̍wɛ̄ɛ̄ pi̍la̍ o̍ hɛ̍li̍ wo̍.”

Dēēve̍ so̍li̍ chōndi̍i̍ bīīsi̍e̍i̍ le̍ Sɔ̍ɔ̄ nda̍ Chōna̍ta᷅ŋ po̍ ndɔ̄

¹⁷ O̍ ko̍ŋ kɔ̍ɔ̍lī, mi̍ Dēēve̍ so̍lī chōndi̍i̍ bīīsi̍e̍i̍ le̍ Sɔ̍ɔ̄ nda̍ Chōna̍ta᷅ŋ po̍ ndɔ̄.

¹⁸ Ndu̍yɛ̍ mbo̍ dīmī māā ā pɛ̄ɛ̄ku̍ wa᷅ŋnda̍ Chu̍dā chōnde̍i̍ he̍ī. Chōnde̍i̍ he̍ī ī chō ī pōōnyīāā o̍ yāu̍ Cha̍su̍lūā wo̍ ni᷄ŋ. Chōndi̍i̍ ke̍ŋ cho̍ he̍ī ni̍. Mbo̍ dīmī āā,

¹⁹ “Ōo̍ wāŋnda̍ I̍sɔ̄lūɛ̄ī, wānāā nāā ba̍nāa̍ ā sɔ̄la̍ pīɔ̍mndo̍ o̍ pēmbūŋ I̍sɔ̄lūɛ̍i̍yo̍ŋ chōo̍. So̍vɛ̄i̍ya̍a̍ kpāāyāā bɛ̄ndūa̍a̍ ā de᷄l.

²⁰ Lā di̍mūl bɛ̍ɛ̍ wāŋnda̍ Ka̍a̍tī chi̍e̍e̍ a̍ ndi̍ o̍kɔ̄ɔ̄ le̍. Lā yo̍ndā ndi̍ o̍ bɛ̍ɛ̄la̍ŋ A̍si̍kɛ̍lɔ̄ŋ chi̍e̍e̍ le̍, yɔ̄ŋi̍ wāŋ lāāndūa̍a̍ Fīli̍i̍tīāŋnda̍ a̍ tūe̍i̍ mā na᷄ŋ kɔ̄l. Lā di̍mūl nda̍ a̍ ndi̍ o̍kɔ̄ɔ̄ le̍, yɔ̄ŋi̍ wānāa̍ si̍nā ha̍ā Mɛ̄lɛ̄ka̍ le̍ wa̍ chūāūwāā ndāā la̍a̍ndūa̍a̍ ā tūe̍i̍ mā dɔ̄ɔ̄nu᷄ŋ nya̍a̍le̍.

²¹ “Mbɔ̄ māā pīɔ̄ɔ̄ si̍ā lɛ̄ o̍ pēmbūŋ Ki̍būāā wo̍ŋ chōo̍ le̍ fɔ̍, kɛ̄lɛ̄ŋgāā mī mɔ᷄m chu̍chū lo̍ŋ. Mbɔ̄ māā lɛ̄ŋndē Ki̍būāāle̍ŋ lē sīmnu̍ŋ po̍llo̍ fɔ̍. Kāni̍ fo̍ndōle̍, lo̍ŋ so̍vɛ̄i̍nɔ̍ kɔ̄l sīmūlāa̍ nyɛ̄ ndɔ̄ ka̍lā ka̍lā ndu̍ o̍o̍ sɔ̍ŋgā o̍ bā māā bōo̍ bɛ̍ndū le̍ ndu̍ māndāa̍ wo̍ ō chō ō mālāā lɛ̄ŋ ni̍. Nyɛ̄ kālā ka̍lā Sɔ̍ɔ̄ ndu̍ o̍o̍ sɔ̍ŋgā o̍ bā le̍ ndu̍ māndāa̍ wo̍, lɛ̄ŋ ndo̍ŋ o̍ cho̍ ō mālāā ō sɔ̄vɛ̍i̍yo̍ ni̍.

²² Chīɔ̍u̍ Chōna̍ta᷅ŋ ndo̍, chīɔ̄ū dīyāa̍ o̍ wa̍ ni̍. Mūɛ̄ī fāŋīi̍ Sɔ̍ɔ̄ ve̍ īnyīɛ̍ɛ̍ bɛ̍ɛ̍ ndi̍i̍ nɔ̍ le̍. Wānāā kpāāyāā bɛ̄ndūa̍a̍ kpo̍u̍ chīŋa̍la᷅ŋndo̍ nda̍ mā dīu̍ nda̍. Tē nda̍ a̍a̍ si̍mu̍l ya̍a̍mɔ̍ɔ̍wa̍a̍ ndāa̍ pɛ̍, yōmɔ̄ɔ̍ nda̍ a̍a̍ ya᷅m nda̍ ni̍.

²³ “Sɔ̍ɔ̄ nda̍ Chōna̍ta᷅ŋ, wānāā kɛ̄ndɛ̄ kɛ̍ndīāā wāŋnda̍ nda̍ a̍a̍ ka̍a̍la̍ kāālā bɛ̄ndōo̍ wa̍ ā sɔ̄la̍ pīɔ̍mndo̍. Mɛ̄ɛ̍ nda̍ wa̍ dīōm pīlɛ̍ chi̍e̍ēŋ yɛ̍, le̍nde̍ ko̍ni̍ nda̍ chō vɛ̄lɛ̄ dīōm pīlɛ̍ chi̍e̍e̍ pīɔ̍m ni̍. Nda̍ a̍a̍ ke̍lēŋā nda̍ a̍a̍ hi̍o̍ū mɛ̄ɛ̍ kōvi̍a̍a̍ kēlēŋā nu̍a̍ā sɔ̄ɔ̍ chūa̍a̍ yɛ̍. Ndu̍yɛ̍ nda̍ a̍a̍ ke̍ndū ŋ̄dīāl nda̍ a̍a̍ hi̍o̍ū kpɔ̍kūŋnda̍.

²⁴ “Wāŋ lāāndūa̍a̍ I̍sɔ̄lūɛ̄ī, lā cha᷄ŋ le̍ Sɔ̍ɔ̄, fo̍ndōle̍, ndu̍ to̍sa̍ ni̍ mi̍ lā chūɛ̄ɛ̄nu᷄ŋ ko̍lāla̍ si̍a̍ŋālā ba̍ā kālā lā bɛ̄ndūla̍ŋ, ndu̍ to̍sa̍ ni̍ mi̍ lā chūɛ̄ɛ̄nu᷄ŋ nyɛ᷅m ba̍ā kālāŋ nda̍ tōōsīāā a̍ ko̍o̍līi̍yo̍ŋ ndo̍ŋ.

²⁵ “So̍vɛ̄i̍ya̍a̍ kpāāyāā bɛ̍ndūa̍a̍ ā de᷄l, ā sɔ̄la̍ pīɔ̍mndo̍ o̍ chɔ̄ūwo̍. Chōna̍ta᷅ŋ cho̍ īhīni̍ o̍ vi̍lɛ̍i̍yo̍ o̍ pēmbo᷄ŋ tɛ̄ɛ̄ŋ.

²⁶ “Mɔ̍nɛ̍i̍ bīī ya̍ le̍ nūm wānāyɛ̍i̍ ni̍ Chōna̍ta᷅ŋ. A̍ wa̍ bɔ̍ɔ̍ wa̍nā kɛ̍ndɛ̄ nāa̍ ya̍ chu̍a̍. Kāālā nūm o̍o̍ nɔ̍ le̍ ya̍ wo̍ ō wa̍ ō bɔ̄ɔ̍, ndu̍ o̍o̍ hi̍o̍ū bɛ̍ɛ̍ mɛ̄ɛ̍ wānā pɔ̍nɔ̍ɔ̍ kāālā nu̍a̍ā wānā la̍nɔ̍ɔ̍ yɛ̍.

²⁷ “So̍vɛ̄i̍ya̍a̍ kpāāyāā bɛ̄ndūa̍a̍ ā de᷄l. Wōlɔ̄ɔ̄lā ndāla̍ chɔ̄ūla̍ŋ lā chō lā mālāā lɛ̄ŋ lā tāmbɛ̍i̍la̍ŋ la̍ŋ.”